Amepusho Ukufuma ku Babelenga

Mulandu nshi Yesu aebele umwanakashi uwaishibikwe ukuti mubembu ati imembu shakwe shaelelwa?—Luka 7:37, 48.

Ilyo Yesu ali mu ng’anda ya kwa Simone, umuFarise alelya, umwanakashi umo “aiminine lwa ku numa ku makasa yakwe.” Alilile ifilamba no kubomfya amakasa ya kwa Yesu kabili ayakumwine ku mushishi wa ku mutwe wakwe. E lyo kabili atomwene amakasa ya kwa Yesu no kuyasuba amafuta ayanunkila. Ibuuku lya kwa Luka lyatila, ulya mwanakashi ‘aishibikwe mu musumba ukuti mubembu.’ Kwena fwe bantu bonse tuli babembu, lelo Amalembo ilingi line yabomfya ili shiwi ku kulondolola umuntu uucita imembu ishabipisha nangu uwaishibikwa ukuti alacita sana imembu. Cimoneka kwati ulya mwanakashi ali ni cilende. Umuntu wa musango yu, e o Yesu aebele ati: “Imembu shobe shaelelwa.” (Luka 7:36-38, 48) Bushe Yesu aloseshe mwi? Bushe ulya muntu ali no kwelelwa shani, apo pali ilya nshita ninshi ilambo lya cilubula talilapeelwa?

Ilyo umwanakashi apwishishe ukusamba no kusuba amakasa ya kwa Yesu, lelo ninshi tabalamweleela, Yesu alandile umulumbe pa kulondololwela Simone, umwine wa ng’anda icintu icacindama. Yesu alingenye ulubembu ku nkongole ishingi isho abakongwele bafililwe ukulipila. Aebele Simone ukuti: “Abantu babili bali ne nkongole ku washimisha indalama; umo akongwele indalama badenari 500, e lyo umbi 50. Nomba pa mulandu wa kuti tabakwete ica kumubwesesha, alibabelele uluse bonse babili. E ico nani pali aba babili uwingamutemwa sana?” Simone ayaswike ati: “Kuti natila ni ulya abelele sana uluse.” Yesu amwebele ukuti: “Walungika.” (Luka 7:41-43) Ifwe bonse tufwile ukunakila Lesa, kanshi ilyo twakaana ukumunakila, twacita no lubembu, ninshi twafilwa ukupeela Lesa ifyo tufwile ukumupeela. Ciba kwati twalundapo inkongole. Nomba, Yehova aba nga ulya muntu uwaitemenwe ukwelela abakongwele kuli ena. E mulandu wine Yesu akoseleseshe abakonshi bakwe ukuti balepepa kuli Lesa no kulomba ukuti: “Tubeleleni uluse pa membu shesu, ifyo na ifwe tubelela uluse abatulufyanya.” (Mat. 6:12) Luka 11:4 ilanda ukuti ishi nkongole ni membu.

Finshi abantu ba ku kale balecita pa kuti Lesa abeleele imembu? Ukulingana ne funde lya kwa Lesa ilya mulinganya umuntu uwacita ulubembu alingile ukufwa. E mulandu wine, Adamu alipiliile ubumi bwakwe pa lubembu acitile. E ico, mwi Funde Lesa apeele ku luko lwa bena Israele, umuntu uwabembuka nga alefwaya ukuti imembu shakwe shelelwe, alingile ukutuula inama kuli Yehova. Umutumwa Paulo alandile ukuti: “Ukulingana na Mafunde ni cikanga umulopa usangulule fyonse, e ico umulopa nga tausuumine te kuti kube ukubelelwa uluse.” (Heb. 9:22) AbaYuda baishibe ukuti ifi fine fye e fyo balingile ukucita pa kuti Lesa abelele imembu. Kanshi te kuti tupape, ukuti abantu balitwishike ilyo baufwile ifyo Yesu aebele ulya mwanakashi. Balya abaleliila pamo na Yesu, mu mitima baleti fye: “Bushe uyu muntu nani uwa kuti ale-elela ne membu?” (Luka 7:49) E ico, cinshi calengele ulya mwanakashi walecita sana imembu ukwelelwa?

Ukusesema kwa kubalilapo fye uko Lesa alandile ilyo abantu bakubalilapo babembwike, kwalandile pa bufwayo bwa kwa Yehova ubwa kubikako “umwana” uo Satana no “mwana” wakwe bali no kusuma ku citende. (Ukute. 3:15) Ilyo abalwani baipeye Yesu cali kwati bamusuma ku citende. (Gal. 3:13, 16) Umulopa wa kwa Yesu e lambo lyalubula abantu ku lubembu ne mfwa. Apo tapali icali no kulesha Yehova ukucita ico alefwaya, lilya line fye alandile amashiwi yaba pa Ukutendeka 3:15, kuli Lesa ena cali kwati ne cilubula nacilipilwa kale.  Kanshi ale-elela bonse abaleba ne citetekelo mu malayo yakwe.

Ilyo Yesu talaisa pano calo, kwaliko abantu abo Yehova alemona ukuti balungami. Pali aba pali Enoke, Noa, Abrahamu, Rahabu, na Yobo. Icitetekelo calengele ukuti balelolela ukufikilishiwa kwa malayo ya kwa Lesa. Umusambi Yakobo alembeele ukuti: “Abrahamu atetekele Yehova, e ico Lesa amumwene ukuti mulungami.” Yakobo alandile pali Rahabu ati: “Bushe te fyo na Rahabu cilende alungamikilwe ku milimo yakwe iisuma, ilyo apokelele inkombe no kushifumisha ku nshila imbi?”—Yako. 2:21-25.

Imfumu Davidi iya mu Israele alicitile imembu shabipa ishingi sana, lelo alicetekele sana Lesa wa cine kabili nga abembuka alelapila ukufuma pa nshi ya mutima. Na kabili Amalembo yatila: “Lesa apeele Kristu ukuba ilambo lya kufutilako imembu sha baletetekela mu mulopa wakwe. Ici cali pa kuti alange ubulungami bwakwe, pantu Lesa aeleele imembu ishacitilwe kale ilyo aleshishimisha. Lelo pali nomba alefwaya ukulanga ubulungami bwakwe, pa kuti abe uwalungama ilyo alelungamika uwaba ne citetekelo muli Yesu.” (Rom. 3:25, 26) Pa mulandu we lambo lya cilubula ilyo Yesu ali no kupeela ku ntanshi, Yehova alyelele Davidi pa membu shakwe ukwabula ukulaba ku mafunde yakwe aya mulinganya.

Ifi fine e fyo cali na kuli ulya mwanakashi uwasubile Yesu amafuta ku makasa. Ali ni cilende, lelo alilapiile. Alishibe ukuti alekabila ukulubulwa ku membu kabili alilangile ku fyo acitile ukuti aletasha uo Yehova atumine ukwisatulubula. Nangu ca kutila icilubula cali no kupeelwa ku ntanshi, calishininkishiwe ukuti cikabako, e ico pa mulandu wa ici cilubula, na bantu abapala uyu mwanakashi bale-elelwa. E mulandu wine Yesu aebele ulya mwanakashi ukuti: “Imembu shobe shaelelwa.”

Nga fintu fye twamona, Yesu talekankamba ababembu. Alebacitila ifisuma. E lyo Yehova alaitemenwa ukwelela ababembu abalapila. Ukwishiba ici kulatukosha sana fwe bantunse abashapwililika kabili tulomfwa bwino icine cine!

[Icikope pe bula 7]

Lesa abamwene ukuti balungami