Kuti Mwacita Shani pa Kuti Mutwalilile Ukushimikila?

BUSHE mwalitala amumfwapo ukunaka no kufuupuka ica kuti mwalafwaya no kuleka ukushimikila? Ifintu ifingalenga catwafya ukutwalilila ukushimikila fyaba kutukaanya, amasakamika, ukulwalilila, ifyo bambi balelanda, nangu ukukanapanga abasambi. Lelo, tontonkanyeni pali Yesu. “Pa mulandu wa kusekelela ukwabikilwe pa ntanshi yakwe,” alishipikishe ifya kwesha fyabipisha. (Heb. 12:2) Alishibe ati nga ashininkisha ukuti imilandu balepeela Lesa ya bufi, ninshi kuti alenga umutima wa kwa Yehova ukusekelela.—Amapi. 27:11.

Na imwe nga mwatwalilila ukushimikila, kuti mwalenga umutima wa kwa Yehova ukusekelela. Lelo, ni shani nga ca kuti amafya yamo yalemupwisha amaka ya kushimikila? Ba Kristina, abali mu myaka ya bukote kabili abalwalilila batile: “Ilingi line ndanaka no kubombomana. Amafya ya mu bukote, pamo nga ukulwalilila na masakamika ya mikalile kuti fyalenga waleka ukupimpa.” Kuti mwacita shani pa kuti mutwalilile ukulashimikila te mulandu na mafya ya musango yu?

Pashanyeni Bakasesema

Nga ca kuti bakasabankanya ba Bufumu balefwaya ukutwalilila ukulashimikila, bafwile ukulapashanya imibele ya bakasesema ba ku kale. Natulandeko pali Yeremia. Pa kubala ilyo bamwebele ukuti abe kasesema, aleshimunuka. Lelo, alishipikishe mu mulimo wakwe uwa-afya ukucila pa myaka 40 iyo alesesema pantu acetekele sana Lesa.—Yer. 1:6; 20:7-11.

Ba Henryk batila ifyacitikile Yeremia filabakosha sana. Basosa ukuti: “Pali iyi myaka yonse ukucila pali 70 iyo nshimikila, inshita shimo ndafuupuka pa fyo abantu basasuka nangu pa fyo basuula umulimo wa kushimikila. Nga cabe fyo, njibukisha fye Yeremia. Ifyo atemenwe Yehova ne fyo bucibusa bwakwe na ena bwakosele fyamupeele amaka ya kutwalilila ukusesema.” (Yer. 1:17) Filya fyacitikile Yeremia filakosha na ba Rafał. Basosa ukuti: “Yeremia acetekele Lesa ukucila ukulatontonkanya pa fyalemucitikila ne fyo aleumfwa. Te mulandu na balwani ukufula, ena atwalilile fye ukusesema ukwabula umwenso. Ifi fine e fyo njesha ukulaibukisha.”

Kasesema na umbi uo bambi bapashanya pa kuti batwalilile ukushimikila ni Esaya. Lesa amwebele ukuti abena Israele banankwe tabali no kumumfwa. Yehova atile: “Lenga imitima ya aba bantu ukukunkuma, kabili lenga amatwi yabo ukukoma.” Bushe Esaya ali no kufilwa ukubomba umulimo wa kushimikila? Lesa te fyo aletontonkanya! Ilyo bamutumine ukusesema, atile: “E po ndi! Ntumeni.” (Esa. 6:8-10) Esaya alitwalilile ukubomba umulimo bamupeele. Bushe na imwe mulatwalilila ukubomba umulimo wa kushimikila?

Nga tulefwaya ukutwalilila ukushimikila ku bantu abashifwaya ukumfwa, nga filya na Esaya atwalilile, tatufwile ukulatontonkanya sana pa fyo abantu bakaana. Ba Rafał balanda ifyo bacita nga bafuupulwa. Batila: “Ndesha ukukanatontonkanya sana pa fibi ifyo abantu banjasuka nga ndeshimikila. Abantu nshimikilako kuti banjasuka icili conse balefwaya.” Ba Anna basanshapo abati: “Nshifwaya ukwikalila fye ukutontonkanya pa fibi nangu ifya kufuupula ifyo abantu banjasuka mwi bala. Icingafwa ukukanacita ifyo kupepa no kubebeta ilembo lya bushiku ilyo nshilafumina mwi bala. Nga nacita ifyo ndalabako bwangu bwangu ku fya kufuupula fyonse.”

Kasesema Esekiele alesesema ku baYuda abali muli bunkole lelo abali abomankonso. (Esek. 2:6) Ulya kasesema akaana ukweba abantu ifyo  Lesa alelanda e lyo umubifi afwa ukwabula ukumfwa ukusoka, nga wali mulandu wa kwa Esekiele. Yehova amwebele ati: “Umulopa wakwe nkaufwaya mu minwe yobe.”—Esek. 3:17, 18.

Ba Henryk balesha ukuba no mutima ngo wa kwa Esekiele. Batila: “Ndefwaya ukuba uwa kaele ku mulopa wa bantu bonse. Abantu abengi kuti baisafwa.” (Imil. 20:26, 27) Ba Zibignyev na bo e fyo bomfwa. Batila: “Icalefwaikwa kuli Esekiele kutwalilila fye ukubila te mulandu ne fyo bambi baletontonkanya. Ici cilangafwa ukumona umulimo wa kushimikila filya fine Kabumba aumona.

Tamuba Mweka

Ilyo muleshimikila tamuba mweka. Nga filya fine umutumwa Paulo asosele, na ifwe kuti twatila: “Tubombela pamo na Lesa.” (1 Kor. 3:9) Ba Kristina, abatile inshita shimo balabombomana, basosele no kuti: “E mulandu wine lyonse nombela Yehova ukuti ampeeleko amaka. Kabili alampeela.” Cine cine, tulakabila umupashi wa kwa Lesa ukutwafwilisha mu mulimo wa kushimikila!—Seka. 4:6.

Ilyo tulebombako umulimo wa kushimikila, umupashi wa mushilo na o ulatwafwa ukuba ne “fisabo fya mupashi.” (Gal. 5:22, 23) Ico nomba, e citwafwa ukutwalilila ukulashimikila te mulandu ne fyo abantu bengacita. Ba Henryk batile: “Ukubomba umulimo wa mwi bala kulangafwa ukuwamyako imibele yandi. Ndasambilila ukuba uwatekanya no kulangulukilako bambi e lyo no kukananenuka bwangu.” Ukutwalilila ukushimikila te mulandu na mafya yapusanapusana kuti kwamwafwa ukukwatilako ifisabo fya mupashi.

Yehova abomfya bamalaika bakwe ukutungulula uyu mulimo waibela. (Ukus. 14:6) Baibolo itweba ukuti kwaba bamalaika “amakana ikumi ukufushiwa ku makana ikumi, na makana ya makana.” (Ukus. 5:11) Aba bamalaika abatungululwa na Yesu, balafwilisha ababomfi ba kwa Lesa pa calo. Bushe mulebukisha ifyo lyonse ilyo muleshimikila?

Ba Anna batile: “Ilyo natontonkanya ukuti bamalaika balaba na ifwe ilyo tuleshimikila, ndomfwa na maka yabwela. Nalicindika umulimo babomba uwa kutwafwa ilyo baletungululwa na Yehova na Yesu.” Mwandini lishuko ukubombela pamo na bamalaika ba cishinka!

Bushe ukubombela pamo na bakasabankanya banensu kuti kwatwafwa shani? Lishuko sana ukwishibana ne bumba likalamba ilya Nte sha cishinka. Mufwile mwalimona ukuti ya cine amashiwi ya mwi pinda lya mu Baibolo ilitila: “Icela cinoona icela. No muntu anoona icinso ca muntu munankwe.”—Amapi. 27:17.

Nga tulebomba na bambi mu mulimo wa kushimikila, tulakwata ishuko lya kumona inshila shimbi isha kubombelamo isho tushaishiba. Ba Eljibyeta batile, “Nga ndebomba na bakasabankanya bambi ndakwata ishuko lya kulanga ukuti nalitemwa aba bakasabankanya e lyo na bantu tusanga mwi bala.” Mule-esha ukubombako na bakasabankanya bapusanapusana. Cikalenga umulimo wa kushimikila ukuwama nga nshi.

Muleisakamana

Pa kuti tutwalilile ukuba abacincila mu mulimo wa kushimikila, tufwile ukuteyanya bwino, ukulaisambilisha fwe bene, no kulatuushako. Nangu tutile, tufwile ukuisakamana mu fya kwa Lesa e lyo no kusakamana ubumi bwesu.

Baibolo itila: “Amapange ya wacincila yamulenga ukubomba bwino.” (Amapi. 21:5) Ba Zigmunt, abali ne myaka 88, batile: “Ukuteyanya bwino imibombele yandi mu mulimo wa kushimikila kulalenga ndebomba bwino. Ndateyanya bwino inshita pa kuti napoosako inshita iikalamba mu kushimikila.”

Ukwishiba bwino Amalembo kulatukosha kabili kulatupangasha ukuti tubombe bwino umulimo wa kushimikila. Filya fine fye tukabila ifya kulya pa kuti tutwalilile aba mweo, e fyo tukabila ne fya kulya fya ku mupashi pa kuti tutwalilile ukulabombako umulimo wa kushimikila. Ukubelenga Icebo ca kwa Lesa lyonse e lyo no kulya “ifya kulya . . . pa nshita yalinga” kukatukosha ukuti tubombe bwino umulimo wa kushimikila.—Mat. 24:45-47.

 Ba Eljibyeta balyalwileko fimo mu mikalile yabo pa kuti baleshimikila sana. Batile: “Nalicefyako sana inshita nalepoosa ukutamba TV pa kuti nkwate nshita ya kupekanishisha umulimo wa mwi bala. Icungulo lyonse nga ndebelenga Baibolo, ntontonkanya pa bantu nacikumanya ilyo nacilashimikila. Ndafwaya amalembo na fimbi ifyalembwa ifingabafwa.”

Ukutuusha na ko kuti kwamwafwa ukuba na maka kabili kuti calenga mwalabomba sana umulimo wa kushimikila. Lelo, nga mwacishamo ukuipoosa mu fya kuleseshamo icitendwe, teti mubombe bwino umulimo wa kushimikila. Ba Anja, abatemwa ukushimikila batile: “Nga tauletuusha kuti wanaka sana, kabili ico kuti calenga wafuupuka. Ndesha na maka ukuti ica musango yo ciikancitikila.”—Luk. Mil. 4:6.

Te mulandu ne fyo tubombesha, banono batetekela imbila nsuma. Lelo, Yehova takatale alaba umulimo wesu. (Heb. 6:10) Nangu ca kuti abengi tabafwaya ukulanda na ifwe, kuti balatulandapo ilyo twaya. Kuti caba nga filya tubelenga pali Esekiele ukuti: Abantu “bakeshiba ukuti kasesema ali mu kati kabo.” (Esek. 2:5) Kwena, umulimo wa kushimikila te mulimo wayanguka, lelo tulamwenamo ifisuma e lyo na batetekela imbila nsuma na bo bakamwenamo.

Ba Zigmunt batile: “Ukubombako umulimo wa kushimikila kulatwafwa ukufwala ubuntu bupya no kulanga ukuti twalitemwa Lesa na bantu banensu.” Ba Anja na bo batile: “Lishuko nga nshi ukubombako uyu mulimo wa kupususha abantu. Tawakatale aubombwa na kabili mwi sonde lyonse nge fi kabili ilyo ifintu fibipile nge fi.” Na imwe bene kuti mwasanga amapaalo ayengi nga ca kuti mwatwalilila ukushimikila.—2 Kor. 4:1, 2.

[Ifikope pe bula 31]

Ukusakamana ubumi bwesu no kuisakamana mu fya kwa Lesa kukatwafwa ukutwalilila ukushimikila