Amepusho Ukufuma ku Babelenga

Apo Yehova alilesha ukupepa utulubi, mulandu nshi ashakandiile Aarone ilyo apangile umwana wa ng’ombe?

Ilyo Aarone apangile umwana wa ng’ombe, nga fintu tubelenga mu Ukufuma icipandwa 32, alipulile ifunde lya kwa Lesa ilyakaanya ukupepa utulubi. (Ukufu. 20:3-5) Ici calengele ‘Yehova afulilwe Aarone icibi ica kuti apene amulofye; lelo Mose alimupapaatileko muli ilya nshita.’ (Amala. 9:19, 20) Bushe ipepo lya kupapaata, ilyo Mose apepeleko Aarone lyali na “maka ayengi”? (Yako. 5:16) Ee. Cimoneka ukuti Yehova alyaswike ipepo lya kwa Mose ilya kupapaata kabili takandile Aarone. E lyo kwali imilandu na imbi ibili iyalengele Aarone bemukanda.

Nalimo cimbi icalengele ukuti Aarone bemukanda, ni co ali na bucishinka. Ilyo Mose bamutumine kuli Farao na ku kuyafumya abena Israele mu Egupti, Yehova asalile Aarone ukuya na Mose ku kuyaba uwa kumusoselako. (Ukufu. 4:10-16) Aba baume babili balyumfwilile, kabili balile mu kumona imfumu ya mu Egupti imiku iingi, nangu ca kuti Farao uwali no mutima uubi alebacusha. Kanshi ilyo bali mu Egupti, calimoneke ukuti Aarone ali uwa cishinka, no kuti apampamine pa kubombela Yehova.—Ukufu. 4:21.

Moneni ne calengele Aarone ukupanga umwana wa ng’ombe. Mose apwile inshiku 40 pa Lupili lwa Sinai. Ilyo “abantu bamwene ukuti Mose akokola ukutentemuka ulupili,” bapatikishe Aarone ukuti abapangile icilubi. Aarone acitile ico balefwaya kabili alibapangile umwana wa ng’ombe uwa golde. (Ukufu. 32:1-6) Lelo ifyo Aarone acitile pa numa filanga ukuti ena talefwaya ukuti abantu bapepe icilubi. Kanshi nalimo icalengele ukuti apange mupatikisha wa bantu. Ku ca kumwenako, ilyo Mose alefwaya ukwishiba abali kuli Yehova, abana ba kwa Lebi bonse, ukubikapo fye na Aarone, basalile ukuba ku lubali lwa kwa Yehova. Abantu 3,000 abalengele kube ukupepa umwana wa ng’ombe balibepeye.—Ukufu. 32:25-29.

Lyena pa numa Mose aebele abantu ukuti: “Namubembuka ulubembu ulukalamba.” (Ukufu. 32:30) Kanshi, twamona ukuti te Aarone fye eka uwakwete umulandu wa kupepa icilubi. Na bantu bambi balimwenenemo mu luse ulukalamba ulwa kwa Yehova.

Pa numa ya ifi ifyacitike, Yehova apeele icipope ca kuti Aarone abe shimapepo mukalamba. Lesa aebele Mose ukuti: “Ukafwike Aarone ifya kufwala fya mushilo kabili ukamusube no kumusangulula, pa kuti abombe bushimapepo kuli ine.” (Ukufu. 40:12, 13) Ukwabula no kutwishika, Aarone balimwelela kuli Yehova pa cilubo apangile. Nangu Aarone acitile fi, ali kapepa wa cishinka, uwaletungilila ukupepa kwa cine, taali cipondoka kapepa wa tulubi.