Twalilileni Ukuba ne ‘Mitima Iyasanguluka’ Muli Shino Nshita Ishayafya

“TAPALI nangu umo uwingakaana ukuti abantu ba mu macalici ayengi tababa na mibele yasanguluka.” Vittorio Messori, kalemba wa lyashi uupepa ku Katolika alembele ifi ilyo alelanda pa milandu ya bulalelale ubo aba mwi Calici mu Italy bacita. Inyunshipepala ya La Stampa yatile, “Ubulalelale te kuti bupwe nangu basuminisha bashimapepo ukulaupa pantu imilandu ya bulalelale iingi iyo aba bashimapepo bacita, ya kucenda abaume banabo, e lyo na bakalume.”

Ukufulisha kwa bubifi ukwabula no kutwishika, cishibilo ca kutila shino ni “nshiku sha kulekelesha” isha cino calo. (2 Tim. 3:1-5) Nga fintu amalipoti yalelanga, imibele yabipa ilekuma abantu bonse fye kumo na balya bene abaita abati bena Lesa. Imitima yabo iyabipa kabili iyakowela ilenga balecita ifyabipa. (Efes. 2:2) E mulandu wine Yesu asokele ukuti “mu mutima e mufuma amatontonkanyo ayabipa, ukwipaya, ubucende, ubulalelale, ukwiba, ubunte bwa bufi, ne miponto.” (Mat. 15:19) Yehova Lesa ena afwaya ababomfi bakwe batemwa “ukusanguluka kwa mutima.” (Amapi. 22:11) E ico, bushe Umwina Kristu kuti acita shani pa kuti atwalilile ukuba no mutima uwasanguluka muli shino nshiku shayafya?

Calola mwi ‘Ukusanguluka Umutima’

Muli Baibolo, ishiwi lya kuti “umutima” ilingi line balibomfya mu mampalanya. Ukulingana ne citabo cimo, Baibolo nga yabomfya ishiwi lya kuti umutima, ninshi ilelanda pa fyo “umuntu aba mu kati na nkati” no kulangilila ukuti umutima “e cintu icacindama sana kuli Lesa, icilenga umuntu ukuba cibusa wakwe no kulenga umuntu ukuba ne mibele iyo akwata.” Kanshi nga batila umutima, ninshi balelanda pa fyo twaba. Nga fintu amashiwi yambwilwe pa muulu yalangilile, uyu mutima e o Yehova aceeceeta kabili e o abikako sana amano mu babomfi bakwe.—1 Pet. 3:4.

Muli Baibolo “ukusanguluka” no “busaka” mashiwi ayabomfiwa ku kulondolola ubusaka bwa ku mubili. Lelo aya mashiwi balayabomfya na ku kulondolola imibele nelyo imipepele iishakowela nangu iisuma. Mu Lyashi lya pa Lupili, Yesu atile: “Balipaalwa abatambalala imitima.” Abantu abo alelandapo, ni abo abasanguluka mu kati. (Mat. 5:8) Ifyo aba bantu batemwa ne fyo bafwaya ukucita fyalisanguluka, e lyo kabili baba ne mitima ya cishinka. Balitemwa Yehova no mutima wabo onse, baba abafumacumi, te ba bumbimunda. Ukutemwa Yehova no kumutasha e filenga babe ne mitima iyasanguluka. (Luka 10:27) Na imwe bene kuti mwatemwa ukuba abasanguluka muli uyu musango, bushe te ifyo?

Pa Kuba “Abasanguluka mu Mutima” Tufwile Ukubombesha

Umubomfi wa kwa Yehova talingile fye ukuba “uwa kaele mu minwe yakwe” lelo alingile no kuba “uwasanguluka mu mutima.” (Amalu. 24:3, 4) Muno nshiku cileyafishako na sana ku babomfi ba kwa Lesa ukutwalilila ukuba “abasanguluka mu mutima.” Satana ne calo ateka, ukubikapo no kukanapwililika kwesu, filalenga ciletukosela sana ukupalama kuli Yehova. Pa kuti tucimfye ifi, icikabilwa sana kutemwa “ukusanguluka kwa mutima” e lyo no kupampamina pa kutwalilila ukuba abasanguluka mu mutima. Nga twacita ifyo, tukacingililwa kabili tukatwalilila ukuba ifibusa fya kwa Lesa. Kuti twacita shani pa kutwalilila ukuba no mutima wasanguluka?

Pa AbaHebere 3:12, batusoka ukutila: “Cenjeleni, mwe bamunyinefwe, epali umo pali imwe  aba no mutima uwabipa uwabula icitetekelo pa kufuma kuli Lesa wa mweo.” Te kuti tube no ‘mutima uwasanguluka’ nga ca kutila twakwata umutima “uwabula icitetekelo.” Fisambilisho nshi Satana Kaseebanya atandanya ifilenga abantu bafilwa ukutetekela muli Lesa? Pali ifi paba ne cisambilisho citila ifintu fyasangwike fye, ne citila takwaba imibele ne mipepele iyalungama, ciba fye ku fyo umuntu umwine alemona. Satana wine alalenga na bantu ukukanacetekela ukuti Amalembo ya Mushilo yafuma kuli Lesa. Tatufwile ukukonkelela ifintu fya musango yu ifingonaula ukutontonkanya kwesu. (Kol. 2:8) Kuti twacingililwa nga tulebelenga Baibolo cila bushiku no kutontonkanyapo. Ukwishiba bwino Icebo ca kwa Lesa kukalenga tukatemwe sana Yehova no kwishiba bwino ifyo afwaya. E ico nga tulefwaya ukukaana amatontonkanyo ya bufi no kutwalilila ukuba ne citetekelo icakosa muli Yehova pa kuti tube no mutima uwasanguluka, tufwile ukutemwa Yehova no kwishiba bwino ifyo afwaya.—1 Tim. 1:3-5.

Ilyo Twabelelekwa no Lunkumbwa lwa Mubili

Ubwafya bumbi ubo twingakwata ilyo tule-esha ukutwalilila ukuba no ‘mutima wasanguluka’ lunkumbwa lwa mubili no kufwaisha ifyuma. (1 Yoh. 2:15, 16) Ukutemwa indalama nelyo ukufwaisha ukunonka ifyuma ne fikwatwa kuti kwalenga Umwina Kristu ukucita ifintu ifingapusana no kufwaya kwa kwa Lesa. Bamo tababa aba cinshinka pa ncito, balabepa bambi, nelyo baleba indalama nangu ifintu fimbi.—1 Tim. 6:9, 10.

Lelo nga twaba na katiina kasuma aka kutiina ukufulwisha Yehova, twatemwa no mulinganya, e lyo twapampamina na pa kukwata kampingu musuma, ninshi tulelanga ukuti twalitemwa ‘umutima uwasanguluka.’ Ukutemwa kwa musango yu kulalenga twatwalilila “ukuba aba cishinka muli fyonse.” (Heb. 13:18) Nga twacita ifyalungama, bucishinka bwesu kuti bwalenga bambi ukutemwa icine ca mu Baibolo. Ba Emilio, ba Nte abena Italy kabili banamutekenya ababomba ku kampani kakwata imyotoka shisenda abantu, basangile icikwama umwali ne ndalama sha ku America, amadola 680. Ababomba nabo balipapile ukumona uko ba Emilio batwele  icikwama ku mukalamba wa ncito, uwabweseshemo icikwama ku mwine. Bamo abo babomba nabo balitemenwe sana ifyo ba Emilio bacitile ica kuti batampile no kusambilila Baibolo. Icafumamo ca kutila abantu 7 mu ndupwa shibili balisambilila icine. Kanshi ukusanguluka kwa mutima nga e kulelenga tuleba ne cishinka, abantu bambi kuti batendeka ukulumbanya Lesa.—Tito 2:10.

Cimbi icingalenga umutima wa Mwina Kristu ukukanasanguluka fintu abengi bamona ubulalelale. Apo abengi bamona ukuti ubulalelale, ubucende, e lyo no kuulungana kwa baume beka beka na banakashi beka beka fyaliba fye bwino, kuti calenga umutima wa Mwina Kristu ukukowela. Umuntu nga atendeka ukucita ubupulumushi kuti aba uwa bumbimunda, atampa no kufisa ulubembu. Umuntu uucita ifya musango yu, ninshi taba no ‘mutima uwasanguluka.’

Ba Gabriele babatishiwe ilyo baali ne myaka 15 kabili ilyo line balitendeke ukubombako bupainiya. Nangu cibe fyo, pa numa batampile ukulasangwa na banabo aba misango yabipa mu fikuulwa fya bwalwa. (Amalu. 26:4) Ifi fine e fyo batampile imisango yabipa icalengele baba fye Inte mwi shina, kabili balitamfiwe mu cilonganino ca Bwina Kristu. Filya Yehova abasalapwile calengele ukuti batontonkanyepo sana. Ba Gabriele batile: “Natendeke ukucita ifintu ifyo nshabikileko sana amano kale. Natendeke ukubelenga Baibolo cila bushiku, no kulaesha ukwiluka ifyo Yehova alelanda, kabili nalebikako amano pa kubelenga impapulo shilanda pali Baibolo. Nalimwene ifyo cawama ukuisambilisha fwe bene e lyo ne fyo ukubelenga Baibolo no kupepa lyonse fikosha.” Ukucita ifi kwalengele ba Gabriele ukuleka imibele yabipa no kuba cibusa wa kwa Yehova na kabili.

Pali ino nshita ba Gabriele ni bapainiya na kabili, pamo na bakashi babo. Icacitikile ba Gabriele cilelanga ifyo ukubelenga Baibolo ne mpapulo sha “musha wa cishinka kabili uwashilimuka” fingafwa umuntu ukuba no mutima uwasanguluka no kukaana imibele yabipa.—Mat. 24:45; Amalu. 143:10.

Ukuba no ‘Mutima Uwasanguluka’ Ilyo Kwaba Amafya

Abantu ba kwa Lesa bamo balakwata amafya pa mulandu wa bantu ababakaanya ukupepa, na pa mulandu wa kubulwa indalama, e lyo na pa mulandu wa malwele ayakalamba ayo bakwata. Inshita shimo abantu ba kwa Lesa balaba na masakamika. Nangu fye ni Mfumu Davidi yalikwete amasakamika ya musango yu. Yatile: “Umupashi wandi uuli muli ine wanaka; umutima wandi mu nda watalala.” (Amalu. 143:4) Cinshi calengele iyi mfumu ukushipikisha? Davidi aibukishe ifyo Lesa asakamana ababomfi Bakwe ne fyo na o bamupuswishe. Aletontonkanya pa fyo Yehova acitile pa mulandu we shina Lyakwe ilikalamba. Davidi abikile sana umutima pa fyo Lesa acita. (Amalu. 143:5) Na ifwe bene nga tuletontonkanya pali Kabumba wesu na pali fyonse ifyo atucitila na pa fyo atwalilila ukutucitila, cikatwafwa na lintu tuli mu bwafya.

Ilyo bambi batulufyanya na lintu fwe bene fye tulemona kwati nabatulufyanya, kuti twafulwa. Nga twaikalila fye ukutontonkanya pa fyo batulufyenye kuti calenga twapata na bamunyinefwe. Nalimo kuti twaleka ukula-angala nabo, twaipaatulako, e lyo twaleka fye no kubabikako amano. Bushe nga tulecite fyo, ninshi tulafwaya ukuba ‘abasanguluka mu mutima’? Kanshi, cimo ico tulingile ukukwatila umutima wasanguluka, kufwaya ukuti ukwampana kwesu na bamunyinefwe Abena Kristu kuwame no kuti twishibe ifya kucita nga ca kutila twapusana nabo.

Muli ici calo umo imibele ya bantu ileya ilebipilako fye, ifwe fwe Bena Kristu ba cine twali-ibela pantu twalitemwa ‘umutima wasanguluka.’ Ubumi bwesu bulaba bwino pantu tulakwata umutende uufuma mu kucita ukufwaya kwa kwa Lesa. Ne cacilapo ca kuti, twaliba ifibusa fya pa mutima ifya kwa Kabumba wesu, Yehova Lesa, uwatemwa bonse “abasanguluka imitima.” (Amalu. 73:1) E co kanshi, kuti twapendelwa pa bantu abakaba aba nsansa pantu, nga fintu Yesu alaile, “bakamona Lesa” ilyo akalapususha bonse abatemwa ‘ukusanguluka kwa mutima.’—Mat. 5:8.