Bushe Kuti Mwayabukila ku Makedonia?

PA CABU ca mu musumba wa Troa mu Asia Minor, kwamoneke icimonwa ku mutumwa Paulo. Mu cimonwa amwene umwina Makedonia alemulomba ati: “Abukileni ku Makedonia mwise mutwafwe.” Ilyo Paulo amwene fye icimonwa, ena na banankwe ale-enda na bo ‘batile ni Lesa abetile ukuyabila imbila nsuma’ ku bena Makedonia. Cinshi cafuminemo? Mu musumba ukalamba uwa Filipi, Lidia na ba mu ng’anda yakwe balisangwike Abena Kristu. Na bambi muli ici citungu ca Roma ica Makedonia nabo balisangwike Abena Kristu.—Imil. 16:9-15.

Ne Nte sha kwa Yehova pali lelo na bo balaipeelesha ukucita ifi. Abengi balibomfya indalama shabo no kukuukila ku fifulo fimbi uko bakabila ba mbila ya Bufumu bacepa. Ku ca kumwenako, ba Lisa balefwaya ukubombesha sana umulimo wa kushimikila. Bakuukiile ku Kenya ukufuma ku Canada. Ba Trevor na ba Emily, abena Canada, baile ku Malawi pantu balefwaya ukubombesha umulimo wa kushimikila. Ba Paul na ba Maggie, aba ku England, bamwene ukuti apo bapoka penshoni, ishuko lya kubomba sana umulimo wa kwa Yehova lyamoneka, e ico baile ku East Africa. Bushe mwali-ipeelesha ukubombela Lesa? Bushe te kuti mutontonkanyepo pa kukuuka? Nga mulafwaya ukucite fyo, finshi Baibolo yalandapo ifingamwafwa ukubomba bwino?

Ibebeteni

Cimo ico mufwile ukutontonkanyapo, mulandu mulefwaila ukukuukila ku cifulo cimbi. Ifunde ilikalamba ilyo Yesu alandilepo lya kuti: “Uletemwa Yehova Lesa obe no mutima  obe onse, no mweo obe onse, no kutontonkanya kobe konse.” Ico tulingile ukufwaila ukuya mu kubombela ku calo cimbi, kutemwa Yehova e lyo no kufwaya ukubomba umulimo wa kulenga abantu ukuba abasambi. Yesu akonkenyepo ukusosa ati: “Ilya cibili, ilyapalana ne li, litila, ‘Uletemwa umunobe nge fyo waitemwa we mwine.’” Abatemwa abantu banabo balafwaya ukwafwa abantu no mutima onse. (Mat. 22:36-39; 28:19, 20) Ababombela mu fyalo fimbi, tabaya fye mu kutandala, baya mu kubomba umulimo uukalamba uufwaya ukuipeelesha. Ukutemwa e kufwile ukulenga mwacite co. Ba Remco na ba Suzanne aba ku Netherlands, ababombela ku Namibia nomba, batile, “Icalenga twikale kuno, kutemwa.”

Ba Willie, bakangalila benda aba ku Namibia, batile: “Abakuukila ku fyalo fimbi ku kuyashimikila, tabenekela abantu basanga ukulabasakamana. Ico bakonka, kubombela pamo na bamunyinabo e lyo no kubafwa ukubomba umulimo wa kushimikila.”

Nga mwabebeta ico mulefwaila ukukuuka, ipusheni amuti: ‘Finshi naishiba ifingalenga nayafwa abantu mu calo cimbi? Bushe nine kabila wa mbila nsuma uwafikapo? Ni ndimi nshi nanda? Bushe ndafwaya ukusambilila ululimi lumbi?’ Lanshanyenipo sana no lupwa lwenu. Ipusheniko na baeluda mu cilonganino. E lyo ne cacindamisha, pepelenipo kuli Yehova. Ukuibebeta mu bufumacumi kufwile ukumwafwa ukumona nga kuti mwabomba nelyo nga namuipeelesha ukuyabombela mu calo cimbi.—Moneni akabokoshi akalelanda ati,  “Moneni Nga Kuti Mwakuuka.”

 Uko Mwingayabombela

Paulo bamwitile ku Makedonia mu cimonwa. Pali lelo, Yehova tabomfya ifisungusho pa kututungulula. Lelo, ukupitila muli iyi magazini na mu mpapulo shimbi, abantu ba kwa Lesa baleshiba ififulo ifingi uko aba kubila imbila nsuma bacepa. Kanshi kuti mwatampilapo ukulemba ififulo ukushaba sana aba kushimikila. Nga tamuipekenye ukusambilila ululimi lumbi nelyo ukwikalilila mu calo mulefwaya ukuyako, kuti cawama mwaya ku calo uko balanda sana ululimi mwaishiba. Lyena fwailisheni ifikabilwa pa kupoka ifipepala fya kwingililapo mu calo cimbi, pa fyo mwingenda, pa fya kucingililwa ku misoka, pa mitengo ya fintu, na pa miceele. Kuti cawama nga mwalandako na bamo abakuukilapo ku calo cimbi. Pepelenipo pali uyu mulandu. Ibukisheni ukuti Paulo na banankwe “umupashi wa mushilo walibaleseshe ukushimikila mu citungu ca Asia.” Nangu ca kutila balyeseshe ukuya ku Bitunia, “umupashi wa kwa Yesu walibakeenye” ukucite co. Kanshi na imwe pa kuti musange uko mwingaya-afwa sana abantu kuti papite nshita.—Imil. 16:6-10.

Ilyo mulepwisha ukufwailisha ninshi napamo namumonako na kale ukwingawama ukubombela. Nga muletontonkanya pa kuyabombela mu calo cimbi, lembeleni ku maofeshi ya Nte sha kwa Yehova mu fyalo muletontonkanyapo. Londololeni imilimo ya Bwina Kristu iyo mwabombapo, nelyo iyo mubomba, e lyo kuti mwaipusha ne fipusho fyonse ifyo mukwete, pamo nga imikalile muli ico calo, amayanda yabamo, ifipatala fyabako, e lyo nga kuti kwaba ne shuko lya kwingila incito. Lyena peeleni kalata atemwa amakalata kuli komiti wa mulimo mu cilonganino cenu. Na bo bakalemba kalata ya kumulondolola no kuitumina pamo na kalata wenu ku maofeshi ya Nte sha kwa Yehova ayaba ku calo uko mulefwaya ukuya. Ifyo bakamwasuka fikamwafwa ukusala uko mwingayabomba bwino.

Ba Willie, abo tulandilepo kale, batile: “Abaya mu kubomba bwino ilingi line balabala bayako ku calo balefwaya ukuyaikala, no kufwayafwaya ififulo uko bengekala bwino no kubombesha e lyo no kuba ne nsansa. Munyinefwe umo no mwina mwakwe, balimwene ukutila, nga baikala mu mishi, imikalile ikaafya. E ico basalile ukwikala mwi tauni linono umushaba sana aba kushimikila, lelo umo imikalile yaliko bwino kabili umo babombele ne nsansa.”

Ifya Kucita nga Mwakwata Amafya

Nga mwakuukila ku cifulo cimbi, ukwabula no kutwishika kuti mwakwatako amafya yamo. Ba Lisa abo tulandilepo kale batile, “Kulaba ukutalalilwa no kufuluka sana.” Cinshi cibafwa nga baleumfwa ifyo? Icibafwa, kusangwa sana na ba mu cilonganino caba uko bakuukiile. Ba Lisa bali-ipeele ubuyo bwa kwishiba amashina ya bantu bonse mu cilonganino. Pa kucita ifi, balefika bwangu ku kulongana, e lyo na pa numa ya kulongana balebala ba-ambaulako na bamunyinefwe na bankashi e lyo baya. Ba Lisa balebomba  na bantu bambi umulimo wa kushimikila, e lyo baleitako na ba bwananyina abengi ku mwabo. E co balipangile ifibusa ifingi. Batile: “Nshimona no kuti nali-ipusulapo fimo. Yehova alimpaala icine cine.”

Pa numa ya kukusha abana babo, ba Paul na ba Maggie bafumine mu ng’anda umo baikele pa myaka 30. Ba Paul batile: “Ukushitisha ifipe twakwete, kwalyangwike ukucila ifyo twale-enekela. Lelo ukusha ulupwa lwesu kwalyafishe sana ukucila ne fyo twale-enekela. Twalilila sana ilyo twali mu ndeke. Twatendeke no kutontonkanya ati napamo ico tulecita tacili bwino. Lelo twashintilile pali Yehova. Ukukwata ifibusa ifipya kulatupeela inkosho ya kutwalilila.”

Ba Greg na ba Crystal bafumine ku Canada no kuya ku Namibia pantu balanda iciNgeleshi, ico na bena Namibia abengi balanda. Lelo, pa numa balimwene ukuti cali no kubafwa sana nga basambilila ululimi lwa cikaya ulwa ku Namibia. Batile: “Limo twalefuupuka. Lelo, pa numa ya kusambilila ululimi lwa cikaya ulwa ku Namibia, e lyo twaishibe bwino intambi sha bena Namibia. Ukwampana na bamunyinefwe kwalitwafwile ukubelesha bwangu imikalile ya kulya.”

Ukuicefya no kuipeelesha muli uyu musango kuti kwalenga bamunyinefwe ku calo mwaya ukumupashanya. Ba Jenny balebukisha bwino indupwa shimo ishakuukiile ku Ireland uko bakuliile. Batile: “Balitemenwe sana abantu. Balemoneka ukutila baishile mu kubombela abantu te kufwaya bambi ukubabombela. Bali abacincila sana kabili abasansamuka ica kuti nalebapashanya. Na ine nalile mu kubombela ukushali sana bakabila.” Ba Jenny na bena mwabo nomba ni bamishonari ku Gambia.

Ipaalo lya kwa Yehova “Lilacindamika”

Umulimo Paulo abombele mu Makedonia walimuletele insansa icine cine! Pa numa ya myaka mupepi na 10, alembeele bamunyinefwe mu Filipi ukuti: “Ntootela Lesa wandi, lyonse ilyo naibukisha imwe.”—Fil. 1:3.

Ba Trevor na ba Emily, abailebombela ku Malawi ilyo bashilaya kwi sukulu lya Gileadi ilya bamishonari, na bo e fyo bomfwa. Batile: “Limo twaletwishika nga ca kuti ico twalecita cali fye bwino, lelo twali ne nsansa. Ukukuuka kwalengele twikatane sana no mwina mwandi kabili twalimwene amapaalo ya kwa Yehova.” Ba Greg na ba Crystal, abo tulandilepo kale batile, “Takwaba cimbi ico tutontonkanyapo ukulacita.”

Kwena, te bonse bengakumanisha ukuyabombela ku calo cimbi. Bamo kuti cawama bakuukila fye ku cifulo cimbi mu calo cabo ukushaba sana bakabila ba mbila nsuma. Bambi kuti baipekanya fye ukuya mu kubombela mu filonganino fimbi mupepi na ku mwabo. Icacindama kubombela Yehova no mweo onse. (Kol. 3:23) Nga mulebomba ifi, mukamona ukuti aya mashiwi ya kwa Lesa ya cine ayatila: “Ipaalo lya kwa Yehova lilacindamika, kabili talundako ukucululuka.”—Amapi. 10:22.

[Akabokoshi ne Cikope pe bula 5]

 Moneni nga Kuti Mwakuuka

Pa kuibebeta ukutila mwishibe nga kuti mwakuukila ku calo cimbi, moneni ifipusho fyakonkapo no kwasuka mu bufumacumi kabili pepelenipo. Ifyebo fyaba muli bamagazini ba Ulupungu lwa kwa Kalinda abafumine kale kuti fyamwafwa ukucite co.

• Bushe ndi mwina Kristu wakosa?—“Umo Mwingasangila Insansa” (October 15, 1997, ibula 6)

• Bushe nine kabila wa mbila nsuma uwafikapo?—“Ifya Kutunguluka mu Butumikishi bwa Bupainiya” (May 15, 1989, ibula 21)

• Bushe kuti nakumamo ukwikala ukutali sana no kwaba ulupwa lwandi ne fibusa?—“Ukubomba no Kufuluka mu Mulimo wa kwa Lesa” (May 15, 1994, ibula 28)

• Bushe kuti nasambilila ululimi lumbi?—“Ukulongana mu Cilonganino Icibomfya Ululimi lwa ku Calo Cimbi” (March 15, 2006, ibula 17)

• Bushe kuti nakwata indalama sha kwikalilamo nga nakuuka?—“Bushe Kuti Mwabombako Umulimo wa Kushimikila ku Calo Cimbi?” (October 15, 1999, ibula 23)

[Icikope pe bula 6]

Ukuicefya no kuipeelesha ukubomba kuti kwalenga bamunyinenwe mwasanga ukumupashanya

[Icikope pe bula 7]

Abafwaya ukubombela bambi e babomba bwino