Bushe Mulaleka Yehova Amwipusha?

MU Baibolo mwaliba ifipusho ifingi ififika abantu pa mitima. Na kuba, Yehova Lesa alabomfya ifipusho pa kusambilisha icine ca mu Baibolo icacindama. Ku ca kumwenako, Yehova aipwishe ifipusho ifingi ilyo alesoka Kaini pa fyabipa ifyo alefwaya ukucita. (Ukute. 4:6, 7) Inshita shimo, Yehova aleipusha fye icipusho cimo icalelenga no muntu uo aipusha acitapo cimo. Ilyo Esaya aumfwile Yehova aipusha ukuti: “Nani ndetuma, kabili nani akaba inkombe yesu?” Uyu kasesema ayaswike ati: “E po ndi! Ntumeni.”—Esa. 6:8.

Yesu, Kasambilisha Mukalamba na o aleipusha amepusho ayalefika abantu pa mitima. Mu mabuuku yalembele Mateo, Marko, Luka na Yohane mwaba amepusho ukucila pali 280 ayo Yesu aipwishe. Nangu ca kutila ilingi line alebomfya amepusho ku kutalalika abalemukaanya, icikalamba ico alebomfesha amepusho, kufwaya ukufika pa mitima ya balemukutika pa kuti batontonkanye pali bucibusa bwabo na Lesa. (Mat. 22:41-46; Yoh. 14:9, 10) Umutumwa Paulo na o, uwalembele amabuuku 14 aya mu Malembo ya Bwina Kristu aya ciGriki, alibomfeshe amepusho ya kunashanasha. (Rom. 10:13-15) Ku ca kumwenako, muli kalata alembeele abena Roma, mwaba amepusho ayengi. Amepusho Paulo aipwishe yalelenga abalebelenga amakalata yakwe ukusambilila no kutasha pa ‘mapaalo ayengi ayafuma kuli Lesa na mano no kwishiba.’—Rom. 11:33.

Amepusho yamo yalakabilwa ukwasukwa, yambi ya kulenga fye umuntu ukutontonkanya sana. Amepusho ya kulenga fye umuntu ukutontonkanya e yo Yesu abomfeshe sana ukulingana ne fyo tusanga muli Mateo, Marko, Luka, na Yohane. Pa nshita imo, Yesu asokele abasambi bakwe ukuti: “Cenjeleni ku citutumushi ca baFarise ne citutumushi ca kwa Herode,” e kutila ubumbimunda bwabo ne fisambilisho fya bufi. (Marko 8:15; Mat. 16:12) Abasambi ba kwa Yesu tabailwike ifyo abebele ica kuti batampile ukukansana ukutila nabalaba ukusenda umukate. Moneni ifyo Yesu abomfeshe amepusho mu kulanshanya ukwipi ukwakonkelepo. “Abebele ati: ‘Mulandu nshi mulekansanina pa mulandu wa kuti tamukwete imikate? Bushe na nomba tamulailuka no kwishiba? Bushe nacimukosela ukuumfwa? “Mwalikwata amenso, bushe tamumona? Mwalikwata amatwi, bushe tamuumfwa?”. . . Bushe na nomba tamulailuka?’” Ico Yesu aipushishe aya mepusho, ni co alefwaya abasambi ukutontonkanya, no kwiluka umwalolele ifyo abebele.—Marko 8:16-21.

“Ndekwipusha”

Yehova Lesa aipwishe umubomfi wakwe Yobo amepusho pa kuti alule amatontonkanyo yakwe. Amepusho aipwishe Yobo yamulengele ukwishiba ukuti munono sana nga kumulinganya kuli Kabumba wakwe. (Yobo, ifipa. 38-41) Bushe Yehova ale-enekela Yobo ukumwasuka icipusho cimo na cimo? Kwena kwati te fyo cali. Ilyo Lesa amwipwishe icipusho pamo nga “Wali kwi ilyo nashimpile icalo?” alefwaya fye Yobo atontonkanye no kwiluka. Ilyo Yehova alekele ukumwipusha, Yobo alifililwe ukwasuka. Alandile fye ukuti: “Cinshi ningamwasuka? Iminwe yandi nabika pa kanwa.” (Yobo 38:4; 40:4) Yobo alyumfwikishe icishinka kabili ali-icefeshe. Nangu cibe fyo, Yehova talesambilisha fye Yobo ukuba uwaicefya. Yobo alyalwike na mu fyo aletontonkanya. Mu nshila nshi?

Nangu ca kutila Yobo ali “umuntu uwa kaele kabili umulungami,” limo limo imilandile yakwe yalelanga ukuti ifyo aletontonkanya tafyaleba bwino. Na Elihu alimwene ico ilyo alekalipila Yobo pa “kuimona uwalungama ukucila  Lesa.” (Yobo 1:8; 32:2; 33:8-12) Kanshi amepusho Yehova aipwishe yalilungike Yobo. Ilyo Lesa alelanda kuli Yobo ukufuma mu nkuuka, atile: “Nani uulecilikila ukufwaya kwandi pa kulanda ifyabula amano? Shi kaka mu musana ngo mwaume, ine nalakwipusha, na iwe unjebe.” (Yobo 38:1-3) Mu mepusho Yehova aleipusha alandile pa mano yakwe ayashakwata impela na pa maka yakwe ayamonekela mu milimo yakwe. Filya Lesa amusokolwelele fyalengele Yobo ukucetekela ubupingushi bwa kwa Yehova no kucetekela inshila acitilamo ifintu ukucila ifyo acetekele kale. Yobo afwile alyumfwile umwenso ilyo Lesa Wa Maka Yonse alemwipusha!

Ifyo Twingalenga Yehova Atwipusha

Inga ifwe? Bushe na ifwe kuti twanonkelamo mu mepusho ayaba mu Baibolo? Ee, kuti twanonkelamo! Nga ca kuti ilyo tulebelenga ayo mepusho, twatala twaiminina no kutontonkanyapo, ninshi tukaipakisha amapaalo ukufuma kuli Lesa. Icintu cimbi icalenga ukuti Icebo ca kwa Lesa cibe na maka, mepusho yabamo ayafika pa mutima. Cine cine, “icebo ca kwa Lesa . . . ca maka . . . cileshiba amatontonkanyo na mapange ya mutima.” (Heb. 4:12) Lelo pa kuti twinganonkelamo, tufwile ukulaipusha amepusho yamo yene fwe bene, caba kwati Yehova e uletwipusha pa lwesu. (Rom. 15:4) Natumone amepusho yamo yamo.

“Bushe Kapingula wa pano isonde ponse takacite icalungama?” (Ukute. 18:25) Abrahamu aipwishe Yehova ici cipusho lilya Lesa ali mupepi no konaula Sodomu na Gomora. Abrahamu alishibe ukuti Yehova teti abe no lufyengo, ukwipaila ababifi pamo na balungami. Icipusho Abrahamu aipwishe cilanga ukuti alitetekele sana ukuti Yehova mulungami.

Muno nshiku abantu bamo nalimo kuti balatunganya pa fyo ubupingushi bwa kwa Yehova bukaba, ukulatunganya pa fintu fimo pamo nga ni bani bakapusuka Armagedone nelyo ni bani bakabuuka. Mu nshita ya kuleka ifya musango yu ukutusakamika, tufwile ukulaibukisha icipusho ca kwa Abrahamu. Ukwishiba ukuti Yehova ni Shifwe wa kutemwa e lyo no kucetekela sana mu mulinganya wakwe no luse lwakwe, nga filya Abrahamu acitile, kulalenga twilaonaula inshita na maka ukulasakamana pa fishilingile, nelyo ukulatwishika, atemwa ukulalanda pa fishiletunonsha.

“Nani pali imwe nga ca kuti alesakamikwa engalundako ubumi bwakwe panono?” (Mat. 6:27) Ilyo alelanda kwi bumba ilikalamba apali na basambi bakwe, Yesu abepwishe ici cipusho pa kukomaila pa fyo cacindamina ukucetekela ukuti Yehova akabapeela ifyo bakabila. Muli shino nshiku sha kulekelesha isha calo cabipa  muli ifintu ifingi ifilelenga abengi ukusakamikwa, lelo ukubika sana amano kuli ayo masakamika takwakalundeko ubumi nelyo ukubuwamyako.

Kanshi lyonse ilyo twasakamikwa pa filetucitikila nelyo ifilecitikila abatemwikwa besu, nga tuleibukisha icipusho Yesu aipwishe kuti twaleka ukusakamikwa sana. Kuti twaleka ukusakamikwa kabili te kuti tuletontonkanya pa fintu ifyalubana ifinganasha amatontonkanyo yesu no mubili. Nga fintu Yesu atwebele, Shifwe wa ku muulu, uulisha ifyuni fya mu lwelele no kufwika ifimenwa alishiba bwino ifyo tukabila.—Mat. 6:26-34.

“Bushe umuntu kuti alapwila umulilo pa cifuba cakwe na malaya yakwe ukwabula ukupya?” (Amapi. 6:27) Mu fipandwa fya kubalilapo 9 mwi buuku lya Amapinda mwaba ukufunda ukwipi ukwa mano uko wishi alefunda umwana wakwe umwaume. Icipusho cili pa muulu cilanda pa fintu fyabipa ififuma mu bucende. (Amapi. 6:29) Nga ca kuti twaisanga tulesengasenga nelyo tuletontonkanya pa kucita ubulalelale, ici cipusho cifwile ukulatwibukishako ifyabipa ifingafumamo. Ici cipusho kuti catwafwa na lintu tulefwaya ukucita ifyabipa fimbi. Ici cipusho cilelangilila fye ukuti filya Baibolo ilanda aiti, “Ico umuntu alebyala, e co akalobolola,” fya cine.—Gal. 6:7.

“Ni we nani uwa kuti ulepingula umubomfi wa mu ng’anda ya muntu umbi?” (Rom. 14:4) Muli kalata alembeele abena Roma, Paulo alandile pa mafya yali mu cilonganino pali ilya nshita. Abena Kristu bamo, pa mulandu wa kuti bafumine ku fyalo fyalekanalekana, balitemenwe sana ukulapingula Abena Kristu banabo pa fyo balecita. Icipusho Paulo aipwishe cabebukishe ukuti bafwile ukulapokelela bambi no kushiila Yehova ubupingushi.

Na muno nshiku mwine, abantu ba kwa Yehova bafuma ukwapusanapusana. Lelo Yehova alituleta pamo no kutwikatanya. Bushe na ifwe tulacitapo fimo ifilenga ukuti kube ukwikatana? Nga tulangufyanya ukusuusha ifyo bamunyinefwe bacita, kuti cawama ukuipusha icipusho icili pa muulu ico Paulo aipwishe!

Amepusho Yalalenga Twapalama Kuli Yehova

Aya mepusho ayanono twalandapo ayaba mu Cebo ca kwa Lesa yatwafwa ukumona ifyo ifipusho fingalenga umuntu ukuibebeta. Nga tuletontonkanya pa fyo icipusho cimo na cimo cilelanda kuti calenga twabomfya ifyebo ukulingana ne fyo ifintu fili. Ilyo tulebelenga Baibolo, twakulamona ifipusho na fimbi ifyabamo ifyo twingasambililako.—Moneni akabokoshi pe bula 14.

Nga tuleleka amepusho yaba mu Cebo ca kwa Lesa yaletufika pa mitima ninshi mu matontonkanyo na mu mitima yesu mukalaba ifintu ifikalaumfwana ne nshila shalungama isha kwa Yehova. Ilyo Yehova aipwishe Yobo, Yobo alandile ukuti: “Namumfwilile mu fya kumfwaumfwa fye, lelo nomba amenso yandi yamumona.” (Yobo 42:5) Kanshi pa numa ya aya mepusho, Yobo alishibe sana Yehova, cali fye kwati alemumona. Umusambi Yakobo na o alandile ukuti: “Palameni kuli Lesa, na o akapalama kuli imwe.” (Yako. 4:8) Lekeni tulenge fyonse ifyaba mu Cebo ca kwa Lesa, ukusanshako na mepusho yabamo, fitwafwe ukukosha bucibusa bwesu na Lesa e lyo no kuba kwati ‘tulemona’ Yehova bwino bwino!

[Akabokoshi pe bula 14]

Bushe ukuipusha aya mepusho mwe bene kuti kwamwafwa shani ukulamona ifintu nga filya Yehova afimona?

▪ “Bushe Yehova alitemwa imituulo ya koca na malambo ukucila ukunakila ishiwi lya kwa Yehova?”—1 Sam. 15:22.

▪ “Uwapangile amenso, bushe kuti afilwa ukumona?”—Amalu. 94:9.

▪ “Bushe cisuma abantu ukuifwaila abene ubukata?”—Amapi. 25:27.

▪ “Bushe naulungika ifi wakalipa nga nshi?”—Yona 4:4.

▪ “Umuntu kuti amwenamo shani nga anonka icalo conse lelo alofya umweo wakwe?”—Mat. 16:26.

▪ “Nani akatupaatulako ku kutemwa kwa kwa Kristu?”—Rom. 8:35.

▪ “Kanshi cinshi ukwete ico ushapokelele?”—1 Kor. 4:7.

▪ “Ulubuuto ne mfifi kuti fyaikala shani pamo?”—2 Kor. 6:14.

[Icikope pe bula 15]

Cinshi Yobo asambilile ku fyo Yehova amwipwishe?