Amepusho Ukufuma ku Babelenga

Finshi twingasambilila ku mashiwi yaba pa Amapinda 24:27?

Uwalembele Amapinda afundile umulumendo umo ati: “Bomba imilimo yobe iya pa nse, ulime ne bala. E lyo uye no kukosha aba mu ng’anda yobe.” Cishinka nshi ili lembo lilandapo? Cishinka ca kuti ilyo umwaume ashilaupa no kukwata abana, alingile ukuipekanya bwino. Tafwile ukulaba ukuti ukusakamana abakashi na bana mulimo wakwe.

Ku numa, limo ici cikomo calelondololwa ukuti, umulume kabili wishi afwile ukulabomba incito ya ku mubili e lyo ne ncito ya kukosha nelyo ukukoselesha ulupwa lwakwe ukupitila mu kubasambilisha pali Lesa na pali Baibolo. Nangu ca kuti ici cishinka kabili na Malembo e fyo yakoselesha umwaume ukucita, cimoneka kwati te cishinka icikalamba ico ici cikomo cilandapo. Mulandu nshi twalandila ifyo? Pali imilandu ibili.

Umulandu wa kubalilapo wa kuti, ilyo ici cikomo cilanda pa kukosha ulupwa, te pa kukoselesha umukashi na bana abo umwaume akwata kale cilandapo. Lelo, nga kukonka fye, amashiwi ya kuti ukukosha aba mu ng’anda yapilibula ukukuula ing’anda. Ishiwi lyapilibulwa ukuti “ukukosha” mu mampalanya lipilibula no kuti ukukwata ulupwa, e kutila ukuupa no kukwata abana.

Umulandu walenga bubili wa kuti ici cikomo cikomaila pa kucita ifintu bwino bwino mu kukonkana, e kutila ukubalilapo ukucita icifwile ukwise ntanshi e lyo mwakonkeshapo cimbi. Bushe ninshi ili lembo liletweba ukuti tulingile ukubalilapo ukucita ifya ku mubili e lyo twakonkeshapo ifya ku mupashi? Awe iyo!

Pa nshita ilyo ifyalembwa mu Baibolo fyalecitika, umwaume nga alefwaya “ukukosha aba mu ng’anda [yakwe],” nelyo ukuupa no kukwata abana, aleipusha ukuti, ‘Bushe ninjipekanya bwino ukusakamana umukashi na bana abo twingakwata?’ Ilyo umwaume ashilaupa, alebomba, kabili alekwata amabala. E mulandu wine, Baibolo ya Today’s English Version yapilibwila ici cikomo ati: “Wikuula ing’anda no kukwata ulupwa ukufikila amabala yobe yapya, kabili kuti wasanga ubwikalo.” Bushe na lelo e fyo cifwile ukuba?

Ee. Uulefwaya ukuupa alingile ukuipekanya bwino pa kuti akalesunga bwino ulupwa lwakwe. Nga ca kuti ali na maka, alingile ukulabomba. Kwena, ukubombesha kwa mwaume mu kusunga ulupwa lwakwe takulingile ukupelela fye mu kupeela ulupwa lwakwe ifya ku mubili. Icebo ca kwa Lesa citila umwaume uushisakamana ulupwa lwakwe mu fyo lukabila, mu matontonkanyo, na mu fya kwa Lesa ninshi abipa ukucila no ushatetekela! (1 Tim. 5:8) Kanshi, ilyo umulumendo alepekanya ukuupa no kukwata abana ku ntanshi, alingile ukuipusha amepusho pamo nga aya: ‘Bushe ninjipekanya bwino bwino ukusunga ulupwa lwandi no kubapeela ifyo bakabila? Bushe ninjipekanya bwino ukulatungulula ulupwa lwandi mu fya mapepo? Bushe nkalatungulula lyonse isambililo lya Baibolo ilya lupwa?’ Icebo ca kwa Lesa cilakoselesha sana abaume ukubomba iyi milimo yacindama.—Amala. 6:6-8; Efes. 6:4.

Kanshi umulumendo uulefwaya ukuupa alingile ukutontonkanyapo sana pa kufunda kwaba pa Amapinda 24:27. Umukashana na o kuti cawama nga aipusha amepusho yapalako pa kuti eshibe nga naipekanya ukubomba bwino imilimo umukashi na nyina akwata. Abaupana nabo kuti baipusha ifipusho fimo fine ilyo baletontonkanya pa kukwata abana. (Luka 14:28) Abantu ba kwa Lesa nga balekonka uku kufunda, te kuti balekwata sana amasakamika kabili kuti baba ne nsansa mu lupwa lwabo.

[Amashiwi pe bula 12]

Mepusho nshi umulumendo alingile ukuipusha pa cupo?