Twalilileni Ukuba Abakosa Muli Bukapepa Ilyo Muletensha Umuntu Wenu Umulwele

ILYO badokota bapimine cimumena icali mu mongololo wa ba Kim, Inte ya kwa Yehova, basangile ukuti balikwete ubulwele bwa kansa. * Abena mwabo batila: “Bafumishe cimumena, no kukonkanyapo ukubondapa. Imyundapile balebondapa yalebapwa sana amaka. Balefilwa no kwenda.”

Elenganyeni ifyo ba Steve baleumfwa ububi pa kumona abena mwabo abo batemwa baleshomboka no bulwele ubwaleya fye bulebipilako. Nalimo mwalikwatako umuntu wenu uwalwala muli uyu musango nangu uucula ku mafya ya mu bukote. (Luk. Mil. 12:1-7) Nga ni fyo, ninshi mwalishiba ukuti pa kutensha bwino umuntu wenu, mufwile na imwe muleisakamana. Nga ca kuti mwanaka muli bukapepa, amatontonkanyo yenu no mubili kuti fyanaka mwalafilwa no kucita ifyo uo muletensha alekabila. Finshi fingamwafwa ukukanalekelesha bukapepa bwenu ilyo muletensha umuntu wenu umulwele nelyo ukusakamana umukoloci? Nga pali ifyo aba mu cilonganino bengacita ku kulanga ukuti balelangulukilako abo balwele, finshi ifyo fine?

Finshi Fingamwafwa Ukuba Abakosa?

Nga mulefwaya ukukanabwelela inuma muli bukapepa e lyo no kusakamana ubumi bwenu ilyo muletensha umuntu wenu, mufwile ukwakanya bwino inshita no kulacita ifintu ukulingana na maka yenu. Ilembo lya Amapinda 11:2 litila “Abafuuka e ba mano.” ‘Ukufuuka’ balelandapo kwishiba apapela amaka yenu. Pa kuti tamulebombesha ukucila mu cipimo, mufwile ukumona ifyo mwatantika imibombele yenu e lyo no kubebeta imilimo mwakwata.

Ba Steve balilangishe amano no bufuuke pantu balipitulwike mu milimo bakwete. Balebomba incito ya kusangilamo ifya kulya, e lyo bali bakampanya be bumba lya baeluda kabili  bakangalila ba mulimo mu cilonganino ca Nte sha kwa Yehova mu calo ca Ireland. E lyo kabili bali muli Komiti wa Kumfwaninamo ne Fipatala. Ba Steve basosele ukuti: “Umwina mwandi Kim tabalile ailishanya ukuti nalemusha eka ilyo nalebomba iyi milimo. Lelo ine nalishibe ukuti ndebombesha ukucila mu cipimo.” Bushe ba Steve bacitile shani? Batila: “Pa numa ya kupepa no kutontonkanyapo sana, napingwilepo ukushiila umbi bukampanya. Nalikonkenyepo ukuba eluda, lelo ukupeelako bambi imilimo nakwete kwalengele ndeba sana no mwina mwandi no kumusakamana bwino.”

Mu kuya kwa nshita, ba Kim batampile ukupola. Ba Steve na ba Kim balibebetele ifintu na kabili, kabili ba Steve batampile ukubomba imilimo balebomba kale iya mu cilonganino ilyo basuminishenye na bena mwabo. Ba Steve batila: “Pa mulandu wa malwele, twalisambilila ukulacita fye ifintu ifyo twingakwanisha. Ndetasha sana Yehova pa bwafwilisho atupeele kabili ndetasha umwina mwandi pa fyo antungilila ukwabula ukuilishanya te mulandu no kulwalilila.”

Moneni ne fyacitikile ba Jerry, bakangalila benda na bena mwabo ba Maria. Balyalwileko imibombele yabo pa kuti balesunga abafyashi  babo abakote. Ba Maria batila: “Ine na bena mwandi twakwete ubuyo bwa kubomba bumishonari ku calo cimbi. Lelo abena mwandi ba Jerry, bafyalwa fye beka, kabili abafyashi babo balekabila uwa kubasunga. E ico twatile twalaikala fye mu calo ca Ireland, umwikala abafyashi pa kuti tulebasunga. Ico calengele tutenshe batatafyala ilyo bali mu cipatala mpaka ne mfwa yabo. Pali ino nshita, tulalanshanya na bamamafyala cila bushiku, kabili twaikala fye lwa mupepi ica kuti nga balefwaya ubwafwilisho tulabutukilako no kubaafwa. Aba mu cilonganino umwaba bamamafyala balatwafwa sana, ne ci calenga tutwalilile mu mulimo wa kwenda.”

Ifyo Bambi Bengafwilisha

Ilyo umutumwa Paulo alelanda pa kwafwilisha bamukamfwilwa abakoloci mu cilonganino, alembele ukuti: “Umuntu nga tasakamana abantu bakwe, maka maka aba mu ng’anda yakwe, ninshi nakaana icitetekelo kabili abipa ukucisha no ushatetekela.” Paulo acinkwileko Abena Kristu banankwe ukuti nga balefwaya imicitile yabo ibe ‘iisuma mu menso ya kwa Lesa,’ bafwile ukusakamana abafyashi babo na banakulwibo na bashikulwibo. (1 Tim. 5:4, 8) Lelo, bambi mu cilonganino kuti bayafwilishako, kabili bafwile ukuitemenwa ukucite co.

Moneni ifyacitikile ba Hakan na ba Inger, abakoloci abekala ku Sweden. Ba Hakan batila, “ilyo badokota bapimine abena mwandi no kusanga ati balikwete ubulwele bwa kansa, bonse babili twalitulumwike. Ku numa, umwina mwandi ali no bumi busuma kabili ali uwakosa. Twatampile ukulasempela fye ku cipatala ku kundapwa, kabili uku kundapa kwalemutembula. Umwina mwandi Inger aleikala fye pa ng’anda iyi yonse inshita, na ine nshalefumapo pa kuti ndemutensha.” Bushe aba mu cilonganino bayafwile shani ba Hakan na ba Inger?

Baeluda mu cilonganino bapekenye ukuti ba Hakan na ba Inger baleumfwa ukulongana konse pa foni. E lyo kabili bamunyinefwe na bankashi baletutuminako amafoni no kutupempula. Baletutuminako amakardi na makalata. Ba Hakan batila: “Twalemona ukuti bamunyinefwe bonse baletutungilila na Yehova aletwafwa. Uku kwafwa kwalengele tutwalilile abakosa muli bukapepa. Caliwama ukuti pali ino nshita umwina mwandi alipola kabili tulasangwa ku kulongana ku Ng’anda ya Bufumu.” Ilyo aba mu cilonganino baesha na maka ukwafwilisha abalwele na bakoloci pa kati kabo, baba ‘fibusa fya cishinka ifyakwata ukutemwa ukushipwa, kabili ifibusa ifyaba nga munyina uufyalwa ilyo kuli ubucushi.’—Amapi. 17:17.

Yehova Alatasha Ifyo Mubomba

Umulimo wa kutensha umuntu wenu umulwele ulanasha. Lelo, Imfumu Davidi yalembele ukuti: “Alipaalwa onse uwafwilisha umupiina,” pamo nga umuntu uulekabila ubwafwilisho pa mulandu wa kulwala.—Amalu. 41:1.

Mulandu nshi abatensha nangu abasakamana abalecula babela abapaalwa? Ilembo lya Amapinda 19:17 litila: “Uulepeela umupiina ninshi aleashimisha Yehova, e ukamubwesesha pa luse lwakwe.” Lesa wa cine alabikako sana amano ku babomfi bakwe aba citetekelo abalelwala, kabili alapaala ababasakamana. Kemba wa malumbo Davidi aimbile ukuti: “Yehova akamwafwa [uyo muntu] ilyo ali pa busanshi bwa kulwala kwakwe; mukamusakamana mu kulwala kwakwe konse.” (Amalu. 41:3) Ukwabula no kutwishika, uuletensha nga ca kuti inshita imbi e waisalwala nangu ukuba no bwafya, Yehova kuti aisamwafwa.

Ifyo cawama ukwishiba ukuti Yehova Lesa alamona kabili alatasha pa fyo tutensha abantu besu abalwele! Nangu ca kutila limo pa kutensha umulwele tulingile ukubombesha, Amalembo yatulaya ukuti “amalambo ya musango yu e yasekesha Lesa.”—Heb. 13:16.

[Futunoti]

[Ifikope pe bula 18]

Mwibwelela inuma muli bukapepa ilyo muletensha kabili lekeni abalefwaya ukumwafwa bamwafweko