Icingafwa Abacaice Ukulaibukisha Kabumba Wabo

“IBUKISHA Kabumba obe ilyo ucili umwaice.” E fyalembele imfumu ya mano Solomone, imyaka nalimo 3,000 iyapitapo. (Luk. Mil. 12:1, Today’s English Version) Abena Kristu bacaice nabakwata icintu na cimbi ica kubafwa ukwibukisha Kabumba wabo. Icitabo ca Ifipusho Abacaice Bepusha ne Fyasuko Ifingabafwa, Ibuuku 2, califumine pa Kulongana kwa Citungu ukwa Nte sha kwa Yehova ukwaleti, “Ukulatungululwa no Mupashi wa kwa Lesa,” ukwali mu fyalo ifingi ukutendeka mu May 2008 ukufika mu January 2009.

Pe bula lya bubili muli ici citabo, paliba kalata iyo Ibumba Litungulula lyalembela abacaice. Amashiwi yamo muli iyi kalata yatila: “Tulepepa kuli Lesa ukuti ifyebo ifili muli cino citabo, filekwafwa ukulashipikisha amafya na matunko ayo abaice balekwata pali ino nshita kabili fyakulakwafwa ukucita ifintu ukulingana ne fyo Lesa afwaya.”

Abafyashi balafwaya ukukusha abana “ukulingana no kusalapula kwa kwa Yehova no kukonkomesha kwakwe.” (Efes. 6:4) Ilyo bafika pa bukashana no bulumendo, abacaice abengi tabaicetekela kabili balafwaya sana aba kubatungulula. Abana benu nga nabafika pali uyu mushinku, kuti mwacita shani pa kuti ici citabo cibafwe sana? Fimo ifyo mwingalacita ni fi:

▪ Mulingile ukukwata ici citabo no kucibelenga sana pa kuti mwishibe fyonse ifyabamo. Lelo te kubelengamo fye. Esheni no kumona ifyo balondolwele ifishinka. Ici citabo tacafwa fye abacaice ukwishiba icisuma ne cibi, lelo cilabafwa no kukwata “amano.” (Heb. 5:14) Cilabalanga ne fya kucita pa kuti lyonse balecita icalungama. Ku ca kumwenako, Icipandwa 15 (“Kuti Nacita Shani pa Kuti Nshilekonkelela Abanandi?”) taceba fye abacaice ukuti tabalingile ukukonkelela abanabo. Cilanda na pa fya mu Baibolo ifingabafwa ukulacita icalungama e lyo no ‘kwishiba ifya kwasuka.’—Kol. 4:6.

▪ Mulebomfya ifiputulwa umo baipusha abacaice ukulemba ifili ku mutima. Nangu ca kutila ifi fiputulwa fyalembelwa abacaice, kuti cawama na imwe mwalembamo mu citabo cenu ifyo muletontonkanya. *  Ku ca kumwenako, ilyo mwafika pe bula 16 apaba ifipusho fibili pa lwa kwishishanya, esheni ukwibukisha ifyo mwali no kwasuka ilyo mwali ne myaka iikwete umwana wenu, e lyo nga mulefwaya, kuti mwafilemba mu ncende basha. Lyena kuti mwaipusha amuti: ‘Bushe ifyo naleumfwa iyo nshita e fyo ng’umfwa na ino nshita? Ukufuma ilya nshita nali umwaice ukufika ino nshita, finshi fimbi naishibilapo pali uyu mulandu kabili kuti nasambilisha shani umwana wandi pali ifi fintu?’

▪ Mwilabelenga ifyo umwana wenu alemba mu citabo cakwe. Ifiputulwa muli ici citabo umo baipusha abana ukulemba fimo fyabelako ukwafwa umwana ukulemba ifili ku mutima nelyo ukufitontonkanyapo fye. Icifwaikwa kuli imwe kwishiba fye ifyo umwana wenu aletontonkanya, te kwishiba ifyo alembele. Pe bula 3, pa kamutwe katila: “Mwe Bafyashi,” ici citabo calanda ukuti: “Pa kukoselesha abacaice ukulalemba mu citabo cabo ifili ku mukoshi, tamulingile ukulamonamo mu citabo cabo. Nalimo inshita imbi kuti bamweba ifili mu mutima ifyo balemba.”

Cisuma Ukubomfya pe Sambililo lya Baibolo Ilya Lupwa

Icitabo citila Ifipusho Abacaice Bepusha, Ibuuku 2, cisuma sana ukubomfya pa Mapepo ya Lupwa. Kuti mwabomfya shani ici citabo apo tacakwata fipusho pa mpela ya paragrafu imo na imo? Pa kusambilila, kuti mwabomfya fye inshila iili yonse iingaafwa sana abana benu.

Ku ca kumwenako, indupwa shimo balaipakisha ukupituluka mu fyo bengacita ilyo balelanshanya iciputulwa citila, “Ifyo Nkacita Abanandi nga Balefwaya Mbakonkelele,” icaba pa mabula 132 na 133. Icipusho ca kubalilapo pali aya mabula kuti ca-afwa umwana wenu ukutontonkanya pa bwafya ubukalamba engakwata. Icipusho ca bubili cilelanga uko ubwafya bwingafuma. Pa numa ya kulanda pa fingafumamo nga akonkelela bambi nelyo nga akaana ukubakonkelela, umwana wenu balimweba ukutontonkanya pa fyo engaasuka pa kuti abalemupatikisha baleke. Afweni umwana wenu ukutontonkanya pa nshila shalekanalekana isho engabomfya pa kwasuka pa kuti tomfwile insoni pa kulanda na pa kuti ayasuka mu kushipa.—Amalu. 119:46.

Kuti Camwafwa Ukulalanshanya na Bana Benu

Icitabo ca Ifipusho Abacaice Bepusha, Ibuuku 2 cilaafwa abacaice ukulanshanya na bafyashi babo. Ku ca kumwenako, pa tubokoshi tutila “Kuti Nacita Shani pa kuti Nande na Bafyashi Bandi pa Lyashi lya Baume Nangu Ilya Banakashi?” (amabula 63-64) na kabokoshi katila  “Landa na Bafyashi Bobe!” (ibula 189), paliba ifyebo pa fyo abana bengatendeka ukulanda pa malyashi ayashanguka ukulandapo. Umukashana umo uwa myaka 13 alembele ukuti, “Ici citabo calimpeele inkosho ya kulanda na bafyashi bandi pa fyo naletontonkanyapo na pa fyo nalecita.”

Ici citabo cilalenga no lupwa lonse ukulalanshanya na mu nshila shimbi. Pa mpela ya cipandwa cimo na cimo, palaba akabokoshi akatila, “Uletipo Shani?” Aka kabokoshi, te kakupitulukamo fye, lelo ifyebo fyaba pali aka kamutwe fya kulanshanyapo ngo lupwa. Mupepi na ku mpela ya cipandwa cimo na cimo kulaba akabokoshi akatila “Ifyo Ndefwaya Ukucita!” Aka kabokoshi kalalenga ukuti abacaice balelemba ifintu fyalekanalekana ifyo bengacita ukulingana ne fyo basambilile muli ico cipandwa. Amashiwi ya kulekelesha pa kabokoshi katila “Ifyo Ndefwaya Ukucita!” yatila: “Ifyo ningatemwa ukwipusha abafyashi bandi pali ili lyashi ni fi: . . . ” Ici kuti calenga abacaice ukulalanshanya na bafyashi babo pa kuti balebapandako amano.

Bafikeni pa Mutima!

Mwe bafyashi ubuyo bwenu bwa kufika umwana pa mutima. Icitabo ca Abacaice Bepusha, Ibuuku 2, kuti camwafwa ukucite co. Moneni ifyo umufyashi umwaume umo abomfya ici citabo pa kuti umwana wakwe alelanshanya na ena ukufuma pa nshi ya mutima.

“Rebekah na ine twalikwata ififulo fimo uko twatemwa ukutandala pa makasa, nelyo ne ncinga atemwa na motoka. Nalimona ukuti Rebekah tafilwa ukulanda icili ku mukoshi nga natuya kuli ishi ncende.

“Iciputulwa ca kubalilapo ico twalanshenyepo muli ici citabo, ni kalata yafuma kwi Bumba Litungulula e lyo ne fyebo fyaba pa mutwe utila ‘Mwe Bafyashi.’ Nalefwaya umwana wandi ukwishiba ukuti nga filya ifyebo fyaba pe bula 3 filanda, afwile ukulemba mu citabo cakwe fyonse ifili ku mutima ukwabula umwenso. Nshakulabelengamo mu citabo cakwe.

“Naebele Rebekah ukusala ifipande engatemwa twalandapo ne fyo twingabalilapo. Pa fipande fya kubalilapo ifyo asalile, pali ne cipande citila ‘Bushe Mfwile Ukwangala Ifyangalo fya pa Kompyuta?’ Nshale-enekela ukutila kuti asala ici cipande! Lelo pali icalengele acisale. Abanankwe abengi pa sukulu baleteya ifyangalo fya pa kompyuta ifyabipa sana. Nshaishibe ukuti na mu fyangalo fya pa kompyuta mulaba ulubuli, ne nsele! Lelo alilondolwele fyonse ifi ilyo twalanshenye akabokoshi katila: “Ifyo Ndefwaya Ukucita!” akaba pe bula 251. Kalya kabokoshi kalengele Rebekah ukupekanya ifya kwasuka nga balemupatikisha ukuteya ifyangalo fya pa kompyuta.

“Ino nshita Rebekah alanjeba ifyo alembele mu citabo cakwe. Nga tulesambilila cilafya ukuleka ukulanshanya. Tulalekanina ukubelenga, kabili ilyo tulebelenga alafwaya ukulanda pali fyonse kumo ne fikope no tubokoshi. Ici cilalenga ndemweba ifyalecitika ilyo nali umwaice nga ena. Na o alanjeba ifyo ifintu fyaba muli ino myaka. Tamfisa nangu cimo!”

Nga muli bafyashi, ukwabula no kutwishika, mwalitemenwe ilyo ici citabo cafumine. Nomba mulingile ukucibomfya bwino sana. Ibumba Litungulula kuti lyatemwa ici icitabo citila Ifipusho Abacaice Bepusha ne Fyasuko Ifingabafwa, Ibuuku 2, ca-afwa ulupwa lwenu. Shi ici citabo nacileafwa abantu bonse, maka maka abacaice pa kuti ‘baletungululwa no mupashi.’—Gal. 5:16.

[Futunoti]

[Akabokoshi pe bula 30]

Ifyo Abacaice Bamo Balandapo

“Ici citabo, citabo cifwaya pa kubelenga naukwata akalembelo e lyo uletontonkanya na pa fyo ulebelenga. Apo muli ici citabo balishamo apa kulemba, cilalenga umuntu alelemba ifyebo ifyo engalatontonkanyapo pa kuti awamya imikalile.”—Nicola.

“Limo abantu, na bamona kwati balengafwa, balanjeba ukuti mfwile ukufwaya uwa kwishishanya nankwe. Icipande ca kubalilapo fye calilenga namona ukuti te mulandu ne fyo abantu basosa, nshilaipekanya ukutendeka ukwishisha.”—Katrina.

“Akabokoshi katila ‘Bushe Ulefwaya Ukubatishiwa?’ kalingafwa ukubika sana amano ku lubatisho lwandi. Kalilenga natontonkanya pa fyo ningacita pa kuti ndepepa amapepo ayasuma na pa kuti isambililo lya pa lwandi lile-enda bwino.”—Ashley.

“Nangu ca kutila abafyashi bandi Abena Kristu balensambilisha ukufuma ku bwaice, ici citabo calingafwa ukuitontonkanishisha ne mwine pa fyo mfwile ukucita mu bumi. Calilenga ndelanshanya na bafyashi bandi tonse utwa ku mutima.”—Zamira.

[Icikope pe bula 31]

Mwe bafyashi ishibeni sana ifyaba muli ici citabo

[Icikope pe bula 32]

Pampamineni pa kufika abana benu pa mutima