Twalilileni Ukukonka Inshila Yawamisha iya Bumi!
Twalilileni Ukukonka Inshila Yawamisha iya Bumi!
“Nga tuli aba mweo kabili nangu nga twafwa, tuli ba kwa Yehova.”—ROM. 14:8.
1. Cinshi Yesu asambilishe pa mikalile yawamisha?
YEHOVA afwaya tuleipakisha sana ubumi. Abantu kuti baba ne mikalile yalekanalekana, lelo kwaba fye imikalile imo iyawamisha. Tapali ico twingacita icingawama ukucila pa kulakonka ifyo Icebo ca kwa Lesa cilanda ne fyo tusambilila ku Mwana wakwe Yesu Kristu. Yesu aebele abasambi bakwe ukulapepela Lesa mu mupashi na mu cine, kabili abapeele no mulimo wa kulenga abantu ukuba abasambi. (Mat. 28:19, 20; Yoh. 4:24) Nga tulekonka ifyo Yesu atwebele, Yehova alatemwa kabili alatupaala.
2. Bushe abengi bayankwileko shani ku bukombe bwa Bufumu mu nshita sha batumwa, kabili abaleitwa ati “Aba Nshila” baleikala shani?
2 Ilyo ‘ababa no mutima uusuma abalefwaya umweo wa muyayaya’ batetekela no kubatishiwa, cilawama ukubeba ukuti: “Twalilileni ukukonka inshila yawamisha iya bumi!” (Imil. 13:48) Mu nshita sha batumwa, abantu abengi sana abafumine mu nko shalekanalekana balipokelele icine no kubatishiwa, pa kuti balange ku cintubwingi ukuipeela kwabo kuli Lesa. (Imil. 2:41) Aba Bena Kristu ba kubalilapo baleitwa ati “Aba Nshila.” (Imil. 9:2; 19:23) Calilolelemo ukulabeta ati Aba Nshila pantu abasangwike abasambi ba kwa Kristu baleikala ukulingana ne citetekelo bakwete muli Yesu Kristu e lyo kabili balemupashanya.—1 Pet. 2:21.
3. Cinshi cilenga abantu ba kwa Yehova ukubatishiwa, kabili ni banga babatishiwa mu myaka 10 iyapita?
3 Umulimo wa kulenga abantu ukuba abasambi ulebombwa sana muli shino nshiku sha kulekelesha ica kuti pali ino inshita abantu baleshimikila mu fyalo ukucila 230. Mu myaka 10 iyapita, abantu ukucila pali 2,700,000 bali-ipeela kuli Yehova no kubatishiwa pa kulanga ukuipeela kwabo kuli ena. Nga kwakanya, ninshi cila mulungu ababatishiwa icalo conse balacila 5,000! Icilenga abantu ukubatishiwa, kutemwa Lesa, no kwishiba Amalembo e lyo no kucetekela ifyo yasambilisha. Ulubatisho cintu icacindama mu bumi bwesu, pantu e ntendekelo ya bucibusa bwesu na Yehova. Na kabili ukubatishiwa cilangililo ca kuti twalicetekela ukutila Lesa akulatwafwa ukumubombela mu cishinka, nga filya fine aleafwa ababomfi bakwe aba ku kale ukwenda mu nshila yakwe.—Esa. 30:21.
Mulandu Nshi Mufwile Ukubatishiwilwa?
4, 5. Landeni pa mapaalo yamo no busuma ubwaba mu kubatishiwa.
4 Napamo mwalisambilila pali Lesa, mwalyalula ne mikalile yenu, kabili pali nomba muli bakasabankanya abashabatishiwa. Nga mwalicita ifyo, ninshi cawama. Lelo bushe mwali-ipeela kuli Lesa mwi pepo, kabili bushe mulefwaya ukubatishiwa? Ukulingana ne fyo mwasambilila muli Baibolo, mufwile mwalishiba ukuti icikalamba mu bumi bwenu, kulumbanya Yehova, te kubika fye amano ku fintu fyenu nelyo ku kulonganika ifyuma. (Belengeni Amalumbo 148:11-13; Luka 12:15) Nomba, mapaalo nshi kabili busuma nshi bwaba mu kubatishiwa?
5 Nga mwaba Umwina Kristu waipeela, ubumi bwenu bukawama sana. Ukucita ukufwaya kwa kwa Lesa kukalenga mukabe ne nsansa. (Rom. 12:1, 2) Umupashi wa kwa Yehova ukalenga mukakwate imibele ya bukapepa pamo nga umutende ne citetekelo. (Gal. 5:22, 23) Lesa akaasuka amapepo yenu no kumupaala ilyo mule-esha ukukonka Icebo cakwe mu mikalile yenu. Mukalasekelela ukubomba umulimo wa kushimikila, kabili ukukonka ifyo Lesa afwaya kukakosha isubilo lyenu ilya kukwata umweo wa muyayaya. Na kabili, ukuipeela no kubatishiwa kukalanga ukutila mulefwaya sana ukuba Inte ya kwa Yehova.—Esa. 43:10-12.
6. Bushe ulubatisho lwesu lulanga cinshi?
6 Nga twaipeela kuli Lesa no kubatishiwa, tulenga caishibikwa ukutila tuli ba kwa Yehova. Umutumwa Paulo alembele ukutila: “Na kuba, takuli uwa muli ifwe uuikalila umwine, kabili takuli uuifwila umwine; pantu nga tuli no mweo, ni kuli Yehova tubela aba mweo, kabili nga twafwa, ni kuli Yehova tufwila. E ico nga tuli aba mweo kabili nangu nga twafwa, tuli ba kwa Yehova.” (Rom. 14:7, 8) Lesa alitucindika pa kutupeela amaka ya kuisalila. Nga ca kuti ukutemwa Lesa e kwalenga twasalapo ukulakonka iyi nshila ya bumi, tulalenga umutima wakwe ukusekelela. (Amapi. 27:11) Ulubatisho lwesu cishibilo ca kuti twali-ipeela kuli Lesa kabili lulenga caishibikwa ukuti twasala Yehova ukuba Kateka wesu. E lulanga ukuti twasalapo ukulanakila ena pantu e mulopwe. (Imil. 5:29, 32) Yehova na o alaba na ifwe. (Belengeni Amalumbo 118:6.) Ukubatishiwa e kulenga no kuti Lesa aletupaala pali nomba e lyo kukalenga na ku ntanshi akatupaale sana.
Abasambi Ababatishiwa Balakwata Ulupwa Ulwabatemwa
7-9. (a) Bushe Yesu akoseleshe shani abashiile ifintu fyonse no kumukonka? (b) Bushe amashiwi yalandile Yesu ayaba pali Marko 10:29, 30 yalefikilishiwa shani?
7 Umutumwa Petro aebele Yesu ati: “Moneni! Twalisha fyonse no kumukonka; finshi ifwe tukakwata?” (Mat. 19:27) Petro alefwaya ukwishiba ifyo ena na basambi bambi aba kwa Yesu bali no kunonkelamo ku ntanshi. Pa kuti balebomba sana umulimo wa kushimikila pa Bufumu, bali-ipuswileko fimo. (Mat. 4:18-22) Mashiwi nshi Yesu abebele ayabakoseleshe?
8 Ukulingana ne fyalandile Marko pa lyashi limo line, ifyo Yesu aebele abasambi bakwe fyalangile ukuti bakapepa banabo bali no kuba e balupwa lwabo. Atile: “Takuli uwasha ing’anda nelyo bamunyina nelyo inkashi nelyo nyina nelyo wishi nelyo abana nelyo amabala pa mulandu wa ine na pa mulandu wa mbila nsuma uushakapokelele imiku 100 pali ino nshita, amayanda na bamunyina ne nkashi na banyina na bana na mabala, e lyo no kumucusha pa mulandu wa ine. Na ku ntanshi akapokelela umweo wa muyayaya.” (Marko 10:29, 30) Abena Kristu ba kubalilapo pamo nga Lidia, Akula, Prisila na Gai, bali pa bantu abalepeela aba bwananyina umwa kwikala, kabili bali nga “bamunyina nelyo ba nkashi nelyo banyina” kuli balya aba bwananyina nga filya fine Yesu alaile.—Imil. 16:14, 15; 18:2-4; 3 Yoh. 1, 5-8.
9 Amashiwi ya kwa Yesu yalefikilishiwa sana ino nshita. “Amabala” ayo abasambi bakwe basha yemininako imikalile iyo abengi pamo nga bamishonari, na balya ababombela pa Bethel, na baya mu kubombela mu fyalo fimbi e lyo na bambi baitemenwa ukusha pa kuti balebomba imilimo ya Bufumu mu fyalo fyalekanalekana. Bamunyina abengi na bankashi balisha amayanda yabo pa kuti bangusheko imikalile, kabili tulomfwa bwino nga baletushimikilako ifyo Yehova abasakamana ne fyo ukumubombela kubaletela insansa. (Imil. 20:35) Na kuba ababomfi ba kwa Yehova bonse ababatishiwa balaipakisha amapaalo yafuma mu ‘kufwaya ubufumu no bulungami bwa kwa Lesa’ capamo na bamunyinabo bambi mwi sonde lyonse.—Mat. 6:33.
Nga Mwaingila “Umwa Kufisama” Mukacingililwa
10, 11. Bushe “umwa kufisama umwa Wapulamo” ni mwi, kabili kuti twaingilamo shani?
10 Ukuipeela no kubatishiwa kulaleta ipaalo na limbi. Ne li ipaalo, lishuko lya kwikala “umwa kufisama umwa Wapulamo.” (Belengeni Amalumbo 91:1.) Ici, cifulo ca mampalanya umwaba umutelelwe, umo ababamo bacingililwa ku fingonaula bucibusa bwabo na Yehova. Ico mwitilwa ati “umwa kufisama” ni co abashipepa kabili abashacetekela Lesa tabamwishiba. Nga tulecita ififwaikwa ku baipeela kuli Yehova no kumucetekela sana, ciba kwati tule-eba Yehova ukuti: “Ni mwe cubo candi kabili uwa kuncingilila, ni mwe Lesa wandi, uo natetekela.” (Amalu. 91:2) Yehova Lesa asanguka icubo cesu. (Amalu. 91:9) Bushe kwaliba ukucingililwa kumbi ukwawama ukucila pa kuuba muli Yehova?
11 Ukwingila “umwa kufisama” umwa kwa Yehova, kuba ifibusa fyakwe. Ukuipeela no kubatishiwa e ntendekelo ya kuba ifibusa fyakwe. Pa numa ya kubatishiwa, tulatwalilila ukukosha bucibusa bwesu na Lesa ukupitila mu kubelenga Baibolo, ukupepa ukufuma pa nshi ya mutima e lyo no kumumfwila sana. (Yako. 4:8) Takwaba uwatala apalama sana kuli Yehova nga Yesu, uwatwalilila ukuba ne citetekelo cakosa muli Kabumba. (Yoh. 8:29) E ico tufwile ukucetekela fye ukuti Yehova alafwaya ukutwafwa no kuti akulatwafwa ukufikilisha ifyo twamulaile ilyo twaipeele. (Luk. Mil. 5:4) Ifyo Lesa apeela abantu bakwe ifikosha bucibusa bwabo, e filanga apabuuta ukuti alitutemwa no kuti alafwaya tutwalilile ukumubombela.
Bikeni Amano Kuli Paradaise wa ku Mupashi
12, 13. (a) Bushe paradaise ya ku mupashi e cinshi? (b) Kuti twa-afwa shani abapya?
12 Ukuipeela no kubatishiwa kulalenga no kuti tube muli paradaise ya ku mupashi umwaba amapaalo. Iyi paradaise ya ku mupashi, mutende uwaba pa Bena Kristu ba cine na bacetekela banabo na pa kati kabo na Yehova Lesa. (Amalu. 29:11; Esa. 54:13) Muno calo tamwaba icili conse icawama nga paradaise ya ku mupashi. Ici cimonekela sana ku mutende, ne cumfwano e lyo no kutemwa kwa Bwina Kristu ukuba pa ba bwananyina ilyo baba pa kulongana kwa bafuma ku fyalo ifingi, abalanda indimi shapusanapusana kabili abapusana ne mishobo.
13 Imibele yaba muli paradaise ya ku mupashi iyo tuipakisha yalipusana sana ne mibele yabipa iyaba mu calo pali lelo. (Belengeni Esaya 65:13, 14.) Ukubila ubukombe bwa Bufumu kulatupeela ishuko lya kwita bambi ukuti bese muli iyi paradaise ya ku mupashi. Na kabili lipaalo ukwafwa abatendeka nomba line ukulongana kabili abengatemwa ukusambilila ifya kushimikila. Baeluda kuti batweba ukwafwa abapya bamo nga filya fine Akula na Prisila ba-afwile Apollo ilyo ‘bamulondolwelele bwino bwino amafunde ya kwa Lesa.’—Imil. 18:24-26.
Twalilileni Ukusambilila Kuli Yesu
14, 15. Milandu nshi iisuma iyo tufwile ukutwalilila ukusambilila kuli Yesu?
14 Calicindama ukutwalilila ukusambilila kuli Yesu pantu ilyo talaba umuntunse, alikele na Wishi kabili alibombele pamo nankwe pa minshipendwa ya myaka. (Amapi. 8:22, 30) Alishibe ukutila icacindama mu bumi, kubika sana amano ku kubombela Lesa no kuba inte ku cine. (Yoh. 18:37) Yesu alemona ukuti ukubika amano ku fintu fimbi ni bukaitemwe no kuti abacite fyo tabaishiba ifingabaletela insansa. Alishibe ukuti ali no kupita mu mafya ayakalamba e lyo no kwipaiwa. (Mat. 20:18, 19; Heb. 4:15) Apo e o tupashanya, alitusambilisha ifya kuba aba cishinka kuli Lesa.
15 Ilyo Yesu abatishiwe, tapakokwele, Satana alimutunkile ukusha inshila yawamisha iya bumi, lelo Yesu alikeene. (Mat. 4:1-11) Ici citusambilisha ukutila te mulandu ne fyo Satana engacita, kuti twatwalilila ukuba aba cishinka. Satana alafwaya sana ukutunka abalefwaya ukubatishiwa na babatishiwe nomba line. (1 Pet. 5:8) Balupwa lwesu abaebwa ifya bufi pa fyo twasumina, kabili abamona kwati baletucingilila kuti balatukaanya ukupepa. Lelo ilyo baletukaanya, balalenga twakwata ishuko lya kulanga imibele isuma iya Bwina Kristu, pamo nga umucinshi no kunakilila, ilyo tuleasuka ifipusho batwipusha na lintu tulebashimikila. (1 Pet. 3:15) Ukucite fi kuti kwalenga abalekutika ku fyo tulelanda batendeka ukutemwa icine.—1 Tim. 4:16.
Te Kwesha Ukusha iyi Nshila ya Bumi Iyawamisha!
16, 17. (a) Finshi fitatu ififwaikwa pa kukwata umweo ifyaba pa Amalango 30:19, 20? (b) Finshi Yesu, Yohane, na Paulo, balandile ifya-ampana ne fyo Mose alembele?
16 Ilyo kwashele imyaka 1,500 ukuti Yesu ese pano calo, Mose aebele abena Israele ukusala inshila ya bumi iyaweme sana pali ilya nshita. Atile: “Nalenga umuulu ne sonde ukuba inte pali imwe lelo, ukuti nimbika pa ntanshi yenu umweo ne mfwa, ipaalo ne citiipu; e ico saleni umweo pa kuti mube no mweo, imwe na bana benu, pa kulatemwa Yehova Lesa wenu, pa kulaumfwila ishiwi lyakwe na pa kulambatila kuli ena.” (Amala. 30:19, 20) Abena Israele tabali aba cishinka kuli Lesa, nalyo line ifintu fitatu ifyo Mose abebele ukuti e fyalekabilwa pa kukwata umweo wa muyayaya tafyayalwike. Yesu na bantu bambi na bo balifilandilepo.
17 Intanshi, ‘tufwile ukutemwa Yehova Lesa wesu.’ Tukalanga ukuti twalimutemwa nga tule-enda mu nshila shakwe ishalungama. (Mat. 22:37) Ica bubili, ‘tufwile ukulaumfwila ishiwi lya kwa Yehova’ pa kulasambilila Icebo ca kwa Lesa no kulaumfwila mafunde yakwe. (1 Yoh. 5:3) Pa kucite ifi tufwile ukulasangwa ku kulongana lyonse, uko tusambilila Baibolo. (Heb. 10:23-25) Ica butatu, ‘tufwile ukulambatila kuli Yehova.’ Te mulandu ne fyo twingapitamo, lekeni lyonse tuleba ne citetekelo muli Lesa no kulakonka Umwana wakwe.—2 Kor. 4:16-18.
18. (a) Bushe Ulupungu lwa kwa Kalinda lwalondolwele shani icine mu 1914? (b) Bushe ukwishiba icine muno nshiku kwalenga tuleumfwa shani?
18 Ala lipaalo ukulakonka icine ca mu Baibolo mu bumi bwesu! Mu 1914, mu Ulupungu lwa kwa Kalinda mwali ifyebo fyacindama ifyaleti: “Bushe tatwapaalwa kabili bushe tatwaba ne nsansa? Bushe Lesa wesu te wa cishinka? Nga kuli uwaishiba ifintu ifisuma ukucila ifyo twasambilila, alekonka ifyo fine. Uuli onse pali imwe nga asanga fimo ifyawama ukucila ifi, kuti cawama atwebako. Takwaba icili conse ico twamona ukuti caliwama ukucila ifyo twasambilila mu Cebo ca kwa Lesa, na kuba takwaba ne cawamako nangu fye ni panono. . . . Tatwakwata na mashiwi ayo twingabomfya ku kulondolola umutende, insansa, na mapaalo ifyo ukwishiba bwino Lesa wa cine kwaleta mu mitima yesu na mu bumi bwesu. Ukwishiba imibele ya kwa Lesa pamo nga Amano, Umulinganya, Amaka no Kutemwa kulatuletela insansa no kulenga twilasakamikwa. Tapaba fimbi ifyo tufwaya ifyacila apa. Takwaba cimbi ico tukabila icacila pa kwishiba Lesa bwino bwino.” (Ulupungu lwa kwa Kalinda, December 15, 1914, amabula 377-378) Tatwakaleke ukutasha pa cine ca mu Baibolo ico tusambilila. Pali nomba tufwile ukulaumfwa bwino sana ukuti ‘twenda mu lubuuto lwa kwa Yehova.’—Esa. 2:5; Amalu. 43:3; Amapi. 4:18.
19. Mulandu nshi abafikilepo ukubatishiwa balingile ukucitile co ukwabula ukupoosa inshita?
19 Nga mulefwaya ukulaenda “mu lubuuto lwa kwa Yehova” lelo tamulaipeela no kuba Umwina Kristu wabatishiwa, mwikokola ukuipeela. Esheni na maka ukulacita ifyo Baibolo yatila e fifwaikwa pa kubatishiwa. Nga mwacite fi e lyo mukalanga ukuti mulatasha Lesa na Kristu pa fyo batucitila. Peeleni Yehova icintu icacindama sana ico mwakwata, e kuti ubumi bwenu. Langeni ukuti mulefwaya ukulacita ukufwaya kwa kwa Lesa ukupitila mu kulakonka Umwana wakwe. (2 Kor. 5:14, 15) Iyi e nshila yawamisha iya bumi!
Kuti Mwayasuka Shani?
• Bushe ulubatisho lwesu lwimininako cinshi?
• Ukuipeela kuli Lesa no kubatishiwa kutuletela mapaalo nshi?
• Mulandu nshi cacindamina ukusambilila kuli Yesu?
• Cinshi cikalenga tukatwalilile ukukonka inshila ya bumi iyawamisha?
[Amepusho]
[Icikope pe bula 25]
Ulubatisho lwenu lulanga ukuti mwalisala inshila ya bumi iyawamisha
[Ifikope pe bula 26]
Bushe mwalingila “umwa kufisama” no kucingililwa?