Amepusho Ukufuma ku Babelenga

Cinshi cingalenga umuntu ukubatishiwa cipya cipya?

Umuntu uwabatishiwa kale, limo kuti alatwishika nga alilingile ukubatishiwa kabili kuti atendeka no kutontonkanya pa kubatishiwa cipya cipya. Limbi kuti ilyo alebatishiwa, ninshi acili alacita ifyabipa mu bumfisolo ifyali no kulenga atamfiwa nga ca kuti ali uwabatishiwa iyo nshita. Bushe umuntu wa musango uyu, kuti twatila alilingile ukuipeela kuli Lesa pali ilya nshita? Uyu muntu aleka ukucita ifyo Baibolo yalesha, nga e lyo alingile ukuipeela kuli Yehova. Kanshi nga ca kuti umuntu abatishiwa ninshi talaleka ukucita ifyabipa, kuti caba fye bwino ukutontonkanyapo pa kubatishiwa cipya cipya.

Inga nga ca kuti umuntu talecita ifyabipa pa nshita alebatishiwa, lelo pa numa ya kubatishiwa e lyo acita ulubembu ulwingafwaikwa komiti ya bupingushi yabombelapo? Nomba tutile alanda ukuti, taishibe bwino bwino ico abatishiwilwe e lyo atila no kuti taalingile ukubatishiwa. Kuti caba shani? Ilyo baeluda balelanshanya nankwe, tabalingile ukulanda ifingalenga alamona ati ca cine tafikilepo ukubatishiwa kabili tabalingile no kumwipusha nga alamona ukuti ukuipeela kwakwe no kubatishiwa kwali fye bwino. Pantu na kuba uyu muntu alyumfwile ilyashi lya mu Malembo pa fyo ulubatisho lwacindama. Kabili alisumine ilyo kalanda aipwishe fipusho ifyakuma ukuipeela no kubatishiwa. E lyo alilefwala ne fya kufwala fimbi ifya kubatishiwilwamo, bamwibisha na mu menshi. Kanshi, kuti twatila alishibe bwino bwino ico alecita ne fyo cacindama. Baeluda balingile ukumumona ukuti alibatishiwa.

Nga ca kuti umuntu aletwishika ulubatisho lwakwe, baeluda kuti bamweba ukuyabelenga Ulupungu lwa kwa Kalinda ulwa October 15, 1960, pa mabula 415 na 416, e lyo no lwa September 1, 1964, pa mabula 404 ukushinta ku 407, umo ilyashi pa kubatishiwa cipya cipya lyalondololwa sana. Nga ca kutila kuli ifishinka ifilelanga ukuti umuntu alingile ukubatishiwa na kabili (ifishinka pamo nga ukukanaumfwikisha icine ca mu Baibolo ilyo abatishiwe), umuntu umwine e ufwile ukupingulapo ukubatishiwa cipya cipya.

Finshi Abena Kristu balingile ukutontonkanyapo nga ca kuti bali no kulaikala mu ng’anda imo ine na bantu bambi?

Abantu fye bonse balafwaya umwa kwikala. Nomba, muno nshiku abantu abengi tabakwata amayanda. Ubupiina, ukulwala, ne fintu fye fimbi kuti fyalenga balupwa abengi balaikala mu ng’anda imo. Mu ncende shimo, balupwa abengi limbi kuti baleikala pamo mu muputule fye umo.

Kwena te mulimo wa kuteyanya kwa kwa Yehova ukupeela abantu ba kwa Lesa mu filonganino fyonse amafunde pa mayanda balingile ukulaikalamo. Abena Kristu balikoseleshiwa ukulatontonkanya pa fishinte fya kututungulula ifyaba muli Baibolo pa kuti bengamona nampo nga ifyo bapekanya ukulaikala kuti fyaba bwino mu menso ya kwa Lesa nelyo iyo. Fishinte nshi fimo ifyo bengakonka?

 Ico tulingile ukutontonkanyapo sana, ni fintu ukwikala na bantu bambi kukalenga tukabe na fintu kukalenga bukapepa bwesu ukuba. Tulingile ukuipusha ukuti, bantu ba musango nshi nakulaikala nabo? Bushe balapepa Yehova? Bushe balakonka ifyo Baibolo ilanda? Umutumwa Paulo alembele ati: “Mwilufiwa. Ukwampana pamo na babi kulonaula imibele isuma.”—1 Kor. 15:33.

Amalembo yalondolola ukuti Yehova alikaanya ubulalelale no bucende. (Heb. 13:4) Kanshi imikalile ya kuti abantu abashaupana balaikala pamo kwati nalimo balyupana, te kuti isekeshe Lesa nangu fye panono. Umwina Kristu talingile ukulaikala mu ng’anda imo na bantu abamona kwati ubulalelale tabwabipa.

E lyo kabili, Baibolo ikonkomesha ukuti bonse abafwaya Lesa ukubatemwa bafwile “ukufulumuka ubulalelale.” (1 Kor. 6:18) Kanshi kuti cawama ku Mwina Kristu ukukaana imikalile iingalenga alatunkwa ukucita ubulalelale. Tutile, Abena Kristu abengi balelaala mu ng’anda imo. Bushe ukwikala kwa musango yu te kuti kulete amatunko? Kuti caba shani nga ca kuti abantu babili abashaupana baisanga fye bali pamo beka pa mulandu wa kuti bambi abo bekala nabo nabafumapo pa nshita inono? E lyo kuti mwafuma ifyabipa nga ca kuti umwaume no mwanakashi abashimbe kabili abatemwana baleikala ing’anda imo. Kanshi aba mano balataluka ku mikalile ya musango yu.

Nangu fye bantu abalekana te kuti ciwame nga batwalilila ukulaikala mu ng’anda imo ine. Apo balyupene kale kabili balitemwanene, kuti batunkwa ukucita ubupulumushi.—Amapi. 22:3.

Ica kulekeleshako lelo icacindama ico tulingile ukutontonkanyapo ni fintu abantu mu bwikashi bamona ifyo umo asalapo ukulaikala. Nangu ca kutila Umwina Kristu alemona ukuti imikalile baleikalilamo ili fye bwino, abantu mu bwikashi nga balelandapo ukuti taiweme, ninshi taili bwino. Tatufwaya nangu panono ukucita ifingalenga abantu balapontela ishina lya kwa Yehova. Paulo atile: “Mwilapunwisha abaYuda na baGriki ne cilonganino ca kwa Lesa, nge fyo na ine ncita icisuma kuli bonse muli fyonse, nshifwaya kumwenamo icisuma ne mwine kano icingawamina abengi, pa kuti bapusuke.”—1 Kor. 10:32, 33.

Ku bafwaya ukukonka inshila shalungama isha kwa Yehova kuti limbi cayafya ukusanga umwa kwikala umwalinga. Lelo ilyo Abena Kristu bashilacita icili conse bafwile ‘ukumona nga kuti casekesha Shikulu.’ Balingile ukushininkisha ukuti takuli nangu cimo icabipa icilecitwa mu mayanda yabo. (Efes. 5:5, 10) Pa kuti cibe ifi, Abena Kristu balingile ukulapepa kuli Lesa ukuti alebatungulula kabili bafwile ukubombesha pa kuti mu ng’anda yabo tamucitike ifingaleta umuseebanya pali bena na pe shina lya kwa Yehova.