Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Moneni nga kuti mwayasuka amepusho yakonkapo:

• Mulandu nshi Mesia alingile ukufwa?

Imfwa ya kwa Yesu cilangililo ca kuti umuntu uwapwililika kuti atwalilila ukubombela Lesa na mesho ayabipisha. Na kabili, imfwa yakwe yali cilubula ca bamwana Adamu ukufuma ku lubembu bapyene, no kukwata ishuko lya kupeelwa umweo wa muyayaya.—12/15, amabula 22-23.

• Finshi fingafwa umuntu ukulanwa fye ubwalwa mu kulinga?

Ipepo no kulabelenga Baibolo kuti kwamwafwa. Ukuilama, ukukakatila ku kusalapo kwakwe ukwa kukananwesha, no kukwata ifibusa ifisuma nako kwalicindama. Umuntu nga alafwaya ukunwa afwile ukwishiba apo alapelela, afwile no kukwata amaka ya kuleka nga afika apo pene apeleela.—1/1, amabula 7-9.

• Bushe ukulanshanya bwino na bana kusanshamo finshi?

Te kulanda fye na bana, lelo cisanshamo no kubepusha amepusho no kukutika ku fyasuko fyabo mu mutekatima. Abengi basanga ukuti inshita ya ca kulya ilaba ni nshita isuma iya kulanshanya.—1/15, amabula 18-19.

• Apo Yehova alipwililika kabili talufyanya, kuti alanguluka shani?

Lesa limo kuti acinja imicitile yakwe ku bantu. Ku ca kumwenako, abena Israele balipondokele Yehova imiku iingi no kutendeka ukupepa tulesa tumbi. Iyo nshita Yehova aleleka ukubacingilila. Lelo ilyo abantu baumfwile ububi pa fyo bacitile no kulomba Lesa ukuti abafwe, Lesa alebomfwila uluse, nangu ‘alelanguluka.’ (Abapi. 2:18)—2/1, ibula 21.

• Cinshi cingalenga umuntu ukubatishiwa cipya cipya?

Kuti abatishiwa cipya cipya nga ca kuti ilyo alebatishiwa, ninshi acili alacita ifyabipa mu bumfisolo ifyali no kulenga atamfiwe nga ca kuti ali uwabatishiwa iyo nshita.—2/15, ibula 22.

• Abantu batila ni pa milandu nshi itatu ilyo ciba bwino ukwiba?

Bamo batila caliba fye bwino ukwiba nga uli mupiina. Bamo batila tacabipa kabili “bonse baleba.” E lyo bamo abatoola ifintu fya mutengo balafisunga no kusosa ati “ukutoola te kwiba.” Baibolo tayalandapo ukuti caliba fye bwino ukwiba pali iyi milandu.—3/1, amabula 12-14.

• Mu mulumbe wa kwa Yesu uwa ngano ne fyani, bushe ukutanda imbuto shisuma cimininako cinshi?

Umwana wa muntu, Yesu Kristu apekenye ibala ilyo alebomba umulimo pano isonde. Ukufuma mu 33 C.E. no kuya ku ntanshi, imbuto shisuma shalitandilwe ilyo Abena Kristu balesubwa ukuba abana ba Bufumu.—3/15, ibula 20.

• Bushe abapala ingano abalandwapo mu mulumbe wa kwa Yesu balelonganikwa shani mu butala bwa kwa Yehova? (Mat. 13:30)

Ukulonganika aba bantu kwalitwalilila pa nshita iikalambako mu nshita sha mpela ya cino calo. Ingano sha mampalanya, e kuti abana ba Bufumu abasubwa, balalonganikwa mu butala bwa kwa Yehova ilyo besa mu cilonganino ca Bena Kristu nelyo ilyo bapokelela icilambu cabo mu muulu.—3/15, ibula 22.

• Ni Bani basalile Amalembo ya Bwina Kristu aya ciGriki aya kubika mu Baibolo?

Te cilye ce calici nelyo shimapepo. Lelo Abena Kristu ba cine abatungulwilwe no mupashi wa mushilo, balimwene ukuti cine cine aya malembo yafumine kuli Lesa. Ici cumfwana ne cishinka ca kuti cimo ica bupe ca mupashi wa mushilo ico abali mu cilonganino ca Bwina Kristu ica kubalilapo bakwete, “kwiluka amashiwi ukumona nga yafumine kuli Lesa.” (1 Kor. 12:4, 10)—4/1, ibula 28.