Ifya Kucita mu Mulimo wa kwa Lesa Fingi Lelo Tulasekelela

YEHOVA afwaya mwaba ne nsansa. (Amalu. 100:2) Apo muli babomfi bakwe, mufwile mwalikwata ifya kucita ifingi. Napamo ilyo mwaipeele fye kuli Lesa tamwakwete sana ifya kucita, lelo pali ino nshita fyalifula pantu mufwile mulabomba incito ya kusangilamo umwa kuliila e lyo kabili mulabomba ne milimo imbi iya kwa Lesa. Limbi mulomfwa no bubi nga mwafilwa ukucita fyonse ifyo mwacipanga ukucita. Kuti mwacita shani pa kuti mulekumanisha ukucita fyonse ifikabilwa ukwabula ukuleka “ukusekelela muli Yehova”?—Nehe. 8:10.

Mwikala mu nshita iyayafya kabili mulakwata ifya kucita ifingi, e ico mulingile ukufitantika bwino. Kanshi, ukufunda kwa kwa Paulo kumo ukwaba mu Cebo ca kwa Lesa kuti kwamwafwa. Kutila: “Cenjeleni, mwilaenda kwati bawelewele lelo mule-enda nga ba mano, mulebomfya bwino inshita yonse iyo mwashukila, pantu ishi nshiku sha bubifi.”—Efes. 5:15, 16.

Ukulingana no ku kufunda, kuti mwatantika shani ifya kucita pa kuti tamulekeleshe ukuisambilisha Baibolo, ukusakamana ulupwa, umulimo wa kushimikila, incito mubomba, ne fintu fimbi ifyacindama?

Bushe mulebukisha ifyo mwatemenwe ilyo mwaipeele kuli Lesa no kubatishiwa? Mwalisekelele ilyo mwaishibe Yehova ne fyo afwaya. Napamo mwalisambilile pa myeshi iingi pa kuti mwishibe Yehova na pa kuti mukwate insansa. Na lyo line, mwalimona ubusuma bwabamo. Ukusambilila pali Yehova kwalilenga ubumi bwenu ukuwama.

Pa kutwalilila ukuba ne nsansa, mufwile ukutwalilila ukusambilila Baibolo. Nga cilamwafya ukusanga inshita ya kubelenga no kuisambilisha Baibolo, tantikeni bwino ifyo mucita. Nangu mamineti ayanono fye mulepoosa cila bushiku ku kusambilila Baibolo no kwetetula, kuti mwapalama kuli Yehova, kabili nga mulecita ifi mukaba ne nsansa nga nshi.

Ababomfi ba kwa Lesa abengi, kuti bakwata inshita ya kucita ifintu ifyacindama nga bacefyanyako ukucita ifintu ifishacindama. Yipusheni amuti, ‘Ma-awala yanga mpoosa ku kubelenga bamagazini ba ku calo nelyo inyunshipepala, atemwa ukutamba TV, ukukutika ku nyimbo nelyo  ukucita ifintu fimbi ifyo natemwa?’ Ukucita ifintu fya musango yu takwabipa kulila fye tafilemusendela inshita iikalamba. (1 Tim. 4:8) Nga mwamona ukuti tamulebomfya bwino inshita, kuti cawama mwatantika bwino ifya kucita pa kuti muleibomfya bwino.

Ba Adamu, baeluda abaupa kabili abakwata na bana batatu, balondolwele icabafwa abati: “Ndesha na maka ukukanafusha ifya kucita mu bumi. Nshicita ifya kuleseshamo icitendwe ifisenda sana inshita kabili nshishita ifipe ififwaya inshita iikalamba sana iya kusakamana. Te kutila nshicita nangu fimo ifya kuisekesha. Na ine ndacita ifi fintu lelo nsala ifishinsendela inshita iikalamba.”

Ukutontonkanya pa busuma bufuma mu fyo mwatantika ukucita ifintu kuti kwalenga mwaba ne nsansa kabili kuti kwalenga mwilakwata amasakamika. Ku ca kumwenako, ba Mariusz, baeluda abakwata abana batatu batile: “Ilyo natendeke ukusambilila Baibolo, nalilekele ukusakamikwa sana pa fingacitika ku ntanshi. Ndakwata amafya mu nshita mu nshita, kabili ayengi ni Yehova fye e uyeshiba. Lelo alangafwa ica kuti ndasekelela ilyo ndetontonkanya pa fya ku ntanshi.”

Nga fintu caba kuli ba Mariusz, ukuba ne subilo takulenga amasakamika yonse ukupwa. Lelo kuti kwamwafwa ukuba ne nsansa no kwishiba ifya kucita nga ca kuti mwakwata amafya. Baibolo itila: “Inshiku shonse isha mulanda shibi; lelo uwasansamuka umutima lyonse aba nga uuli no mutebeto.” (Amapi. 15:15) Muletontonkanya na pa kutemwa uko Lesa amulanga kale. Ukucite fyo kuti kwalenga mwamutemwa sana kabili kuti amupeela ne nsansa.—Mat. 22:37.

Ukubika Yehova ne fyo afwaya pa ntanshi kulalenga ulupwa ukuba ulwa nsansa. Ukuba ne mibele ya Bwina Kristu kulalenga aba mu lupwa ukulaumfwana no kwikatana sana. Ifi fikalenga mu lupwa lwenu mukabe umutende ne cumfwano.—Amalu. 133:1.

Ulupwa nga lulecitila pamo ifya kwa Lesa, lulakwata insansa sha cine cine. Ba Mariusz balondolwele ukuti: “Nalitemwa sana ukucitila ifintu pamo no lupwa lwandi. Umwina mwandi alantungilila sana. Ilingi line ndaba nankwe nga ndeshimikila nelyo nga tulewamya icifulo ca kulonganinapo icitungu, kabili nga banjita ku filonganino fimbi ku kulanda amalyashi, alanshindika. Ici cilankosha sana.”

Amalembo yeba Abena Kristu ukupekanishisha indupwa shabo ifyo bakabila mu bumi. (1 Tim. 5:8) Nomba incito nga ilamusendela sana inshita na maka, kuti yamupwishisha insansa sha kubombela Lesa. Mufwile ukulanda na Yehova mwi pepo. (Amalu. 55:22) Bamo basalapo no kufwaya incito imbi pa kuti batangishe Ubufumu bwa kwa Lesa mu bumi bwabo. Umwina Kristu uuli onse talingile ukufumya amano ku kupepa Lesa pa mulandu fye wa kuti aingila incito ya malipilo ayengi iimusendela inshita iikalamba.—Amapi. 22:3.

Limo cilafwa ukulemba ubusuma no bubi bwa ncito mubomba nangu iyo mulefwaya ukwingila. Kwena, uuli onse alafwaya incito iisuma kabili uko engafola indalama ishingi. Lelo bushe incito mubomba ilalenga muleafwa ulupwa lwenu ukuba bakapepa bakosa? Kuti cawama mwatontonkanya pa busuma no bubi bwa iyo ncito, e lyo mwapingula ukucita ifingalenga mwabika sana amano kuli bucibusa bwenu na Yehova.

Nga ca kutila incito yenu ilelenga mwilalunduluka mu kupepa Yehova, mufwile ukufwayako imbi. Abena Kristu abengi balyalula sana ifingi mu bumi bwabo pa kuti fye balesanga inshita ya kucita ifya kwa Lesa. Munyinefwe umo uwa ku Poland alandile ukuti: “Inshita imo nasukile fye nasalapo ukuleka incito pantu ilingi naleya mu kubombela ukutali sana. Nshalekwata inshita iikalamba iya kusakamana ulupwa lwandi nelyo iya kubombela Lesa.” Nomba alisanga incito iishimusendela sana inshita na maka.

Mwaliba Insansa mu Kwafwa Bambi

Yesu atile “mwaba insansa ishingi mu kupeela ukucila ishaba mu kupokelela.” (Imil. 20:35) Fingi ifyo Abena Kristu bengapeela. Limo pa kukwata insansa no kulenga bambi ukuba ne nsansa, icikabilwa fye kumwentula, nelyo ukuposha umuntu mu minwe, atemwa ukutasha umuntu ukufuma pa nshi ya mutima pa fyo alebombesha imilimo ya kwa Lesa.

 Umutumwa Paulo akoseleshe Abena Kristu banankwe ukuti: “Sansamusheni abali no bulanda, koselesheni abanaka.” (1 Tes. 5:14) Ababa na malangulushi limo kuti bamona kwati te kuti bacimfye amafya ku maka yabo. Bushe te kuti ciwame mwa-afwa abantu ba musango yu? Nga mwamona ukuti munyinenwe umo insansa sha kubombela Yehova shapwa, mukoselesheni. Ukucite fyo kukamukoselesha sana na imwe. Amafya yamo, takuli umuntunse uwingayapwisha. Lelo kuti mwalanga munyinenwe inkumbu, no kumukoselesha ukushintilila pali Yehova uushifilwa ukutwafwa. Yehova alafwa abamucetekela.—Amalu. 27:10; Esa. 59:1.

Cimbi na co ico mwingacita kweba uumoneka ukukanasanga insansa mu kushimikila ukuti mubombe nankwe. Ilyo Yesu atumine abasambi bakwe 70, abatumine “babili babili.” (Luka 10:1) Bushe tamulesumina ukuti ico calengele balekoseleshanya? Bushe te kuti ciwame na imwe mwakonka ico Yesu acitile pa kuti mwafweko bamo ukubwesha insansa bakwete kale?

Fwe bantunse twalikwata ifingi ifituletela amasakamika. Na lyo line, Paulo atukoselesha ati: “Sekeleleni lyonse muli Shikulu. Ndetila na kabili, Sekeleleni!” (Fil. 4:4) Apo mwalitemwa Lesa, mulamumfwila, kabili mulatwalilila ukubomba umulimo amupeela nangu kuli amafya, kabili ubumi bwenu bwaliwama. E cilenga mulesekelela. Ne cacilapo ukuwama ca kutila, Yehova alamwafwa ilyo muli na masakamika na mafya.—Rom. 2:6, 7.

Icitetekelo twakwata cilalenga twailuka ukuti icalo cipya ico Yehova atulaya cili mupepi sana. Ici calo cikatuletela amapaalo ayengi kabili kukaba ifingi ifikalenga tulesekelela! (Amalu. 37:34) Kanshi ici cilatusansamusha, lelo tatufwile ukulaba amapaalo yashaifulila ayo Yehova atupeela na pali ino ine nshita. E cingatwafwa ‘ukulabombela Yehova no kusekelela.’—Amalu. 100:2.

[Icikope pe bula 8]

(Nga mulefwaya ukumona icikope, moneni muli magazini)

Kuti cawama mwatantika bwino ifya kubomfya inshita nga mulefwaya ukuba ne nsansa

UKWANGALA na FIMBI IFYA KULESESHAMO ICITENDWE

UKUSAKAMANA ING’ANDA no LUPWA

INCITO

UKULONGANA

UKUISAMBILISHA BAIBOLO

UKUSHIMIKILA

[Ifikope pe bula 10]

Bushe na imwe te kuti mwafweko bambi ukuba ne nsansa na kabili?