Bushe Lyonse Mupampamina fye pa Kucita Ifyo Mwatemwa?

ABANA banono babili baleangala. Umo apoka umunankwe ico aleangasha no kupunda ati, “Candi!” Ukufuma fye ku bwaice sana, abantunse abashapwililika balalanga imibele iya kuitemwa. (Ukute. 8:21; Rom. 3:23) Kabili, aba pano calo bakoselesha abantu ukuba bakaitemwe. Nga tatulefwaya ukukwata iyi mibele, tufwile ukulwisha na maka bukaitemwe. Nga te ifyo, kuti twapunwisha bambi na bucibusa bwesu na Yehova teti bukose.—Rom. 7:21-23.

Ilyo umutumwa Paulo aletukoselesha ukutontonkanya pa fyo imicitile yesu ingakuma bambi, alembele ati: “Nangu fyonse fyalisuminishiwa; lelo te fyonse ifingatwafwa. Nangu fyonse fyalisuminishiwa; lelo te fyonse ifingatukuula.” Paulo asosele no kuti: “Mwilapunwisha.” (1 Kor. 10:23, 32) Kanshi, mu fintu ifikumine ifyo twatemwa, cisuma ukuipusha fwe bene atuti: ‘Nga ca kuti ifyo natemwa kuti fyafulunganya umutende mu cilonganino, bushe te kuti ciwame ukufileka fye? Bushe kuti nakonka ifyo Baibolo isosa, nangu ca kuti ukucita ifyo kuti kwankosela?’

Pa Kusala Incito

Abengi batila takuli uulingile ukubapingula pa musango wa ncito bafwile ukulabomba pantu ifya ncito abene bafwile ukuipingwila, e lyo tafikuma uuli onse, nga kukumako bambi  ninshi ni panono fye. Lelo tontonkanyeni pa fyo cali kuli shimakwebo uwa mwi tauni ilinono ku calo cimo ica ku South America. Uyu muntu aishibikwe ukuti alitemwa ifyangalo fya cela mushuke kabili ali ni cakolwa. Lelo pa numa ya kusambilila Baibolo ne Nte sha kwa Yehova, alitampile ukukonka ifyo alesambilila kabili alyalwile no bumi bwakwe. (2 Kor. 7:1) Ilyo alandile ukuti alefwaya na o aleshimikilako pamo ne cilonganino, eluda umo alilandile nankwe bwino bwino no kumukoselesha ukuti atontonkanye pa milimo alebomba. Uyu muntu e waishibikwe muli ilyo itauni ukuti alashitisha ubwalwa bumo ubwaibela. Ubu bwalwa balabubomfya ku fingi nomba ilingi line babusansha mu fya kunwa fyalowa pa kuti abalenwa balekolwa.

Uyu muntu alilwike ukuti nga ca kuti aleshimikila ku bantu e lyo acili aleshitisha ubo bwalwa, kuti caleta umuseebanya pa cilonganino no konaula bucibusa bwakwe na Lesa. Nangu ca kuti alikwete ulupwa ulukalamba ulwa kusunga, alilekele ukushitisha ubwalwa. Ino nshita pa kusanga indalama sha kusungilamo ulupwa, ashitisha amapepala ne fintu fipangilwa ku mapepala. Uyu muntu no mukashi wakwe, pamo na bana bakwe babili pa bana akwata basano, nomba balibatishiwa. Balabombesha mu mulimo wa kushimikila imbila nsuma na ku mutima tuutu.

Pa Kusala Ifibusa

Bushe pa kusala ifibusa, kusala fye abo tutemenwe nangu tufwile ukutontonkanya na pa filanda Baibolo? Nkashi umo alefwaya ukuya ku mutebeto no mulumendo uushali Mwina Kristu wa cine. Nangu ca kuti balimusokele pa bubi bwingafumamo, ena aleti alikwata insambu sha kuisalila kabili aliile ku mutebeto no yu mulumendo. Tapapitile ne nshita ukufuma apo bafikiile, balimupeele ifya kunwa umo babikile no muti wa kumulaalika utulo. Ilyo ashibwike ninshi napapita inshita iikalamba, asangile ukuti uyu mulumendo uo umwine aleti munankwe, alimucendele ilyo aali mu tulo.—Linganyeniko Ukutendeka 34:2.

Nangu ca kuti nga muleangala na bashipepa te lyonse ica musango yu cingacitika, Baibolo ilasoka ukuti: “Uule-enda na ba mano akaba uwa mano, lelo uwangala na bawelewele akacula.” (Amapi. 13:20) Tatulingile no kutwishika ukuti ukwangala na babi kuitwala fye mu busanso! Ilembo lya Amapinda 22:3 litila: “Uwasalapuka nga amona ububi alabelama, lelo imbulwa mano shena shiya fye no kukandwa.” Abo twangala na bo kuti balenga twalacitako ifyo bacita e lyo kuti balenga twapalama kuli Lesa nangu ukutalukako.—1 Kor. 15:33; Yako. 4:4.

Mu Mifwalile no Kupempenkana

Amafashoni ya mifwalile yaluka fye umo shacela. Lelo ifyo Baibolo ilanda pa lwa mifwalile no kupempenkana fyena tafyaluka. Paulo akonkomeshe abanakashi Abena Kristu ukuti “balefwala  bwino, balefwala ifyalinga kabili ifya mucinshi.” Na baume bene bafwile ukukonka ifyo Paulo alandile. (1 Tim. 2:9) Paulo taletila tufwile ukufwala fye cikulu natufwala, kabili taletila Abena Kristu bonse bafwile ukufwala fye ifyapalana. Inga pa kufwala ifyalinga? Icitabo cimo icilondolola amashiwi citila ukulinga “e kukanacishamo mu mifwalile, mu milandile, nangu mu mibele.”

Tufwile ukuipusha fwe bene atuti: ‘Bushe kuti nalanda no bufumacumi ukuti ndafwala ifyalinga nga ca kuti ndekosapo fye ukufwala ifya kuti nga ndepita bonse balecebukilako? Bushe imifwalile yandi ilenga abantu ukutwishika imibele yandi?’ Kuti twasengauka ‘ukupunwisha bambi’ mu mifwalile nga ca kuti ‘tatulebika fye amano ku fyo tulefwaya fye fwe bene, lelo tulebika amano na ku fyo bambi bafwaya.’—2 Kor. 6:3; Fil. 2:4.

Mu Makwebo

Ilyo mu cilonganino ca ku Korinti mwaimine imilandu yakakala iyakumine ubucenjeshi, Paulo alembele ati: “Cinshi ico mushisuulilako fye? Cinshi ico mushisalilapo ukufyengwa?” Paulo afundile Abena Kristu ukuti bafwile ukuitemenwa ukusuulako kuli fimo ukucila ukutwala bamunyinabo ku filye fya milandu. (1 Kor. 6:1-7) Munyinefwe umo ku calo ca America alikonkele uku kwine ukufunda. Alebombela Umwina Kristu munankwe lelo alifililwe ukumupeela amalipilo bapangene. Bakonkele ifilanda Baibolo, kabili balikumene imiku iingi lelo balifililwe ukupwisha ubwafya. Basukile batwala umulandu ku “cilonganino,” icimininwako na baeluda.—Mat. 18:15-17.

Ku ca bulanda, na lyo line balifililwe ukuwikishanya. Uyu munyinefwe uwali umubomfi alipepele imiku ne miku, e lyo apingwilepo ukusuulako fye ku ndalama isho abombeele. Mulandu nshi? Atile, “Uku kupusana kwalempwisha insansa no kumpoosela inshita ya kubomba imilimo ya Bwina Kristu.” Ilyo asuulileko fye ku ndalama, aumfwile ukuti insansa shakwe shabwela, kabili alimwene no kuti Yehova alepaala imibombele yakwe.

Na mu Tuntu fye Utunono

Nga tatulepampamina fye pa kucita ifyo tutemenwe, kulaba na fimbi ifisuma ififumamo. Bapainiya babili, umulume no mukashi, balifikile bwangu pa cifulo ca kulonganinapo pa bushiku bwa kubalilapo ubwa kulongana kwa citungu no kusala ifipuna pa cifulo icisuma ico balefwaisha. Ilyo fye ukulongana kwaletendeka, ulupwa lumo no mulongo wa bana lwalingile mu cikuulwa ca kulonganinamo. Ilyo aba bapainiya bamwene ukuti ulu lupwa lulefwaya apa kwikala apa kuti bonse bakumane, balimine pa fipuna fyabo no kupeela ulu lupwa, ne ci calengele ukuti ulu lupwa lwikale pamo. Ilyo papitile inshiku shinono pa numa ya kulongana kwa citungu, balya bapainiya bapokelele kalata ya kubatasha kuli lulya lwine lupwa. Muli kalata balondolwele ifyo baumfwile sana ububi pa kucelwa ku kulongana. Lelo bwangu bwangu balisansamwike no kutasha pa mulandu wa cikuuku ca balya bapainiya.

Nga twakwata ishuko, lekeni tulesuulako ku fyo twatemwa pa kuti bambi na bo bengasekelamo. Nga tuli no kutemwa ‘umushaba ukucita ifya kuisekesha,’ tukafwilishako ukusungilila umutende mu cilonganino na bantu banensu. (1 Kor. 13:5) Ne cacindamisha ca kuti, tukatwalilila ukuba ifibusa fya kwa Yehova.

[Icikope pe bula 20]

Bushe mulaitemenwa ukusuulako ku fyo twatemwa no kulangulukilako bambi mu mifwalile?

[Icikope pe bula 20, 21]

Bushe mulaitemenwa ukufuma pa fipuna pa kuti bamunyinenwe bekalepo?