Bushe Nine Mfwile Ukusala Ukwa Kupepa Nangu Bafyashi Bandi?

MU Poland abantu abengi beba Inte sha kwa Yehova ukutila, “Nafyalilwe mu mipepele nabamo, kabili emo nkafwila.” Ici cilanga ukuti, ukulingana ne fyo batontonkanya, abana abakonka imipepele ya bafyashi, na bo nga bakwata abana ciba ifyo fine. Bushe na kuntu mwikala e fyo caba? Ciba shani ilingi ku bakonka fye imipepele bafyalilwemo? Bela fye ico cine mu kupepa pantu bakonkelesha ulupwa lwabo. Bushe ici kuti cacitika na ku Nte sha kwa Yehova abasambilishiwa icine ku bafyashi babo nelyo banakulwibo na bashikulwibo?

Ifi te fyacitike kuli Timote, uo banyina na banakulu abali bakapepa bakosa ba-afwile ukucetekela Lesa wa cine no kumutemwa. Timote alishibe amalembo ya mushilo “ukufuma ku bunya.” Mu kuya kwa nshita, Timote, banyina na banakulu balishininkishe ukuti ukupepa kwa Bena Kristu e kwali ukupepa kwa cine. ‘Alishininwe ukusumina ukuti ifyo aumfwile mu Malembo pali Yesu Kristu fya cine.’ (2 Tim. 1:5; 3:14, 15) E ico nangu ca kutila abafyashi pali lelo balesha na maka ukwafwilisha abana babo ukuba ababomfi ba kwa Yehova, abana abene e bafwile ukuitemenwa ukulabombela Yehova.—Marko 8:34.

Pa kuti umwana atemwe Yehova no kumubombela ukwabula ukunenuka te mulandu ne fingacitika, alingile ukumfwikisha ifyo alesambilila no kushininwa ukuti fya cine. Nga acite ifi, icitetekelo cakwe cikakosa kabili cikalimbwa bwino.—Efes. 3:17; Kol. 2:6, 7.

Ifyo Abana Balingile Ukulacita

Albert * uwakuulile mu lupwa lwa ba Nte atile: “Nalishibe ukufuma fye na ku kale ukuti imipepele ya Nte sha kwa Yehova e ya cine, lelo calingafishe ukuba ne mibele balenjeba ukuti e yo mfwile ukukwata.” Nga uli mulumendo nelyo umukashana napamo uleti fye cishinka alandile. Kuti cawama waesha ukumona ifyo imikalile Lesa afwaya yaba e lyo no kwesha ukusanga ubusuma bwaba mu kucita ukufwaya kwakwe. (Amalu. 40:8) Albert atile, “Natendeke ukupepa kuli Lesa. Pa kubala calekosa. Naleipatikisha fye ukupepa. Lelo, mu nshita fye iinono, nalimwene ukuti nkaba uwacindama kuli Lesa nga ndecita icalungama. Ici calengele natendeka ukwalula imibele yandi.” Nga wapalama kuli Yehova kuti watendeka ukutemwa ifyo afwaya tulecita.—Amalu. 25:14; Yako. 4:8.

Tontonkanya pa cangalo waishiba ukuteya pamo nga isolo nelyo umupila. Nga tawaishiba  ifyo bakonka pa kuteya, nelyo nga tawaishiba no kuteya, kuti uleumfwa ubunang’ani bwa kuteya. Lelo nga walishiba ifyo bakonka pa kuteya, walishiba na bwino ifya kuteya, bushe te kuti ulefwaisha ukuteya ifyo fyangalo lyonse fye inshita nga yamoneka? E fyo Lesa afwaya fwe Bena Kristu tulecita. Kanshi ulepekanishisha ukulongana. Ulecitako fyonse ifyo Umwina Kristu alingile ukucita. Nangu uli mwaice, kuti wakoseleshako na bantu bambi nga uli ne mibele isuma.—Heb. 10:24, 25.

E fyo ciba na pa kwebako bambi ifyo wasuminamo. Ukutemwa e kufwile ukulenga ulebebako, te kupatikishiwa fye. Ipushe we mwine auti: ‘Cinshi ndefwaila ukulaebako bambi pali Yehova? Cinshi calenga ukuti ntemwe Yehova? Ufwile ukulamona Yehova nga Shifwe uwakwata ukutemwa. Yehova alandile ukupitila muli Yeremia ukuti: “Mukamfwaya no kunsanga, pantu mukamfwaya no mutima wenu onse.” (Yer. 29:13, 14) Cinshi cingakwafwa ukufwaya Yehova? Jakub atile: “Nalyalwike mu fyo naletontonkanya. Naleya ku kulongana na mu kushimikila ukufuma fye ku bwaice, lelo ifi fintu naleficitila fye ico cine. Ilyo naishileishiba bwino Yehova no kuba cibusa wakwe e lyo natampile ukutemwa icine.”

Nga uleampana na bantu abasuma, ukalaipakisha umulimo wa kubila imbila nsuma. Ipinda lya mu Baibolo lilanda ukuti: “Uule-enda na ba mano akaba uwa mano.” (Amapi. 13:20) Eco ulepanga icibusa na bantu abafwaya ukubombela Yehova kabili abamubombela ne nsansa. Jola atile: “Nalekoseleshiwa ilyo naleangala na baice abengi ababikile amano ku kubombela Yehova. Natendeke ukulabombako lyonse umulimo wa kushimikila kabili uyu mulimo walendetela insansa.”

Umulimo wa Bafyashi

Jola atile: “Ndatasha sana abafyashi bandi pa kunsambilisha pali Yehova.” Cine fye, abafyashi kuti bayafwa abana babo ukulapepa Lesa wa cine. Umutumwa Paulo alembele ukuti: “Mwe bashibo, . . . [mulekusha abana benu] ukulingana no kusalapula kwa kwa Yehova no kukonkomesha kwakwe.” (Efes. 6:4) Uku kufunda ukwafuma kuli Lesa kulelanga bwino sana ukuti umulimo wa bafyashi, kufunda abana ifyo Yehova afwaya, te kubafunda ifyo bena bafwaya. Ukucila ukulaeba abana ukucita ifyo imwe mwalefwaya, kuti cawama sana nga ca kutila mwabafwa ukupampamina pa kulacita ifyo Yehova afwaya balecita mu mikalile yabo!

Kuti mulesambilisha abana benu amashiwi ya kwa Yehova no “kuyalandapo ilyo mwikele mu mayanda yenu na lintu mule-enda mu musebo na pa kulaala na pa kubuuka.” (Amala. 6:6, 7) Ba Ewa na ba Ryszard abakwata abana batatu abaume batile: “Twalelanda sana pa milimo yalekanalekana iyo bengabombela Yehova inshita yonse.” Cinshi cafuminemo? “Abana besu balembeshe mwi Sukulu lya Bulesa abene beka ninshi bacili abaice, kabili baishileba bakasabankanya, na mu kupita kwa nshita abene bapingwilepo ukubatishiwa. Awe bonse basukile baingila mu mulimo wa nshita yonse.”

 Calicindama ku bafyashi ukuba ne mibele isuma iyo abana bengakonka. Ba Ryszard batile, “Tatwalefwaya nangu panono ukuba ne mibele yabipa pa ng’anda e lyo no kubepekesha ukuba abasuma ku cilonganino.” E ico ipusheni ukuti: ‘Bushe abana bamona ukuti naba shani? Bushe balamona ukuti nalitemwa Yehova ukufuma pa nshi ya mutima? Bushe amapepo yandi no kusambilila Baibolo, filabalanga ifyo natemwa Yehova? Bushe ifyo imomba umulimo wa kushimikila, ifyo natemwa ukucita pa kulesha icitendwe, ifyo mona ifyuma, ne fyo nanda pa ba mu cilonganino, filalenga abana bandi bamona ukuti nalitemwa Yehova?’ (Luka 6:40) Abana bakalamona ifyo mucita cila bushiku, no kumona nga ca kuti ifyo mulanda filapusana ne fyo mucita.

Ukusalapula abana na ko kwalicindama ilyo mulebakusha. Lelo Icebo ca kwa Lesa citweba ‘ukusambilisha umwaice umo afwile ukubela.’ (Amapi. 22:6) Ba Ewa na ba Ryszard batile, “Twalesambilisha cila mwana eka ifya mu Baibolo.” Kwena abafyashi abene e bengamona nga kuti cawama ukusambilisha cila mwana eka. Te mulandu ne nshila mwasala, mulingile ukusambilisha cila mwana ukulingana ne fyo aba. Pa kucita ifi tamufwile ukupampamina fye pa cintu cimo lelo mulingile ukumona na fimbi ifingabafwa. Ku ca kumwenako, ukucila ukubeba fye ukuti inyimbo shimo shibi, bushe te kuti ciwame mwabalanga ifyo bengasala inyimbo ishisuma, ne fyo Baibolo ingabafwa ukucite co?

Abana benu kuti limbi balishiba bwino bwino ifyo mufwaya balekonka, kabili limbi kuti balemoneka no kuti balafikonka. Lelo mufwile ukubafika pa mitima. Ibukisheni ukuti, “amano ayaba mu mutima wa muntu yaba nga menshi mu cishima icitali, lelo uwiluka e ukatapamo.” (Amapi. 20:5) Muleiluka no kumona ifintu ifingalanga ukuti abana benu bali no bwafya nangu ca kuti tabulemoneka, e lyo no kubafwa ukwabula ukupoosa inshita. Ilyo mulebafwa, mwilabapeela imilandu, mulelanda amashiwi ayalanga ukuti mwalibabikako amano, kabili muleipusha amepusho ayalinga. Nalyo line, mwilabepushisha pa tuntu tonse fye. Nga namubabikako amano, mukabafika pa mitima kabili cikanguka ukubafwa.

 Ifyo Icilonganino Cingabafwa

Bushe mwe babomfi ba kwa Lesa te kuti ciwame mwala-afwa abaice mu cilonganino ukucindika icine cafuma kuli Lesa ico bapokelela? Nangu ca kutila bafyashi bakwata umulimo wa kufunda abana, abantu bambi mu cilonganino maka maka baeluda kuti babafwako. Calindama sana ukwafwa maka maka balya aba kuti umufyashi umo fye e Nte.

Finshi baeluda bengacita pa kwafwa abacaice ukutemwa Yehova no kulamona ukuti na bo balafwaikwa mu cilonganino kabili balicindama? Ba Mariusz, baeluda mu cilonganino icaba mu Poland, batile: “Baeluda bafwile ukulalanshanya sana na baice mu cilonganino ne ci calicindama nga nshi. Tabafwile ukulanda fye na bo nga bali na mafya, lelo bafwile ukucite co na pa nshita shimbi, napamo ilyo baleshimikila na bo, nelyo pa numa ya kulongana, atemwa pa nshita fye shimbi ilyo baleisha.” Kuti cawama nga mwaipusha abacaice pa fyo bamona icilonganino. Ukulanshanya nabo muli uyu musango, kuti kwalenga bapalama ku cilonganino no kulenga balamona ukuti na bo bene balafwaikwa mu cilonganino.

Nga ni mwe baeluda, bushe mulabikako amano ku kwishiba abaice ababa mu cilonganino mu mwenu? Nangu ca kutila ba Albert, abo tulandilepo, pali ino nshita ni baeluda, balikwete sana amafya ilyo balekula. Batile: “Ilyo nali umulumendo, nalekabila sana ukukoseleshiwa kuli baeluda.” Baeluda kuti balanga no kuti balasakamana abaice nga ca kuti balebapepelako ukuti babe bakapepa bakosa.—2 Tim. 1:3.

Cilawama ku bacaice ukulabombako imilimo mu icilonganino. Nga baleikala fye, kuti batampa ukubika amano ku kucita ifya muli cino calo. Bushe te kuti ciwame imwe mwe bakalamba mwalaya na bo mu kushimikila no kuleka baba ifibusa fyenu? Muleishako na bacaice, no kuba aba bucibusa ilyo muli na bo. Jola atile: “Nkashi umo painiya, alinsakamene sana. E o naile nankwe mu kushimikila pa muku wa kubalilapo ukuimina ne mwine.”

Ulingile Ukuisalila we Mwine

Mwe baice, yipusheni amuti: ‘Finshi mfwaya ukucita? Nga ca kuti nshilabatishiwa, bushe ndafwaisha ukubatishiwa?’ Ukutemwa Yehova ukufuma pa nshi ya mutima e kulingile ukulenga wafwaya ukubatishiwa. Taulingile ukubatishiwa pa mulandu wa kukonkelela ulupwa lobe.

Kanshi, leka Yehova abe Cibusa obe uwa cine cine, kabili uletemwa sana icine ca mu Baibolo. Ukupitila muli kasesema Esaya, Yehova alandile ukuti: “Wilasakamana, pantu nine Lesa obe.” Yehova takakulekeleshe nakalya nga watwalilila ukuba cibusa wakwe. Ukwabula ukutwishika akakukosha no ‘kukutungilila no kuboko kwakwe ukwa ku kulyo ukwa bulungami.’—Esa. 41:10.

[Futunoti]

[Icikope pe bula 4]

Esheni ukwishiba ifyaba mu mutima wa mwana wenu

[Icikope pe bula 6]

Ukutemwa Yehova e kufwile ukulenga wapingulapo ukubatishiwa