Amepusho Ukufuma ku Babelenga

Bushe abana abafwila mwi fumo bakabuuka?

Abashafwilwapo akanya no kumfwa ifyo cikalipa, nalimo te kuti belenganye ifyo abafwilwapo bomfwa. Bamo balaloosha icine cine ifumo nga lyaonaika nangu umwana nga afyalwa akapoopo. Namayo umo, amafumo yasano yalyonaike. Mu kuya kwa nshita, asukile afyala abana baume babili no kubakusha. Lelo alebukisha ifyo aleumfwa ilyo amafumo yaleonaika. Lyonse aleishiba imyaka abana balya bali no kuba na yo abakanafwa. Bushe Abena Kristu abo ifi ficitikila kuti basubila ukuti abo bana bakabuuka?

Icasuko kuli ici cipusho ca kuti tatwaishiba. Baibolo tailanda mu kulungatika pa lwa kubuuka kwa bana abafyalwa utupoopo nelyo abafwa pa mulandu wa kuti ifumo lyaonaika. Lelo, mu Cebo ca kwa Lesa mwaliba fimo ifingatwafwa ukumfwikisha uyu mulandu e lyo no kutusansamusha.

Natulande pa mepusho yabili ayapalana. Ica kubalilapo ca kuti, ukulingana na Yehova, ni lilali ubumi bwa muntu butampa, bushe ni lilya kwaba ukwimita nangu ni pa kufyalwa? Ica bubili ca kuti, bushe Yehova amona umwana uushilafyalwa ukuti muntu wa cine cine nangu amona fye kwati ni nsandesande ishili pamo mwi fumo lya kwa namayo? Amashiwi ya kwa Lesa ayashaluka yalasuka bwino bwino aya mepusho yabili.

Mu Mafunde ya kwa Mose balilondolwele bwino bwino ukuti ubumi tabutendeka pa kufyalwa, lelo butendeka pa kwimita. Cinshi cilangilila ifyo? Ifunde lyalondolwele ukuti uwaipaya akanya akaimitwa na o alingile ukwipaiwa. Moneni ifyo ifunde lyasosele. Lyatile: “Mukapeele umweo pa mweo.” * (Ukufu. 21:22, 23) Kanshi, akamwana kali mwi fumo ninshi katuntulu kabili kamuntu. Ukwishiba ukuti akanya kali mwi fumo kamuntu, kwalyafwa Abena Kristu abengi ukukaana ukufumya amafumo, pantu balishiba ukuti lubembu kuli Lesa.

Ca cine ukuti akanya kali mwi fumo na ko ka mweo, nomba bushe kalicindama kuli Yehova? Ifunde ili tulandilepo pa muulu lyatile umuntu nga aipaisha akanya akali mwi fumo ninshi kumwipaya. Kanshi ubumi bwa kanya akali mwi fumo bwalicindama kuli Lesa. Na kabili, Amalembo yambi yalanga ukuti Yehova amona utunya tuba mu mafumo ukuti bantu ba cine cine. Ku ca kumwenako, Imfumu Davidi ilyo yali no mupashi wa kwa Yehova yatile: “[Mwalincingilile] mu nda muli mayo . . . Amenso yenu yalimwene, kabili mwi buuku lyenu mwalembelwe ifilundwa fyandi fyonse, mwalembelwe inshiku ifilundwa fyapangilwe.”—Amalu. 139:13-16; Yobo 31:14, 15.

Yehova aleshiba ne mibele akanya kali mwi fumo kakakwata ne fyo kengesacita ku ntanshi. Ilyo Rebeka, muka Isaki ali ne fumo lya bampundu, Yehova aliseseme pa lwa bana babili abalelwishanya mwi fumo lyakwe. Ico cilangilila ukuti kale kale alimwene imibele bakwete iyali no kukuma abantu abengi ku ntanshi.—Ukute. 25:22, 23; Rom. 9:10-13.

Ifyacitike ilyo Yohane Kabatisha ali mwi fumo na fyo filatusambilishako fimo. Ukulingana ne mbila nsuma ya kwa Luka, Baibolo itila: “Ilyo Elisabete aumfwile Maria alemuposha, umwana mwi fumo lyakwe alicilwike; kabili umupashi wa mushilo waishile pali Elisabete.” (Luka 1:41) Ilyo Luka kondapa alelanda pali ci cacitike abomfeshe ishiwi lya ciGriki ililanda pa kana akali mwi fumo nangu pa kanya akafyalwa. E shiwi limo line abomfeshe ilyo alelanda pali Yesu ilyo ali akanya ninshi nasendama mu ca kuliilamo ifitekwa.—Luka 2:12, 16; 18:15.

Bushe Baibolo ilanga ukuti paliba ubupusano pa mwana uli mwi fumo na pa ufyelwe? Awe iyo. Kabili ico cilomfwana ne fyasanga aba sayansi muno nshiku. Ku ca kumwenako, abafwailisha basanga ukuti umwana uuli mwi fumo kuti aumfwa ifilecitika ku nse kabili kuti fyamukuma. E mulandu wine kanshi namayo uuli pa bukulu atemenwa sana umwana uulekula mwi fumo lyakwe.

Imyeshi abana bafyalilwapo ilapusanapusana. Tontonkanyeni pali ci: Namayo umo afyala umwana umutuntulu ilyo imyeshi tailakumana, lelo aikala fye inshiku ishinono afwa. Namayo umbi ali ne fumo ne myeshi yakumana fye bwino bwino, lelo umwana afyalwa akapoopo. Bushe ulya wafyele ilyo imyeshi tailakumana kuti asubila ukuti umwana wakwe akabuuka pantu alifyalwa aikalako na pa calo ilyo ulya umbi takwete isubilo pantu umwana afyelwe akapoopo?

Mu kusupula uyu mulandu, Baibolo isambilisha ukuti ubumi butendeka pa kwimita no kuti Yehova amona umwana uushilafyalwa ukuti muntu wa cine cine uwapusanako na bambi. Pa mulandu wa ifyo fishinka fya mu Baibolo, bamo kuti batontonkanya ati nga twatila umwana uwafyalwa akapoopo takabuuke, ninshi fyapusana ne fi fishinka fya mu Baibolo. Kuti batila nga tulelanda ifyo ninshi tamwaba amano mu kusumina ifyo Baibolo ilanda ati tatufwile ukufumya amafumo.

Kale, ino magazini yalelanda pa mepusho yamo ayalengele tuletwishika nga ca kuti abana abafwa pa mulandu wa kuti ifumo lyaonaika nelyo abafyalwa utupoopo, bakabuuka. Nalimo kuti twaipusha atuti bushe mu Paradaise Lesa akabika akanya akaimitwa mwi fumo lya kwa namayo? Lelo pa numa ya kusambilila sana, ukwetetula, no kupepelapo, Ibumba Litungulula nomba liletila ifintu fya musango yo te kuti tulefilandapo sana ilyo tulelanda pa kubuuka. Yesu atile: “Lesa kuti acita ifintu fyonse.” (Marko 10:27) Ifyacitikile Yesu wine filanga ukuti aya mashiwi ya cine; ubumi bwakwe balibukuushishe ukufuma ku muulu ukwisa mwi fumo lya mukashana nacisungu. Abantu kuti bamona kwati ica musango yo teti cicitike.

Bushe ninshi calola mu kuti Baibolo isambilisha ati abana abafwa ilyo tabalafyalwa tabakabuuke? Tufwile ukukomailapo ukuti Baibolo tayasuka ico cipusho mu kulungatika, e ico te kuti tukosepo fye atuti bakabuuka. Ici cintu kuti caleta amepusho ya mutatakuya ayapusanapusana. Lelo, kuti cawama ukuleka fye ukulatunganya. Nomba ico twaishiba ca kuti: Yehova Lesa umwine, uwafulisha icikuuku ne nkumbu, e waishiba. (Amalu. 86:15) Tatutwishika ukuti alafwaisha ukubwesha abafwa ukupitila mu kubabuusha. (Yobo 14:14, 15) Twalicetekela ukuti lyonse fye acita ifyalungama. Akasansamusha bonse pa bulanda twakwata muli cino calo cabamo ububifi ilyo akeba Umwana wakwe “[ukonaula] imilimo ya kwa Satana Kaseebanya.”—1 Yoh. 3:8.

[Futunoti]

 [Icikope pe bula 13]

Yehova akatusansamusha pa fibi fyonse twapitamo