Mulebombako Sana Umulimo wa kwa Lesa Uwa Kuseepa Uushaikulila

‘Beni abacincila pe mu mulimo wa kwa Shikulu.’—1 KOR. 15:58.

1. Finshi Yesu acincishe abasambi bakwe ukucita?

ILYO balepita mu Samaria ku kupwa kwa mwaka wa 30 C.E., Yesu aliminine ukuti atuusheko pa cishima cali mupepi ne tauni lya Sukari. Palya, aebele abasambi bakwe ati: “Inuneni amenso no kumona amabala, ukuti nayabuuta, ni nshita ya kuseepa.” (Yoh. 4:35) Ico Yesu alelandapo, te kuseepa kwa cine cine, lelo alelanda pa kulonganika abantu abafumacumi abali no kuba abasambi bakwe. Na kuba, ilyo alandile aya mashiwi, alebacincisha ukulabombako uyu mulimo wa kuseepa. Uyu mulimo wali uukalamba, lelo inshita ya ku-ubomba yalicepele!

2, 3. (a) Cinshi cilanga ukuti twikala mu nshita ya kuseepa? (b) Cinshi cino cipande calalandapo?

² Ifyo Yesu alandile pa lwa kuseepa fyalitukuma sana na pali nomba. Pali ino nshita, ibala umwa kuseepa abantunse, ‘lyalibuuta, ni nshita ya kuseepa.’ Cila mwaka abantu abengi nga nshi baletwa ku kwisaumfwa icine icipeela umweo, na basambi bapya abengi balabatishiwa. Lishuko sana kuli ifwe ukubombako uyu mulimo wa kuseepa uushaikulila uo Yehova Lesa Umwine wa mulimo wa kulobolola atungulula. Bushe ‘mwalicincila’ muli uyu mulimo?—1 Kor. 15:58.

³ Mu myaka itatu na hafu iyo Yesu abombele ubutumikishi pano calo, alikanshishe abasambi bakwe ifya kubomba uyu mulimo. Pa masambililo yacindama ayengi ayo Yesu asambilishe abasambi bakwe, twalalandako pali yatatu muli cino cipande. Isambililo limo na limo lilelanda pa mibele iingatwafwa sana ilyo tule-esha ukubombesha muli uyu mulimo wa kulonganya abasambi muno nshiku. Natulande pali iyi mibele.

Ukuicefya Kulafwaikwa

4. Cilangililo nshi Yesu abomfeshe pa kulanga ifyo ukuicefya kwacindama?

⁴ Elenganyeni ici: Abasambi bafuma fye mu kutalikana pa ufwile ukuba umukalamba pali bena. Ne finso fifwile filemoneka ukuti baletwishikana kabili nabakalifyanya. E ico Yesu aita umwana umunono no kumwiminika pa kati kabo. E lyo alanda pa mwana umunono ati: “Onse uuleicefya ngo yu mwana umunono, e ukaba umukalamba mu bufumu bwa mu muulu.” (Belengeni Mateo 18:1-4.) Ukucila ukulatontonkanya nga bantu ba mu calo abamona ukuti umuntu uwacindama ni ulya uwakwata amaka ya kutungulula, ifyuma, ne cifulo ca pa muulu, abasambi balingile ukwishiba ukuti icingalenga baba abakalamba, kuicefya. Ukuicefya kwa cine e kwingalenga Yehova ukubapaala no kulababomfya.

5, 6. Pa kubombako sana umulimo wa kuseepa, mulandu nshi tufwile ukubela abaicefya? Shimikeni icilangililo.

⁵ Na muno nshiku mwine, abantu abengi babika sana amano ku kuba na maka ya kutungulula, ku kwata ifyuma ne fifulo fya pa muulu. Ici calenga belakwata inshita nelyo balekwata fye inshita inono iya kucita ifya kwa Lesa. (Mat. 13:22) Lelo abantu ba kwa Yehova balomfwa bwino ‘ukuicefya’ pa kuti Yehova Umwine wa mulimo wa kulobolola alebapaala no kubatemwa.—Mat. 6:24; 2 Kor. 11:7; Fil. 3:8.

⁶ Moneni ifyo ba Francisco, baeluda aba ku South America bacitile. Ilyo bali abalumendo, balekele ukusambilila pa yuniversiti no kuba bapainiya. Batile: “Ilyo nakobekele, mfwaya nga  nalisangile incito iyali no kulenga ine no mukashi wandi ukukwata indalama ishingi. Lelo twasalilepo ukwangusha imikalile pa kuti tutwalilile ukubomba umulimo wa nshita yonse. Ilyo twaishilekwata abana, amafya yalifulileko. Lelo Yehova alitwafwile ukutwalilila ukwangusha imikalile.” Ba Francisco basondwelele ati: “Ukucila pa myaka 30, nalikwata ishuko lya kubomba bueluda e lyo ne milimo imbi iyaibela. Tatwabala atumfwapo ububi pa kwangusha imikalile yesu.”

7. Bushe finshi mwacita pa kuti mukonke ukufunda kwaba pa Abena Roma 12:16?

⁷ Nga tamuleba no “mutima wa cilumba” muli cino calo lelo “muleiceefya,” na imwe kuti mwaisakwata amapaalo ayengi ne milimo yaibela mu mulimo wa kuseepa.—Rom. 12:16; Mat. 4:19, 20; Luka 18:28-30.

Ukubomba na Maka Yesu Yonse Kulaleta Ifilambu

8, 9. (a) Supawileni icilangililo ca matalanti ico Yesu alandile. (b) Ni bani maka maka ici cilangililo cingakoselesha?

⁸ Na cimbi icikabilwa pa kuti tulebomba sana umulimo wa kuseepa, kubomba na maka yesu yonse. Yesu alangilile ici ilyo ashimike umulumbe wa matalanti. * Ici cilangililo cilanda pa muntu uwaile ku calo ca kutali, lelo ilyo ashilaya aseekeshe icuma cakwe ku basha batatu. Apeele umusha wa ntanshi amatalanti 5, uwa cibili, yabili, no wa citatu amupeele limo. Ilyo shikulwibo aile, umusha wa kubalilapo no wa cibili, balibombele na maka yabo yonse pantu ilyo line fye ‘balicitile amakwebo’ mu matalanti bapeelwe. Lelo umusha wa citatu ena, ali ‘munang’ani.’ Ashiikile italanti lyakwe pa nshi. Ilyo ulya muntu abwelele, alilambwile umusha wa ntanshi no wa cibili no kubasonta ukuba ‘bakangalila pa fingi.’ Apokele italanti ilyo apeele umusha wa citatu no kumutamfya.—Mat. 25:14-30.

⁹ Ukwabula no kutwishika, mulafwaya ukupashanya balya basha ba mu cilangililo ca kwa Yesu no kubomba na maka yenu yonse umulimo wa kupanga abasambi. Nomba ni shani nga ca kuti ifintu fimo filelenga mwilabomba sana? Napamo mulabomba inshita iikalamba sana ku ncito pa kuti fye mulesanga indalama sha kusungilamo ulupwa. Nelyo mulalwalilila na maka yenu yaleya yalepwa pa mulandu wa kuti namukula sana. Nga e fyo cili, mu mulumbe wa matalanti muli fimo ifyalamukoselesha.

10. Bushe umwine wa matalanti mu cilangililo alangile shani ukuti tale-enekela abasha ukukwata amaka yamo yene, kabili ici kuti camukoselesha shani?

¹⁰ Moneni ukuti muli uyu mulumbe shikulwibo alishibe ukuti  abasha tabalingene amaka. Alangile ici ilyo apeele abasha amatalanti “umo umo ukulingana na maka yakwe.” (Mat. 25:15) Nga fintu twingenekela, umusha wa ntanshi alisangiilepo amatalanti ayengi sana ukucila uwa bubili. Lelo shikulu wabo alishibe ukuti aba basha babili balibombele na maka yabo yonse pantu aebele cila musha ati “we musha musuma kabili uwa cishinka” kabili abapeele icilambu cimo cine. (Mat. 25:21, 23) Na Yehova Lesa Umwine wa mulimo wa kulobolola alishiba ukuti ifyo mulepitamo kuti fyakuma ifyo mwingacita mu mulimo wakwe. Nga mulebomba no mweo wenu onse, akeshiba kabili akamulambula.—Marko 14:3-9; belengeni Luka 21:1-4.

11. Shimikeni icilangililo icilelanga ifyo ukubombesha na lintu tuli na mafya kwingatuletela amapaalo ayengi.

¹¹ Kuli ba Selmira, bankashi abekala ku Brazil kuti twasambililako ukutila, kuti twabombesha mu mulimo wa kwa Lesa na lintu ifintu fishili bwino. Imyaka 20 iyapita, abalume baba Selmira balibepeye ku mfuti ku bapuupu kabili ba Selmira bashele na bana batatu aba kusunga. Baingile incito ya kuwamya mu ng’anda iyalebasendela ama-awala ayengi kabili balenaka ico balenina bamotoka abaleisula sana. Te mulandu na ya mafya, ba Selmira balyakenye bwino inshita pa kuti batendeke ukubomba bupainiya bwa nshita yonse. Babili pa bana babo nabo balitendeke ukubomba bupainiya. Batila: “Pa myaka iyapita, nalitungulula amasambililo ya Baibolo ku bantu ukucila pali 20 kabili aba balisanguka ‘balupwa’ lwandi. Ukufika na lelo twalitemwana kabili fibusa fyandi. Ifyo nanonka te fintu ningashita ne ndalama.” Ukwabula no kutwishika, Umwine wa mulimo alilambula ba Selmira pa kubombesha kwabo!

12. Cinshi cikalanga ukuti tulabombesha mu mulimo wa kushimikila?

¹² Nga ca kutila ifintu fimo pali ino nshita filelenga mwilabomba inshita iikalamba mu butumikishi, kuti mwaesha ukubombesha muli uyu mulimo wa kuseepa nga ca kuti mulelundulula imibombele yenu. Nga ca kutila mulekonka sana ifyo tusambilila mu Kulongana kwa Mulimo, mukalashimikila bwino sana kabili mukalabomfya ne nshila shimbi isha kushimikilamo. (2 Tim. 2:15) E lyo nga cingacitika, kuti mwaleka ukucita ifintu fimo ifishacindama sana pa kutila mulebombako lyonse umulimo wa kushimikila pamo ne cilonganino.—Kol. 4:5.

13. Cinshi cikabilwa sana pa kuti lyonse tulebomba na maka yesu yonse?

¹³ Mwilaba ukutila icilenga abantu ukubomba na maka yabo yonse, kutemwa no kufwaya ukutasha Lesa. (Amalu. 40:8) Umusha wa butatu uwalumbulwa mu mulumbe wa kwa Yesu aletiina shikulu wakwe. Alemumona kwati alyafya kabili talangulukila. Ne ci calengele umusha ukushiika italanti lyakwe mu nshita ya kulibomfya pa kuti ifyuma fya kwa shikulu wakwe fifulileko. Tufwile ukutemwa Yehova Umwine wa mulimo wa kulobolola pa kuti twiba ngo yu musha. Tantikeni inshita ya kusambilila no kwetetula pa mibele ya kwa Lesa iisuma pamo nga ukutemwa, ukutekanya, no luse. Nga mulecite fyo mukalafwaya ukubombesha mu mulimo wakwe kabili mukalabomba no mutima onse.—Luka 6:45; Fil. 1:9-11.

“Muleba Aba Mushilo”

14. Cinshi cifwaikwa sana ku kuli bonse abafwaya ukubomba umulimo wa kuseepa?

¹⁴ Umutumwa Petro ayambwile amashiwi yaba mu Malembo ya ciHebere no kulanda pa bufwayo bwa kwa Lesa umwine ku babomfi bakwe aba pano isonde. Atile: “Filya Lesa uwamwitile aba Uwa Mushilo, e fyo na imwe mube aba mushilo mu myendele yenu yonse, pantu calembwa ati: ‘Muleba aba mushilo, pantu ine ndi wa mushilo.’” (1 Pet. 1:15, 16; Lebi.19:2; Amala. 18:13) Aya mashiwi yalanga ukuti ababomba umulimo wa kuseepa balingile ukuba abasanguluka mu mibele na muli bukapepa. Pa kukwata ubu busaka, tufwile ukulacita ifingalenga twasanguluka. Cinshi cingatwafwa? Cine icaba mu cebo ca kwa Lesa.

15. Icine icaba mu cebo ca kwa Lesa cakwata amaka ya kucita cinshi kuli ifwe?

¹⁵ Icine icaba mu cebo ca kwa Lesa caba nga  menshi ayasangulula ifintu. Ku ca kumwenako, umutumwa Paulo alembele ukuti icilonganino ca Bena Kristu Basubwa calisanguluka kuli Lesa nga nabwinga wa kwa Kristu, kabili Kristu acisangulwila “ku menshi ya mu musambilo, e kutila ku cebo ca kwa Lesa . . . , ukuti cibe ica mushilo kabili icabula akalema.” (Efes. 5:25-27) Ku numa Yesu na o alilandilepo pa maka ya kusangulula ayo icebo ca kwa Lesa ico alebila cakwata. Ilyo alelanda ku basambi bakwe, atile: “Imwe mwalisanguluka kale pa mulandu wa mashiwi ayo nalanda kuli imwe.” (Yoh. 15:3) Kanshi icine icaba mu cebo ca kwa Lesa calikwata amaka ya kusangulula abantu mu mibele na muli bukapepa. Nga twaleka ici icine catusangulula, e lyo Lesa akapokelela ukupepa kwesu.

16. Cinshi cingatwafwa ukuba abasanguluka mu muli bukapepa na mu mibele?

¹⁶ Kanshi pa kuti tusuminishiwe ukubombako umulimo wa kuseepa, intanshi tufwile ukuleka ukucita fyonse ifingakowesha imibele yesu na bukapepa. Nga fintu twamona, pa kutwalilila ukukwata ili shuko lya kubombako umulimo wa kuseepa, tufwile ukuba ne myendele isuma no kuba abasanguluka muli bukapepa nga fintu Yehova afwaya. (Belengeni 1 Petro 1:14-16.) Filya fine tubikako amano ku busaka bwa ku mubili, e fyo tufwile no kubika amano ku kusangululwa ne cine caba mu cebo ca kwa Lesa. Pa kuti tusangululwe, tufwile ukulabelenga Baibolo lyonse no kusangwa ku kulongana, e lyo no kwesha na maka ukulakonka ifyo Lesa atusambilisha. Ukucita ifyo kukatwafwa ukucimfya amatunko no kutaluka ku fintu fya muli cino calo ifingatukowesha. (Amalu. 119:9; Yako. 1:21-25) Tulasansamuka ukwishiba ukuti nangu imembu shesu shibipe shani, icine icaba mu cebo ca kwa Lesa kuti ‘catusamba’!—1 Kor. 6:9-11.

17. Pa kuti tube abasanguluka, kufunda nshi ukwa mu Baibolo tufwile ukulaumfwila?

¹⁷ Bushe mulaleka icine caba mu cebo ca kwa Lesa ukumusangulula? Bushe mucita shani nga bamusoka pa bubi bwaba mu fya kutambatamba ne fya kuleseshamo icitendwe ifyabipa? (Amalu. 101:3) Bushe mulataluka ku kubishanya kushalinga na bana be sukulu banenu nelyo abo mubomba nabo abashatetekela? (1 Kor. 15:33) Bushe mulesha no mutima onse ukucimfya ifingalenga mwabembuka, no kuba abakowela mu menso ya kwa Yehova? (Kol. 3:5) Bushe mulataluka ku fikansa fya calo e lyo na ku kucindikisha icalo cenu, ifimoneka sana mu fyangalo fya kucimfyanya ifingi?—Yako. 4:4.

18. Bushe ukuba abasanguluka mu menso ya kwa Lesa kukatwafwa shani ukubombesha mu mulimo wa kuseepa?

¹⁸ Nga tulekonka ifi twasambilila mukafuma ifisuma nga nshi. Yesu apashenye abasambi bakwe abasubwa ku misambo ya mukunyu no kusosa ati: “Umusambo onse uwaba muli ine uushitwala ifisabo, [Tata] alaufumyamo, na onse uutwala ifisabo alautungwila bwino bwino, pa kuti utwalishe.” (Yoh. 15:2) Nga mwaleka amenshi ya cine caba mu Baibolo ukumusangulula, mukatwalisha.

Amapaalo Pali Nomba na ku Ntanshi

19. Bushe abasambi ba kwa Yesu bapaalilwe shani ilyo balebomba umulimo wa kuseepa?

¹⁹ Abasambi ba cishinka abasambilile kuli Yesu, balipeelwe amaka ukupitila mu mupashi wa mushilo pa Pentekoste mu 33 C.E., aya kushimikila ukufika na “ku mpela ya pano isonde.” (Imil. 1:8) Bamo baishileba mwi bumba litungulula, bamo bali bamishonari, bambi bali  bakangalila benda, kabili aba bonse balibombele sana umulimo wa kubila imbila nsuma “ku cibumbwa conse ica mwi samba lya muulu.” (Kol. 1:23) Balipokelele amapaalo ayengi kabili nabo balilengele abengi ukulasekelela!

20. (a) Mapaalo nshi mwapokelela pa kubombako sana umulimo wa kuseepa? (b) Finshi mulefwaisha ukucita?

²⁰ Nga fintu twamona, ukuicefya, ukubomba na maka yesu yonse, no kukonka amafunde yaba mu Cebo ca kwa Lesa, kukalenga tukatwalilile ukubombesha no kubomba bwino umulimo ukalamba uwa kuseepa uulebombwa ino ine nshita. Ilyo abantu abengi balecula no kukalifiwa pa mulandu wa kukonkelela ifyuma no kwangala ifya muli cino calo, ifwe tukalakwata insansa sha cine. (Amalu. 126:6) Ne cacilapo ukucindama ca kuti, “ukucucutika [kwesu] mu mulimo wa kwa Shikulu te kwa fye.” (1 Kor. 15:58) Yehova Lesa, Umwine wa mulimo wa kulobolola, akatulambula umuyayaya pa ‘mulimo wesu no kutemwa uko tulanga kwi shina lyakwe.’—Heb. 6:10-12.

[Futunoti]

Bushe Muleibukisha?

• Ilyo mule-esha na maka ukubombesha mu mulimo wa kuseepa . . .

• mulandu nshi mulingile ukubela abaicefya?

• kuti mwacita shani pa kuti lyonse mulebomba na maka yenu yonse?

• mulandu nshi ukuba abasanguluka mu kupepa na mu myendele kwacindamina?

[Ifipusho]

[Icikope pe bula 17]

Ukuicefya kuti kwalenga twa-angusha imikalile pa kuti twakwata inshita iikalamba iya kucita ifya Bufumu