Abalungama Bakulalumbanya Lesa Umuyayaya

“Umulungami akebukishiwa . . . Ubulungami bwakwe bwaiminina pe.”—AMALU. 112:6, 9.

1. (a) Fisuma nshi ifyo abantu abo Lesa amona ukuti balilungama bakaipakisha ku ntanshi? (b) Cipusho nshi twingepusha?

MWANDINI abantu abo Lesa amona ukuti balilungama bakaipakisha ubumi ku ntanshi! Bakalasambilila pa mibele ya kwa Yehova iisuma umuyayaya. Bakalalumbanya Lesa ilyo bakalasambilila na fimbi pa milimo yakwe. Cimo icikabilwa sana pa kuti umuntu akaipakishe ifisuma fya musango yu ku ntanshi “bulungami.” Iyi e mibele iyo Amalumbo 112 yakomailapo sana. Nomba bushe Yehova, Lesa wa mushilo kabili uwalungama, kuti amona shani abantu ababembu ukuti balilungama? Te mulandu ne fyo twesha ukucita ifyalungama, tulalufyanya, e lyo limo limo ifilubo tucita filabipa nga nshi.—Rom. 3:23; Yako. 3:2.

2. Pa mulandu wa kuti Yehova alitemwa abantunse, fipesha amano nshi fibili ifyo acitile?

² Pa mulandu wa kuti Yehova alitemwa abantunse, alipekanya ica kwafwa abantu ababembu ukuba abalungama mu menso yakwe. Bushe acitile shani ifyo? Intanshi, acitile icipesha amano lintu akuushiishe ubumi bwa Mwana  wakwe uo atemwa nga nshi mwi fumo lya kwa nacisungu pa kuti engafyalwa nga umuntu uwapwililika. (Luka 1:30-35) Lintu Yesu bamwipeye ku balwani bakwe, Yehova alicitile icipesha amano na cimbi. Alimubuushishe no mubili uwa ku muulu kabili alimupeela ubukata.—1 Pet. 3:18.

3. Mulandu nshi Lesa alambwila Umwana wakwe no bumi ubwa ku muulu?

³ Yehova alilambula Yesu lintu amupeela ifyo ashakwete ilyo ashilaisa pano calo, e kutila alipeela Umwana wakwe ubumi ubushingonaika. (Heb. 7:15-17, 28) Yehova alilambula Yesu pa mulandu wa kuti alitwalilile ukuba ne cishinka lintu aeshiwe nga nshi. Ilyo Yesu atwalilile ukuba uwa cishinka mpaka ne mfwa, alengele Wishi ukukwata apa kwasukila Satana ukuti filya asosele ukuti abantu babombela Lesa pa mulandu wa kuti alabapaala, fya bufi. Lelo babombela Lesa pa mulandu wa kuti balimutemwa.—Amapi. 27:11.

4. (a) Ilyo Yesu abwelele ku muulu, cinshi acitile, kabili Yehova acitilepo shani? (b) Bushe mumfwa shani pa fyo Yehova na Yesu bamucitila?

⁴ Ilyo Yesu aile ku muulu, alicitile ifintu na fimbi. “Amonekele ku cinso ca kwa Lesa pa mulandu wesu” “no mulopa wakwe.” Pa mulandu wa cikuuku cakwe, Shifwe wa mu muulu alipokelele ilambo lya mutengo ilyatuulile Yesu, ilyaba “e lambo lya pa membu shesu ilitubwesesha kuli Lesa.” Kanshi kuti ‘twabombela Lesa wa mweo’ na ‘bakampingu abasanguluka.’ Ici e cilenga ukuti na ifwe tusuminishe ku mashiwi ya kubalilapo ayaba mu Amalumbo 112, ayatila: “Lumbanyeni Jah!”—Heb. 9:12-14, 24; 1 Yoh. 2:2.

5. (a) Finshi tufwile ukucita pa kuti Lesa aletumona ukuti twalilungama? (b) Bushe Amalumbo 111 na Amalumbo 112 bayalemba shani?

⁵ Pa kuti Lesa aletumona ukuti twalilungama, tufwile ukutetekela mu mulopa wa kwa Yesu uwasuumine. Tufwile ukulatasha Yehova cila bushiku pa mulandu wa fyo atutemwa. (Yoh. 3:16) E lyo tufwile no kulabelenga Icebo ca kwa Lesa no kulaesha na maka ukucita ifyo cilanda. Mu Amalumbo 112 mwaba ifintu fisano ifyo abantu bonse abafwaya ukulabombela Lesa na bakampingu abasanguluka balingile ukulakonka. Amalumbo 112 yalikatana na Amalumbo 111 mu fyo yalandapo. Yonse yatendekela na mashiwi ya kuti “Lumbanyeni Jah!” e kutila “Aleluya!” e lyo pakonka amalaini 22, kabili laini imo na imo itendekela ne cilembo ca alufabeti wa ciHebere umwaba ifilembo 22. *

Icingalenga Umuntu Ukuba Uwapaalwa

6. Bushe “umuntu” uutiina Lesa uo Amalumbo 112 yalandapo apaalwa shani?

⁶“Alipaalwa umuntu uutiina Yehova, uusekelela nga nshi mu mafunde yakwe. Abana bakwe bakaba impalume pano isonde. Kumfwa inkulo ya bantu abalungami, ikapaalwa.” (Amalu. 112:1, 2) Intanshi kemba wa malumbo alanda kwati alelanda pa “muntu” umo e lyo ku mpela ya cikomo 2 atendeka ukulanda pa bantu abengi, pantu atila “abantu abalungama.” Ici cilanga ukuti Amalumbo 112 yalanda  pa bantu abengi kwati yalelanda pa muntu umo. Umutumwa Paulo ayambwile Amalumbo 112:9 lintu alelanda pa Bena Kristu baliko mu nshita ya batumwa. (Belengeni 2 Abena Korinti 9:8, 9.) Ala mwandini aya malumbo yalalanga bwino sana ifyo abasambi ba kwa Kristu muno nshiku bafwile ukulacita pa kuti Lesa alebapaala!

7. Mulandu nshi ababomfi ba kwa Lesa balingile ukulatiinina Lesa, kabili mulingile ukulamona shani amafunde ya kwa Lesa?

⁷ Nge fyo Amalumbo 112:1 yalanga, aba Bena Kristu ba cine balaba na mapaalo ayengi nga ‘baletiina Yehova.’ Ukutiina Lesa, e kutila ukutiina ukumufulwisha, kulalenga balekaana umupashi wa muli cino calo ca kwa Satana. ‘Balasekelela nga nshi’ mu kubelenga Icebo ca kwa Lesa na mu kulakonka amafunde yabamo. Pa mafunde yaba mu Cebo ca kwa Lesa ayo bakonka paba ne funde lya kulashimikila imbila nsuma ya Bufumu mu calo conse. Balesha na maka ukulenga abantu ba mu nko shonse ukuba abasambi ba kwa Kristu uku ninshi balesoka ababifi pa bushiku bwa kwa Lesa ubuleisa ubo akapingulapo abantu.—Esek. 3:17, 18; Mat. 28:19, 20.

8. (a) Bushe abantu ba kwa Lesa aba muno nshiku babalambula shani pa mulandu wa kucincila kwabo? (b) Mapaalo nshi abakwata isubilo lya kwikala pano calo bakaipakisha?

⁸ Pa mulandu wa kulakonka amafunde ya musango yo, ababomfi ba kwa Lesa pano calo bafikile muli ba 7 milioni. Nani uwingakaana ukuti abantu ba kwa Lesa balisanguka “impalume pano isonde”? (Yoh. 10:16; Ukus. 7:9, 14) Kabili ku ntanshi ‘bakapaalwa’ nga nshi lintu Lesa akafikilisha ukufwaya kwakwe! Ibumba lya bantu abakwata isubilo lya kwikala pano calo likacingililwa mu “bucushi bukalamba” kabili likapanga “isonde lipya” “umukaba ubulungami.” Mu kuya kwa nshita, abakapusuka Armagedone bakaipakisha ‘amapaalo’ ayengi nga nshi. Bakasengela iminshipendwa ya bantu abakabuushiwa. Ala mwandini ili subilo lisuma icine cine! Pa kulekelesha, ‘abasekelela nga nshi’ mu mafunde ya kwa Lesa bakapwililika kabili bakaba “abana ba kwa Lesa” umuyayaya.—2 Pet. 3:13; Rom. 8:21.

 Ifya Kubomfya Bwino Ifyuma

9, 10. Bushe Abena Kristu ba cine babomfya shani ifyuma fyabo ifya ku mupashi, kabili bushe ubulungami bwabo bukeminina shani pe?

⁹“Mu ng’anda yakwe mwaba ifipe ifyauma umutengo ne fyuma; no bulungami bwakwe bwaiminina pe. Abyashisha abaololoka ulubuuto mu mfifi. Wa mutembo kabili wa nkumbu kabili alilungama.” (Amalu. 112:3, 4) Pa nshita sha mu Baibolo, ababomfi ba kwa Lesa bamo bali sana ne fyuma. Kabili, na bantu abo Lesa apaala nabo balaba ne fyuma fya mampalanya. Nge fyo cali na mu nshiku sha kwa Yesu, na lelo line abantu abengi abanakila Lesa bapiina kabili balibasuula. (Luka 4:18; 7:22; Yoh. 7:49) Lelo nampo nga umuntu mupiina nelyo mukankaala, kuti aba ne fyuma, e kutila kuti aishiba Lesa kabili kuti aba na mano ayafuma ku muulu.—Mat. 6:20; 1 Tim. 6:18, 19; belengeni Yakobo 2:5.

¹⁰ Abena Kristu basubwa, pamo ne mpaanga shimbi, balapeelako bambi ici cuma ca mampalanya, e kutila ‘balabyashisha abaololoka ulubuuto’ mu calo ca kwa Satana umwaba imfifi. Bacite fyo ilyo bafwilisha bambi ukulanonkelamo mu mano ayafuma ku muulu na mu kwishiba Lesa. Abalwani balyesha ukulesha umulimo wa kushimikila imbila nsuma ya Bufumu lelo balifilwa. Kabili, ifisuma ififuma muli uyu mulimo walungama ‘fikeminina pe.’ Ababomfi ba kwa Lesa nga baleshipikisha ilyo bali na macushi, kuti bacetekela ukuti bakaba aba mweo umuyayaya, ‘bakeminina pe.’

11, 12. Ni nshila nshi shimo isho abantu ba kwa Lesa babomfeshamo indalama ne fipe ifyo bakwata?

¹¹ Abantu ba kwa Lesa, Abena Kristu basubwa ababa mwi bumba lya musha e lyo na baba mwi “bumba ilikalamba,” balapeela ifipe ifyo bakwata. Pa Amalumbo 112:9 patila: “Ni kapekape; apeela abapiina.” Abena Kristu ba cine aba muno nshiku balasangula ifintu ifya kupeela Abena Kristu banabo nelyo fye abena mupalamano ababa mu kubulwa. Na kabili balabomfya indalama ne fipe ifyo bakwata ku kwafwilisha abantu nga kwacitika akayofi. Nge fyo Yesu alandile, umuntu uupeela na o alapaalwa nga nshi.—Belengeni Imilimo 20:35; 2 Abena Korinti 9:7.

¹² Na kabili, tontonkanyeni pa ndalama shipooswa pa kupulinta ino magazini mu ndimi 172. Kabili abalanda indimi ishingi pali ishi bapiina. Na kabili aba bamagazini balafuma na mu lulimi lwa ba cibulu e lyo na mu filembo fya mpofu.

Wa Mutembo Kabili Wa Mulinganya

13. Ni bani baba e fya kumwenako mu kuba no mutembo na mu kupeela ne nsansa, kabili kuti twabapashanya shani?

¹³“Musuma umuntu uwa mutembo kabili uwashimisha.” (Amalu. 112:5) Nalimo mwalimona ukuti abantu abengi abafwilisha bambi tababa aba mutembo. Bamo balapeela pa kuti bailange ukuti balikwata ifingi e lyo bambi balashimunuka ukwafwilisha abanabo. Kwena tacumfwika bwino ukwafwilishiwa ku muntu uulekumona kwati tapali ico uli nelyo ku muntu uulekumona kwati ulemushupa fye. Lelo, cilawama ukwafwiwa no muntu uwa mutembo. Yehova aba e ca kumwenako ica mupe wa nsansa kabili uwa mutembo. (1 Tim. 1:11; Yako. 1:5, 17) Yesu Kristu na o ali no mutembo pantu alepashanya sana Wishi. (Marko 1:40-42) Kanshi pa kuti Yehova aletumona ukuti twalilungama, tufwile ukuba aba mutembo no kulaitemenwa ukwafwilisha bambi, maka maka ilyo tuleafwa abantu ukwishiba Yehova.

14. Ni nshila nshi isho ‘twingacitamo ifyalungama’?

¹⁴“Fyonse ifyo acita fyalilungama.” (Amalu. 112:5) Nge fyo Baibolo yasobele, ababa mwi bumba lya kwa kangalila wa cishinka balasakamana ifyuma fya kwa Shikulwibo ukulingana no bulungami nelyo umulinganya wa kwa Yehova. (Belengeni Luka 12:42-44.) Iyi mibele imonekela mu fyo bafunda baeluda ukulingana na Malembo, pantu limo baeluda balabombela pa milandu ya ba mu cilonganino abacita ulubembu ulwabipisha. Na cimbi icilanga ukuti fyonse ifyo aba mwi bumba lya musha bacita fyalilungama kabili mulaba umulinganya ni filya batungulula ifilonganino fyonse, amayanda ya bamishonari, ne misambo ukulingana ne fyo Baibolo yalanda. Te baeluda fye beka balingile ukuba no mulinganya, lelo na Bena Kristu bambi nabo bafwile ukuba no mulinganya mu fyo bacita kuli bambi na ku bashasumina, ukubikako fye na mu makwebo.—Belengeni Mika 6:8, 11.

 Amapaalo Abalungama Bakaipakisha

15, 16. (a) Bushe ifyabipa ificitika mu calo fikuma shani abalungami? (b) Cinshi ico ababomfi ba kwa Lesa bakatwalilila ukucita?

¹⁵“Pantu takabale atelentenshiwa. Umulungami akebukishiwa umuyayaya. Takatiine nangu lyashi ilibi. Umutima wakwe walishipa, washintilila pali Yehova. Umutima wakwe tautelentenshiwa; takatiine, mpaka akamone icikacitikila abalwani bakwe.” (Amalu. 112:6-8) Kale ifyabipa tafyalecitika nge fyo filecitika pali ino nshita, ukubikako fye ne nkondo, ukusansa kwa fipondo, amalwele ayaleisa na ya kale, ulukaakala, ubupiina, no konaula icalo. Ifi fyabipa filakuma na bantu abo Lesa amona ukuti balilungama lelo bena tababa no mwenso wa fikacitika ku ntanshi. Imitima yabo bena ‘yalishipa’ kabili ‘taitelentenshiwa’ pantu balishiba ukuti icalo cipya ica kwa Lesa, umukaba ubulungami nacipalama. Nga kwacitika akayofi, balashipikisha pantu bashintilila pali Yehova. Taleka abalungami ‘ukutelentenshiwa,’ lelo alabafwilisha no kubapeela amaka ya kushipikisha.—Fil. 4:13.

¹⁶ Na kabili abo Lesa amona ukuti balilungama balashipikisha ulupato no bufi ubo bababepesha ku balwani babo. Ifi fyonse, ulupato no bufi ubwafita fititi, fyalifilwa ukulesha Abena Kristu ba cine ukulashimikila kabili tafyakabaleshe. Ababomfi ba kwa Lesa batwalilila fye ukuba abashipa kabili abashitelententa ilyo balebomba umulimo Yehova abapeela uwa kushimikila imbila nsuma ya Bufumu no kwafwa abantu abakutika ku mbila nsuma ukuba abasambi. Ukwabula no kutwishika ilyo impela ilepalamina, abalwani bakacilanapo ukukaanya abalungami. Ulu lupato lukacilamo sana lintu Goge wa ku Magoge, e kutila Satana Kaseebanya, akasansa ababomfi ba kwa Yehova aba mu calo conse. Pali ilya nshita, ‘tukamona icikacitikila abalwani besu’ ilyo bakabacimfya nakalya nakalya. Ala mwandini cikawama nga nshi ukumona uko Yehova akalenga ishina lyakwe ukuba ilya mushilo!—Esek. 38:18, 22, 23.

‘Bakasumbulwa mu Bukata’

17. Bushe abalungami ‘bakasumbulwa shani mu bukata’?

¹⁷ Mwandini cikawama nga nshi ilyo fwe bantu bonse tukalalumbanya Yehova ukwabula ukukaanya kwa kwa Satana ne calo cakwe! Bonse abatwalilila ukuba abalungama mu menso ya kwa Yehova bakalaipakisha ukumulumbanya umuyayaya. Tabakacimfiwe pantu Yehova alaya ukuti “ulusengo” lwa balungami “lukasumbulwa mu bukata.” (Amalu. 112:9) Abantu ba kwa Yehova abalungama bakasumbulwa ilyo abalwani ba kwa Yehova bonse bakacimfiwa.

18. Bushe amashiwi ya kulekelesha ayaba mu Amalumbo 112 yakafikilishiwa shani?

¹⁸“Umubifi akamona kabili akafulwa. Akasumanya ameno no kusunguluka. Ico ababifi bakumbwa cikaloba.” (Amalu. 112:10) Bonse abatwalilila ukukaanya abantu ba kwa Lesa ‘bakasunguluka’ ku mufimbila no lupato lwabo. Amapange yabo aya kufwaya ukulesha umulimo wesu yakalobela pamo nabo mu “bucushi bukalamba” ubuleisa.—Mat. 24:21.

19. Cinshi ico twacetekela ukuti e cikacitika?

¹⁹ Bushe mukaba pa bantu abakapusuka ilyo Yehova akacimfya? Nelyo nga ca kuti mwafwa, pa mulandu wa kulwala nangu ukukota, ilyo icalo ca kwa Satana cishilapwa, bushe mukaba pa “balungama” abakabuushiwa? (Imil. 24:15) Kuti mwabapo nga ca kuti fye mwatwalilila ukutetekela mwi lambo lya cilubula ilya kwa Yesu no kulapashanya Yehova, nge ficita abantu abemininwako no “muntu” uwalungama uo Amalumbo 112 yalandapo. (Belengeni Abena Efese 5:1, 2.) Yehova akashininkisha ukuti ‘icibukisho’ ca balungama tacilabilwe, kabili takalabe ifyalungama ifyo balecita. Yehova akabebukisha kabili akabatemwa umuyayaya.—Amalu. 112:3, 6, 9.

[Futunoti]

Amepusho ya Kutontonkanyapo

• Milandu nshi imo iilenga tulebilikisha ukuti “Aleluya”?

• Finshi ificitika muno nshiku ifilenga Abena Kristu ba cine ukuba ne nsansa nga nshi?

• Mupe wa musango nshi uo Yehova atemwa?

[Amepusho]

[Icikope pe bula 25]

Pa kutwalilila ukuba abalungama mu menso ya kwa Lesa tufwile ukutetekela mu mulopa wa kwa Yesu uwasuumine

[Ifikope pe bula 26]

Imisangulo ya kuitemenwa ilabomfiwa ku kwafwilisha ilyo kwacitika akayofi e lyo na ku kusabankanya impapulo shilanda pali Baibolo