Mwe Bacaice—Citeni Ifingamwafwa Ukufwaisha Ukubombela Yehova

“Ibukisha Kabumba obe Lesa Mukulu mu nshiku sha bulumendo bobe.”—LUK. MIL. 12:1.

1. Finshi abacaice ba mu Israele babebele ukucita?

IMYAKA 3,500 iyapita, Mose kasesema wa kwa Yehova aebele bashimapepo na bakalamba ba mu Israele ukuti: “Longanyeni abantu, abaume na banakashi na banono . . . , pa kutila bakutike kabili basambilile, pantu bafwile ukulatiina Yehova Lesa wenu no kubika amano ku kukonka fyonse ifyalembwa muli ili funde.” (Amala. 31:12) Nga fintu mwamona, abo baebele ukulongana mu kupepa, baume, abanakashi, na banono. Kanshi, na bacaice bene bali pali balya abo baebele ukuti bakutike, basambilile, no kukonka ifyo Yehova alebeba.

2. Bushe Yehova alangile shani ukuti alibikile amano ku Bena Kristu bacaice mu nshita sha batumwa?

² Mu nshita sha batumwa, Yehova alitwalilile ukubika amano kuli bakapepa bacaice. Ku ca kumwenako, Lesa apeele umutumwa Paulo umupashi wa kulemba ifyebo fimo ku bacaice mu makalata yamo ayo atumiine ifilonganino. (Belengeni Abena Efese 6:1; Abena Kolose 3:20.) Ifi fyebo fyalengele Abena Kristu bacaice abafikonkele ukutemwa sana Shibo uwa ku muulu kabili alibapaalile.

3. Finshi abacaice bacita muno nshiku ifilanga ukuti balafwaisha ukubombela Lesa?

³ Bushe abacaice muno nshiku balibeba ukulalongana ku kupepa Yehova? Ee! E mulandu wine ababomfi ba kwa Lesa bonse bomfwila bwino ukumona abacaice abengi abalebombela Lesa mwi sonde lyonse balekonka ukufunda kwa kwa Paulo ukutila: “Tutontonkanye pa banensu ku kucincishanya ku kutemwa kabili ku kubomba imilimo iisuma, twilapuswa ku kulongana, filya waba umusango wa bamo, lelo tulekoseleshanya, maka maka apo mulemona ubushiku bulya bulepalama.” (Heb. 10:24, 25) Na kabili abaice abengi balabomba na bafyashi babo mu mulimo wa kushimikila imbila nsuma iya Bufumu bwa kwa Lesa. (Mat. 24:14) Kabili pa kulanga ifyo batemwa Yehova no mutima onse, abacaice abengi cila mwaka balabatishiwa, kabili balaipakisha amapaalo ya kuba abasambi wa kwa Kristu.—Mat. 16:24; Marko 10:29, 30.

Iseni mu Kubombela Lesa Ino Ine Nshita

4. Ni lilali abacaice bafwile ukusumina ubwite bwa kwa Lesa ubwa kumubombela?

⁴ Ilembo lya kwa Lukala Milandu 12:1 litila: “Lelo ibukisha Kabumba obe Lesa Mukulu mu nshiku sha bulumendo bobe.” Mwe bacaice, bushe myaka inga iyo mufwile ukukwata pa kutila musumine ubwite bushaiwamina ubwa kupepa no kubombela Yehova? Amalembo tayalanda mu kulungatika imyaka iyo mulingile ukukwata. E ico kanshi, mwilatontonkanya ukuti mucili abaice sana ica kuti teti mukutike kuli Yehova no kumubombela. Te mulandu ne myaka iyo mukwete, tulemukoselesha ukusumina ubu bwite ukwabula ukupoosa inshita.

5. Bushe abafyashi kuti bayafwa shani abana babo ukulunduluka?

⁵ Abamwaafwa ukulunduluka mwe bacaice abengi, bafyashi benu, nalimo bonse babili nelyo bamo fye. E fyo cali na kuli Timote uwa mu Baibolo. Ilyo ali umwaice, nyina Yunike na  nakulu Loisi balimusambilishe amalembo ya mushilo. (2 Tim. 3:14, 15) Na imwe bene abafyashi benu balamukansha ilyo bamusambilisha Baibolo, ukupepela pamo na imwe, ukumusenda mu kulongana kwa pa cilonganino na ku kulongana kukalamba ukwa bantu ba kwa Lesa, na lintu balebomba na imwe umulimo wa kushimikila. Kanshi ukumusambilisha inshila sha kwa Lesa mulimo uwacindama nga nshi uo Yehova apeela abafyashi benu. Bushe mulatasha pa fyo abafyashi benu bamutemwa ne fyo bamubikako amano?—Amapi. 23:22.

6. (a) Ukulingana na Amalumbo 110:3, mipepele ya musango nshi iisekesha Yehova? (b) Finshi ifyo twalalandapo nomba?

⁶ Na lyo line, ilyo mulekula, Yehova afwaya imwe mwe bacaice “mushininkishe mwe bene ico Lesa afwaya,” nga filya Timote acitile. (Rom. 12:2) Nga mwacita ifyo, ico mukalasangilwa mu kulongana, no kubombako imilimo ya cilonganino, e lyo no kushimikila, ni co mufwaya ukucita ukufwaya kwa kwa Lesa, te kufwaya ukusekesha abafyashi benu. Nga muleitemenwa ukubombela Yehova, akulatemwa. (Amalu. 110:3) Nomba, kuti mwalanga shani ukuti mulefwaisha ukulakutika kuli Yehova no kulakonka ifyo amweba? Twalalanda pa fintu fyacindama fitatu umo mwingalangila ifyo. Ne fi fintu kusambilila, ukupepa, e lyo ne mibele. Natulande pali ifi fintu cimo cimo.

Ishibeni Ukuti Yehova Kuti Aba Cibusa Wenu

7. Cinshi cilanga ukuti Yesu alitemenwe sana Amalembo, kabili cinshi calengele ukuti ayatemwe?

⁷ Ica kubalilapo icingalanga ukuti mulefwaya sana ukubombela Yehova kulabelenga Baibolo cila bushiku. Nga mulebelenga Icebo ca kwa Lesa lyonse mukeshiba Lesa bwino kabili mukeshiba Baibolo. (Mat. 5:3) Yesu alitushiila ica kumwenako. Inshita imo ilyo ali ne myaka 12, abafyashi bakwe bamusangile mwi tempele, “naikala na bakasambilisha alekutika kuli bena no kubepusha.” (Luka 2:44-46) Yesu atemenwe Amalembo no kufwaisha ukuyomfwikisha ninshi ali fye umwaice. Cinshi calengele? Ukwabula no kutwishika, nyina Maria na Yosefe, wishi uwamukushishe, e bamwafwile sana. Bali ababomfi ba kwa Lesa kabili basambilishe Yesu pa lwa kwa Lesa ukufuma fye ku bwaice.—Mat. 1:18-20; Luka 2:41, 51.

8. (a) Ni lilali abafyashi balingile ukutendeka ukusambilisha abana ukutemwa Icebo ca kwa Lesa? (b) Landeni icacitike icilelanga umulandu cacindamina ukukansha abana ukutula fye ku bwaice.

⁸ Na muno nshiku mwine, abafyashi abatiina Lesa balishiba ubusuma bwaba mu kusambilisha abana icine ca mu Baibolo ukutula fye ku bwaice. (Amala. 6:6-9) E fyo Rubi, nkashi Umwina Kristu acitile ilyo fye abeleke umwana umwaume uwe shina lya Joseph. Cila bushiku alemubelengela Icitabo Candi ca Malyashi ya mu Baibolo. Ilyo umwana wakwe alekula, uyu nkashi alimwafwile ukulaibukisha amalembo ayengi. Bushe Joseph alinonkelemo mu fyo bamukanshishe? Ilyo atampile ukulanda, Joseph aleshimika amalyashi ayengi aya mu Baibolo mu mashiwi yakwe fye. Kabili ilyo ali ne myaka 5, alilandile ilyashi lya kubalilapo mwi Isukulu lya Butumikishi Ilya Bulesa.

9. Mulandu nshi ukubelenga Baibolo no kutontonkanya pa fyo mulebelenga kwacindamina?

⁹ Mwe bacaice, nga mulefwaya ukulalunduluka, mufwile ukubelesha ukulabelenga Baibolo cila bushiku ica kuti na lintu mukaba abakalamba tamwakaleke. (Amalu. 71:17) Mulandu nshi ukubelenga Baibolo kukamwafwila ukulunduluka? Moneni ifyo Yesu asosele ilyo alepepa kuli Wishi: “Nomba pa kuti babe no mweo wa muyayaya, kano baishiba imwe mwe Lesa wa cine mweka, na Yesu Kristu uo mwatumine.” (Yoh. 17:3) Ca cine, nga mwaishiba sana Yehova, mukeshiba ukutila kuti aba cibusa wenu kabili mukamutemwa nga nshi. (Heb. 11:27) E ico kanshi, lyonse ilyo mwabelenga Baibolo, lekeni ifyo mwabelenga fimwafwe ukwishibilako Yehova. Yipusheni amuti: ‘Bushe ifyo nabelenga fyansambilisha finshi pali Yehova? Bushe ifi nabelenga fyalanga shani ukuti Lesa alintemwa kabili alansakamana?’ Nga mwakwata inshita ya kutontonkanya pali aya mepusho, cikamwafwa ukwishiba ifyo Yehova  atontonkanya ne fyo omfwa e lyo ne fyo afwaya ukuti mulecita. (Belengeni Amapinda 2:1-5.) Nga filya fine cali kuli Timote, na imwe bene ‘mukashininwa ukuti fya cine’ ifyo musambilila mu Malembo kabili mukaitemenwa ukulapepa Yehova.—2 Tim. 3:14.

Ifyo Ipepo Lingalenga Mwatemwa Sana Yehova

10, 11. Bushe ipepo kuti lyamwafwa shani ukufwaisha ukubombela Lesa?

¹⁰ Ica bubili icingalenga mwalafwaisha ukubombela Yehova no mutima onse, mapepo yenu. Pa Amalumbo 65:2, patila: “Mwe bomfwa ipepo, kuli imwe e ko abantunse bakesa.” Na lintu abena Israele bali bantu ba kwa Lesa abo apangene nabo icipangano, abena fyalo abaleisa kwi tempele lya kwa Yehova balepepa kuli ena. (1 Isha. 8:41, 42) Lesa taba na kapaatulula. Bonse abakonka amafunde yakwe bafwile ukucetekela ukuti akulabomfwa nga bapepa. (Amapi. 15:8) Kanshi, amashiwi ya kuti “abantunse,” yasanshamo na imwe mwe bacaice.

¹¹ Mwalishiba ukuti pa kutila icibusa cikose pafwile paba ukulanshanya. Mufwile mwalitemwa ukwebako icibusa cenu ifyo muletontonkanya, ifimusakamike, e lyo ne fyo muleumfwa. Kanshi na lintu mulepepa amapepo ukufuma pa nshi ya mutima, ninshi mulelanshanya na Kabumba wenu, Lesa Mukulu. (Fil. 4:6, 7) Mulelanda kuli Yehova fyonse ifili mu mutima nga filya fine mwingalanda ku bafyashi benu abamutemwa nelyo kuli cibusa wenu uwa pa mutima. Na kuba, ifyo mupepa filanga fye ifyo mumfwa pali Yehova. Mukamona ukuti nga mwapalama sana kuli Yehova, na mapepo yenu yakalaba bwino sana.

12. (a) Mulandu nshi amapepo ayasuma yashipelela fye pa kulanda amashiwi? (b) Cinshi cikalenga mukeluke ukuti Yehova aba mupepi na imwe?

¹² Kwena, mufwile ukwishiba ukuti pa kuti mupepe ipepo ilisuma mulingile ukulanda ifili mu mutima, te kulanda fye cikulu mulelanda. Mu mapepo yenu, mufwile ukulanga Yehova ukuti mwalimutemwa, mwalimucindika sana, no kuti mwashintilila pali ena. Nga muleiluka ifyo Yehova asuka amapepo yenu, mukeshiba bwino bwino ukuti “Yehova aba mupepi na bonse abalilila kuli ena.” (Amalu. 145:18) Cine cine, Yehova akapalama kuli imwe, akamukosha pa kuti mulekaana Kaseebanya na pa kuti mulesalapo ukucita ifisuma mu bumi.—Belengeni Yakobo 4:7, 8.

13. (a) Bushe bucibusa na Lesa bwayafwile shani nkashi umo? (b) Bushe bucibusa bwenu na Lesa bumwafwa shani ukukaana ukucita ifyo bambi balemupatikisha?

¹³ Moneni ifyo Cherie asangile inkosho pa kuba cibusa wa kwa Yehova. Ilyo aali ku sekondari alipeelwe ifilambu pantu ali na mano kabili alicenjele sana mu fyangalo. Ilyo apwishishe isukulu, bamulaile ukuti bakamwafwa mu masambililo pa kuti akasambilile sana. Cherie atile, “Ubu bwali bwesho kabili abaletusambilisha amangalo na bana be sukulu banandi balempatikisha sana ukuti nsumine.” Lelo alilwike ukuti, nga alafwaya ukusambilila sana, akalapoosa inshita iikalamba ku kubelenga ifya ku sukulu no kupekanishisha ifyangalo, ica kuti takalekwata inshita ya kubombela Yehova. Cinshi Cherie acitile? Atila, “Nalipepele  kuli Yehova, e lyo pa numa nalikeene ifyo bandaile kabili natampile bupainiya bwa nshita yonse.” Pali ino nshita, nabomba bupainiya pa myaka 5. Atila, “Nshi-iseka pa fyo nacitile. Naliba ne nsansa ukwishiba ukuti ico nasalilepo ukucita e citemuna Yehova. Kanshi nga mulefwaya Ubufumu bwa kwa Lesa intanshi, fyonse ifyo mukabila akamupeela.”—Mat. 6:33.

Imibele Isuma Ilanga Ukuti ‘Mwalisanguluka mu Mutima’

14. Mulandu nshi imibele isuma yacindamina kuli Yehova?

¹⁴ Ica butatu ico mwingalangilamo ukuti mwali-itemenwa ukubombela Yehova mibele isuma. Yehova alapaala abacaice abatwalilila ukuba ne mibele isuma. (Belengeni Amalumbo 24:3-5.) Ilyo Samwele ali umwaice alikeene ukupashanya imibele yabipa iyakwete abana ba kwa Shimapepo Mukalamba Eli. Abantu balimwene ukuti Samwele alikwete imibele isuma. Baibolo itila: “Muli yo nshita umwaice Samwele alekula kabili Yehova alimutemenwe na bantu na bo balimutemenwe.”—1 Sam. 2:26.

15. Finshi fimo ifilenga ukuti muletwalilila ukuba ne mibele isuma?

¹⁵ Twikala mu calo umo abantu abengi baba abaitemwa, aba matutumuko, abashumfwila bafyashi babo, abashitasha, abashaba na cishinka, abankalwe, aba cilumba, abatemwa ukwangala ukucila ukutemwa Lesa. Iyi e mibele imo imo iyo umutumwa Paulo alumbwile. (2 Tim. 3:1-5) Kanshi calyafya ukuba ne mibele isuma muli cino calo umwafula imibele yabipa. Lelo nangu cibe fyo, ilyo lyonse mwacita icalungama no kukaana ukucita ifyabipa, ninshi mulelanga ukuti mwaba ku lubali lwa kwa Yehova mu fikansa fya mitekele. (Yobo 2:3, 4) Kabili mukaba ne nsansa ukwishiba ukuti namumfwila ifyo Yehova alemupapaata ukuti: “We mwana wandi, ube na mano, kabili ulenge umutima wandi ukusekelela, pa kuti njasuke uulenseebanya.” (Amapi. 27:11) Na kabili, ukwishiba ukuti Yehova natemwa ico mucitile kukalenga mulefwaisha ukumubombela.

16. Bushe nkashi umo alengele shani umutima wa kwa Yehova ukusekelela?

¹⁶ Umwina Kristu umo uwe shina lya Carol ilyo ali fye umukashana pa sukulu, alitwalilile ukukonka ifya mu Baibolo, kabili bambi balimwene imibele yakwe iisuma. Cinshi cacitike? Abana be sukulu banankwe batendeke ukumuseka pa mulandu wa kuti alekaana ukusefyako amaholide no kusefya kwa fya mapolitiki pa mulandu wa fyo asambilile mu Baibolo. Ilyo balemuseka, limo limo alekwatako ishuko lya kulondolwela abanankwe ifya mu Baibolo. Ilyo papitile imyaka iingi, Carol apokelele kardi ukufuma ku o alesambilila nankwe, uwalembele ukuti: “Lyonse nalefwaya ukwishiba uko waba no kukutasha. Fwe bengi twalekumbwa imibele yobe iisuma ne fyo wali Umwina Kristu wacaice umusuma, na filya fine waleba uwashipa pa kukaana ukusefyako amaholide. Ni we Inte ya kwa Yehova nabalilepo ukwishiba.” Uyu muntu alitemenwe sana imibele ya kwa Carol ilyo bali bonse pa sukulu ica kuti aishiletendeka no kusambilila Baibolo. Pali kardi alembeele Carol alandile no kuti nomba ni Nte, kabili apo abatishiwilwa palipita ne myaka ukucila 40! Nga filya Carol acitile, mwe bacaice mwe baba abashipa ukukonka ifya mu Baibolo, nalimo na imwe kuti mwalenga aba mitima isuma baishiba Yehova.

 Abacaice Abalelumbanya Yehova

17, 18. (a) Bushe mumfwa shani pa bacaice ababa mu cilonganino cenu? (b) Ku ntanshi, cinshi cikacitika ku bacaice ababa na katiina kuli Lesa?

¹⁷ Ifwe bonse fwe baba mu kuteyanya kwa kwa Yehova ukwa mwi sonde lyonse twaliba ne nsansa ukumona abacaice abengi abacincila mu kupepa kwa cine! Aba abacaice balabelenga Baibolo cila bushiku, ukupepa, no kukwata imibele iyumfwana no kufwaya kwa kwa Lesa. Ifi e fibafwa ukufwaisha ukubombela Yehova. Abacaice ba musango yu balalenga abafyashi babo e lyo na bantu ba kwa Yehova bonse ukuba ne nsansa.—Amapi. 23:24, 25.

¹⁸ Ku ntanshi, abacaice aba cishinka bakaba pa bakapusuka no kwingila mu calo cipya ico Lesa alaya. (Ukus. 7:9, 14) Muli cilya calo, emo bakaipakisha amapaalo ayengi nga nshi ilyo bakatwalilila ukwishiba Yehova, kabili bakakwata ne shuko lya kumulumbanya ku ciyayaya.—Amalu. 148:12, 13.

Bushe Kuti Mwalondolola?

• Finshi abacaice balingile ukucita pa kuti babe mu kupepa kwa cine ilelo?

• Nga ca kuti mulefwaya ukunonkelamo ilyo mulebelenga Baibolo, mulandu nshi cacindamina ukutontonkanya pa fyo mulebelenga?

• Bushe ipepo kuti lyamwafwa shani ukupalama kuli Yehova?

• Cinshi imibele isuma iya Mwina Kristu ingacita?

[Amepusho]

[Icikope pe bula 5]

Bushe walibelesha ukubelenga Baibolo cila bushiku?