Cindikeni Icifulo Cenu Mu Cilonganino

“Lesa abikile ifilundwa mu mubili, cimo cimo ukulingana ne fyo atemenwe.”—1 KOR. 12:18.

1, 2. (a) Twaishiba shani ukuti cila muntu kuti asanga icifulo mu cilonganino no kucicindika? (b) Mepusho nshi twalalandapo muli cino cipande?

UKUTULA fye mu nshiku sha bena Israele, Yehova atungulwila no kusakamana abantu bakwe mu lukuta, e kutila mu cilonganino. Ku ca kumwenako, ilyo abena Israele bacimfishe umusumba wa Ai, Yoshua “abelengele amashiwi yonse ayali mu mafunde, ipaalo ne citiipu, ukulingana na fyonse ifyalembelwe mwi buuku lya mafunde . . . pa ntanshi ya lukuta lwa bena Israele.”—Yosh. 8:34, 35.

² Mu nshita ya batumwa, umutumwa Paulo aebele Timote uwali ni eluda, ukuti icilonganino ca Bena Kristu ni “ng’anda ya kwa Lesa” kabili “luceshi apashintilila icine.” (1 Tim. 3:15) “Ing’anda ya kwa Lesa” pali lelo cilonganino ca Bena Kristu ba cine conse. Mu cipandwa 12 ica kalata wa ntanshi uo Paulo alembeele abena Korinti, apashenye icilonganino ku mubili wa muntu. Asosele ukuti ifilundwa fyonse filakabilwa nangu ca kuti fibomba imilimo yapusanapusana. Paulo alembele ati: “Lesa abikile ifilundwa mu mubili, cimo cimo ukulingana ne fyo atemenwe.” Kabili atile “ifilundwa fya mubili ifyo tumona ukuti tafyacindama sana, e fyo tucindika sana.” (1 Kor. 12:18, 23) Kanshi, umulimo wa Mwina Kristu umo umulungami mu ng’anda ya kwa Lesa tawacindama nelyo ukubipa ukucila uwa Mwina Kristu  munankwe. Wapusana fye. Nomba, kuti twacita shani pa kusanga icifulo mu cilonganino ca kwa Lesa kabili kuti twacicindika shani? Finshi ifingakuma icifulo cesu mu cilonganino? Kabili kuti twacita shani pa kuti ‘bonse balemona ukulunduluka kwesu’?—1 Tim. 4:15.

Kuti Twacindika Shani Icifulo Cesu?

3. Ni nshila nshi imo twingasangilamo icifulo mu cilonganino kabili iyo twingalangilamo ukuti twalicicindika?

³ Inshila imo twingasangilamo icifulo mu cilonganino no kulanga ukuti twalicicindika kulaumfwila “umusha wa cishinka kabili uwashilimuka” e lyo no mwiminishi wakwe, e kutila Ibumba Litungulula. (Belengeni Mateo 24:45-47.) Tufwile ukuiceeceeta ukumona nga tulomfwila umusha wa cishinka. Ku ca kumwenako, pa myaka iingi twalifundwa mu kulungatika pa mifwalile na pa fyo tufwile ukuba abapempenkana, pa fya kutambatamba, pa nyimbo, pa fya kuleseshamo icitendwe, na pa fya kutaluka ku fintu fyabipa ifyaba pa Intaneti. Bushe tulomfwila uku kufunda kusuma pa kuti tucingilile bukapepa bwesu? Nga pa mashiwi batukoselesha aya kuti tulekwata amapepo ya lupwa, bushe twalikonka uku kupanda amano no kusalapo icungulo cimo ica mapepo ya lupwa? Nga ca kuti tuli bashimbe, bushe tulasanga inshita ya kuisambilisha Icebo ca kwa Lesa? Yehova akatupaala ifwe umo umo kabili nge ndupwa nga ca kuti tulekonka ubutungulushi bwa musha wa cishinka.

4. Cinshi tufwile ukutontonkanyapo ilyo tulepingula pa milandu ya pa lwesu?

⁴ Bamo kuti batila, ifintu pamo nga ifya kutambatamba, inyimbo, imifwalile, no kupempenkana fintu ifyo umuntu umwine afwile ukuipingwila. Lelo, Umwina Kristu uwaipeela, uwacindika icifulo cakwe mu cilonganino, tatontonkanya fye pa fyo alefwaya ilyo alesala ifya kucita. Atontonkanya pa fyo Yehova amona uyo mulandu ukulingana ne fyo Icebo cakwe Baibolo, cilanda. Amashiwi yaba mu Baibolo yafwile ukuba nge ‘nyali ku makasa yesu, kabili ngo lubuuto mu nshila yesu.’ (Amalu. 119:105) Ca mano na kabili ukutontonkanya pa fyo ifintu tusala ukucita fikuma umulimo wesu uwa kushimikila ne fyo fikuma abantu bambi, aba mu cilonganino na ba ku nse.—Belengeni 2 Abena Korinti 6:3, 4.

5. Mulandu nshi tufwile ukutalukila umupashi wa kukanafwaya ukutungululwa?

⁵ “Umupashi uyo nomba ubomba mu bana bacintomfwa” uli fye mpanga yonse kwati ni filya umwela tupeema waba konse konse. (Efes. 2:2) Uyu mupashi kuti walenga twalatontonkanya ukuti tatukabila ukutungululwa no kuteyanya kwa kwa Yehova. Ifwe tatufwaya nangu panono ukuba nga Diotrefe, ‘uwalekaana no kusuusha fyonse ifyalefuma ku mutumwa Yohane.’ (3 Yoh. 9, 10) Tufwile ukutaluka uyu mupashi wa kukanafwaya ukutungululwa. Shi twilasosa nelyo ukucita ifilelanga ukuti tatwacindika inshila Yehova alebomfya pali lelo ukufishishamo ifyebo kuli ifwe. (Impe. 16:1-3) Lelo, tufwile ukucindika ishuko twakwata ilya kubombela pamo no musha wa cishinka. Kabili tufwile ukuibikilishako pa kuti tuleumfwila bakangalila mu filonganino twaba e lyo no kulabanakila.—Belengeni AbaHebere 13:7, 17.

6. Mulandu nshi tufwile ukulamwena ifyo ifintu fili mu mikalile yesu?

⁶ Inshila imbi twingalangilamo ukuti twalicindika icifulo cesu mu cilonganino kulamona ifyo ifintu fili mu mikalile yesu e lyo no kulabombesha pa kuti fye ‘tucindike umulimo wesu’ no kulenga Yehova acindikwe. (Rom. 11:13) Bamo balakumanisha ukuba bapainiya ba nshita yonse. Bambi baba mu mulimo wa nshita yonse uwaibela, e kutila bamishonari, bakangalila benda, e lyo na babombela pa Bethel. Bamunyinefwe abengi pamo ne nkashi balafwilishako mu mulimo wa kukuula Amayanda ya Bufumu. Abantu ba kwa Yehova abengi nga nshi balebombesha ukwafwa indupwa shabo ukulabombela Lesa kabili cila mulungu balabombako umulimo wa kushimikila. (Belengeni Abena Kolose 3:23, 24.) Tatuletwishika  ukuti nga twaipeela fye fwe bene ukulabombela Lesa kabili nga tuleibikilishako ukumubombela no mweo wesu onse, tukasanga icifulo mu cilonganino cakwe.

Ifintu Ifikuma Umulimo Wesu mu Cilonganino

7. Londololeni ifyo ifilecitika mu mikalile yesu fingakuma icifulo cesu mu cilonganino.

⁷ Calicindama ukumona bwino bwino ifyo imikalile yesu ili pantu, ifyo imikalile yesu ili, filakuma ifyo twingacita mu cilonganino. Ku ca kumwenako, icifulo ico munyinefwe akwata mu cilonganino calipusanako ne cakwata nkashi. Umushinku, ubumi, ne fintu fimbi na fyo filakuma ifyo twingacita mu mulimo wa kwa Yehova. Amapinda 20:29 yatila: “Ubusuma bwa balumendo maka yabo, no bucindami bwa bakote ni mfwi shabo.” Aba mu cilonganino abali mu mushinku wa bwaice kuti babomba imilimo iingi pa mulandu wa kuti bacili na maka, lelo abakalamba bena balakuula aba mu cilonganino ku mano yabo na ku fyo bapitamo. Tufwile na kabili ukwibukisha ukuti fyonse ifyo twingacita mu cilonganino ca kwa Yehova ni pa mulandu fye wa cikuuku ca kwa Lesa.—Imil. 14:26; Rom. 12:6-8.

8. Bushe ififwaya imitima yesu kuti fyakuma shani ifyo tucita mu cilonganino?

⁸ Icilangililo ca banankashi babili calatulanga umulandu na umbi uukuma icifulo cesu mu cilonganino. Bonse bapwishisha fye pamo isukulu lya ku sekondari. Bonse bali mu mibele imo ine. Abafyashi babo balibakoseleshe ukuti nga bapwisha isukulu bakatendeke bupainiya bwa nshita yonse. Cilya bapwisha isukulu, umo atendeka bupainiya bwa nshita yonse, umbi ena asalapo ukwingila incito. Cinshi basalila ifyapusana? Mulandu wa fyo umutima ufwaya. Cila muntu acita fye ukulingana ne fyo alefwaya. Bushe ifyo te fyo fwe bengi tucita? Tufwile ukutontonkanyapo sana pa fyo twingafwaya ukucita mu mulimo wa kwa Lesa. Bushe te kuti tulundeko imibombele yesu muli uyu mulimo, nangu ca kuti ici kuti calenga twa-alulako fimo fimo mu mikalile yesu?—2 Kor. 9:7.

9, 10. Finshi twingacita nga ca kutila tulefilwa ukubombesha mu mulimo wa kwa Yehova?

⁹ Inga nga ca kuti tatukwete umutima wa kubombesha mu mulimo wa kwa Yehova kabili tatulebomba ukulingana na maka yesu? Muli kalata Paulo alembeele abena Filipi, atile: “Lesa e ulebombela muli imwe, pa mulandu wa kufwaya kwakwe pa kuti mulefwaya e lyo no kucitapo cimo.” Ca cine, Yehova kuti abombela muli ifwe no kwalula ukufwaya kwesu.—Fil. 2:13; 4:13.

¹⁰ Mulandu nshi tushingepushisha Yehova ukutulenga ukucita ukufwaya kwakwe? Imfumu Davidi iya mu Israele e fyo yacitile. Yapepele ati: “Nengeni ukwishiba inshila shenu, mwe Yehova; nsambilisheni inshila shenu. Nengeni ukwenda mu cine cenu kabili nsambilisheni, pantu ni mwe Lesa we pusukilo lyandi. Muli imwe e mo natetekela akasuba konse.” (Amalu. 25:4, 5) Na ifwe kuti twapepa kuli Yehova ukuti atulenge ukucita ifimulenga ukusekelela. Ilyo twatontonkanya ifyo Yehova Lesa no Mwana wakwe bomfwa pa fyo tubabombela, imitima yesu isulamo fye ukubatasha. (Mat. 26:6-10; Luka 21:1-4) Uyu mutima wa kutasha kuti watulenga ukulomba kuli Yehova ukuti alenge  tulebombesha mu mulimo wakwe. Kasesema Esaya alitulanga umusango wa mutima tufwile ukuba na o. Ilyo aumfwile ishiwi lya kwa Yehova lileipusha aliti: “Nani ndetuma, kabili nani akaba inkombe yesu?” Kasesema ayaswike ati: “E po ndi! Ntumeni.”—Esa. 6:8.

Kuti Twacita Shani pa Kuti Tulebombesha?

11. (a) Kukabila nshi kuliko ukwa kuti abaume ababatishiwa batinamine imilimo mu cilonganino? (b) Bushe umwaume uwabatishiwa atinamina shani imilimo ya mu cilonganino?

¹¹ Mu mwaka wa mulimo uwa 2008, abantu 289,678 e babatishiwe icalo conse. Ici cipendo cilelanga fye ukuti mu filonganino mulekabilwa abaume abengi aba kutungulula. Bushe umwaume uwabatishiwa afwile ukwankulako shani kuli uku kukabila? Afwile ukuibikilishako fye ukukumanisha ififwaikwa fya babomfi batumikila na baeluda ifyatantikwa mu Malembo. (1 Tim. 3:1-10, 12, 13; Tito 1:5-9) Bushe umwaume uwabatishiwa kuti aibikilishako shani pa kuti akumanishe ififwaikwa fya mu Malembo? Kupitila mu kubombako umulimo wa kushimikila no mweo onse, ukubika amano ku milimo apeelwa mu cilonganino, ukubombesha ukuwamyako amasuko yakwe pa kulongana, no kubika amano ku ba bwananyina banankwe. Ninshi alelanga ukuti alicindika icifulo cakwe mu cilonganino.

12. Bushe imisepela kuti yalanga shani ukuti yalitemwisha icine?

¹² Cinshi bamunyinefwe abalumendo, maka maka abacilile imyaka 13, bengacita pa kuti balunduluke mu cilonganino? Bafwile ukubombesha pa kuti bakule mu ‘mano ya kwiluka’ ukupitila mu kuisambilisha Baibolo. (Kol. 1:9) Ukuba no mute wa kusambilila Icebo ca kwa Lesa no kula-asukapo pa kulongana kwa cilonganino kuti kwalenga abalumendo ukulunduluka. Na kabili abalumendo kuti balanga ukuti baletinamina nga balebombela pa kukumanisha ififwaikwa pa kukwatako ‘ishuko ilikalamba ilya kubombesha’ mu mbali shalekanalekana isha mulimo wa nshita yonse. (1 Kor. 16:9) Ukubombela Yehova kulalenga umuntu ukuba ne mikalile isuma kabili mu kubombela Lesa mulafuma amapaalo ayengi.—Belengeni Lukala Milandu 12:1.

13, 14. Ni mu nshila nshi bankashi balangilamo ukuti balicindika icifulo cabo mu cilonganino?

¹³ Bankashi nabo bene kuti balanga ukuti balicindika ishuko bakwata ilya kubombako umulimo walumbulwa pa Amalumbo 68:11. Palya paba amashiwi ayatila: “Yehova asosa icebo; abanakashi abalesabankanya imbila nsuma libumba ilikalamba.” Inshila imo iyacindamisha iyo bankashi bengalangilamo ukutasha pa cifulo cabo mu cilonganino, kupitila mu kubombako umulimo wa kulenga abantu ukuba abasambi. (Mat. 28:19, 20) Kanshi, nga balebombako umulimo wa kushimikila no mweo onse no kuitemenwa ukuipusulako  fimo pa mulandu wa uyu wine mulimo, e lyo cimoneka ukuti bankashi balicindika icifulo cabo mu cilonganino.

¹⁴ Mu mashiwi Paulo alembeele Tito, atile: “Eba na banakashi abakalamba ukuti babe ne mibele ya mushilo, . . . balesambilisha ifisuma; pa kuti balesambilisha abakashana ukutemwa abalume babo, ukutemwa abana babo, ukuba na mano, ukuba abasanguluka, abasunga bwino amayanda yabo, abasuma, abanakila abalume babo, pa kutila icebo ca kwa Lesa cipontelwa.” (Tito 2:3-5) Ala mwandini bankashi abakosoka kuti bakoselesha aba mu cilonganino! Nga ca kutila balecindika bamunyina abatungulula mu cilonganino kabili nga balekonka ifyo Icebo ca kwa Lesa cilanda pa fya kufwala, pa kupempenkana, pa fya kutambatamba na pa nyimbo, balalenga bambi ukubapashanya kabili balalanga no kuti balicindika nga nshi icifulo cabo mu cilonganino.

15. Finshi bankashi abashimbe bengacita pa kutila belatalalilwa?

¹⁵ Inshita shimo, kuti cakosela nkashi umushimbe ukusanga icifulo cakwe mu cilonganino. Nkashi umo uo ici cacitikile atile: “Ubushimbe limo limo bulalenga umuntu ukuyumfwa uwatalalilwa.” Ilyo uyu nkashi bamwipwishe ifyo acita pa kuti elatalalilwa, atile: “Ipepo no kusambilila Icebo ca kwa Lesa kwalingafwa ukusanga icifulo candi mu cilonganino na kabili. Ndasambilila ifyo Yehova amona ine. Kabili ndesha ukwafwilishako bambi mu cilonganino. Ukucita ifi kulanenga ukulatontonkanya na pali bambi ukucila ukulatontonkanya fye pali ne mwine.” Ukulingana na Amalumbo 32:8, Yehova aebele Davidi ati: “Nkakupanda amano ninshi na menso yandi yali pali iwe.” Ca cine, Yehova alibikako amano ku mubomfi wakwe umo na umo, ukusanshako na bankashi abashimbe, kabili bonse akabafwilisha ukusanga icifulo cabo mu cilonganino.

Sungilileni Icifulo Cenu!

16, 17. (a) Mulandu nshi twingalandila ukuti ukupokelela ubwite bwa kwa Yehova ubwa kuba mu kuteyanya kwakwe e ca mano ico twingapingulapo ukucita? (b) Kuti twasungilila shani icifulo cesu mu kuteyanya kwa kwa Yehova?

¹⁶ Yehova aitemenwe fye umwine ukutukulila kuli ena ukuti tube ifibusa fyakwe. Yesu atile: “Takuli uwingesha kuli ine kano Tata uwantumine, amukula.” (Yoh. 6:44) Pa bantu bonse ababa pano isonde, Yehova umwine alitwita ukuti tube mu cilonganino cakwe. Ukusumina ukuba mu cilonganino cakwe, e ca mano ico twacita. E calenga no kuti twishibe icintu icacindama nga nshi mu mikalile yesu. Kabili tulasekelela nga nshi pa kusanga icifulo mu cilonganino!

¹⁷ Kemba wa malumbo atile: “Mwe Yehova, nalitemwa ing’anda mwikalamo.” Kabili aimbile no kuti: “Ulukasa lwandi lukeminina apabatama; pa kati ka mabumba ayalongene e po nkalumbanishisha Yehova.” (Amalu. 26:8, 12) Ifwe bonse umo umo, Lesa wa cine alitukwatila icifulo mu kuteyanya kwakwe. Nga lyonse tulekonka ubutungulushi bwakwe no kulabomba umulimo wakwe lyonse, kuti twasungilila icifulo cesu mu cilonganino ca kwa Yehova.

Bushe Muleibukisha?

• Mulandu nshi twingalandila ukuti Umwina Kristu umo na umo alikwata icifulo mu cilonganino?

• Kuti twalanga shani ukuti twalicindika icifulo cesu mu cilonganino ca kwa Lesa?

• Fintu nshi fingakuma icifulo cesu mu cilonganino?

• Bushe Abena Kristu imisepela e lyo na bakalamba kuti balanga shani ukuti balicindika icifulo cabo mu cilonganino ca kwa Lesa?

[Amepusho]

[Ifikope pe bula 16]

Finshi bamunyinefwe bengacita pa kuti batinamine imilimo ya mu cilonganino?

[Icikope pe bula 17]

Bushe bankashi kuti balanga shani ukuti balicindika icifulo cabo mu cilonganino?