Ukucita Ifya kwa Lesa E Kutuletela Insansa no Kutuusha

“Sendeni ikoli lyandi . . . , e lyo mwalasanga ukutuusha.”—MAT. 11:29.

1. Pa Mafunde Lesa apeele abena Israele pa Lupili lwa Sinai pali ifunde nshi, kabili mulandu nshi abapeelele?

PA MAFUNDE ayo Lesa apeele abena Israele pa Lupili lwa Sinai, pali ne funde lyalelanda pa kusunga Isabata cila mulungu. Ukupitila muli Mose uo alelandilamo, Yehova aebele uluko lwa bena Israele ukuti: “Ulebomba umulimo obe inshiku 6; lelo mu bushiku bwalenga 7 wilabombamo, pa kutila ing’ombe yobe ne mpunda yobe fituushe e lyo no mwana mwaume wa musha mwanakashi obe no mulebeshi batuushe.” (Ukufu. 23:12) Pa mulandu wa cikuuku cakwe, Yehova ateyenye ukuti abo apeele Amafunde ya kwa Mose balekwata ubushiku bumo ubwa kuti “baletuusha.”

2. Bushe abena Israele bamwenenemo shani mu kusunga Isabata?

² Bushe ubushiku bwe Sabata bwali bushiku bwa kutuusha fye? Iyo, bwali bushiku ubwacindeme sana ubwa kupepa Yehova. Ukusunga Isabata kwalengele imitwe ya ndupwa ukusambilisha indupwa shabo ‘ukulakonka imibele ya kwa Yehova ku kucita ubulungami.’ (Ukute. 18:19) Kwalelenga no kuti indupwa ne fibusa fyabo baleba pamo no kulatontonkanya pa milimo ya kwa Yehova e lyo no kulasekelela capamo. (Esa. 58:13, 14) Ne cacilapo ukucindama Isabata lyalelangilila ifyo cikesaba ku ntanshi ilyo kukaba ukutuusha kwine kwine mu Kuteka kwa kwa Kristu ukwa Myaka 1,000. (Rom. 8:21) Inga pali lelo? Ni kwi Abena Kristu abakonka imibele ya kwa Yehova bengasanga ukutuusha kabili finshi fingalenga bakwata uko kutuusha?

Ukuba na Bena Kristu Banensu Kulatusansamusha

3. Bushe Abena Kristu ba kubalilapo baletungililana shani, kabili finshi fyalefumamo?

³ Umutumwa Paulo alondolwele icilonganino ca Bwina Kristu ukuti “luceshi apashintilila icine.” (1 Tim. 3:15) Abena Kristu balekoseleshanya no kukuulana mu kutemwa pa kuti baletungililana. (Efes. 4:11, 12, 16) Ilyo Paulo ali mu Efese, aba mu cilonganino cali mu Korinti balimutandalile no kumukoselesha. Moneni ifyo aumfwile. Atile: “Ndi ne nsansa pa kumona ukuti Stefana, Fortunati na Akaiki nabesa, . . . nabasansamusha nga nshi umutima wandi.” (1 Kor. 16:17, 18) Na lintu Tito aile ku Korinti ku kubombela aba bwananyina, Paulo alembeele icilonganino ati: “Imwe bonse mwalimutalalika umutima.” (2 Kor. 7:13) Na muno nshiku, Inte sha kwa Yehova balasanga insansa sha cine cine ilyo balebishanya na Bena Kristu banabo.

4. Bushe ukulongana kutusansamusha shani?

⁴ Mwalimona na mwe bene ukuti ukulongana kulatuletela insansa sana. Ilyo tuli pa kulongana tulakoseleshanya “umo na umo ku citetekelo ca mubiye.” (Rom. 1:12) Bamunyinefwe ne nkashi, te fibusa ifyo tukumana fye na fyo no kupatukana twapatukana, capwila na po pene. Fibusa fya cine cine, bantu abo twatemwa no kucindika. Tulasekelela no kusansamuka sana lyonse ilyo tulongana nabo.—File. 7.

5. Kuti twasansamushanya shani pa kulongana kukalamba?

⁵ Ukulongana kukalamba uko tukwata cila mwaka, nako kulalenga tulesansamuka. Pali  uku kulongana kukalamba, tulasambilishiwa icine icaba mu Cebo ca kwa kwa Lesa, Baibolo. E lyo kabili tulakwata ne shuko lya ‘kukusha ukutemwa kwesu.’ (2 Kor. 6:12, 13) Kuti twacita shani nga tuli ba nsoni kabili cilatwafya ukulanshanya na bantu? Cimo icingatwafwa ukwishibana na bamunyinefwe ne nkashi kulabombako imilimo pa kulongana kukalamba. Pa numa ya kubombako imilimo pa kulongana kwa fyalo ifingi, nkashi umo atile: “Ku kulongana naishibeko fye ulupwa lwandi e lyo ne fibusa abanono fye. Lelo ilyo nabombeleko umulimo wa kuwamya, nalishibe bamunyina na bankashi abengi! Nalyumfwile bwino sana!”

6. Cinshi cimbi twingacita ilyo tuli pa kutuusha icingalenga twasekelela?

⁶ Abena Israele baleya ku Yerusalemu ku kupepa pa mitebeto itatu iyalebako cila mwaka. (Ukufu. 34:23) Ilingi line pa kuya balesha amabala na makwebo no kwenda inshiku ishingi pa makasa mu misebo iya lukungu. Na lyo line, ukuya kwi tempele kwalelenga kuleba “ukusekelela kukalamba” pantu abalesangwako “balelumbanya Yehova.” (2 Imila. 30:21) Ababomfi ba kwa Yehova abengi nabo basanga ukuti ukuya ku Bethel no lupwa lwabo, nelyo ukutandalila ifikuulwa fimbi ifya Nte sha kwa Yehova, kulalenga balesekelela sana. Bushe te kuti ciwame mwatandalilako ifi fifulo ilyo ulupwa lwenu lukalatuusha?

7. (a) Bushe ukwangalila capamo na Bena Kristu banensu kuti kwatwafwa shani? (b) Cinshi cingalenga ukwangalila capamo na Bena Kristu banensu ukuwama no kutukoselesha?

⁷ Ukwangalila pamo no lupwa lwesu e lyo ne fibusa, kuti kwalenga twakoseleshiwa. Imfumu ya mano Solomone yatile: “Ku muntu takwaba icisuma icacila pa kulya no kunwa no kusekelamo mu kubombesha kwakwe.” (Luk. Mil. 2:24) Ukwangala na Bena Kristu banensu takulenga fye tulesekelela, lelo kulalenga twatemwana nabo sana pantu tulabeshiba bwino. Kanshi pa kuti ukwangala kuwame kabili tukoseleshiwe, cilawama ukukanafula sana no kubikako  amano ku kukumona ifilecitika maka maka nga kuliko no bwalwa.

Ukushimikila Kulatusansamusha

8, 9. (a) Londololeni ifyo ubukombe bwa kwa Yesu bwapusene no bwa bakalemba na baFarise. (b) Busuma nshi tusanga mu kwebako bambi icine ca mu Baibolo?

⁸ Yesu ali uwacincila mu kushimikila, kabili akoseleshe na basambi bakwe ukucincila. Icilanga ifi, mashiwi alandile ayatila: “Umulimo wa kulobolola ukalamba, lelo ababomfi bena nabacepa. E ico, lombeni Umwine wa mulimo wa kulobolola ukuti atume ababomfi mu mulimo wakwe uwa kulobolola.” (Mat. 9:37, 38) Ubukombe Yesu alesambilisha bwalelenga abantu ukusansamuka; bwali ni “mbila nsuma.” (Mat. 4:23; 24:14) Bwalipusene na mafunde yaletitikisha abantu ayo abaFarise bapangile.—Belengeni Mateo 23:4, 23, 24.

⁹ Nga tuleshimikila abantu ubukombe bwa Bufumu, tubeba ifilenga basansamuka, kabili pa nshita imo ine ici cilenga twaumfwikisha sana icine ca mu Baibolo icacindama no kutasha Lesa ukufuma pa nshi ya mutima. Kemba wa malumbo atile: “Lumbanyeni Jah, pantu cisuma ukulumbanishisha Lesa wesu pa filimba, pantu ukumwimbila kwaliwama.” (Amalu. 147:1) Bushe te kuti ciwame mwalalumbanya sana Yehova ku bantu pa kutila insansa shenu shafulilako?

10. Bushe icilanga ukuti tulebomba bwino umulimo wa kushimikila ni fintu abantu bankula ku bukombe? Londololeni.

¹⁰ Ca cine ukuti mu fifulo fimo abantu balakutika sana ku mbila nsuma ukucila mu fifulo fimbi. (Belengeni Imilimo 18:1, 5-8.) Nga mwikala mu cifulo umo abantu bashatemwa sana ubukombe bwa Bufumu, muletontonkanya pa fisuma ifyo mucita mu mulimo wenu uwa kushimikila. Ibukisheni ukuti ukubombesha kwenu mu mulimo wa kubila ishina lya kwa Yehova te kwa fye. (1 Kor. 15:58) Ifyo abantu tushimikila bankula ku mbila nsuma, te cilanga ukuti tulebomba bwino. Tufwile ukucetekela fye ukuti Yehova akalenga abafwaya ukumfwa ubukombe bwa Bufumu bakomfwe.—Yoh. 6:44.

Amapepo ya Lupwa Yalatuletela Insansa

11. Mulimo nshi Yehova apeela abafyashi, kabili finshi fingabafwa ukubomba uyu mulimo?

¹¹ Abafyashi bakapepa balikwata umulimo wa kufunda abana pali Yehova ne mibele yakwe. (Amala. 11:18, 19) Nga mwalikwata abana, bushe mulatantika inshita ya kubafunda pali Shifwe wa ku muulu uwakwata ukutemwa? Pa kumwafwa ukubomba uyu mulimo wacindama no kwafwa ulupwa lwenu, Yehova alimupeela ifya kubomfya ifingi pamo nga ifitabo, bamagazini, amavidio na matepu umwaba ifya kulya fya ku mupashi ifisuma.

12, 13. (a) Bushe indupwa shimwenamo shani mu Mapepo ya Lupwa? (b) Bushe abafyashi bafwile ukucita shani pa kuti amapepo ya lupwa yaleletela ulupwa insansa?

¹² E lyo kabili umusha wa cishinka kabili uwashilimuka alipekanya ukuti tulekwata ubushiku bwa Mapepo ya Lupwa. Ubu, bushiku bwatantikwa ubwa kukwata isambililo lya Baibolo ilya lupwa cila mulungu. Abengi basanga ukuti Amapepo ya Lupwa yalilenga baikatana no kutemwana sana kabili yalilenga na bucibusa bwabo na Yehova ukukoselako. Lelo bushe abafyashi kuti bacita shani pa kuti amapepo yabo aya lupwa yalebaletela insansa?

¹³ Amapepo ya Lupwa tayafwile ukumfwisha ubunang’ani. Pantu na kuba tupepa “Lesa wa nsansa,” kabili afwaya tulesekelela ilyo tulemubombela. (1 Tim. 1:11; Fil. 4:4) Ukukwata ubushiku na bumbi ubwa kulanshanya ifya mu Baibolo lishuko icine cine. Abafyashi bafwile ukulabomfya inshila shapusanapusana isha kufundilamo abana, no kufwayako ifintu fimo ifyo bengacita pa kuti abana bomfwikishe. Ku ca kumwenako, ulupwa lumo lwaebele Brandon, umwana wabo uwa myaka 10, ukwisalanda pa mutwe waleti: “Cinshi Yehova Abomfesha Insoka ku Kwimininako Satana?” Ne  calengele ni co Brandon alitemwa sana insoka kabili aleumfwa sana ububi ukuti insoka yalibomfiwa ku kwimininako Satana. Indupwa shimo limo shilacita ifilangililo ifyashimpwa pa malyashi ya mu Baibolo. Cila muntu mu lupwa balamupeela amashiwi ya muntu uulumbwilwe mu Baibolo aya kubelenga e lyo limo ulupwa lulacita icilangililo ukulingana ne lyashi balebelenga. Ishi nshila sha kusambilishishamo ulupwa, shilenga abana ukuipakisha no kukanaikalapo fye pe sambililo pa kuti ifishinte fya mu Baibolo filebafika pa mutima. *

Talukeni Ifintu Ifingalenga Mwafinininwa

14, 15. (a) Finshi filengele amafya no mwenso ukufula muli shino nshiku sha kulekelesha? (b) Mafya nshi na yambi ayo fwe Bena Kristu twingakwata?

¹⁴ Amafya no mwenso nafifulilako muli shino nshiku sha kulekelesha isha calo cabipa. Abantu abengi tababomba kabili balakwata na mafya yambi aya ndalama. Na babomba bene ciba kwati indalama bafola, bashisendela mu matumba yatulika, icilenga balefilwa ukupeela ulupwa lwabo ifikabilwa. (Linganyeniko Hagai 1:4-6.) Bapolitishani ne ntungulushi shimbi balifilwa ukufumyapo ukusansa kwa tupondo e lyo no bubifi bumbi. Abantu abengi balomfwa sana ububi pa filubo ifyo bacita.—Amalu. 38:4.

¹⁵ Abena Kristu ba cine nabo balakwata amafya na masakamika ayaba mu calo ca kwa Satana. (1 Yoh. 5:19) Limo abasambi ba kwa Kristu balakwata amafya na yambi ilyo bale-esha ukuba aba cishinka kuli Yehova. Yesu atile: “Nga bacushishe ine, na imwe bakamucusha.” (Yoh. 15:20) Lelo na lintu ‘baletucusha, tatulekeleshiwa.’ (2 Kor. 4:9) Mulandu nshi?

16. Cinshi cingatwafwa ukutwalilila ukuba ne nsansa?

¹⁶ Yesu atile: “Iseni kuli ine imwe bonse mwe balecula kabili abafininwa, na ine nalamusansamusha.” (Mat. 11:28) Nga twatetekela sana icilubula ca kwa Kristu ciba kwati twaibika mu maboko ya kwa Yehova. Nga twacite fi, tukalakwata “amaka yacila aya bantunse.” (2 Kor. 4:7) “Kaafwa,” umupashi wa mushilo uwa kwa Lesa, ulakosha icitetekelo cesu pa kuti tuleshipikisha ifya kwesha na mafya tukwata e lyo no kutwalilila ukuba ne nsansa.—Yoh. 14:26; Yako. 1:2-4.

17, 18. (a) Mupashi nshi tufwile ukuibakako? (b) Cinshi cingacitika nga twabika sana amano ku fintu ifishacindama?

¹⁷ Abena Kristu ba cine pali lelo balingile ukuibaka pa kuti tabasendelwe no mupashi wa ici calo uulenga abantu ukutemwisha ukwangala. (Belengeni Abena Efese 2:2-5.) Nga tatuibakile kuti twaba no “lunkumbwa lwa mubili no lunkumbwa lwa menso, no kuitakishisha pa fyo [twakwata].” (1 Yoh. 2:16) Nelyo kuti twalamona kwati ukukonkelela ulunkumbwa lwa mubili kuti kwalenga twaba ne nsansa. (Rom. 8:6) Ku ca kumwenako, abantu bamo bali-ipoosa mu kubomfya imiti ikola no kunwensha ubwalwa, ukutamba ifye shiku, ukwangala ifyangalo fibabika mu kapoosa mweo, nelyo ukucita ifintu fyalekanalekana ifyabipa pa kuti fye baisansamushe. Satana abomfya “imicenjelo” yakwe ku kulufya abantu pa kuti balemona kwati ukucita ifyabipa e kwingabaletela insansa.—Efes. 6:11.

¹⁸ Ca cine ukuti ukulya, ukunwa, ne fya kuleseshamo  icitendwe ifisuma, tafyabipa nga tafilecila mu cipimo. Na lyo line te fyo tufwile ukubikako sana amano mu bumi bwesu. Tulingile ukwakanya bwino inshita no kuilama maka maka pa mulandu wa nshita tuleikalamo. Ifyo tufwaya mu bumi kuti fyalenga twafinininwa ica kuti twaba “abanang’ani nelyo abashitwala ifisabo mu kwishiba bwino bwino Shikulwifwe Yesu Kristu.”—2 Pet. 1:8.

19, 20. Cinshi tulingile ukucita pa kukwata insansa sha cine?

¹⁹ Nga tulemona ifintu nge fyo Yehova afimona, tuleshiba ukuti ifya muli cino calo nangu fingatusansamusha, fya pa nshita fye iinono. Mose alishibe ici, na ifwe bene twalishiba. (Heb. 11:25) Icishinka ca kutila, ukucita ukufwaya kwa kwa Shifwe wa ku muulu e kutuletela insansa sha cine.—Mat. 5:6.

²⁰ Natutwalilile ukucita ifya kwa Lesa pantu e fituletela insansa sha cine. Nga tulecita ifyo “[tukakaana] imikalile iishili ya bwina Lesa no lunkumbwa lwa pano calo . . . ilyo tulelolela isubilo ilishaiwamina no kumoneka kwa bukata ukwa kwa Lesa mukulu no kwa Mupusushi wesu, Kristu Yesu.” (Tito 2:12, 13) Kanshi natupampamine pa kutwalilila ukusenda ikoli lya kwa Yesu ukupitila mu kukonka ubutungulushi bwakwe. Nga tulecita ifyo, tukakwata insansa sha cine kabili tukasanga ukutuusha!

[Futunoti]

Kuti Mwayasuka Shani?

• Finshi filetela abantu ba kwa Yehova insansa pali lelo?

• Bushe umulimo wa kushimikila uletela shani fwe na bo tushimikilako insansa?

• Finshi imitwe ya ndupwa ingacita pa kuti amapepo ya lupwa yaleletela ulupwa insansa?

• Finshi filenga tulefinininwa?

[Ifipusho]

[Ifikope pe bula 26]

Nga twasenda ikoli lya kwa Yesu, fingi fingatuletela insansa