Twalilileni Ukusekelela na mu Nshita sha Mafya
Twalilileni Ukusekelela na mu Nshita sha Mafya
“Bonse abooba muli imwe bakasekelela; Bakaula utupundu umuyayaya.”—AMALU. 5:11.
1, 2. (a) Fintu nshi fimo ifilenga tulesakamana sana pali lelo? (b) Ukusansha pa mafya ayo abantu bonse bakwata, finshi fimbi ifyo Abena Kristu ba cine bafwile ukushipikisha?
INTE SHA KWA YEHOVA na bo bene balakwata amafya ayo abantu bonse bakwata. Abantu ba kwa Lesa abengi balacula ku lukakaala, ku nkondo na ku lufyengo lwalekanalekana. Bamo balacula ku tuyofi, ku nsala, ku kulwala kabili imfwa ilabaletela amafya ayengi. Umutumwa Paulo alembele ukuti: “Twalishiba ukuti ifibumbwa fyonse fitetela capamo no kucululukila capamo ukufika kuli nomba.” (Rom. 8:22) Na kabili tulacula pa mulandu wa kuti tatwapwililika. Na ifwe bene nalimo kuti twalanda nga filya Imfumu Davidi yalandile aiti: “Imembu shandi shapita pa muulu wa mutwe wandi; shamfinina nge cisendo cafina.”—Amalu. 38:4.
2 Nangu ca kuti Abena Kristu ba cine balakwata amafya ayo bonse bakwata, mu mampalanya balasenda ne cimuti ca kucushiwilwapo. (Luka 14:27) Ca cine, nga filya fine cali kuli Yesu, na basambi bakwe balibapata kabili balabacusha. (Mat. 10:22, 23; Yoh. 15:20; 16:2) E co kanshi, pa kuti tulekonka Kristu tufwile ukubombesha no kushipikisha ilyo tulelolela amapaalo ayakaba mu calo cipya.—Mat. 7:13, 14; Luka 13:24.
3. Twaishiba shani ukuti tacalola mu kuti Abena Kristu balingile ukuba aba bulanda pa kucita ifyo Lesa afwaya?
3 Bushe cilolele mu kuti Abena Kristu tabakwata insansa mu bumi bwabo? Bushe tufwile ukulaba fye aba bulanda mpaka impela ikese? Ukwabula no kutwishika, Yehova afwaya ukuti tuleba ne nsansa ilyo tulelolela ifyo atulaya ukufikilishiwa. Imiku iingi, Baibolo yalilanda ukuti abapepa Lesa wa cine baliba ne nsansa. (Belengeni Esaya 65:13, 14.) Amalumbo 5:11 yatila: “Bonse abooba muli [Yehova] bakasekelela; bakaula utupundu umuyayaya.” Ca cine, nangu tulakwata amafya kuti tulesekelela, no kwikala ukwabula amasakamika, kabili kuti tuleba ne nsansa. Lekeni tumone ifyo Baibolo ingatwafwa ukulasekelela na lintu twaba na mafya.
Yehova Ni “Lesa wa Nsansa”
4. Bushe Lesa omfwa shani bamo nga bakaana ukucita ifyo afwaya?
4 Intanshi tontonkanyeni pali Yehova. Apo ni Lesa Wa Maka Yonse, e wakwata amaka pali fyonse ifyo abumba. Tabulisha icili conse kabili tashintilila pa muntu uuli onse. Nangu ca kuti Yehova alikwatisha amaka, tatuletwishika ukuti alyumfwile ububi ilyo umwana wakwe umo malaika apondweke no kuba Satana. Lesa afwile alikalipe na pa numa ilyo bamalaika bambi bakonkelele Satana no kupondoka. Elenganyeni na kabili ifyo Lesa aumfwile ububi ilyo Adamu na Efa, ifibumbwa ifyo apeele amano pali fyonse ifyo abumbile pano calo, bakeene ukumumfwila. Ukutula fye lilya line, abantu abengi abafuma mu bufyashi bwabo balikaana ukutekwa na Yehova.—Rom. 3:23.
5. Cinshi maka maka icalenga Yehova ukumfwa sana ububi?
5 Bucipondoka ubo Satana atendeke buleilako fye pa ntanshi. Pa myaka 6,000, Yehova alimona uko abantu bapepa ifilubi, uko bacita ulukakaala, uko bepaya abantu banabo, na kuntu bacita ubulalelale bwabipisha. (Ukute. 6:5, 6, 11, 12) Na kabili, alyumfwa uko abantu bamubepesha ubufi bwafiita fititi no kumupontela. Nangu fye bantu ba kwa Lesa na bo bene limo limo balamukalifya. Baibolo ilanda pa nshita imo ilyo abantu bakalifye Lesa, aiti: “Balemupondokela imiku iingi mu mpanga, no kumulungulusha mu matololo! Kabili libili libili bale-esha Lesa, kabili bakalifye uwa mushilo uwa kwa Israele.” (Amalu. 78:40, 41) Yehova alomfwa sana ububi abantu bakwe nga bakaana ukumumfwila. (Yer. 3:1-10) Nga fintu twamona, ifyabipa filacitika, kabili ilyo fyacitika Yehova alomfwa ububi nga nshi.—Belengeni Esaya 63:9, 10.
6. Bushe Lesa acita shani ifyabipa nga fyacitika?
6 Lelo nangu Yehova alomfwa sana ububi, tafilwa ukubombelapo pa cacitika. Nga kwacitika ifyabipa, Yehova bwangu bwangu alacitapo fimo pa kutila ubwafya bwikula sana. Na kabili alipekanya fimo ifikabila inshita iikalamba ifikalenga ukufwaya kwakwe kukasuke kukafikilishiwe. Pa mulandu wa ifi fisuma ifyo Yehova acita, alasekelela ilyo alelolela ukuti inshita ikafike iya kuti bonse bakeshibe ukuti e walinga ukuteka ne ya kupaala bakapepa bakwe aba cishinka. (Amalu. 104:31) Ca cine, Yehova alatwalilila ukuba “Lesa wa nsansa” te mulandu ne fyo abantu bamuseebanya.—1 Tim. 1:11; Amalu. 16:11.
7, 8. Kuti twapashanya shani Yehova nga twakwata amafya?
7 Kwena te kuti tupwishe amafya nga filya Yehova ayapwisha. Na lyo line, kuti twapashanya Yehova ilyo twakwata amafya. Ca cifyalilwa fye ukumfwa ubulanda ilyo kwacitika ifyabipa, lelo tatulingile ukutwalilila ukuba aba bulanda. Apo twapangwa mu cipasho ca kwa Yehova, twalikwata amano kabili tulapelulula, ne ci cilenga tuleishiba bwino amafya tukwete e lyo no kwishiba ifingalinga ukucita.
8 Icacindama cimo icingatwafwa ukushipikisha amafya, kwishiba ukuti tatwakwata amaka ya kwalula ifintu fimo. Ukulasakamikwa sana pa mafya ya musango yu, kuti kwalenga fye ubulanda bwesu ukukulilako kabili kuti kwapwisha ne nsansa tusanga mu kupepa kwa cine. Nga twaesha apo twingapesha ukupwisha ubwafya, kuti caba bwino ukuleka ukutontonkanya pali ubo bwafya no kubika amano ku fingatwafwa. Ici cishinka e cili mu malyashi yakonkapo aya mu Baibolo.
Mwilacilamo Ukusakamikwa
9. Cinshi cilanga ukuti Hana tasakamikwe ukucila mu cipimo?
9 Tontonkanyeni pali Hana nyina wa kwa kasesema Samwele. Aali no bulanda pa mulandu wa kuba ing’umba. Apo takwete mwana balemuseka no kumupumya. Inshita shimo, Hana aleumfwa ububi ica kuti alelila fye kabili alekaana no kulya. (1 Sam. 1:2-7) Bushiku bumo ilyo aingile mwi tempele lya kwa Yehova, Hana ‘aliculile no mutima wakwe, kabili atampile ukupepa kuli Yehova no kulila nga nshi.’ (1 Sam. 1:10) Ilyo Hana aebele Yehova fyonse ifyali ku mutima, Eli shimapepo mukalamba aile apo aali no kusosa ukuti: “Kabiye umutende, kabili Lesa wa kwa Israele akupeele ico wamulomba.” (1 Sam. 1:17) Ilyo Hana bamwebele ifi, alilwike ukuti alicitile ifyali mu maka yakwe. Takwete amaka ya kupwisha ubu-umba bwakwe. Hana tasakamikwe ukucila mu cipimo. Lyena “alifuminepo no kuyalya, ne cinso cakwe tacamoneke ica bulanda na kabili.”—1 Sam. 1:18.
10. Bushe Paulo acitile shani ilyo akwete ubwafya ubo aishibe ukuti te kuti abupwishe?
10 Umutumwa Paulo ilyo ali na mafya na o acitile ifyapalako. Alikwete ubwafya ubwalemucusha. Aleita ubu bwafya ati “umuunga mu mubili.” (2 Kor. 12:7) Te mulandu no bwafya Paulo akwete, alicitile icali mu maka yakwe pa kuti bupwe. Ne co acitile kupepa kuli Yehova ukuti amwafwe. Miku inga Paulo apepele kuli Yehova pali ubu bwafya? Miku itatu. Ilyo Paulo apepele pa muku walenga itatu, Lesa amwebele ati “umuunga mu mubili,” uo akwete tawali na kupwa mu cisungusho. Paulo alyumfwile ifyo Yehova amwebele kabili abikile fye amano ku kumubombela.—Belengeni 2 Abena Korinti 12:8-10.
11. Bushe ukupepa no kulomba kuli Lesa kuti kwatwafwa shani ukushipikisha amafya?
11 Ifyacitikile Hana na Paulo tafiletusambilisha ukuti tufwile ukuleka ukupepa kuli Yehova ilyo amafya yacilamo. (Amalu. 86:7) Lelo Icebo ca kwa Lesa citukoselesha ukuti: “Mwisakamikwa nangu kamo, lelo muli fyonse lekeni ifyo mulelomba fishibikwe kuli Lesa mu kupepa no kupapaata pamo no kutootela.” Bushe Yehova kuti acita shani nga twamulomba no kumupapaata? Baibolo yatwalilila ukusosa ukuti: “No mutende wa kwa Lesa uwacila amatontonkanyo yonse ukalinda imitima yenu na matontonkanyo yenu muli Kristu Yesu.” (Fil. 4:6, 7) Ca cine, Yehova nalimo te kuti afumyepo ubwafya tukwete, lelo pa kulanga ukuti nayasuka amapepo yesu kuti acingilila amatontonkanyo yesu. Nga twapepela pa bwafya tukwete, nalimo kuti catwafwa ukwishiba amafya yengafuma mu kusakamikwa sana.
Sekeleleni mu Kucita Ukufwaya kwa kwa Lesa
12. Mulandu nshi ukuba no bulanda pa nshita yalepa kwabipila?
12Amapinda 24:10 yatila: “Bushe ulanenuka mu bushiku bwa macushi? Awe ninshi amaka yobe yanono.” Ipinda limbi litila: “Umuntu alaba no bulanda pa mulandu wa kukalipwa umutima.” (Amapi. 15:13) Pa mulandu wa mafya, Abena Kristu bamo balifuupulwa ica kuti balileka no kubelenga Baibolo e lyo no kutontonkanya pa fyaba mu Cebo ca kwa Lesa. Tabapepa ukufuma pa nshi ya mutima, kabili limo balataluka Abena Kristu banabo. Ukuba no bulanda pa nshita yalepa, kulaleta amafya yambi.—Amapi. 18:1, 14.
13. Bushe finshi fimo ifyo twingacita ifingapwisha ubulanda no kulenga tulesekelela?
13 Lelo ukukanasakamikwa sana, e kwingatwafwa ukubika amano ku fintu ifingalenga tulesekelela. Davidi alembele ukuti: “Ukucita ukufwaya kwenu, mwe Lesa wandi, e ko natemwa.” (Amalu. 40:8) Ilyo twakwata amafya, ico tushifwile na kutontonkanyapo, kuleka ukupepa Lesa no kucita ifyo afwaya. Na kuba, icingapwisha ubulanda bwesu kulacita ifintu ifileta insansa. Yehova atweba ukutila ukubelenga Icebo cakwe no kulalolesha mu mafunde yakwe, kuti kwatuletela insansa. (Amalu. 1:1, 2; Yako. 1:25) Mu Malembo ya Mushilo e lyo na mu kulongana kwa Bwina Kristu, e mufuma “ifyebo ifisuma” ifingatukoselesha no kulenga imitima yesu ukusekelela.—Amapi. 12:25; 16:24.
14. Finshi Yehova atulaya ifilenga tulesekelela pali ino nshita?
14 Lesa alitupeela ifingi ifingalenga tulesekelela. Ubulayo bwakwe ubwa kuti akatupususha cintu icikalamba icituletela insansa. (Amalu. 13:5) Twalishiba ukuti te mulandu na mafya tulekwata pali ino nshita, ku ntanshi Lesa akalambula bonse abafumacumi abamufwaya. (Belengeni Lukala Milandu 8:12.) Kasesema Habakuki alandile ifyo acetekele ubu bulayo ilyo atile: “Nangu umukunyu taubalwile, ne myangashi taitwele ifisabo; umuolife wafilwa ukutwala, na mabala yakaana ukufumya ifya kulya; impaanga shaloba mu macinka, na mu matanga tamuli ing’ombe; na lyo line, ine, nakula-angila muli Yehova; nakulasekelela muli Lesa we pusukilo lyandi.”—Haba. 3:17, 18.
‘Balipaalwa Abantu abo Yehova E Lesa Wabo!’
15, 16. Lumbuleni ifintu fimo ifyo Lesa atupeela ifyo tuipakisha ilyo tulelolela amapaalo ya ku ntanshi.
15 Ilyo tulelolela ifintu ifisuma ifyo tukaipakisha ku ntanshi, Yehova afwaya ukuti na pali ino nshita tuleipakisha ifisuma ifyo atupeela. Baibolo itila: “Ninjishiba ukuti takuli icawama [ku bantu] kano ukusekelela no kucita ifisuma mu nshita ya bumi bwabo; kabili ninjishiba ukuti umuntu onse alingile ukulya no kunwa, no kusekelamo mu kubombesha kwakwe konse. Ubu e bupe bwa kwa Lesa.” (Luk. Mil. 3:12, 13) “Ukucita ifisuma” kusanshamo no kucitila bambi ifisuma. Yesu atile mwaba insansa ishingi mu kupeela ukucila ishaba mu kupokelela. Ukucita ifisuma ku bena mwesu, ku bana, ku bafyashi, e lyo na kuli balupwa, kulalenga twaba ne nsansa sana. (Amapi. 3:27) Ukuba aba nkumbu, aba cileela, e lyo no kulaelela bamunyinefwe na bankashi na ko kulalenga twaba ne nsansa sana kabili kulenga na Yehova ukutemwa. (Gal. 6:10; Kol. 3:12-14; 1 Pet. 4:8, 9) E lyo nga tulebomba umulimo wesu uwa kushimikila no mweo onse tukaba ne nsansa nga nshi.
16 Mwi lembo lya muli Lukala Milandu ilyo tulandilepo, mwaba amashiwi yalanda pa fintu fimo ifyo tuipakisha, pamo nga ukulya no kunwa. Nangu fye lintu tulecula, kuti twaipakisha ifintu fimo pano calo ifyo Yehova atupeela. Na kabili, pa kutamba uko akasuba kalewa, no kumona impanga iyayemba, no twana twa nama tuleangala, na pa kutamba ifipesha mano fimbi ifyabumbwa tatupoosapo indalama, lelo ifi fintu filatuletela insansa. Ukutontonkanya pali ifi fintu, kulalenga twatemwa sana Yehova, pantu e watupeela ifintu fyonse ifisuma.
17. Finshi fikalenga tukalubuke ku mafya, kabili pali ino nshita, cinshi citusansamusha?
17 Icacilapo ukucindama ca kuti ukutemwa Lesa, ukukonka amafunde yakwe, e lyo no kukwata icitetekelo mu cilubula fikalenga tukalubuke ku mafya yonse ayo ulubembu lwaleta no kuipakisha insansa ku ciyayaya. (1 Yoh. 5:3) Pali ino nshita, tulasansamuka ukwishiba ukuti Yehova alishiba fyonse ifitucusha. Davidi alembele ukuti: “Nkaanga no kusekelela mu cikuuku cenu, pantu namumona ukucula kwandi; namwishiba amacushi ya mweo wandi.” (Amalu. 31:7) Pa mulandu wa kuti Yehova alitutemwa, akatupokolola ku fyabipa.—Amalu. 34:19.
18. Mulandu nshi abantu ba kwa Lesa bafwile ukubela aba nsansa lyonse?
18 Ilyo tulelolela ukufikilishiwa kwa malayo ya kwa Lesa, lekeni tulepashanya Yehova, Lesa wa nsansa. Twileka ifyabipa ifitucitikila fituleshe ukubombela Lesa. Nga twakwata amafya, tuleleka amatontonkanyo yesu na mano ukulatutungulula. Ifyabipa nga fyacitika, Yehova akalatwafwa ukuilama e lyo no kucita fimo ifingalenga ubulanda bwesu ukucepako. Lekeni tulesekelela pa fisuma ifyo Lesa atupeela, ifya ku mubili ne fya ku mupashi. Nga tulepalama kuli Lesa, tukalasekelela pantu ‘balipaalwa abantu abo Yehova e Lesa wabo!’—Amalu. 144:15.
Finshi Mwasambilila?
• Ilyo tuli na mafya, kuti twapashanya shani Yehova?
• Bushe ukukanacilamo ukusakamikwa kuti kwatwafwa shani ukushipikisha amafya?
• Ilyo tuli na mafya, cinshi cingatwafwa ukulasekelela mu kucita ukufwaya kwa kwa Lesa?
[Amepusho]
[Ifikope pe bula 16]
Yehova alomfwa ububi pa fyabipa ificitika
[Abatusuminishe]
© G.M.B. Akash/Panos Pictures
[Ifikope pe bula 18]
Yehova alitupeela ifilenga tulesekelela lyonse