Mulandu Nshi Mufwile Ukucindikila Abakote?

MU LULAMBA lwa bemba ku California, ku America, kwaliba icimuti ico abantu bakopa sana pa fimuti fyaba muno calo. Bacita ati Lone Cypress. Batila ici cimuti caikala imyaka ukucila pali 250. Apo calishibikwa ukuti ici cimuti calikokola sana, balacisakamana mu nshila ishingi. Ku ca kumwenako, baliciikasha ne ntambo ishikulu e lyo pa nshi balicitungilila na mabwe.

Ici cimuti ciletucinkulako pa lwa Bena Kristu abakote abo twaba nabo, abashipikisha pa myaka iingi. Inshila iikalamba balangilamo uku kushipikisha, kushimikila imbila nsuma. Kasesema Yoele asobele ukuti “abakalamba,” bali no kubila ubukombe bwa mu Baibolo. (Yoele 2:28-32; Imil. 2:16-21) Tontonkanyeni pa ma-awala ubwingi ayo aba abakalamba babomba ilyo baleafwa abantu ukumfwa “imbila nsuma iyi iya bufumu”! (Mat. 24:14) Abakalamba bamo ababilisha Ubufumu, balishipikisha pa myaka iingi ilyo balebacusha na lintu balepita mu mafya yambi. Nga ca kutila icimuti fye balicishiba pa mulandu wa kukokola kabili baliciikasha ne ntambo ishikulu no kucitungilila na mabwe, ninshi abakalamba twakwata mu filonganino tufwile no kucilapo ukubasakamana no kubacindika!

Yehova Lesa aebele abantu bakwe kale ukuti: “Ku wa mfwi uleima, kabili ulecindika umukote.” (Lebi 19:32) Pa babomfi ba kwa Yehova pali lelo paliba abakote aba busumino ‘abaenda na Lesa’ pa myaka iingi sana.  (Mika 6:8) Ilyo batwalilila ukukonka ifilanda Amalembo, umutwe wabo uwa mfwi “uba cilongwe icayemba.”—Amapi. 16:31.

Umutumwa Paulo afundile Timote uwacaice ukuti: “Wilakalipila umwaume umukalamba bukali bukali.” Mu nshita ya kucita ifyo, Timote alingile ‘ukumupapaata nga wishi,’ kabili alingile ukulamona ‘abanakashi abakalamba nga banyina.’ (1 Tim. 5:1, 2) Kanshi cimo cine no kuti Timote ali no ‘kulaima’ ku wa mfwi. Cailanga fye ukutila Yehova afwaya imilandile yesu yalanga umucinshi.

Pa Abena Roma 12:10 patila: “Ku kucindikana ni mwe mubalilepo.” Bakangalila mu cilonganino ukwabula no kutwishika balalanga umucinshi ku Bena Kristu abakote. Lelo ku kucindikana ifwe bonse tulingile ukubalilapo.

Kwena aba mu lupwa balipeelwa umulimo wa kusakamana abafyashi babo kumo na banakulwibo na bashikulwibo. Abantu balisanga inshila sha kusakamaninamo cilya cimuti tulandilepo no kucisungilila kabili balitwalilila ukucita ifyo. Kanshi tufwile ukusangako inshila sha kulangilamo umucinshi ku bafyashi besu abakote na kuli banakulwifwe na bashikulwifwe. Ku ca kumwenako, nga tulekutika ku fyo balelanda te kuti tuleumina fye pa kucita ifintu umo tulefwaila ukwabula ukutontonkanya pa fyo bengatemwa.—Amapi. 23:22; 1 Tim. 5:4.

Abakalamba abo twakwata balicindama sana kuli Yehova. Tabalekelesha iyo. (Amalu. 71:18) Na kuba, Lesa wa cine alabakosha pa kuti batwalilile ukumubombela ne cishinka. Na ifwe natutwalilile ukwafwa no kucindika abakote.

[Ifikope pe bula 7]

Nga filya ici cimuti cikabila ukucitungilila, abakalamba nabo balakabila ukubacindika

[Abatusuminishe]

American Spirit Images/age fotostock