Twalilileni Ukulundulula Amano Yenu

ALA cilawama ukumona uko uwaishibisha icangalo aleangala bwino! Baibolo ikoselesha Abena Kristu ukuti bafwile ukukansha ukulingulula kwabo nga filya uwangala ifyangalo aikansha.

Muli kalata umutumwa Paulo alembele ku baHebere, atile: “Ifya kulya ifyakosa fya bakalamba, abo ukupitila mu kubelesha balikwata amano aya kulekanya icalungama ne calubana.” (Heb. 5:14) Mulandu nshi Paulo akoseleseshe Abena Kristu abaHebere ukuti bafwile ukukansha ukulingulula kwabo nga filya uwangala ifyangalo akansha umubili wakwe? Kuti twakansha shani ukulingulula kwesu?

“Mufwile Ukuba Bakasambilisha”

Ilyo Paulo alelanda pa cifulo ca kwa Yesu ukuti ni “shimapepo mukalamba nga filya Melkisedeke ali,” atile: “Tuli ne fintu ifingi ifya kusosa pali ena [Yesu] kabili ifya-afya ukulondolola, pantu tamumfwa bwangu. Pantu kwena, nangu ca kutila mufwile ukuba bakasambilisha pa mulandu wa nshita iyapitapo, mucili mulekabila umo uwa kumusambilisha ukufuma ku kutendeka ifya kubalilapo ukwishiba mu mashiwi ya mushilo aya kwa Lesa; kabili mukabila umukaka, te fya kulya ifyakosa iyo.”—Heb. 5:10-12.

Ukwabula no kutwishika, abaYuda bamo abali Abena Kristu balifililwe ukwishibilapo na fimbi kabili balifililwe ukulunduluka mu kupepa Lesa. Ku ca kumwenako, calibafishe ukusumina ukwaluka kupya ukwakumine Ifunde lya kwa Mose no kusembululwa. (Imil. 15:1, 2, 27-29; Gal. 2:11-14; 6:12, 13) Bamo calibakosele ukuleka ukucitako fimo ifyakumine Isabata lya cila mulungu e lyo no Bushiku bwa Cifuta Mulandu ubwalebako cila mwaka. (Kol. 2:16, 17; Heb. 9:1-14) E mulandu wine Paulo abakoseleshe ukuti bakanshe amano yabo aya kulingulula pa kuti balelekanya icalungama ne calubana kabili abebele ukuti ‘babombeshe ukulola ku bukalamba.’ (Heb. 6:1, 2) Ukufunda kwakwe kufwile kwalengele bamo batontonkanya pa fyo balebomfya amaka yabo aya kulingulula kabili bafwile balitendeke no kulunduluka mu fya kwa Lesa. Inga ifwe?

Mulelundulula Amano Yenu

Kuti twakansha shani amaka yesu aya kulingulula pa kuti tube Abena Kristu bakosoka? Paulo atile, “ukupitila mu kubelesha.” Nga filya fine uwangala ifyangalo atukusha umubili pa kuikansha ukuti akangale bwino, na ifwe bene tufwile ukukansha amaka yesu aya kulingulula pa kuti tulelekanya icalungama ne calubana.

John Ratey, uwasambilila sana amalwele yakuma amatontonkanyo uwaba pe sukulu basambilisha ifya budokota, atile: “Icintu icisuma sana ico mwingacita kuli bongobongo yenu, kuikansha.” Gene Cohen, uulolekesha pa fya bukote no bumi uwa pa yuniversiti imo ku America atile, “nga tuletontonkanya pali fimo ifyakosa, insandesande shipya muli bongobongo ishilenga umuntu ukusambilila no kulaibukisha ifintu shilapangwa.”

Kanshi tulingile ukulakansha amaka ya kulingulula no kulasambilila na fimbi ifyaba mu Cebo ca kwa Lesa. Nga tulecita ifyo, ninshi tukaba abafikapo ukucita ico “Lesa afwaya icapwililika.”—Rom. 12:1, 2.

 Muletemwa “Ifya Kulya Ifyakosa”

Nga tulefwaya ‘ukubombesha ukulola ku bukalamba,’ tufwile ukuipusha fwe bene ukuti: ‘Bushe ndeya ndeumfwikisha icine ca mu Baibolo? Bushe bambi bamona ukuti nalikosoka mu fya kwa Lesa?’ Nyina alatemwa ukonsha no kupeela umwana wakwe ifya kulya fyamulinga ilyo acili akanya. Elenganyeni ifyo engasakamana nga ca kutila imyaka yapitapo ukwabula ukuti umwana wakwe alelya ifya kulya fyakosa. Na ifwe bene tulatemwa ukumona uko uo tusambilisha Baibolo alunduluka ica kuti aipeela no kubatishiwa abatishiwa. Nomba kuti twaumfwa shani nga ca kuti aleka ukulunduluka? Bushe ico te kuti citufuupule? (1 Kor. 3:1-4) Kafundisha enekela ukuti umusambi umupya nga papitako inshita na o akaba kafundisha.

Pa kuti tuleba na mano ya kupelulula pa milandu imo tufwile ukutontonkanya pa fintu, na pa kucita ifyo kano tuleibikilishako. (Amalu. 1:1-3) Tatufwile ukuleka ifintu pamo nga ukutamba TV nelyo ifyangalo twatemwa ifishikabila ukutontonkanyapo sana, ukutulenga ukufilwa ukutontonkanya pa fintu ifyacindama. Pa kuti tukwate amano ya kulingulula, tufwile ukutemwa ukubelenga kabili tulingile ukulabelenga Baibolo ne mpapulo sha “musha wa cishinka kabili uwashilimuka.” (Mat. 24:45-47) Ukulunda pa kubelenga Baibolo cila bushiku, calicindama no kulubulako inshita ya Mapepo ya Lupwa e lyo no kulasokota ifyebo pa malyashi ya mu Baibolo.

Jerónimo, kangalila uwenda uwa mu Mexico, alandile ukuti alabelenga Ulupungu lwa kwa Kalinda lonse lilya line lwafuma fye. Kabili alalubulako ne nshita ya kusambilila capamo no mukashi wakwe. Jerónimo atila, “Ine no mukashi wandi tulabelenga Baibolo cila bushiku, kabili tulabomfya impapulo sha kutwafwa ukusokota pamo nga broshuwa ya ‘Moneni Icalo Cipya.’” Umwina Kristu uwe shina lya Ronald alandile ukuti lyonse alabelenga ifipandwa fya mu Baibolo ifya kulanshanyapo cila mulungu ku kulongana. Kabili alakwata ne sambililo lya Baibolo ilya kuisambilisha umuku umo nelyo ibili cila mulungu e lyo alapoosapo inshita iikalamba. Ronald alanda ukuti, “Ukuisambilisha nge fi kulalenga ndefuluka ukuti inshita na imbi iya kusambilila ifike.”

Inga ifwe, bushe tulapoosa inshita iikalamba ukuisambilisha Baibolo fwe bene e lyo no kutontonkanya pa Cebo ca kwa Lesa? Bushe tulakansha amaka yesu aya kulingulula e lyo no kwishiba bwino ifya kucita ifintu ukulingana ne fyo Amalembo yalanda? (Amapi. 2:1-7) Lekeni ifwe bonse umo na umo tupampamine pa kuba Abena Kristu bakosoka, abakwata amano no kwishiba, pantu ifi e fyafwa abantu ukulekanya icalungama ne calubana!

[Icikope pe bula 23]

Tulakansha amaka ya kulingulula “ukupitila mu kubelesha”