Ikalasi Lya Gileadi Ilyalenga 125

Bamishonari Babakoselesha Ukuba Nga Yeremia

“ILI kalasi lya Gileadi kuti twatila cintu icikalamba sana icacitika.” Ayo e mashiwi yalandile ba Geoffrey Jackson aba mwi Bumba Litungulula. Balelanda ku bantu 6,156 abasangilweko ilyo aba mwi kalasi lyalenga 125 ilye Sukulu lya Gileadi balepwisha amasambililo yabo pa 13 September, 2008. Ukutula apo Isukulu lya Gileadi lyatampila, abapwisha isukulu no kuba bamishonari no kubatuma ukufika “na ku mpela ya pano isonde” nomba na bafika 8,000, ukusanshako na basambi 56 abalepwisha ili sukulu pali ubu bushiku.—Imil. 1:8.

Munyinefwe Jackson, uwali ceyamani pali iyi programu aipwishe icipusho ca kuti, “Bushe mukacetekelwa pa kuti umulimo wenu ukawame?” Lyena alandile pa fintu 4 ifingalenga umuntu ukucetekelwa. Ne fi fintu ni fi: umutima usuma, ukuba umuntu uo abantu bengafwaya ukupashanya, ukushimpa fyonse ifyo tulesambilisha pa Cebo ca kwa Lesa, no kubika sana amano ku kulenga ishina lya kwa Lesa ukwishibikwa.

Ba David Schafer, abafwilishako muli Komiti ya Kusambilisha, balandile pa mutwe wa lyashi uwa kuti “Bushe Mukeshiba Umo Fyonse Filolele?” Baebele abasambi be Sukulu lya Gileadi ukuti kuti ‘baishiba fyonse’ ififwaikwa pa kuti babombe bumishonari nga ca kuti batwalilila ukufwaya Yehova na mu kuicefya ukushintilila pa “musha wa cishinka kabili uwashilimuka.”

Abakonkelepo ni ba John E. Barr aba mwi Bumba Litungulula, abalandile ilyashi ilyali no mutwe wa kuti “Mwileka Icintu Nangu Cimo Cimupaatuleko ku Kutemwa kwa kwa Lesa.” Inshila ya cikuuku iyo Munyinefwe Barr afundilemo abalepwisha isukulu pamo na bafyashi babo, yalengele umwenso uo nalimo bakwete pa fyo bali no kusanga ilyo bakaba bamishonari upwe. Alondolwele ukuti “mu kutemwa kwa kwa Lesa e mo fye twingasanga ubucingo, no kwikala bwino.” Tapali icingapaatula bamishonari ku kutemwa kwa kwa Lesa kano fye ninshi abene baipaatula kuli Lesa.

Ba Sam Roberson aba mu Dipartimenti Ilolekesha pa Masukulu ya Bulesa bakoseleshe bonse abasangilweko ukufwala “ica kufwala cawamisha.” Aba basambi nga ca kuti balebelenga ifyo Yesu acitile no kwesha ukufikonka, ninshi ‘bakafwala Shikulu Yesu Kristu.’ (Rom. 13:14) Ba William Samuelson, bakangalila ba Dipartimenti Ilolekesha pa Masukulu ya Bulesa, balandile sana pa cilenga umuntu ukucindikwa. Icilenga umuntu ukucindikwa te fyo abantu bamumona, lelo ifyo Lesa amumona.

Ba Michael Burnett, bakafundisha ba mwi sukulu lya Gileadi, baipwishe abasambi pa fyalecitika mu mulimo ilyo baleshimikila. Nangu ca kuti abasambi balebombela mu cifulo icabombelwamo imiku ne miku ilyo bali pe Sukulu lya Gileadi mu Patterson, ku New York, balisangilemo abalefwaya ukumfwa. Ba Gerald Grizzle, ababombela mu Maofeshi Yalolekesha pa Kulongana kwa Citungu baipwishe bamunyinefwe abalesangwa kwi Sukulu lya ba mu Makomiti ya Misambo. Ifyo balandile fya-afwile bamishonari ukwishibako fimo fimo ifyo bali no kusanga muli bumishonari.

Ilyashi lyaleti “Beni Nga Yeremia” e lyalandile ba David Splane, aba mwi Bumba Litungulula kabili  abali mwi kalasi lyalenga 42 ilya Gileadi. Nangu ca kuti Yeremia aletiina umulimo bamupeele, Yehova alimukoseshe. (Yer. 1:7, 8) Lesa akakosha na ba bamunyinefwe ne nkashi abaletendeka bumishonari. Munyinefwe Splane atile, “Nga muli no bwafya no muntu, muleikala pa nshi no kulemba ifintu 10 ifyo mwatemwa pali uyo muntu. Nga mwafilwa, ninshi uyo muntu tamwamwishiba bwino.”

Yeremia aleipeelesha sana. Ilyo alefwaya ukuleka ukushimikila, alipepele kuli Lesa kabili Yehova ali nankwe. (Yer. 20:11) Munyinefwe Splane atile “nga mwafuupuka, lanshanyeni na Yehova. Mukapapa ifyo Yehova akamwafwa.”

Pa mpela ya programu, ceyamani acinkwileko abali mwi bumba ukuti bamunyinefwe na bankashi abapwisha isukulu nabasambilila inshila ishingi isha kulenga abantu ukubacetekela. Lintu bakalashimika ubunte uko bakaya mu kubombela, kabili ilyo abantu bakeshiba ukuti kuti bacetekela aba bamishonari, cikalenga bakalefwaya ukukutika ku bukombe bwabo.—Esa. 43:8-12.

[Akabokoshi pe bula 22]

IFIPENDO FYA BALI MU KALASI

Bafumine mu fyalo: 6

Bakayabombela mu fyalo: 21

Abasambi bonse pamo: 56

Avareji ya myaka ya kufyalwa: 32.9

Avareji ya myaka baba mu cine: 17.4

Avareji ya myaka babomba umulimo wa nshita yonse: 13

[Icikope pe bula 23]

Abapwishishe Isukulu lya Gileadi mwi Kalasi Lyalenga 125

Mu mutande wa mashina, ukupenda kutampiile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.