Ukushipikisha Amesho Kwalilenga Twacetekela Sana Yehova

Abashimika ili lyashi ni ba Ada Dello Stritto

E lyo napwishishe fye ukukopolwela ilembo lya bushiku muli notibuku yandi. Ndi ne myaka 36, lelo pa kukopolola fye ifyo fyebo ifinono napooselepo ama-awala yabili. Mulandu nshi? Bamayo balamweba icalenga.—Joel

INE na bena mwandi twabatishiwe ukuba Inte sha kwa Yehova mu 1968. Pa numa ya kukwata abana abaume babili abalekula bwino, David na Marc, twaishilekwata na umbi umwana umwaume uwe shina lya Joel. Uyu mwana afyelwe ninshi imyeshi ya kufyalilwapo tailakumana. Afyelwe mu 1973 mu cipatala ca mwi tauni lya Binche mu Belgium, apaba amakilomita 60 ku kapinda ka ku kulyo aka Brussels. Ilyo afyelwe afinine amakilogramu 1.7. Ilyo nafumine mu cipatala, batile Joel ashale pa kuti alundeko amakilogramu.

Ilyo papitile imilungu inono kabili twamona ukuti umwana wesu ali fye cimo cine, ine na balume bandi ba Luigi, twalimusendele no kumutwala kuli dokota uwaishiba sana ifya kundapa abana. Ilyo apwishishe ukuceeceeta Joel, dokota atile: “Cabipa sana. Cilemoneka Joel nakwata ubulwele bwabipisha.” Awe bonse twaishileba fye tondolo pa nshita yalepa. Lilya line, nalishibe ukuti umwana wesu ali no bulwele ubukalamba. Lyena dokota aitile abalume bandi pa mbali no kubeba ukuti: “Umwana wenu ali no bulwele bwa trisomy 21,” ubwitwa na kabili ukuti Down syndrome. *

Apo twalisakamene ne fyo uyu dokota atwebele, twatontonkenye ukumona dokota na umbi uwaishiba sana. Apimine umwana wesu Joel mupepi ne awala limo ukwabula ukutweba icili conse. Ine na bena mwandi ba Luigi twamwene kwati akokola sana. Awe twamwene fye uko dokota aisatulolesha no kutweba ati, “Umwana wenu ni mwe mukalamucitila fye fyonse.” Lyena, mwi shiwi lya cikuuku alandile no kuti, “Kwena Joel akaba uwa nsansa pantu mwe bafyashi bakwe mwalimutemwa!” Naimishe Joel no kumufukatila bwino bwino, ninshi ndi no bulanda nga nshi. E fyo twamusendele na ku ng’anda. Iyi nshita ninshi ali fye ne milungu 8.

Ukulongana kwa Bwina Kristu no Mulimo wa Kushimikila Fyalitukoseshe

Inshita imbi ilyo badokota bamupimine basangile ukuti Joel alikwete no bwafya ku mutima kabili ali no bulwele ubulenga amafupa ukukanakosa.  Apo umutima wakwe walikulile sana, waletitikisha bapwapwa ne ci calengele ukuti aleambula amalwele yapusanapusana. Tapakokwele, ilyo ali fye ne myeshi 4, Joel ayambwile ubulwele ubwalelenga alefilwa ukupeema bwino, twalimubweseshemo ku cipatala, kabili balilemuteka. Caletukalipa ukumona ifyo alecula. Twalefuluka ukumulelako no kulamwangasha, lelo balitukeenye ukumwikatamo pa milungu 10 iyo bamutekele. Kanshi ine na ba Luigi ico twalecita kumulolesha fye, no kwikatana, no kupepa.

Pali iyi nshita yonse, twalitwalilile ukulongana, twalesenda David, uwali ne myaka 6 pali iyi nshita, na Marc, uwali ne myaka itatu. Ilyo tuli ku Ng’anda ya Bufumu twaleumfwa kwati Yehova natufukatila. Inshita yonse ilyo twaleba ku kulongana na bamunyinefwe na bankashi, twaleumfwa kwati twalebika ubwafya bwesu pali Yehova, kabili twaleumfwa ne mitima yaikala. (Amalu. 55:22) Nangu fye ni ba nasi abalesakamana Joel balandile ukuti balimwene ifyo ukusangwa ku kulongana kwa Bwina Kristu kwatwafwile ukukanasakamikwa sana.

Ilyo twali no bu bwafya, nalelomba na kuli Yehova ukuti ankoshe pa kuti ndebombako no mulimo wa kushimikila. Mu nshita ya kwikala fye pa ng’anda no kulalila, nalefwaya ukulalandako na bambi no kubeba umulandu ukutetekela mu bulayo bwa kwa Lesa ubwa calo cipya umushakabe amalwele kwanengele ukuba uwakosa. Lyonse nga ndeshimikila, nalemona ukuti Yehova nayasuka amapepo yandi.

“Ala Ici Cena Cipesha Mano!”

Ubushiku twailesenda Joel ukumufumya mu cipatala ukumuleta pa ng’anda, ala twali ne nsansa icine cine! Lelo ubushiku bwakonkelepo, ifyacitike tafyaweme. Joel alilwalishe, kabili twamubutushishe ku cipatala. Pa numa ya kumupima, badokota batwebele ukutila: “Joel ali fye nalimo ne myeshi 6 iya kuba no bumi.” Ilyo papitile imyeshi ibili, ninshi nomba Joel ali ne myeshi 8, twamwene ukuti ifyo badokota balandile fyali fya cine pantu ubulwele bwa kwa Joel bwalebipilako fye. Dokota alitwitile no kutweba ukuti: “Cabipa sana. Nomba takuli na cimbi ico twingacita ukuti tupusushe uyu mwana.” Kabili alandile no kuti: “Ifi caba, ni Yehova fye e wingamwafwa.”

Nabwelele mu muputule umo babikile Joel. Nangu ca kuti nalinakile sana, na mano yalipelele, nshalefwaya ukumusha eka apo aleele. Bankashi ba Bwina Kristu abengi balekomboshanya ukuninda ilyo ba Luigi baleba ku ng’anda balesakamana abana besu bambi babili abakalamba pali Joel. Casendele umulungu umo. Mu kupumikisha fye, umutima wa kwa Joel walilekele ukutunta. Lelo nangu ba nasi babutukile mu muputule ali ukuti bamupusushe, awe nakalya balifililwe. Papitile fye amamineti yanono, nasi umo alandile mwi shiwi lyanakilila atile, “Awe capwa nomba . . . ” Calimponya pa musao ica kuti natendeke fye ukuloosha, nafumina na pa nse. Naeseshe ukupepa kuli Yehova, lelo nalifililwe ukulondolola ifyo cankalipe. Ilyo papitile amamineti 15, nasi alibilikishe no kunjeba ati, “Joel napuupuutuka!” Uyu nasi anjikete pa kuboko no kutila, “Isa, kuti waisamumona nomba.” Awe ilyo naloleshe Joel, namwene umutima wakwe uletunta na kabili! Bwangu bwangu ilyashi lya kuti napuupuutuka lyalisalangene. Ba nasi na badokota baishile mu kumumona, kabili abengi balelanda abati, “Ala ici cena cipesha mano!”

Ilyo Aali ne Myaka 4, Kwacitike Icatupapwishe

Ilyo Joel ali fye umunono, dokota wa bana lyonse aletweba ukuti, “Joel alekabila ukutemwikwa sana.” Apo ine na ba Luigi  twalimwene ifyo Yehova atusakamene ilyo Joel afyelwe, twalefwaya ukumulanga ukuti twalimutemwa sana. Twalikwete inshila ishingi isha kulangilamo ukuti twalimutemwa pantu ni fwe twalecita fyonse ifyo alekabila.

Cila mwaka pa myaka ya kubalilapo 7 iya bumi bwa kwa Joel, kwalecitika ifintu fimo fine ica kuti twabelela no kubelela. Pa kati ka October na March, alelwala amalwele yalekanalekana mu kukonkana, kabili twalesempela fye ku cipatala. Kabili pa nshita imo ine, nale-esha na maka ukukwatako inshita ya kusakamana abana besu babili David na Marc. Aba abana babili nabo balitendeke ukwafwako Joel ukulunduluka muli fimo, kabili ifyafuminemo fyali fya kupapusha. Ku ca kumwenako, badokota abengi batwebele ukuti Joel akaba fye icite. Lelo bushiku bumo ilyo Joel ali ne myaka 4, umwana wesu umbi Marc alimwitile ukuti, “Joel, tente, tente!, balange bamayo ukutila kuti waenda!” Ala nalipapile ukumona Joel alatankila! Twalitemenwe sana, kabili twalipepele kuli Yehova ukumutasha ukufuma pa nshi ya mitima yesu. Inshita shimbi, nga ca kuti Joel acitapo cimo ico ashatala acita, lyonse twalemutasha sana.

Ukusambilisha Joel Pali Lesa Ukufuma fye ku Bwaice Kwaleta Ifisuma

Ilingi line, Joel nga ali bwino twalemusenda ku kulongana ku Ng’anda ya Bufumu. Pa kumucingilila ku tushishi utwingalenga alwala, twalemubika mu cola caba nga basiketi ico bafimbapo pulasitiki pa muulu. Lelo nangu ca kuti aleba muli iyi basiketi napafimbwa na pulasitiki, aletemwa ukuba na bamunyina mu cilonganino.

Bamunyinefwe na bankashi baletukoselesha, balitutemenwe kabili baletwafwa mu fyo twalekabila. Munyinefwe umo aletwibukishako lyonse amashiwi yaba pali Esaya 59:1 ayatila: “Moneni! Ukuboko kwa kwa Yehova takwaipipa ukwa kuti kufilwe ukupususha, kabili ukutwi kwakwe takwakoma ukwa kuti kufilwe ukumfwa.” Aya mashiwi ya kukoselesha yalengele tube ne citetekelo muli Yehova.

Ilyo Joel alekula, twalemwafwa ukuti akabike amano ku kubombela Yehova mu bumi bwakwe. Ilingi line nga tulelanda nankwe twalelanda pali Yehova mu nshila ya kulenga Joel ukutendeka ukutemwana na Wishi wa ku muulu. Twalepapaata Yehova ukuti engatupaala pa kutila umwana wesu akalekonka ifyo twalemusambilisha pali Lesa.

Ilyo Joel ali fye umupungwe, twalitemenwe ukumona ifyo atemenwe ukwebako bambi icine ca mu Baibolo. Ilyo ali ne myaka 14, balimulepwile kabili ilyo alepola nalitemenwe ilyo anjipwishe ukuti, “Mayo, bushe mpeeleko badokota icitabo ca Kuti Waikala Kuli Pe na pe?” Pa numa ya myaka iinono, Joel balilemulepula na kabili. Twaleti fye katwishi uno muku nga alapusuka. Ilyo bashilatampa ukumulepula, Joel abalile apeela badokota kalata iyo twalembele nankwe. Yalelondolola ifyo Joel aishiba pa lwa kubomfya umulopa. Lyena dokota aipwishe Joel ati, “Bushe nausumina ifi?” Joel ukwabula umwenso ayaswike ukuti, “Ee, badokota.” Twalitemenwe sana pa fyo umwana wesu atetekele muli Kabumba wakwe ne fyo apampamine pa kucita ifingalenga  Lesa ukutemwa. Ababomfi ba cipatala balitutungilile sana, na ifwe twalibatashishe icine cine.

Joel Alunduluka mu Kupepa Lesa

Ilyo Joel ali ne myaka 17, alangile ukuipeela kwakwe kuli Lesa ukupitila mu kubatishiwa. Ala tatwakatale atulaba bulya bushiku! Twaliba ne nsansa nga nshi ukumona ifyo alunduluka mu kupepa Lesa. Ukutula ilya nshita, alitwalilila ukutemwa Yehova kabili alicincila mu kupepa Lesa. Na kuba, nga akumana no muntu uuli onse, alitemwa ukusosa ukuti, “Icine e bumi bwandi!”

Ilyo ali mupepi no kufisha imyaka 20, Joel asambilile ukubelenga no kulemba. Wali mulimo uukalamba. Lyonse aletemwa sana nga aishiba ukulemba ishiwi limo. Ukutula apo aishibila ukulemba no kubelenga, cila bushiku alabebeta ilembo ukufuma mu katabo ka Ukubebeta Amalembo Cila Bushiku. Nga abebeta ilembo, alalikopolwela panono panono mu citabo alembamo ifyebo, ica kuti pali ino nshita icitabo cakwe caisulamo fye amalembo!

Pa nshiku sha kulongana, Joel alafwaya lyonse tulebangilila pa kuti aleposha bonse abaleingila mu Ng’anda ya Bufumu. Ilyo tulelongana, alatemwa sana ukwasukapo no kuba mu filangililo. Kabili alabombelako ku fisoselo no kubombako imilimo imbi. Nga ali bwino, cila mulungu tulaya nankwe mu kushimikila. Mu 2007, balibilishe ku cilonganino ukutila Joel nasontwa ukuba umubomfi utumikila. Twalitemenwe ica kuti twalukusha ne filamba. Ala ili lipaalo ukufuma kuli Yehova!

Twalimona Ifyo Yehova Atwafwa

Mu 1999 twakwete ubwesho na bumbi. Namutekenya umo uwa mulekelesha aishilepunka muli motoka yesu, kabili ba Luigi balicenenwe sana. Ici calengele ukuti babaputule ukuulu kumo, kabili imiku iingi balibalepwile mu mongololo. Na kabili ukucetekela muli Yehova, kwalengele ukuti tukwate amaka ayo apeela ku babomfi bakwe. (Fil. 4:13) Nangu ca kutila ba Luigi balilemana, tulesha ukulolesha pa fisuma ifyo bacita. Apo te kuti bengile incito, kanshi balakwata inshita iikalamba iya kusakamana Joel. Ici calenga nkwate inshita iikalamba iya kwangwa ku fintu fya ku mupashi. Ba Luigi kabili balasakamana ifya ku mupashi ifyo ulupwa lukabila e lyo ne fya mu cilonganino, umo batwalilila ukuba bakampanya be bumba lya baeluda.

Ifi fyonse ifyatucitikila fyalenga no kuti tulekwata inshita iikalamba iya kuba pamo no mwana wesu. Ukufika pali ino nshita, twalisambilila ifya kukanafwaya ifyacilamo. Ubushiku twasakamikwa sana, tulapepa kuli Yehova ukumweba ifyo tuleumfwa. Ica bulanda ca kuti, ilyo abana besu David na Marc bafikile pa bulumendo no kufuma pa ng’anda, panono panono balekele ukubombela Yehova. Tulecetekela ukuti nalimo bakasuka bakabwele kuli Yehova.—Luka 15:17-24.

Pa myaka yonse iyi, twalimona ifyo Yehova atwafwa kabili twalisambilila ukushintilila pali ena ilyo twaba na mafya. Twalitemwa amashiwi yaba pali Esaya 41:13, ayatila: “Ne Yehova Lesa obe, ndeikata ukuboko kobe ukwa ku kulyo, ndekweba ati, ‘Witiina. Ine nkakwafwa.’” Tulasansamuka ukwishiba ukuti Yehova alekatisha ukuboko kwesu. Kanshi kuti twatila, ukushipikisha amesho kwalilenga twacetekela sana Shifwe wa ku muulu, Yehova.

[Futunoti]

[Ifikope pe bula 16, 17]

Joel na banyina ba Ada

[Icikope pe bula 18]

Ba Ada, Joel, na ba Luigi

[Icikope pe bula 19]

Joel alitemwa ukuposha bamunyina na bankashi pa Ng’anda ya Bufumu