Ukuba Abalola Kwalengele Bashimikile ku Bengi

BUSHE mwaliba abalola pa kuti muleshimikila abantu lyonse ilyo ishuko lyamoneka mu cifulo mubombela? Bamunyinefwe mu musumba wa Turku, umwaba icabu, ku Finland bali abalola kabili ici calengele bashimikile ku bantu abengi.

Ku numa uku, bamunyinefwe mu Turku balimwene ukuti ibumba lya baume aba ku Asia balishile mu musumba ku kupwisha umulimo balebomba pa bwato ubukalamba ubo balepanga pa cifulo cimo muli uyu wine musumba. Pa numa, munyinefwe umo alisangile hotela umo aba babomfi bafumine ku fyalo fimbi baleikala. Aishibe no kuti lucelocelo, amabasi yalesenda ababomfi ukufuma mu mahotela baleikala ukuya ku cabu. Ilyo line fye aileishibisha bamunyinefwe aba mu cilonganino ca ciNgeleshi mu Turku.

Baeluda muli cilya cilonganino balimwene ukuti ishuko lya kushimikila ubukombe bwa Bufumu lyamoneka, pantu mu musumba mwali abaume abengi abafuma ku fyalo fimbi, kabili mu kwangufyanya batantike ukuti babashimikile. Pa Mulungu, bakasabankanya 10 balilongene mupepi ne citesheni ca basi pa 07:00 hrs ulucelo. Pa kubala, tabamwenepo umubomfi nangu umo. Bamunyinefwe batendeke ukuipusha abati: ‘Bushe natucelwa ukufika pa citesheni?’ ‘Bushe nabafumamo kale mu Turku?’ Awe bamwene fye umubomfi aleisa nafwala na ofoloshi. Kashita kashita na umbi alishile, awe bafula no kufula. Tapapitile na nshita ababomfi abengi balilongene pa citesheni. Bakasabankanya batendeke ukubashimikila no kubatambika impapulo sha mu ciNgeleshi. Icawemeko ca kuti, papitile mupepi ne awala limo pa kuti ababomfi bonse bekale mu mabasi, ne co calengele bamunyinefwe bakwate inshita iikalamba iya kushimikila ku bengi sana pali aba bantu. Ilyo amabasi yaimine, ababomfi baile no tutabo mupepi na 126 e lyo na bamagazini 329!

Ifisuma ifyafuminemo fyalengele bamunyinefwe ukucita cimo cine no mulungu wakonkelepo, ilyo kangalila wa muputule atandalile icilonganino cabo. Pali ubu bushiku, ninshi ne mfula ileloka, kangalila wa muputule atungulwile ukukumana kwa mulimo wa mwi bala ulucelo pa 06:30 hrs, kabili pa numa, bakasabankanya 24 baile ku citesheni ca basi. Pali iyi nshita balisendele ne mpapulo sha mu ciTagalog pantu casangilwe ukuti abengi pali balya babomfi, bafumine ku Phillipines. Lulya lucelo, ilyo amabasi yaimine ukuya ku cabu, ababomfi basendele amabuuku 7, ututabo 69, na magazini 479. Elenganyeni ifyo bamunyinefwe ne nkashi ababombeleko uyu mulimo basekelele!

Ilyo ababomfi tabalabwelelamo ku fyalo bafumineko, bamunyinefwe balitandalile abengi ku mahotela baleikala no kubalondolwela na fimbi pa bukombe bwa Bufumu. Ababomfi bamo batile balilanshanyapo ne Nte sha kwa Yehova mu fyalo fimbi umo bapita. Aba bantu balitashishe bamunyinefwe pa kuipeelesha ukulanshanya nabo ilyo bali mu Finland.

Bushe mwaliba abalola pa kuti muleshimikila ku bantu lyonse ilyo ishuko lyamoneka mu cifulo mushimikilamo? Bushe mulaitemenwa ukulanda na bantu abafuma ku fyalo fimbi? Nga mulecita ifyo, na imwe mukakwata amashuko ya kushimikila nga filya cali kuli bamunyinefwe mu Turku.

[Mapu ne Cikope pe bula 32]

(Nga mulefwaya ukumona mapu, moneni muli magazini)

FINLAND

HELSINKI

Turku