Nalisangile Ico Nabela no Bumi

Abashimika ili lyashi ni ba Gaspar Martínez

Ilyashi lyandi lipi. Lilelanda pa fyo nakuliile ku mushi e lyo naya ku kalale no kuyasanga ifyuma. Nomba mwalamona ukuti ifyuma nasangile te fyo nale-enekela.

NAKULIILE mu ncende ya ku mushi ukushaba no bulimi mu myaka ya ba 1930 mu citungu beta ati Rioja mu calo ca Spain. Ilyo nali ne myaka 10, nalifililwe ukukonkanyapo isukulu, lelo ninshi kwena nalishiba ukubelenga no kulemba. Natendeke umulimo wa kucema impaanga no kulima utumabala utunono pamo na bamunyinane 6.

Umulandu no bupiina, twaletontonkanya ukuti icacindama sana kukwata indalama ne fyuma. Twalekumbwa abakwete ifyuma. Lelo, shikofu inshita imo atwebele ukuti mu mushi wesu “e mwaba bakapepa bene bene pa ncende shonse alepitamo.” Taishibe ukuti mu kuya kwa nshita, abengi bali no kufuma mwi calici lya Katolika.

Natendeka Ukufwaya Ukwikalako Bwino

Naupile umukashana wa mu mushi mu mwesu uwe shina lya Mercedes. Tapakowele, twalikwete no mwana umwaume uwa kukusha. Mu 1957 twakuukile ku musumba wali mupepi uwa Logroño, kabili mu kuya kwa nshita, balupwa lwandi nabo balikuukile. Naishilesanga ukuti apo nali fye cibombebombe, calyafishe ukusanga incito ya kuti ndesungilamo ulupwa. Nalelanguluka nati ni kwi ningasanga ifya kungafwa. Natampile ukuya ku laibrari mu kufwayafwaya lelo nshaishibe ne fyo nalefwaya.

Naishileumfwa ukuti kwali programu ya pa cilimba umo baleafwilisha abantu ukusambilila Baibolo. Ilyo napwile iyi kosi ya mu makalata, aba mwi calici lya Evangelical balishile. Ilyo naile kwi calici lyabo pa miku ya kupenda, namwene ukuti abakulu bakulu mwi calici tabaleumfwana iyo. Nalilekele ukuyako, kabili natile amacalici yonse yaba fye cimo cine.

Natendeka Ukumfwikisha

Mu 1964, umulumendo we shina lya Eugenio alishile pa myesu. Ali ni Nte ya kwa Yehova, kabili e muku wa kubalilapo naumfwilepo ili calici. Na lyo line, nalefwaya sana ukulanda pa fya mu Baibolo. Ine naleti nalishiba sana ifya mu Baibolo. Pa kulanshanya nankwe, naleambula Amalembo ya mu Baibolo yamo yamo ayo nasambilile ilyo nalecita ilya kosi. Nangu cingati nale-esha ukulondolola ifisambilisho fimo ifya baProtestanti, mu mutima nalishibe ukuti nshaficetekelele.

Pa numa ya kulanshanyapo imiku ibili pa nshita yalepa, nasangile ukuti Eugenio ali ni kalapashi mu kubomfya Icebo ca kwa Lesa. Nangu ca kuti nalimucilile mu masambililo ya ku sukulu,  nalepapa ifyo alesanga amalembo no kunondolwela bwino umo yalola. Eugenio alinangile muli Baibolo ukuti tuleikala mu nshiku sha kulekelesha no kutila Ubufumu bwa kwa Lesa nomba line buli no kulenga icalo ukuba paradaise. Nalitemenwe cibi ica kuti nalefwaisha ukwishibilapo na fimbi.—Amalu. 37:11, 29; Esa. 9:6, 7; Mat. 6:9, 10.

Nalisumine ukusambilila nankwe Baibolo. Ifingi sana ifyo nalesambilila e muku wa kubalilapo ukufyumfwa, kabili fyalemfika pa mutima. Ifyo nasambilile fyalengele mone ukuti kanshi ubumi te bwa fye. Nasukile nasanga ifyo nalefwaya. Nomba filya nalefwaya ukuti mbe uwalumbuka mu bwikashi tafyakwete ncito, kabili nasangile ukuti ukushomboka no kufwaya incito ya kumpeela indalama ishingi tacacindama sana. Kabili nasambilile no kuti nangu fye kulwala ne mfwa Lesa akafifumyapo.—Esa. 33:24; 35:5, 6; Ukus. 21:4.

Ilyo line fye natampile ukushimikilako balupwa ifyo nalesambilila, nalebalondolwela ninshi nincincimuka no kucincimuka ukuti Lesa alilaya ukuti akaleta paradaise pe sonde apo abantu ba cishinka bakekala umuyayaya.

Balupwa Bapokelela Icine

Bwangu bwangu fye, twatampile ukulongana mu kalibumba akanono aka bantu mupepi na 12 lyonse pa Mulungu mu ng’anda ya batata mwaice pa kuti tulelanshanya ifya mu Baibolo. Twalepoosa ama-awala yabili nangu yatatu cila mulungu tulelanda fye pa fya mu Baibolo. Ilyo Eugenio amwene ukuti abengi pali balupwa lwandi balitemenwe ukusambilila Baibolo, apekenye ukuti alesambilila no lupwa lumo lumo.

Nalikwete balupwa bambi mwi tauni lya Durango, apali amakilomita 120 ukufuma apo naleikala, kabili takwali Nte nangu umo. E ico pa numa ya myeshi itatu, nalipokele cuti ku ncito pa kuti nkayebatandalila no kubashimikilako ifya mu Baibolo. Pa nshita nali kulya, twalepanga akalibumba ka bantu 10 cila cungulo, kabili nalebashimikilako ifya mu Baibolo mpaka ukufika na ku maca. Bonse balitemenwe ifyo baleumfwa. Ilyo nalefumako, nabashiilile amaBaibolo ne mpapulo shilanda pa fya mu Baibolo. Pa numa ya ifyo, twalelembeshanya amakalata ukumfwa ifyo ifintu file-enda.

Ilyo ba Nte bafikile kuli ili tauni lya Durango, ukushali umbi uwashimikileko ukufumyako fye ine, basangile abantu 18 balepembelela ukusambilila Baibolo. Ba Nte balipekenye ukuti ulupwa lumo na lumo lulesambilila Baibolo.

Ukufikila iyi nshita, umwina mwandi Mercedes talefwaya ukusambilila icine. Te kutila tasumine ifyaba mu Baibolo, lelo icalengele sana kutiina abantu. Pali yo nshita, Inte sha kwa Yehova balishibindile mu Spain, e ico aletila nalimo ubuteko kuti bwatamfya abana besu babili isukulu no kuti abantu bonse bali no kulatukankamba. Nomba ilyo amwene ukuti ulupwa lonse lwalesambilila icine, na o wine alefwaya ukusambilila.

Mu myaka fye ibili, balupwa lwandi ukufika kuli 40 balisangwike Inte kabili balibatishiwe ku kulangilila ukuipeela kwabo kuli Lesa. Balupwa lwandi nabo bene basangile ukuti ukubombela Lesa e kwacindamisha mu bumi. Naumfwile ukuti nalicitile icintu cimo icacindama sana. Twamwene ukuti Lesa alitupaalile no kutupeela ifyuma fya ku mupashi ifingi nga nshi.

Ubumi Bwalewaminako Ilyo Nalekula

Pa myaka yakonkelepo 20, nabikile sana amano ku kukusha abana bandi abaume babili no kubombako imilimo mu cilonganino. Ilyo ine no mwina mwandi Mercedes twakuukile ku Logroño, muli uyo musumba umwali abantu 100,000 mwali fye ba Nte 20. Tapakokwele, bampeele imilimo iingi iya kubomba mu cilonganino.

Lyena, ilyo nali ne myaka 56, baliisele akampani nalebombako, kabili naishileba ilofwa. Ukutula fye na kale nalefwaya sana ukubombako umulimo wa nshita yonse, e ico nashukile iyi nshita ukubomba bupainiya. Indalama sha penshoni bampeele shali ishinono nga nshi ica kuti twatampile fye ukushomboka mu mikalile. Umwina mwandi Mercedes atampile  ukubombako incito sha kuwamya. Twalikuminemo ukusunga ulupwa lwesu ukwabula ukubulisha ififwaikwa. Ncili nine painiya, kabili umwina mwandi na o alabombako bupainiya bwa kwafwilisha mu nshita mu nshita, kabili alaipakisha sana ukushimikila.

Imyaka iinono iyapita, umwina mwandi Mercedes aleshiila Merche bamagazini besu. Uyu mukashana alesambilila Baibolo ku bwaice. Merche aletemwa ukubelenga impapulo shesu kabili umwina mwandi alimwene ukuti Merche acili alitemenwe icine ca mu Baibolo. Awe asukile asumina ukusambilila Baibolo kabili atampile ukulunduluka bwino nga nshi. Lelo umwina mwakwe Vicente, ali ni cakolwa kabili libili libili balemutamfya incito. Ici calengele alefilwa ukusunga umukashi; kabili bucakolwa bwakwe bwalengele icupo ukuba na mafya yabipisha.

Umwina mwandi aebele Merche ukuti Vicente akalanshanye na ine, kabili alicitile fyo pa numa ya nshiku ishingi. Nalimutandalile imiku ne miku, kabili asukile na o asumina ukusambilila Baibolo. Vicente atampile ukucinja, alilekele ukunwa pa nshiku ishingi. Lyena pa milungu iingi, kabili e fyo asukile alekelela ukunwa. Imimonekele yakwe yaliwamineko, no lupwa lwakwe lwalikatene. Ulupwa lwakwe lonse, pamo no mukashi no mwana wabo umwanakashi, nomba batungilila icilonganino icinono icaba ku fishi fya Canary Islands.

Ukulolesha pa fyo Naipakisha

Nangu ca kuti balupwa lwandi abengi abasambilile icine imyaka ya ku numa balifwa, ulupwa lwesu lwatwalilila fye ukukula, kabili Lesa alatupaala icine cine. (Amapi. 10:22) Cilandetela sana insansa ukumona ukuti abengi nga nshi abasambilile icine ca mu Baibolo imyaka 40 iyapita, bacili balebombela Yehova mu cishinka pamo na bana babo e lyo na beshikulu babo!

Balupwa lwandi abengi ni ba Nte, kabili bamo ni baeluda bambi babomfi batumikila, e lyo bambi ni bapainiya. Umwana wandi umwaume umo abombela pa maofeshi ya Nte sha kwa Yehova ku Spain pamo no mukashi wakwe. Ilyo nasambilile icine no kuba Inte, mu Spain mwali fye ba Nte 3,000. Pali ino nshita nabacila pali 100,000. Nalitemwa sana umulimo wa nshita yonse, kabili ndatasha Lesa pa fyo naipakisha ukubomba umulimo wakwe. Nangu cingati nshafikile apatali mu masambililo ya ku sukulu, mu nshita mu nshita balantumako ukubomba umulimo wa kutandalila ifilonganino mu muputule.

Imyaka inono iyapita, nasangile ukuti umushi uo nakulilemo ino nshita cibolya. Ubupiina bwalengele abekashi ukusha amabala yabo na mayanda yabo no kuyafwaya ukwa kwikala ukwawemeko. Lelo, abengi, ukubikako fye na ine wine, twalisanga ifyuma fya ku mupashi ifya mutengo nga nshi. Twalisangile ukuti ukubombela Lesa e cacindamisha mu bumi no kuti ukubombela Yehova kulaleta insansa ishine shine.

[Icikope pe bula 32]

Balupwa ba kwa Munyinefwe Martínez ababa mu cine