Bushe ‘Mwalilimbwa no Kukuulwa pa Mufula’?

BUSHE mwalimonapo ifyo icimuti icikulu cipungaila nga kuli icimwela icikalamba? Icimuti cilatenkana sana, lelo taciwa. Mulandu nshi? Pantu cilakwata imishila iyakosa iyaingila sana mu mushili. Na ifwe bene kuti twaba nga ici cimuti. Ilyo tuli na mafya ayengi, na ifwe kuti twashipa nga ca kutila “twalimbwa no kukuulwa pa mufula.” (Efes. 3:14-17) Mufula nshi uyu wine?

Icebo ca kwa Lesa citila: “Kristu Yesu umwine aba e libwe lya pa koona ilya mu mufula wa kukuulapo” icilonganino ca Bwina Kristu. (Efes. 2:20; 1 Kor. 3:11) Fwe Bena Kristu twakoseleshiwa ‘ukulakonka ifyo afwaya, no kuba abalimbwa muli ena kabili abakuulwa muli ena no kuba ne citetekelo icakosa.’ Nga tulecite fyo, tukalashipikisha amesho yonse ayenganasha icitetekelo cesu, pamo fye na yalya ayeshila mu “mashiwi ya kunashanasha” aya bantu ba “bucenjeshi.”—Kol. 2:4-8.

“Ifyaba Ubwipi no Butali no Kulepa no Kushika”

Nomba cinshi cingatwafwa ukuba ‘abalimbwa’ no “kuba ne citetekelo cakosa”? Cimo icingatwafwa sana ukuba abalimbwa, kuba no mute wa kubelenga Baibolo, Icebo ca kwa Lesa. Yehova afwaya twakwata “amaka ya kulingulula pamo na ba mushilo bonse ifyaba ubwipi no butali no kulepa no kushika” kwa cine. (Efes. 3:18) Kanshi takuli Umwina Kristu uufwile ukumona kwati icacindama kwishibako fye patali patali ifyo Baibolo isambilisha, atemwa ukwishibako fye “ifya kubalilapo” ifyaba mu Cebo ca kwa Lesa. (Heb. 5:12; 6:1) Lelo, bonse fye tulingile ukumfwikisha icine caba mu Baibolo.—Amapi. 2:1-5.

Nomba ici tacilolele mu kuti icikabilwa fye pa kuba “abalimbwa kabili abakuulwa” mu cine, kwishiba ifingi ifyaba mu Baibolo. Pantu kwena na Satana alishiba ifyaba mu Baibolo. Kwaliba na fimbi ifikabilwa. Tulingile “ukwishiba ukutemwa kwa kwa Kristu ukwacila pa kwishiba.” (Efes. 3:19) Na lyo line nga ca kutila icilelenga tulesambilila, kutemwa Yehova no kutemwa icine, ukwishiba ifingi ifyaba mu Cebo ca kwa Lesa kukakosha icitetekelo cesu.—Kol. 2:2.

 Moneni nga Mwalishiba Umwalola aya Mashiwi

Ino nshita esheni ukumona nga mwalyumfwikisha fimo fimo ifyo Baibolo yalandapo. Ukucite fi kuti kwamukoselesha ukubikako sana amano ku kusambilila Baibolo pa lwenu. Intanshi, belengeni ifikomo fya kubalilapo ifyaba muli kalata Paulo alembeele abena Efese. (Moneni akabokoshi kaleti  “Ku Bena Efese.”) Pa numa ya kubelenga ifi fikomo, yipusheni amuti, ‘Bushe nalishiba umwalola amashiwi yaba muli ifi fikomo ayali mu filembo fyapindama muli aka kabokoshi?’ Natutendeke ukulanda pali aya mashiwi.

Ukusalilwa Kabela “Ilyo Icalo Tacilabako”

Paulo alembeele abasumina banankwe ati: “[Lesa] atusalile kabela ukuba abana bakwe muli Yesu Kristu.” Ca cine, Yehova alisaliile kabela ukuti kukaba abantunse abakayaikala ku muulu pamo no lupwa lwakwe ulwapwililika. Aba bana ba kwa Lesa abakafuma pano calo, abakateka na Kristu, bakaba ishamfumu kabili bashimapepo. (Rom. 8:19-23; Ukus. 5:9, 10) Ilyo Satana alwishishe ukuteka kwa kwa Yehova pa muku wa kubalilapo, ico alelandapo ca kutila, abantu Lesa apangile tabapwililike. Ala caliwama kanshi ifi Yehova asala bamo pali aba bene abantu ukuyabombako umulimo wa kufumya ububifi bonse pano isonde ukusanshako fye na Satana Kaseebanya uwabuleta! Lelo Yehova tasaliile kabela umuntu umo na umo uwali no kuba umwana wakwe no kuyaikala ku muulu. Ico Lesa asaliile kabela ca kutila, kukabe ibumba lya bantu abakateka na Kristu mu muulu.—Ukus. 14:3, 4.

“Calo” nshi Paulo alelandapo ilyo alembeele Abena Kristu banankwe ukuti bena nge bumba  lyonse basalilwe “ilyo kushilaba icalo”? Talelanda pa nshita ilyo Lesa talabumba icalo nelyo abantu. Ico kuti calanga ukuti Lesa takwata mulinganya. Nga cali fyo, Lesa te kuti apeele Adamu na Efa umulandu, pantu ninshi mwine ateyenye ilyo tabalabumbwa no kubumbwa ukuti bakabembuke. E co, ni lilali Lesa asaliile kabela ifyo ali no kupwisha ubwafya Adamu na Efa baletele ilyo bakonkelele Satana no kupondokela Lesa Mulopwe? Yehova acitile ico ilyo abafyashi besu aba kubalilapo bapondweke. Lelo iyi nshita ninshi takulaba icalo atemwa abantunse abashapwililika abali no kwisalubulwa.

“Ukulingana no Bukulu bwa Cikuuku ca kwa Lesa”

Mulandu nshi Paulo asosele ukuti ifyalandwapo mu fikomo fya kubalilapo mwi buuku lya bena Efese fyacitilwe “ukulingana no bukulu bwa cikuuku ca kwa Lesa”? Ni co alefwaya abantu beshibe ukuti Yehova aitemenwe fye ku luse lwakwe ukulubula abantunse.

Nga kukonka fye, tapaba umuntu nangu umo pali ifwe uwalingile ukupusuka. Lelo pa mulandu wa kuti Yehova alitemenwe sana abantunse, apekenye ukuti tukalubulwe. Nga twatontonkanya pa kukanapwililika kwesu no lubembu lwesu kuti twamona ukutila nga fintu Paulo asosele, icikuuku ca kwa Lesa e calenga tulubulwe.

Inkama ya kwa Lesa iya Kufwaya Kwakwe

Pa kubala, Lesa tasokolwele ifyo ali no kufumyapo ububi ubo Satana aletele. Yali ni “nkama” ya kwa Lesa. (Efes. 3:4, 5) Lelo pa numa, ilyo icilonganino ca Bwina Kristu catendeke, Yehova alisokolwele ifyo ali no kucita pa kuti filya alefwaya abantu ne calo ukuba pa kubala, fikacitike. Paulo alondolwele ukuti: “Ilyo inshita yafikile,” Lesa abikileko “ubutungulushi” e kuti inshila ya kubombelamo ifintu pa kuti akekatanye ifibumbwa fyakwe ifya mu muulu ne fya pe sonde.

Ukwikatanya ifibumbwa, ukwa kubalilapo kwatendeke pa Pentekoste mu mwaka wa 33 C.E. ilyo Yehova atampile ukulonganika abakateka na Kristu mu muulu. (Imil. 1:13-15; 2:1-4) Ukwa bubili, kwali kulonganya abakekala pe sonde likaba paradaise ilikalatekwa no Bufumu bwa kwa Kristu, Mesia. (Ukus. 7:14-17; 21:1-5) Baibolo nga yatila “ubutungulushi,” te Bufumu bwa kwa Mesia ilandapo, pantu bwena bwatendeke ukuteka mu 1914. Lelo ubutungulushi ni nshila Lesa abombelamo no kutungulula ifintu pa kutila ukufwaya kwakwe ukwa kwikatanya ababa mu muulu na baba pano isonde kukafikilishiwe.

“Muletontonkanya nga Bakalamba”

Ukwabula no kutwishika, ukusambilila Baibolo pa lwenu kukamwafwa ukumfwikisha “ubwipi no butali no kulepa no kushika” kwa cine. Lelo, mufwile na imwe mwalimona ukuti imitabotabo tukwata yalilenga cayangukila Satana ukulalafya abantu ku kusambilila Baibolo nelyo ukulekelela fye ukusambilila. Te kwesha ukumuleka akacite co kuli imwe. Bomfyeni “amano” Lesa amupeela pa kuti “muletontonkanya nga bakalamba” mu fya kwa Lesa. (1 Yoh. 5:20; 1 Kor. 14:20) Mulingile ukwishiba ico mwashininkishisha ukuti ifyo mwasumina fya cine. Nga mwacite fyo lyonse ‘mukala-asuka abamwipusha pe subilo lyenu.’—1 Pet. 3:15.

Amuba mu Efese ilyo kalata ya kwa Paulo baibelengele, bushe ifyo alembele nga tafyalengele mwafwaya “ukwishiba bwino bwino Umwana wa kwa Lesa”? (Efes. 4:13, 14) Tatuletwishika ico! Kanshi lekeni amashiwi ya kwa Paulo yamulenge ukucita cimo cine pali lelo. Ukutemwa sana Yehova no kwishiba bwino bwino Icebo cakwe kukalenga mukabe “abalimbwa kabili abakulwa pa mufula,” wa kwa Kristu. Ukucite fi, kukalenga muleshipikisha amesho yonse ayo Satana engaleta pali imwe ilyo inshita ya kufumyapo ububifi umupwilapo tailafika.—Amalu. 1:1-3; Yer. 17:7, 8.

[Akabokoshi ne Cikope pe bula 27]

 “Ku Bena Efese”

“Abe uwacindikwa Lesa kabili Wishi wa kwa Shikulwifwe Yesu Kristu, pantu pa mulandu wa kukonka Kristu, Lesa alitupeela amapaalo ya mupashi mu muulu. Ilyo icalo tacilabako, ninshi Lesa alitusala kale pa kuti tube aba mushilo kabili ababula akalema ku cinso cakwe mu kutemwa. Pantu Lesa atusalile kabela ukuba abana bakwe muli Yesu Kristu. Ni ku kutemwa fye umwine afwaile ukuti cibe fi, pa kuti Lesa alumbanishiwe pa cikuuku cakwe icacindama ico atulangile ukupitila mu Mwana wakwe uwatemwikwa. Kristu alitulubula ku mulopa wakwe, kabili umulopa wakwe walenga ukuti tubelelwe uluse pa membu shesu, ukulingana no bukulu bwa cikuuku ca kwa Lesa. Atulangile icikuuku icikalamba nga nshi no kutupeela amano yonse no kwiluka, pantu afwaile ukuti twishibe inkama ya kufwaya kwakwe. Inkama ya kwa Lesa ilomfwana no kufwaya kwakwe uko apangile mu mano yakwe umwine ukwa kubikako ubutungulushi ilyo inshita yafika, no ku kufwaya kwakwe kwa kulonganya na kabili ifintu fyonse muli Kristu, ifya mu muulu ne fya pano isonde.”—Efes. 1:3-10.