Amepusho Ukufuma ku Babelenga

Bushe nkashi afwile ukufwala icifimbo ku mutwe ilyo alepilibula amalyashi ya Baibolo mu lulimi lwa bacibulu pa kulongana kwa cilonganino, pa kulongana kwaibela nelyo ukwa muputule e lyo no kwa citungu?

Nga kukonka fye, umwanakashi Umwina Kristu afwile ukufwala icifimbo ku mutwe ilyo alebomba imilimo ya bulesa iya mulume wakwe nelyo iya mu cilonganino iibombwa na baume babatishiwa. Ici cumfwana na mashiwi ayo umutumwa Paulo alandile aya kuti “umwanakashi onse uulepepa nalimo uulesesema nafimbulwa ku mutwe, alenga umutwe wakwe insoni” pantu “umutwe wa mwanakashi mwaume.” (1 Kor. 11:3-10) Nga ca kuti nkashi afwala ku mutwe icifimbo icalinga pa nshita alingile ukucifwala, cishibilo ca kunakila ku kutantika kwa kwa Lesa ukwa mu cilonganino ca Bena Kristu.—1 Tim. 2:11, 12. *

Nomba, inga ca kutila munyinefwe e ulelanda ilyashi e lyo nkashi alelipilibwila mu lulimi lwa bacibulu, bushe afwile ukufwalako icifimbo? Ca cine ukuti nkashi te ulelanda ilyashi lelo alebomfiwa fye ukufisha ifyebo ku bali mwi bumba. Uulesambilisha ni munyinefwe te nkashi iyo pantu ena alepilibula fye. Nangu cibe fyo, paliba ubupusano ubukalamba pa kupilibwila ilyashi mu lulimi lwa ba cibulu e lyo na mu citundu cimbi. Muli ifi fitundu fimbi, ibumba kuti lilelolesha na kalanda no kukutika kuli kapilibula. Lelo, ukupusanako no lulimi lwa bacibulu, bankashi abapilibula amalyashi muli ishi shine ndimi tulanda ilingi line tababa apa kuti onse alebamona. Inshita shimo, kuti baikalako no kwikala ilyo balepilibula nelyo nga ca kuti nabeminina balolesha kalanda ukucila ukulolesha ibumba. E ico tacilingile ukuti nkashi afwale icifimbo ku mutwe ilyo alepilibwila mu ndimi ishi shine tulanda.

Ukulunda pali ifyo, pa mulandu wa kulunduluka mu fya kupangapanga ifibomfiwa pa  kupilibula amalyashi mu lulimi lwa bacibulu, ilingi line uulepilibula e o ibumba limona. Icikope ca kwa kapilibula e cimonekela pali TV, lelo kalanda ena limbi te kuti bamulangeko no kumulanga. Kanshi kuti calinga ukuti nkashi uulepilibwila mu lulimi lwa bacibulu afwaleko icifimbo ku mutwe pa kuti cimoneke ukuti te ulelanda ilyashi lelo ni kapilibula fye.

Ninshi nomba cakulaba shani kuli bankashi abapilibwila mu lulimi lwa bacibulu amalyashi ya mwi Sukulu lya Bulesa, ifilangililo, no kwasukapo kwa bamunyinefwe pa kulongana kwe Sambililo lya Baibolo Ilya pa Cilonganino, Ukulongana kwa Mulimo, ne Sambililo lya Ulupungu lwa kwa Kalinda? Bushe bafwile ukufwalako icifimbo ku mutwe ilyo balebomba uyu mulimo? Cilemoneka ukuti te lyonse cingalinga nkashi ukufwala icifimbo, pantu bonse mwi bumba bafwile ukwishiba ukuti te uletungulula ukulongana. Ku ca kumwenako te kuti afwale icifimbo nga ca kutila alepilibula ifyo abali mwi bumba baleasuka, amalyashi ya bankashi, nelyo ifilangililo. Lelo nga ca kutila alepilibula ilyashi lya kwa munyina, nga alepilibwilako katungulula wa Ulupungu lwa kwa Kalinda nelyo katungulula we Sambililo lya Baibolo Ilya pa Cilonganino, nelyo nga e uletungulula mu kwimba inyimbo, afwile ukufwalako icifimbo. Mu kati ka kulongana, nkashi kuti alepilibwila bamunyina, bankashi, abana, na baeluda. Pali uyu mulandu, kuti cawama afwalila fye limo icifimbo pa kulongana konse.

[Futunoti]