Icine Cayafika Mu Fifulo Fya Mu Mishi

ICITUNGU ca Tuva icaba mu calo ca Russia cabela ku mpela ya kapinda ka ku kulyo aka Siberia. E lyo ku kapinda ka ku kulyo na ku kabanga kwaba Mongolia. Abantu abengi mu Tuva bekala mu mishi umo cafya ukutwala ubukombe bwa Bufumu. Lelo inshita ya ku numa, kwali ibumba lya bantu abafumine mu mishi iingi iya mu Tuva no kuya ku musumba ukalamba muli ici citungu, uwitwa ati Kyzyl ku kulanshanyako fimo nga kabungwe. Ilyo ba Maria, bapainiya abekala mu musumba wa Kyzyl, baumfwile ukuti ili bumba nalisa, batile ishuko lya kushimikila imbila nsuma ku bantu abekala uko imbila nsuma ishafika lyamoneka.

Ba Maria balondolwele ukuti: “Aba muli aka kabungwe basalile pa sukulu apo mfunda ukuti e po bakulakumanina pa kulanshanya ifya kwafwa ababomfya imiti ikola bubi bubi na bakunkuma ku bwalwa. Abantu napamo 50 ukufuma mu kati ka mishi ya mu Tuva balishilesangwako. Pali aba pali bakafundisha, na basambilila ifyo abantu batontonkanya, e lyo na balolekesha pa mikalile ya bana, kabili pali na bantu fye bambi.” Ba Maria batile ishuko lya kubashimikila lyamoneka nangu line balishibe ukuti tacali na kwanguka ukucite fyo. Batile: “Ndi wa nsoni, kabili cilangafya ukucita ubunte bwa mu lyashi. Lelo napepele kuli Yehova ukuti ankoshe niba na mwenso pa kuti nshimikile abalongene pa sukulu.” Bushe ba Maria balibombele fye bwino?

Bakonkenyepo ukulondolola ukuti: “Nasangile Loleni! iyalelanda pa mwenso, iyo namwene ukuti uwasambilila pa fyo abantu batontonkanya kuti aitemwa. E ico, nali-isendele na ku sukulu. Kafundisha umo pa balongene ubu bushiku aishile mu ofesi yandi, awe na ine namupeela na magazini. Alyumfwile bwino ukukwata iyi magazini. Na kuba atile na o wine alikwata umwenso. Ubushiku bwakonkelepo namutwalile icitabo citila, Ifipusho Abacaice Bepushai—Ifyasuko Fibomba, Ibuuku 1. Na co cine alipokele. Alengele natendeka ukumona ukuti na bakafundisha bambi napamo kuti bacitemwa ici citabo. E ico nasendele icibokoshi umwali ifitabo fitila Ifipusho Abacaice Bepusha e lyo ne mpapulo shimbi no kutwala ku sukulu. Tapapitile na nshita, fyonse ifyali mu cibokoshi fyalipwile. Ba Maria balondolwele icacitike abati, “Abengi bakafundisha ilyo bamwene icitabo citila Ifipusho Abacaice Bepusha ku munabo uo napeele, balinkonkele mu ofesi no kunjipusha ukuti, ‘Ni kwi balefolesha ifitabo?’” Mukwai ne o baipwishe nine nalepeela ne fitabo fine balefwaya!

Ubushiku balekelesheko ukulongana bwa pa Cibelushi. Ubu bushiku ba Maria tabalebomba, e ico bashile babika impapulo pa matebulo mu ofesi lyabo, e lyo balemba na pa cipampa mwi ofesi lyabo abati: “Kuli bakafundisha! Kuti mwasendapo impapulo ishenu ne sha kupeela abanenu. Ishi mpapulo shishaiwamina kuti shamwafwa ukubomba bwino umulimo wenu no kukosha indupwa shenu.” Finshi fyakonkelepo? Ba Maria batile: “Ilyo nabweleleko ku ofesi bulya bwine bushiku, nasangile impapulo ishingi nabasenda. Napokeelepo ifitabo fimbi na magazini bwangu bwangu.” Ilyo uku kubungana kwalepwa, ba Maria ninshi balipeela abantu magazini 380, amabuuku 173, na mabroshuwa 34. Ilyo aba bantu babwelelemo uko baleikala no kubombela, balisendele ishi mpapulo. Ba Maria batile, “Natemwa sana pantu icine nomba calatandwa na mu fifulo fyaba ukutali sana mu mishi ya mu Tuva!”—Luk. Mil. 11:6.

[Mapu pe bula 32]

(Nga mulefwaya ukumona mapu, moneni muli magazini)

RUSSIA

ICITUNGU CA TUVA