Kaaneni Ubufi bwa kwa Satana

‘MWIBEPWA. Lesa wenu tamwafwe. Cimbeni nga te ifyo twalamusansa!’ Aya e mashiwi Sankeribu, Imfumu ya bena Asiria yatumine Rabsake ukuyaeba abekashi ba mu Yerusalemu. Abashilika ba iyi mfumu balisanshile icalo ca Yuda. Amashiwi Rabsake atuminwe ukuyalanda yali ya kutompola abantu ba mu Yerusalemu no kubatiinya pa kuti bacimbe.—2 Isha. 18:28-35.

Calishibikwe ukuti abena Asiria bali ba bukatu kabili abankalwe. Baleishibisha abalwani babo ubunkalwe bwabipisha ubo bakwete ne fyo balesunga abasha babo buluku buluku pa kuti abalwani babo balebatiina. Philip Taylor, uulemba amalyashi ya kale atile, “balebomfya icintiinya no bufi pa kuti abantu abo balecimfya balekonka fye ifyo balebeba na pa kuti abalefwaya ukubasansa nga baumfwa amalipoti ya kuti ba buluku, balebatiina.” Ubufi canso ca maka sana. Taylor atile, “Bulonaula ukutontonkanya kwa bantu.”

“Ukushomboka” kwa Bena Kristu ba cine “te kwa kushomboka na bantu bakwata umubili wa munofu no mulopa, lelo kwa kushomboka . . . ne mipashi ibifi iyaba mu muulu,” e kutila, bamalaika abapondokele Lesa. (Efes. 6:12) Umulwani mukalamba pali aba ni Satana Kaseebanya. Na o wine alabomfya icintiinya no bufi.

Satana atila kuti alenga umuntu fye onse ukuleka ukuba uwa cishinka kuli Lesa. Mu nshiku sha kwa Yobo, Satana aebele Yehova Lesa ati: “Conse ico umuntu akwata kuti apeelela pa mweo wakwe.” Mu nshila imbi aletila, umuntu nga acula sana, kuti asuka apondokela Lesa. (Yobo 2:4) Bushe ico Satana alandile ca cine? Bushe batini ifwe bonse nga twacula sana, tulafika pamo apo cafya sana ica kutila pa kuti fye tube no mweo, kano twaleka ukukonka ifyo twasuminamo? Satana afwaya tulemona ukuti ifi e fyo ciba. E ico, alatubepa panono panono pa kuti tusumine ukuti e fyo ciba. Natumone inshila shimo isho acitilamo ifyo e lyo tumone ne fyo twingamukaana.

“Mu Mushili E Mwaba Umufula” Wabo

Satana alandiile muli Elifasi, umo pa banankwe ba kwa Yobo abaishile mu kumupempula, ukuti abantu te kuti bacimfye Satana pantu baba abanaka. Ilyo alelanda pa bantu ukuti “baikala mu mayanda ye loba,” Elifasi aebele Yobo ati: “Mu mushili e mwaba umufula [wabo]! Alabashonaula bwangu ukucila icipelebesha ca bushiku. Ukutula ulucelo ukufika icungulo balatobaulwa; baloba umuyayaya ukwabula no wa kubikako umutima.”—Yobo 4:19, 20.

Amalembo yambi yalinganya fwe bantu ku “fipe fye bumba,” e kutila ifipe ifingatobeka bwangu. (2 Kor. 4:7) Icalenga tube abanaka mulandu wa lubembu twapyana no kukanapwililika. (Rom. 5:12) Satana kuti atusansa no kutucimfya nga tapali wa kutwafwa. Lelo fwe Bena Kristu twalikwata uwa kutwafwa. Twalicindama mu menso ya kwa Lesa nangu ca kutila twaba abanaka. (Esa. 43:4) E lyo kabili Yehova alapeela umupashi wa mushilo ku bamulomba. (Luka 11:13) Umupashi wakwe kuti watupeela “amaka yacila aya bantunse,” ne co, kuti calenga twashipikisha ubwafya ubuli bonse ubo Satana engaleta pali ifwe. (2 Kor. 4:7; Fil. 4:13) Nga twakaanya Kaseebanya, no kuba “abakosa ndi mu citetekelo,”  Lesa akatwikasha kabili akatukosha. (1 Pet. 5:8-10) Kanshi, tatufwile ukutiina Satana Kaseebanya.

Umuntu ‘Anwa Ubupondamishi nga Menshi’

Elifasi aipwishe ukuti: “Bushe umuntunse umwina kufwa nani uwa kuti asanguluke, nelyo onse uwafyalwa ku mwanakashi nani pa kuti alungame?” E lyo umwine ayaswike no kutila: “Mona! [Lesa] tatetekela aba mushilo bakwe, ne myulu na yo tayasanguluka mu menso yakwe. Pali bufi uwa bunani kabili uwapondama, umuntu uunwa ubupondamishi nga menshi!” (Yobo 15:14-16) Elifasi ale-eba Yobo ati Yehova tamona umuntu nangu umo ukuti mulungami. Satana Kaseebanya na o afwaya imitontonkanishishe ya bantu yalubana. Afwaya tulesakamana pa filubo twacitile kale, no kucishamo ukuilengulula, e lyo no kulamona kwati te kuti tulubulwe iyo. Afwaya no kuti tulemona ati ifyo Yehova afwaya tulecita fyalyafya sana no kuti takwata sana inkumbu, e lyo tatweleela kabili te kuti atusakamane.

Kwena, ifwe bonse tuli ‘babembu kabili twalifilwa ukufika pa bukata bwa kwa Lesa.’ Takwaba umuntu umubembu uwingacita fyonse ififwaya Yehova. (Rom. 3:23; 7:21-23) Lelo ico tacalola mu kuti Lesa amona kwati tuli bacabecabe. Yehova alishiba ukuti “icisoka ca pa kutendeka, iciitwa Kaseebanya kabili Satana,” e citutunka pantu calishiba ukuti tuli babembu. (Ukus. 12:9, 10) Lesa alatulangulukilako kabili ‘taikalila fye ukufwailisha ifilubo’ muli ifwe pantu alishiba ati “tuli lukungu.”—Amalu. 103:8, 9, 14.

Nga twaleka ukucita ifyabipa e lyo twapepa kuli Yehova no kumweba ukuti tuli no bulanda pa fyo tucitile, kabili twalapila no kulapila, ‘akatwelela nga nshi.’ (Esa. 55:7; Amalu. 51:17) Baibolo itila nangu ca kuti imembu shesu “shakashika ce, shikabuuta tuutu kwati butonge.” (Esa. 1:18) E ico, natutwalilile ukulacita ukufwaya kwa kwa Lesa.

Apo tuli babembu, te kuti tube abalungama pa menso ya kwa Lesa. Ilyo Adamu na Efa babembwike, baishileba abashapwililika kabili balufishe ne subilo lya kwikala umuyayaya. Ifyo fine e fyo bonse twapyana. (Rom. 6:23) Lelo, pa mulandu wa kuti Yehova alitemwa sana abantu, alitupeele Umwana wakwe, Yesu Kristu uwatuulile ilambo lya kutulubula kulila fye twacetekela muli ena. (Mat. 20:28; Yoh. 3:16) Iyi e nshila yawamisha iyo Lesa alangilamo “icikuuku” cakwe. (Tito 2:11) Kanshi kuti twalubulwa! E ico twileka Satana alelenga tulemona kwati teti tulubulwe.

‘Kumyeniko kwi Fupa Lyakwe na ku Munofu Wakwe’

Satana atile Yobo nga alwala kuti aleka ukutetekela Lesa. Ilyo Satana Kaseebanya asonsombele Yehova, atile: ‘Kumyeniko kwi fupa lyakwe na ku munofu wakwe kabili mumone nga  takamutuke pa menso yenu.’ (Yobo 2:5) Uyu Mulwani wa kwa Lesa kuti atemwa sana nga alenga twalaimona kwati tuli bacabecabe fye pa mulandu wa malwele yesu.

Lelo Yehova tatusuula nga twalafilwa ukubomba umulimo wakwe nge fyo twalebomba kale. Tutile umunensu bamusansa no kumucena sana. Bushe kuti twamusuula pa mulandu wa kuti talekwanisha ukucita ifyo aletucitila kale? Awe iyo! Kuti twatwalilila ukumutemwa no kulamusakamana, maka maka nga ca kuti acenenwe ilyo aletucitilako fimo. Bushe Yehova ena e wingaleka ukututemwa? Baibolo itila: “Lesa taba uushalungama, takalabe umulimo wenu no kutemwa uko mwalangile kwi shina lyakwe.”—Heb. 6:10.

Amalembo yalilanda pali “mukamfwilwa umo umupiina” napamo uwatungilile ukupepa kwa kwa Lesa pa myaka iingi. Ilyo Yesu amumwene alepoosa “utundalama tubili utwacepesha” mu cipao ca ndalama pe tempele, bushe alisuulile ulya mwanakashi kumo no musangulo wakwe? Iyo, lelo alimutashishe pa kupeela indalama shonse isho akwete pa kuti atungilile ukupepa kwa cine.—Luka 21:1-4.

Nga ca kuti twatwalilila aba cishinka, bucibusa bwesu na Yehova tabwakapwe, nangu ulubembu lwingalenga twakota nelyo twalalwalilila. Lesa takatale alekelesha aba cishinka kuli ena nangu amafya yengalenga baleka ukubombesha mu mulimo wakwe.—Amalu. 71:9, 17, 18.

Buuleni “Icisote ce Pusukilo”

Kuti twaicingilila shani ku bufi bwa kwa Satana? Umutumwa Paulo alembele ukuti: “Mulekosa muli Shikulu na mu maka ya bukose bwakwe. Fwaleni ifya bulwi fyonse ifya kwa Lesa ukuti mube na maka ya kwiminina ndi ku kulwisha imicenjelo ya kwa Satana Kaseebanya.” Cimo icaba pa fya kufwala fya bulwi, “cisote ce pusukilo.” (Efes. 6:10, 11, 17) Tufwile ukubuula ico cisote no kucifwalilila pa kuti tulekaana ubufi bwa kwa Satana. Icisote ca mushilika cilacingilila umutwe wakwe. “Isubilo lya kupusuka,” e kutila ukucetekela ukuti fyonse ifyo Lesa alaya pa calo cipya fikacitika, likalacingilila amatontonkanyo yesu pa kuti twilabepwa kuli Satana. (1 Tes. 5:8) Tulingile ukulaisambilisha sana Amalembo pa kuti isubilo lyesu lilekoselako.

Yobo alishipikishe ukusansa kwa kwa Satana ukwakaluka kabili ukwabipisha. Yobo alitetekele sana ukuti abafwa bakabuuka, ica kuti na lintu camoneke kwati alafwa, tanenwike. Lelo aebele Yehova ati: “Muketa, na ine nkaasuka. Pantu mukafuluka umulimo wa minwe yenu.” (Yobo 14:15) Yobo alicetekele ukuti nangu afwa pa mulandu wa kusungilila bucishinka bwakwe, apo Lesa alitemwa ababomfi bakwe aba cishinka, akabeeta ukufuma ku bafwa.

Shi na ifwe natutetekele Lesa wa cine nga fintu Yobo amutetekele. Yehova kuti afumyapo fyonse ifyo Satana na bantu bakwe bengaleta pali ifwe. Ibukisheni no kuti Paulo atweba ukuti: “Lesa wa cishinka, kabili takamuleke ukweshiwa ubwesho ubo mushingashipikisha, lelo ilyo ubo bwesho bwaisa akafwaya na pa kuti mufuminemo pa kuti mube na maka ya kubushipikisha.”—1 Kor. 10:13.

[Icikope pe bula 20]

Yehova alicindamika sana umulimo mumubombela

[Icikope pe bula 21]

Buuleni icisote ce pusukilo no kucifwalilila