Ukusambilishiwa na Lesa Cuma Icapulamo

“Nalisumina ukulufya fyonse pa mulandu wa cuma capulamo ica kwishiba Kristu Yesu.”—FIL. 3:8.

1, 2. Bushe Abena Kristu bamo basalapo ukucita cinshi, kabili mulandu nshi?

UKUFUMA fye ku bwaice, Robert alecita bwino sana ku sukulu. Ilyo ali fye ne myaka 8, kafundisha wakwe umo aile ku mwabo no kumweba ukuti nga atwalilila ukubombesha ku sukulu akafika apatali sana. Amwebele no kuti ale-enekela ukutila bushiku bumo akaba dokota. Na lintu ali ku sukulu lya sekondari, Robert alibombele bwino sana ica kutila alipeelwe ishuko lya kuya kwi sukulu likalamba ilya yuniversiti ilili lyonse ilisuma pa yaba mu calo ekala. Lelo Robert takonkelele aya masomo ayo abengi bengamona ukuti lishuko ilishimoneka. Ne calengele, ni co alefwaya ukubomba bupainiya bwa nshita yonse.

² Abena Kristu abengi, abaice na bakalamba, balakwata ishuko lyakweteko Robert, ilingalenga basambilila no kwingila incito ya pa muulu. Bamo balasuulako kuli aya mashuko pantu bafwaya ukubombela Lesa. (1 Kor. 7:29-31) Cinshi cilenga Abena Kristu pamo nga Robert ukubombesha mu mulimo wa kushimikila? Umulandu uukalamba wa kuti balitemwa Yehova, lelo balimona no kuti ukusambilishiwa na Yehova e cuma icacindamisha. Bushe pali ndakai mwalitontonkanyapo pa fyo ubumi bwenu bwali no kuba amubulaishiba icine? Ukutontonkanya pa mapaalo yamo ayo tuipakisha pa mulandu wa kusambilishiwa na Yehova kuti kwatwafwa ukulaibukisha ifyo imbila nsuma yacindama no kulenga twacincila mu kushimikila bambi.

Lishuko Ukusambilishiwa na Lesa

3. Twaishiba shani ukuti Yehova alafwaya ukusambilisha abantunse ababembu?

³ Yehova alafwaya ukusambilisha abantunse ababembu pantu musuma. Amashiwi ya kusesema ayaba pali Esaya 54:13 yalanda pa Bena Kristu basubwa ati: “Abana bobe bonse bakasambilishiwa kuli Yehova, no mutende wa bana bobe ukafula.” Ifyo aya mashiwi yalanda, e ficitika na ku “mpaanga shimbi” isha kwa Kristu. (Yoh. 10:16) Icilanga ici cishinka, kusesema ukulefikilishiwa muno nshiku. Esaya amwene mu cimonwa abantu ukufuma mu nko shonse baleya ku kupepa kwa cine. Alondolwele ukuti balelanda abati: “Iseni, natunine tuleya ku lupili lwa kwa Yehova, tuleya ku ng’anda ya kwa Lesa wa kwa Yakobo; kabili akatusambilisha imibele yakwe, kabili tukenda mu nshila shakwe.” (Esa. 2:1-3) Mwandini lishuko ilikalamba ukusambilishiwa na Lesa!

4. Bushe Yehova afwaya abo asambilisha ukuba shani?

⁴ Cinshi cifwaikwa pa kusambilishiwa na Lesa? Icifwaikwa sana kuba uwafuuka no kutemwa ukusambilila. Davidi alembele ukuti: “Yehova musuma kabili alilungama. . . . Akasambilisha abafuuka imibele yakwe.” (Amalu. 25:8, 9) Yesu na o atile: “Ndemulumbanya pa cintubwingi, mwe Tata, Shikulu wa muulu ne sonde, pantu mwalifishilisha ifi fintu ku ba mano na bacenjela, no kufisokolwela ku tunya.” (Luka 10:21) Bushe tamumfwa bwino ukupalama kuli Lesa ‘uupeela icikuuku cakwe ku baicefya’?—1 Pet. 5:5.

5. Cinshi calenga twaishiba Lesa?

⁵ Bushe fwe babomfi ba kwa Yehova ni ku maka yesu twishibila icine? Iyo. Na kuba, pa lwesu te kuti twishibe Lesa. Yesu atile: “Takuli uwingesa kuli ine kano Tata uwantumine, amukula.” (Yoh. 6:44) Yehova alakula abantu  abafuuka nge mpaanga ukupitila mu mupashi wa mushilo e lyo na mu mbila nsuma iishimikilwa. Aba bantu e betwa ati “ifisuma ifya mu nko shonse.” (Hag. 2:7) Bushe tamutasha ifi mwaba pali balya abo Yehova akulila ku Mwana wakwe?—Belengeni Yeremia 9:23, 24.

Ifyo Lesa Atusambilisha Filalenga Imibele Yesu Ukuwama

6. Bushe “ukwishiba Yehova” kwafwa shani abantu?

⁶ Mu kusesema Esaya alembele, abomfeshe icilangililo pa kulanda pa fyo abantu balealula imibele muli shino inshiku shesu. Abantu abali kale aba lubuli nomba baliba no mutende. (Belengeni Esaya 11:6-9.) Balya abapatene inshita imo pa mulandu wa kupusana imishobo, ifyalo, imitundu, nelyo intambi, balisambilila ukumfwana. Cimo no kuti ‘balifula bapanga babo ukuti babe baplao.’ (Esa. 2:4) Cinshi calenga baluke? ‘Balishiba Yehova’ kabili balakonka ifyo abasambilisha. Nangu ca kutila ababomfi ba kwa Lesa tabapwililika, balikatana sana na bamunyinabo mu fyalo fyonse. Filya abantu abengi pano calo batemwa imbila nsuma na filya ileta ifisabo fisuma, e citulanga ukuti ukusambilishiwa na Lesa cuma icapulamo.—Mat. 11:19.

7, 8. (a) Finshi fimo fimo “ifyaba nga malinga ayakosa” ifyo abasambilishiwa na Lesa bawisha? (b) Cinshi cilanga ukuti ukusambilishiwa na Lesa kulalenga Yehova ukulumbanishiwa?

⁷ Umutumwa Paulo apashenye umulimo uo ababomfi ba kwa Lesa babomba ku bulwi bwa ku mupashi. Alembele ukuti: “Ifyanso fya bulwi bwesu te fya buntunse, lelo fyanso fya maka ifyo Lesa atupeele ku kuwisha fyonse ifyaba nga malinga ayakosa. Pantu tulewisha amatontonkanyo yalubana na conse icasansabala icilwisha ukwishiba Lesa.” (2 Kor. 10:4, 5) Bushe finshi fimo fimo “ifyaba nga malinga ayakosa” ifyo abasambilishiwa na Lesa balubulwako? Fisambilisho fya bufi ifititikisha abantu, ukutiina imipashi, e lyo na mano ya buntunse, nga kulumbulako fye ifinono. (Kol. 2:8) Ukusambilishiwa na Lesa kulafwa abantu ukutaluka imibele yabipa no kukwata imibele iyo Lesa atemwa. (1 Kor. 6:9-11) Kulalenga ulupwa ukuba ulwa nsansa. Kabili kulalenga abantu abashakwata isubilo baba ne nsansa. Aya e masambililo ayo tukabila pali lelo.

⁸ Imibele imo iyo Yehova asambilisha abantu ukukwata, bufumacumi, nga fintu twalaumfwa mu lyashi twalalandapo. (Heb. 13:18) Umwanakashi umo ku India atendeke ukusambilila Baibolo kabili mu kupita kwa nshita, aishileba kasabankanya uushabatishiwa. Bushiku bumo ilyo alebwelela ku ng’anda pa numa ya kubomba pa bukuule bwa Ng’anda ya Bufumu, asangile ka ceni ka mu mukoshi aka golde pa nshi mupepi ne citesheni ca mabasi. Umutengo wa kako, madola ya ku America 800 (ukucila pali 4 milioni kwacha). Nangu ca kutila uyu mwanakashi ali mupiina, atoolele aka ka ceni no kukatwala ku kapokola. Kapokola asangile alipapile sana! Pa numa kapokola umbi amwipwishe ukuti, “Cinshi waletela aka ka ceni?” Alondolwele ukuti, “Ukusambilila Baibolo kwalingafwa ukwaluka, ndi mufumacumi nomba.” Kapokola alitemenwe sana, kabili aebele eluda washindike uyu mwanakashi ku kapokola ukuti: “Muli cino calo mwaba abantu ukucila pali 38 milioni. Nga kuti mwayafwa abantu 10 pali aba ukuba ngo yu mwanakashi, icalo cesu kuti cawama.” Bushe tatutasha Yehova pa bantu ubwingi abacita ifisuma pa mulandu wa kusambilishiwa na Lesa?

9. Cinshi cilenga abantu ukwalula imibele yabo?

⁹ Abantu balalula imibele yabo pa mulandu wa maka Icebo ca kwa Lesa cakwata aya kwalula abantu, na pa mulandu wa kuti Yehova alabafwa ukupitila mu mupashi wakwe uwa mushilo. (Rom. 12:2; Gal. 5:22, 23) Pa Abena Kolose 3:10 patila: “Fwaleni ubuntu bupya, ubulelengwa cipya cipya ukulingana ne cipasho ca kwa Kalenga wa buko ukupitila mu kwishiba bwino bwino icine.” Amashiwi yaba mu Cebo ca kwa Lesa, Baibolo, yalikwata amaka ya kusokolola ifyo umuntu aba lwa nkati, no kumwalula mu fyo atontonkanya ne fyo amona ifintu. (Belengeni AbaHebere 4:12.) Umuntu nga aishiba Amalembo bwino bwino no kulakonka amafunde ya kwa Yehova ayalungama, kuti aba cibusa wa  kwa Lesa, no kukwata isubilo lya kwikala umuyayaya.

Yehova Alatwafwa Ukuipekanya ku fya ku Ntanshi

10. (a) Cinshi twingalandila ukuti Yehova fye e wingatwafwa ukuipekanya ku fya ku ntanshi? (b) Finshi fikacitika pano isonde lyonse ifikapapusha abantu?

¹⁰ Yehova e wingatwafwa fye ukuipekanya pantu alishiba ifikacitika ku ntanshi. E wasala ne fyo abantunse bakekala. (Esa. 46:9, 10) Ukusesema kwaba mu Baibolo kusokolola ukuti “ubushiku ubukalamba ubwa kwa Yehova nabupalama.” (Sefa. 1:14) Ifyo Amapinda 11:4 yalanda pali ubu bushiku fikafikilishiwa. Yatila: “Ifyuma tafyakaafwe nangu panono mu bushiku bwa bukali, lelo ubulungami bukapokolola umuntu ku mfwa.” Ilyo inshita ya kwa Yehova iya kupingula abantu no konaula icalo ca kwa Satana ikafika, icikatwafwa fye ukupusuka ni bucibusa bwesu na Yehova, indalama tashakatwafwe. Na kuba, pali Esekiele 7:19 patila: “Bakapoosa silfere yabo mu misebo, na golde yabo ikaba ica bunani.” Nga tuleibukisha ifi, tukeshiba ifyacindama ifyo tufwile ukulacita pali nomba.

11. Ni nshila nshi imo iyo ukusambilishiwa na Lesa kutwafwilamo ukuipekanya ku fya ku ntanshi?

¹¹ Inshila imo iyo ukusambilishiwa na Lesa kutwafwilamo ukupekanishisha ubushiku bwa kwa Yehova ubuleisa, kutwafwa ukwishiba ifyacindama ifyo tulingile ukubikako amano. Umutumwa Paulo alembeele Timote ukuti: “Konkomesha aba fyuma muli cino calo ukuti belaitakisha, nangu ukucetekela ifyuma ifishibelelela, lelo balecetekela Lesa.” Nangu ca kutila tatwakwata indalama ishingi, uku kufunda ukwafuma kuli Yehova kuti kwatwafwa. Kuti kwatwafwa ukucita cinshi? Mu nshita ya kulabombesha fye ukuti tukwate ifyuma, tufwile ukubika sana amano ku “kulacita ifisuma” na ku “kulabomba sana imilimo iisuma.” Nga tulebika amano ku mulimo wa kwa Lesa, ‘tukaisungila fwe bene umufula uusuma uwa kukuulapo ku ntanshi.’ (1 Tim. 6:17-19) Ukuipeelesha ukucite fi fintu kulanga ukuti twalikwata amano, pantu, nga fintu Yesu asosele, “umuntu kuti amwenamo shani nga anonka icalo conse lelo alofya umweo wakwe?” (Mat. 16:26, 27) Apo ubushiku bwa kwa Yehova nabupalama, cila muntu afwile ukuipusha ukuti: ‘Ni kwi nonganika ifyuma fyandi? Bushe mombela Lesa nelyo mombela Ifyuma?’—Mat. 6:19, 20, 24.

12. Mulandu nshi tushifwile ukunenukila nga ca kutila bamo basuula umulimo wesu?

¹² Pa “milimo iisuma” iyo Icebo ca kwa Lesa calandapo, umulimo wa kushimikila pa Bufumu no kulenga abantu ukuba abasambi, e mulimo wacindamisha uo Abena Kristu bafwile ukubomba. (Mat. 24:14; 28:19, 20) Nga filya cali ku Bena Kristu ba kubalilapo, bamo limbi kuti basuula umulimo wesu. (Belengeni 1 Abena Korinti 1:18-21.) Na lyo line ubucindami bwa bukombe tubila no bwa mulimo wa kwafwa abengatemwa ukuba ne citetekelo ilyo kucili inshita tabupwa.  (Rom. 10:13, 14) Ilyo tuleafwa abantu ukumona ubusuma bwaba mu kusambilishiwa na Lesa, na ifwe ninshi tulependelwa pa bakakwata amapaalo ayengi.

Abaipusula Fimo pa Kuti Babombele Lesa Balapaalwa

13. Finshi Paulo ashiile pa kuti abe kabila wa mbila nsuma?

¹³ Ilyo Paulo ashilaba Umwina Kristu, balemusambilisha ifyali no kulenga aba umuYuda umukankaala. Napamo ilyo ali ne myaka 13, alifumine mu musumba wa Tarsi uo afyalilwemo no kuya ku Yerusalemu mu kusambilishiwa na Gamaliele, kafundisha wa Mafunde. (Imil. 22:3) Mu kupita kwa nshita Paulo atendeke ukulumbuka ukucila abanankwe, kabili alitwalilila ifyo fine, nga ali mukankaala sana mu baYuda. (Gal. 1:13, 14) Ilyo apokelele imbila nsuma no kutendeka ukushimikila, alishiile fyonse ifi. Bushe Paulo alyumfwile ububi pa fyo acitile? Iyo. Na kuba alembele ukuti: “Nalisumina ukulufya fyonse pa mulandu wa cuma capulamo ica kwishiba Kristu Yesu Shikulu. Ni pa mulandu wakwe nashiliile fyonse kabili mfimona ukuti fisooso fye.”—Fil. 3:8.

14, 15. Mapaalo nshi tukwata ilyo “tubombela pamo na Lesa”?

¹⁴ Abena Kristu pali lelo balasha ifintu ifingi pa mulandu wa mbila nsuma nga filya Paulo acitile. (Marko 10:29, 30) Bushe tulacula nga twacite fyo? Robert uo tulandilepo mu paragrafu ya kubalilapo, alandiileko abengi ilyo atile: “Nshumfwa ububi ubuli bonse. Umulimo wa nshita yonse walilenga naba ne nsansa kabili walenga ‘nasonda no kumona ukuti Yehova musuma.’ Lyonse nga naipusula fimo pa kuti mombe umulimo wa kwa Lesa, Yehova alampaala sana ica kuti ndakwata ifingi ukucila pa fyo njipusulako. Ciba kwati tapali ne fyo njipusula, pantu amapaalo yalafula sana!”—Amalu. 34:8; Amapi. 10:22.

¹⁵ Nga mwalibomba umulimo wa kushimikila no kusambilisha pa nshita ntali, na imwe mufwile mwalisonda no kumona ukuti Yehova musuma. Bushe kwaliko inshita ilyo mwailwike ukuti umupashi wakwe e wamwafwile ilyo mwaleshimikila imbila nsuma? Bushe kwaliko inshita mwamwene abantu basekelela ilyo Yehova aiswile imitima yabo no kuleka baumfwikisha ubukombe? (Imil. 16:14) Bushe Yehova alimwafwa ukupwisha amafya yamo, napamo ukulenga mwakwata ne shuko lya kubombesha mu mulimo wakwe? Bushe Yehova alimwafwapo ukutwalilila ukumubombela mu nshita ya mafya ilyo mwaumfwile ukuti tamukwete amaka ya kucite co? (Fil. 4:13) Nga twamona ifyo Yehova atwafwa ilyo tuleshimikila,  tatutwishika ukuti e ko aba, kabili tulapalama sana na kuli ena. (Esa. 41:10) Bushe te paalo ‘ukulabombela pamo na Lesa’ muli uyu mulimo ushaikulila uwa kusambilisha abantu pali Yehova?—1 Kor. 3:9.

16. Bushe mumfwa shani pa mulimo mubomba na pa fyo muipusula pa kuti mulesambilisha abantu pali Lesa?

¹⁶ Ilyo bacili abomi, abantu abengi balafwaya ukucita fimo ifishingalabwa. Nomba twalimona uko ilingi line ne fintu ifikalamba ifyo abantu bacita muno nshiku filabwa mu kwangufyanya. Lelo umulimo wa kwa Yehova uulenga ishina lyakwe ukucindikwa uo tubombako muno nshiku, ukwabula no kutwishika tawakalabwe. Na ku ntanshi, abantu ba kwa Yehova bakalaulandapo fye lyonse. (Amapi. 10:7; Heb. 6:10) Shi natucindike ishuko twakwata ilya kubombako umulimo uushakalabwe, uwa kusambilisha abantu pali Yehova.

Kuti Mwayasuka Shani?

• Bushe Yehova afwaya abo alesambilisha bakwata imibele nshi?

• Bushe ukusambilishiwa na Lesa kwafwa shani abantu ukuwamya imibele yabo?

• Bushe ukwafwa abantu ukwishiba Lesa kutuletela amapaalo nshi?

[Amepusho]

[Icikope pe bula 23]

Abasambilishiwa na Yehova balekatana sana na bamunyinabo mu fyalo fyonse

[Icikope pe bula 24]

Bushe te paalo ‘ukulabombela pamo na Lesa’?