Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Kanshi moneni nga kuti mwayasuka amepusho yakonkapo:

• Cuma ca musango nshi Lesa engamupeela?

Ku kale, Yehova alipeele ifyuma ku bantu bamo, pamo nga Abrahamu na Solomone. Lelo icuma ico Abena Kristu bakabila sana kabili ico Lesa engabafwa ukusanga citetekelo, umutende, ne nsansa.—9/1, amabula 3-7.

• Cinshi twingasambilila kuli filya Yesu apuswishe Petro ilyo atendeke ukwibila pali bemba? (Mat. 14:28-31)

Nga twamona munyinefwe abulwa icitetekelo, na ifwe kuti twatambika ukuboko mu mampalanya no kumwafwa ukukwata icitetekelo.—9/15, ibula 8.

• Cinshi Yehova aipeeleshe ukucita pa kuti atulubule?

Yehova alekele Umwana wakwe acushiwa no kusaalulwa. Kabili nga filya Abrahamu aipeeleshe ukupeela umwana wakwe nge lambo, Yehova na o alilekele Umwana wakwe aipaiwa nga kapondo.—9/15, amabula 28-29.

• Mulandu nshi Vatican Codex yacindamina?

Amalembo yabamo yalembelwe mu ciGriki ninshi tapalapita ne myaka 300 ukutula apo bapwilile ukulemba Baibolo. Muli iyi Codex, Amalembo yonse aya ciHebere na ya ciGriki, e mo yaba. Kanshi e yo abasoma babomfya pa kwishiba amalembo yali muli Baibolo ya kubalilapo.—10/1, amabula 18-20.

• Cinshi Amapinda 24:27 yatusambilisha pa “kukosha aba mu ng’anda”?

Umwaume uulefwaya ukuupa alingile ukuipekanya bwino ukulasakamana ulupwa lwakwe. Afwile ukupekanishisha limo pa kuti alebapeela ifikabilwa mu bumi e lyo no kulabatungulula mu fya kwa Lesa.—10/15, ibula 12.

• Mulandu nshi cingabela icilubo ukusosa ukuti Inte sha kwa Yehova ni ba Protestanti?

Ba Protestanti batendeke mu myaka ya ba 1500 C.E. ku Bulaya. Ne co balefwaya, kwalulako ifintu fimo ifya mwi calici lya Katolika. E ico abafwaya ukwalula ifintu mu Katolika, e betwa ati ba Protestanti. Kwena, Inte sha kwa Yehova tabasumina ukuti papa e wakwatisha amaka mu fya mapepo kabili balakonka sana ifyo Baibolo isambilisha, lelo balakaana ifisambilisho ifingi ifipusana ne fyo Baibolo isambilisha kumo ne fintu ifingi ificitwa sana mu mipepele itwa ukuti Protestanti.—11/1, ibula 19.

• Bushe umuntu alingile ukwishiba iciGriki ne ciHebere pa kumfwikisha Baibolo?

Iyo. Ukwishiba fye iciHebere ne ciGriki te kwingalenga umuntu ukumfwikisha ifyalembwa mu Baibolo. No wasambilila isho ndimi alakabila ifitabo filondolola amashiwi muli ishi ndimi. Apo Lesa e walengele abantu ukusungilila amashiwi ya Mubomfi wakwe uwacindamisha ayapilibwilwe fye ukufuma mu Malembo ya kubalilapo, kanshi pa kusambilila icine, umuntu kuti abomfya Baibolo mu lulimi ululi lonse pa ndimi shabako.—11/1, amabula 20-23.

• Bushe Yehova na Yesu baba shani ifya kumwenako mu kucindika bambi?

Nangu ca kutila Yehova akwata icifulo icikalamba sana, wa cikuuku ku bantu kabili alabacindika. Ilyo Yehova alelanda kuli Abrahamu na Mose, abomfeshe ishiwi lya ciHebere ilyalelanga ukuti alibacindike. (Ukute. 13:14; Ukufu. 4:6) Lesa na kabili alakutika ku bantu. (Ukute. 18:23-32) Yesu na o e fyo ali, kabili ali-itemenwe ukwafwa bonse abo aleba na bo kabili ilingi line alebeta fye na mashina yabo.—11/15, ibula 25.

• Mulandu nshi Abena Kristu ba cine bashisefesha Umwaka Upya?

Ukusefya Umwaka Upya e mutebeto wacindama sana ku bena Asia. Ico abantu basefesha uyu mutebeto, kufwaya amapaalo pa kuti bale-enda ne shuko. E lyo cimbi, kucindika imipashi. Abena Kristu balacindika abafyashi babo, lelo tabasefyako imitebeto umwaba ukumfwana ne fikolwe fyabo abafwa pa kuti balebacingilila nelyo pa kuti balelomba amapaalo kuli tulesa twa mu mayanda.—12/1, amabula 20-23.