Langeni Ukuti Muli Basambi ba kwa Kristu aba Cine

“Umuti onse uusuma utwala ifisabo ifisuma, lelo umuti onse uubi utwala ifisabo ifibi.”—MAT. 7:17.

1, 2. Bushe abasambi ba kwa Kristu aba cine bapusana shani na ba bufi, maka maka muli ino nshita ya mpela?

YESU atile, icikapusanya abaibepa ukuti Bena Kristu na basambi bakwe aba cine, fisabo fyabo, e kuti ifyo basambilisha ne fyo bacita. (Mat. 7:15-17, 20) Ca cine, ifyo abantu batontonkanya ne fyaba mu mitima yabo filingana ne fyo basambilila. (Mat. 15:18, 19) Abasambilishiwa ifya bufi batwala “ifisabo ifibi,” lelo abasambilila icine ca mu Baibolo batwala “ifisabo ifisuma.”

² Iyi misango ibili iya fisabo yalimoneka bwino sana muli ino nshita ya mpela. (Belengeni Daniele 12:3, 10.) Abena Kristu ba bufi tabaishiba Lesa kabili baibepekesha fye ukumupepa, lelo abaishiba Lesa bwino, bamupepa “mu mupashi na mu cine.” (Yoh. 4:24; 2 Tim. 3:1-5) Baleesha na maka ukuba ne mibele yakwata Kristu. Inga ifwe, bushe tulacite fyo ngo muntu umo umo? Ilyo tulelanda pa fintu fisano ifyo Abena Kristu ba cine beshibikilwako, kuti cawama mwaipusha amuti: ‘Bushe ifyo ncita ne fyo nsambilisha fyalilingana ne fyo Icebo ca kwa Lesa cisosa? Bushe ndalenga abafwaya icine ukucitemwa?’

Mulecita Ifyo Icebo ca kwa Lesa Cilanda

3. Cinshi citeemuna Yehova kabili ni muli finshi Abena Kristu ba cine bafwile ukutemuna Yehova?

³ Yesu atile: “Te onse uutila kuli ine, ‘Shikulu, Shikulu’ akengila mu bufumu bwa mu muulu, kano uucita ififwaya Tata uwaba mu muulu e ukengilamo.” (Mat. 7:21) Ca cine, iciteemuna Yehova te kulanda fye ukuti ndi Mwina Kristu, kano ukucita ififwaikwa ku Bena Kristu. Kanshi abasambi ba kwa Kristu aba cine balingile ukukonka ifyo Lesa afwaya muli fyonse ifyakuma ubumi bwabo pamo nga ifyo bamona indalama, incito, ifya kuleseshamo icitendwe, intambi, amaholide abena fyalo basefya, icupo e lyo ne fyo bamona abantu banabo. Lelo Abena Kristu ba bufi bakonkelesha abantu ba muli cino calo mu fyo batontonkanya ne fyo bacita, nangu line cino calo cilebipilako fye muli shino nshiku sha kulekelesha.—Amalu. 92:7.

4, 5. Ukulingana na mashiwi yaba pali Malaki 3:18, finshi tulingile ukucita?

⁴ E co kasesema Malaki alembele ukuti: “Mukamona na kabili apalekanina umulungami no mubifi, apalekanina uubombela Lesa no ushimubombela.” (Mal. 3:18) Ilyo muletontonkanya pali aya mashiwi, kuti cawama mwayipusha amuti: ‘Bushe naba nga bantu ba muli cino calo, nelyo nalipusanako? Bushe lyonse ndafwaya ukuba nga balya nsambilila nabo ku sukulu nangu abo momba nabo, nelyo bushe ndakosapo fye ukukonka ifyo Baibolo ilanda, no kulondolwela abanandi ifyo nasuminamo ilyo calinga?’ (Belengeni 1 Petro 3:16.) Kwena ico tufwaya te kuilanga ukuti ifwe tuli balungami, lelo kukanaba nga bantu abashatemwa Yehova, abashifwaya na kumubombela.

⁵ Nga mwamonako mumo umo mulingile ukwaluka mu fyo mucita, kuti cawama mwapepelapo kuli Lesa no kutendeka ukucita ifingalenga mwa-aluka. Ne fingamwafwa, kulabelenga Baibolo lyonse, ukupepa kuli Lesa, e lyo no kulasangwa mu kulongana. Nga mulekonka sana ifyo Baibolo isambilisha e lyo mukakwata sana “ifisabo ifisuma” ukusanshapo fye ne “cisabo ca milomo iilumbula apabuuta ishina [lya kwa Lesa].”—Heb. 13:15.

 Mulebilisha Ubufumu bwa kwa Lesa

6, 7. Bupusano nshi bwaba pa Bena Kristu ba cine na ba bufi, nga kulanda pa bukombe bwa Bufumu?

⁶ Yesu atile: “Na mu misumba imbi ndi no kubila imbila nsuma iya bufumu bwa kwa Lesa, pantu e co natumiinwe.” (Luka 4:43) Cinshi Yesu alelandila sana pa Bufumu bwa kwa Lesa ilyo aleshimikila? Alishibe ukuti apo e Mfumu ya ubu Bufumu, ena na bamunyina basubwa no mupashi bakafumyapo ulubembu na Satana Kaseebanya ifiletela abantu amalanda. (Rom. 5:12; Ukus. 20:10) E mulandu wine aebele abasambi bakwe ukulabilisha ubu Bufumu mpaka impela ya cino calo ikese. (Mat. 24:14) Abantu abalanda fye ukuti basambi ba kwa Kristu lelo abashibombako uyu mulimo, te kuti babe abasambi ba cine. Mulandu nshi twasosela ifyo? Pali milandu itatu. Uwa kubalilapo, te kuti bashimikile abantu ifyo bena bashaishiba. Uwa bubili wa kuti, abengi tabaicefya kabili tabashipa aba kutila kuti batwalilila ukushimikila na lintu balebatumfya no kubakaanya. (Mat. 24:9; 1 Pet. 2:23) No wa butatu, Abena Kristu ba bufi tabakwata umupashi wa mushilo.—Yoh. 14:16, 17.

⁷ Lelo abasambi ba kwa Kristu aba cine balishiba ico Ubufumu bwa kwa Lesa bwaba ne fyo bukacita. E lyo kabili balibikako sana amano ku Bufumu kabili no mupashi wa mushilo ulabafwa ukubilisha pali ubu bwine Bufumu icalo conse. (Seka. 4:6) Bushe mulabombako uyu mulimo lyonse? Bushe mule-esha na maka ukulunduluka mu kubila Ubufumu, napamo ukulabomba inshita iikalamba mu mulimo nelyo ukuba abafikapo mu kubila ubufumu? Bamo balesha ukubomfya bwino Baibolo ilyo baleshimikila kabili ici calilenga balunduluka. Umutumwa Paulo uwatemenwe ukupelulushanya na bantu ifya mu Malembo alembele ukuti: “Icebo ca kwa Lesa ca mweo kabili ca maka.”—Heb. 4:12; Imil. 17:2, 3.

8, 9. (a) Finshi fyacitike kuli bamo ifilanga ifyo cacindamina ukubomfya Baibolo pa kushimikila? (b) Cinshi cingatwafwa ukuba abalamuka mu kubomfya Icebo ca kwa Lesa?

⁸ Ilyo munyinefwe umo aleshimikila ku ng’anda ne ng’anda, abelengeele umwaume umo uwalepepa ku Katolika ilembo lya kwa Daniele 2:44 no kulondolola ifyo Ubufumu bwa kwa Lesa bukaleta umutende wine wine ne cibote. Umwaume ayaswike ati: “Naumfwa bwino sana, pantu wacikupukula Baibolo no kunanga ifyo ili ilembo lilanda, tawacilondolola fye ifyo waishiba.” Ilyo munyinefwe abelengeele umwanakashi uupepa ku calici limo ilya ku Eastern Europe, uyu mwanakashi alipwishe amepusho ayengi ayasuma. Uyu munyinefwe no mwina mwakwe na bo babelengele Baibolo pa kwasuka amepusho umwanakashi abepwishe. Pa numa, umwanakashi atile: “Bushe namwishiba ico nacisuminina ukulanshanya nenu? Mwacisa pa mwandi namukwata na Baibolo kabili e yo mwacilabelenga pa kwasuka.”

⁹ Kwena ne mpapulo shesu shalicindama kabili tulingile ukupeela abantu ilyo tuleshimikila. Lelo Baibolo e yo tufwile ukulabomfya sana. E ico nga ca kutila tamuibomfya sana ilyo muleshimikila, kuti cawama mwatendeka ukuibomfya. Napamo kuti mwabalilapo ukusala amalembo ayalanda pa Bufumu bwa kwa Lesa ne fyo bukapwisha amafya ayasakamika abantu uko mwikalila. Lyena pekanyeni  ukuyayabelenga ilyo muleshimikila ku ng’anda ne ng’anda.

Beni ne Nsansa Ukuti Mwitilwa pe Shina lya kwa Lesa

10, 11. Bupusano nshi bwabapo pali Yesu na bengi abatila basambi bakwe ukukuma ku fyo bamona ishina lya kwa Lesa?

¹⁰ “‘Muli nte shandi,’ e fyo Yehova asosa, ‘na ine ndi Lesa.’” (Esa. 43:12) Yesu Kristu, Inte ya kwa Yehova iya cishinka alimwene ukuti lishuko ukwitilwa pe shina lya kwa Lesa no kulenga lyena ukwishibikwa. (Belengeni Ukufuma 3: 15; Yohane 17:6; AbaHebere. 2:12.) Na kuba icalengele Yesu aleitwa “Inte ya Cishinka,” ni co alebilisha ishina lya kwa Wishi.—Ukus. 1:5; Mat. 6:9.

¹¹ Lelo abengi, abatila bemininako Lesa no Mwana wakwe balasaalula ishina lya kwa Lesa, kabili balilifumya na mu maBaibolo yabo. Na kuba ni nomba line fye bashikofu ba ku Katolika babebele ukuti “ishina lya kwa Lesa ilyalembwa mu filembo fya ciHebere fine, e kuti YHWH, talifwile ukubomfiwa nangu ukulumbulwa” pa mapepo. * Uko kutontonkanya kwalilubana icine cine!

12. Cinshi calengele ababomfi ba kwa Yehova beshibikilwe sana kuli Yehova mu mwaka wa 1931?

¹² Abena Kristu ba cine balomfwa bwino ukubomfya ishina lya kwa Lesa. Bapashanya Kristu ne “bumba lya nte” ishaliko ilyo Yesu talabako. (Heb. 12:1) Na kuba, mu mwaka wa 1931, ababomfi ba kwa Lesa baishileishibikilwa sana kwi shina lya kwa Yehova ilyo basumine ukwitwa Inte sha kwa Yehova. (Belengeni Esaya 43:10-12.) Kanshi abasambi ba kwa Kristu aba cine baishileba “abantu abetilwa kwi shina [lya kwa Lesa]” mu nshila yaibela.—Imil. 15:14, 17.

13. Cinshi cingatwafwa ukulacita ififwaikwa ku betilwa kwi shina lya kwa Lesa?

¹³ Cinshi cingatwafwa ukulaikala ukulingana ne fifwaikwa ku betilwa kwi shina lya kwa Lesa? Cimo icingatwafwa, kutwalilila ukulabila pali Lesa. Paulo alembele ukuti, “Onse uwalilila kwi shina lya kwa Yehova akapusuka. Lelo, bakalilila shani ku o bashatetekela? Nga bakatetekela shani uo bashaumfwa? Nga bakomfwa shani apabula uwa kubila? Nga bakabila shani nga tabatuminwe?” (Rom. 10:13-15) E lyo kabili tufwile ukweba abantu icine ababepwa ubufi ubusaalula Kalenga wesu pamo nga icisambilisho ca kuti tukayapya mu mulilo wa pe, icilenga Lesa wa kutemwa alamoneka kwati munkalwe nga Satana Kaseebanya.—Yer. 7:31; 1 Yoh. 4:8; linganyeniko Marko 9:17-27.

14. Bushe abantu bamo bacitile shani ilyo baishibe ishina lya kwa Lesa?

¹⁴ Bushe mulomfwa bwino ukwitilwa kwi shina lya kwa Shinwe wa mu muulu? Bushe mulaafwa abantu bambi ukwishiba ili shina lya mushilo? Umwanakashi umo mu Paris, ku France, alyumfwile ukuti Inte sha kwa Yehova shalishiba ishina lya kwa Lesa, e co aipwishe Nte abalilepo ukumonana nankwe ukuti amulange apo ishina lya kwa Lesa lyalembwa mu Baibolo. Ilyo abelengele Amalumbo 83:18, alitemenwe sana. Atendeke ukusambilila Baibolo kabili pali ino nshita ni nkashi wakosa mu kupepa kabili abombela mu calo cimbi. Ilyo umwanakashi umo Katolika uwaleikala mu Australia amwene ishina lya kwa Lesa muli Baibolo pa muku wa kubalilapo, alililile ku nsansa. Ino nshita ni painiya kabili alibomba uyu mulimo pa myaka iingi. Nomba line fye ilyo Inte sha kwa Yehova mu Jamaica balangile umwanakashi ishina lya kwa Lesa muli Baibolo yakwe, na o wine alilukwishe ifilamba ku nsansa. E co muleba ne nsansa ukuti mwitilwa pe shina lya kwa Lesa kabili mulelenga ishina ili ilishaiwamina ukwishibikwa kuli bonse nga filya Yesu alecita.

“Mwitemwa ici Calo”

15, 16. Bushe Abena Kristu ba cine bamona shani icalo kabili mepusho nshi tufwile ukuipusha?

¹⁵ “Mwitemwa ici calo nelyo ifya muli ici calo. Ngo muntu atemwa icalo, ninshi tatemwa Shifwe.” (1 Yoh. 2:15) Cino calo ne mibele yabamo fyalipusana sana ne fyo Yehova no mupashi wakwe bafwaya. E ico Abasambi ba kwa Kristu aba cine balakaana ukuba aba muli cino calo kabili tabacitemwa nangu panono, pantu balishiba  ukuti nga filya umutumwa Yakobo alembele, “Bucibusa ne calo bulwani kuli Lesa.”—Yako. 4:4.

¹⁶ Kuti cayafya ukukonka aya mashiwi ya kwa Yakobo muli cino calo umwafula amatunko. (2 Tim. 4:10) E mulandu wine Yesu apepeeleko abasambi bakwe ukuti: “Nshilemulomba ukuti mubafumye muli ici calo, lelo ukuti mulebacingilila ku mubifi. Te ba muli ici calo, ifyo na ine nshili wa muli ici calo.” (Yoh. 17:15, 16) Yipusheni mwe bene amuti: ‘Bushe ndesha na maka ukukanaba uwa muli ici calo? Bushe bambi balishiba ukuti nshifwaya ukusefyako imitebeto ya muli cino calo no kukonka intambi ishishumfwana na malembo? Bushe balishiba no kuti nshisefyako icili conse umumonekela umupashi wa calo nangu ca kuti tacafuma ku basenshi?’—2 Kor. 6:17; 1 Pet. 4:3, 4.

17. Cinshi cingalenga abafumacumi basalapo ukuba kuli Yehova?

¹⁷ Ukulanda fye icishinka, ifyo twasuminamo ifyashimpwa pali Baibolo tafyakalenge abantu ukututemwa, nalyo line kuti fyalenga abafumacumi bafwaya ukwishiba ifyo twasuminamo. Ca cine, ilyo abantu ba musango yu bamona ukuti icitetekelo cesu cashimpwa pa Malembo kabili fyonse ifyo tucita filomfwana ne fyo twasuminamo, na bo mu mampalanya kuti bafwaya ukweba abasubwa ukuti: “Tuleya na imwe, pantu natumfwa ukuti Lesa ali na imwe.”—Seka. 8:23.

Langeni Ukutemwa kwa Bwina Kristu Ukwa Cine

18. Bushe ukutemwa Yehova na bantu banensu kumonekela mwi?

¹⁸ Yesu atile: “Uletemwa Yehova Lesa obe no mutima obe onse, no mweo obe onse, no kutontonkanya kobe konse,” kabili atile “uletemwa umunobe nge fyo waitemwa we mwine.” (Mat. 22:37, 39) Uku kutemwa ukwitwa a·gaʹpe mu ciGriki, kulalenga umuntu ukucitila uo atemwa icisuma ukulingana ne cishinte ca mu Baibolo, kabili kufuma pa nshi ya mutima. Uku kutemwa kwalikosa kabili kulamoneka sana. (1 Pet. 1:22) Muli uku kutemwa, tamwaba bukaitemwe, pantu kumonekela ku kucitila abantu ifisuma no kulanda ifisuma kuli bena.—Belengeni 1 Abena Korinti 13:4-7.

19, 20. Shimikeni fimo ifyacitike ifilelanga ifyo ukutemwa kwa Bwina Kristu kwakwata amaka.

¹⁹ Apo ukutemwa kwaba pa fisabo fya  mupashi wa mushilo uwa kwa Lesa, kulalenga Abena Kristu ba cine ukucita ifyo bambi bashingacita, pamo nga ukukanaba no musobolola, pa mushobo, intambi, ne calo abantu bafumako. (Belengeni Yohane 13:34, 35; Gal. 5:22) Ababa nge mpaanga balapapa sana nga bamona ukutemwana kwa musango yu. Ku ca kumwenako, ilyo umulumendo umuYuda ku Israele aile mu kulongana kwa Bwina Kristu pa muku wa kubalilapo, alipapile sana ukumona bamunyinefwe abaYuda na baArabu balepepela Yehova capamo. Ici calengele na o atendeke ukulalongana no kusambilila Baibolo. Bushe mulalanga ukutemwa kwa musango yu kuli bamunyinenwe? E lyo bushe lyonse mulapokelela abapya abaisa mu kulongana ku Ng’anda ya Bufumu te mulandu bafuma ku fyalo fimbi, ba mushobo umbi, nampo nga bapiina nelyo bakankaala?

²⁰ Fwe Bena Kristu ba cine tulesha ukulanga ukutemwa kuli bonse. Mu El Salvador, kasabankanya wacaice alesambilila Baibolo na nakulu bantu uwa myaka 87 uwali Katolika uwakosa sana. Bushiku bumo uyu nakulu bantu alilwele sana ica kuti balimutekele na mu cipatala. Ilyo afumine mu cipatala, baNte balemutandalila no kumutwalila ifya kulya. Balecita ifi fine pa mweshi uutuntulu. Takwali nangu umo uwamutandalile ukufuma uko alepepa. Cinshi cafuminemo? Alipoosele ifilubi fyakwe, no kufuutisha ishina ku calici, kabili alitwalilile ukusambilila Baibolo. Nga fintu mwamona, ukutemwa kwa Bwina Kristu kwalikwata amaka! Kulafika pa mutima ukucila ne fyo amashiwi yengacita.

21. Cinshi twingacita pa kuti tukekale bwino ku ntanshi?

²¹ Nomba line fye Yesu ali no kweba bonse ababepekesha ukumubombela ati: “Nshamwishiba nakalya; fumeni apa, mwe bacita amampuulu.” (Mat. 7:23) Kanshi natuletwala ifisabo ificindika Wishi no Mwana wakwe. Yesu atile: “Onse uumfwe fyebo fyandi ifi no kuficita, akapashaniwa ku muntu uwacenjela uwakuulile ing’anda yakwe pa mwalala.” (Mat. 7:24) Ca cine, nga twalanga ukuti tuli basambi ba kwa Kristu aba cine, Lesa akatupaala, kabili na ku ntanshi tukekala bwino, tukaba nge ng’anda iyakuulwa pa mwalala!

[Futunoti]

Bushe Muleibukisha?

• Bushe Abena Kristu ba cine bapusana shani na ba bufi?

• Lumbuleni “ifisabo” fimo ifyo Abena Kristu ba cine beshibikilwako.

• Pa kuti muletwala ifisabo ifyo Abena Kristu beshibikilwako, finshi mulingile ukucita?

[Amepusho]

[Icikope pe bula 13]

Bushe lyonse mulabomfya Baibolo ilyo muleshimikila?

[Icikope pe bula 15]

Bushe abantu bambi balishiba ifyo mumona ukusefya ukushumfwana na Malembo?