Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Moneni nga kuti mwayasuka amepusho yakonkapo:

• Cinshi ukunwesha ubwalwa kwabipila nangu ca kutila umuntu takolelwe?

Baibolo ilatusoka ukwabula ukupita na mu mbali pa fyo ukucishamo ukunwa ubwalwa kwingonaula bucibusa bwesu na Yehova. (Amapi. 23:20; Esa. 5:11, 12) Ukulingana ne fyalandile Yesu, abanwesha ubwalwa tabailuka ukuti shino ni nshiku shayafya. (Luka 21:34, 35)—1/1 ibula 6.

• Bushe Amapinda 6:30 yalasuminisha ukwiba?

Iyo. Ifyo ilembo lilandapo fya kutila, uwaiba ninshi acita umulandu kuli Lesa. Nangu ca kutila uwaiba pa mulandu wa nsala te kuti apeelwe sana umulandu ngo waibila pa mulandu wa bufunushi nelyo pa mulandu wa kufwaya ukukalifya uo aibila, na o wine alingile ‘ukubweseshapo’ nelyo ukulipila pa fyo ebile. Abafwaya ukutemuna Lesa tabafwile ukwiba nangu ifintu fyayafya shani. (Amapi. 6:31)—3/1, ibula 14.

• Ifi twaishiba ukuti ‘Yehova amona mu mutima,’ tulingile ukuba ne mibele nshi? (1 Sam. 16:7)

Ukwishiba ukuti icacindama kuli Yehova mutima, e kuti ifyo umuntu aba mu kati, ne fyo atontonkanya, kufwile ukulenga twalafwaisha ukuba ne mibele iingalenga twaba abasuma mu menso ya kwa Lesa.—3/1, ibula 23.

• Finshi ifyo umwanakashi umuYuda uwabikile amano ku fya kwa Lesa alecita nga ali na bana bakwe?

Umwanakashi umuYuda uwabikile amano ku fya kwa Lesa, pa kuya ku maliketi na pa kubwela nga ali na bana bakwe, alebasambilisha ifya mu Malembo no kubafwa ukufyumfwikisha. (Amala. 6:6, 7) Limo alefunda abana bakwe abakashana ne fya kubomfya bwino indalama pa kushita ifintu. (Amapi. 31:14, 18)—2/1, ibula 8.

• Malembo nshi yengafwa abaupana ukulaumfwana na bapongoshi babo?

Baibolo ilanda pa mwaume uwaupa ukutila ‘akasha wishi na nyina no kulambatila ku mukashi wakwe, na bo bakaba umubili umo.’ (Ukute. 2:24) “Umutwe wa mwanakashi mwaume,” e kutila umulume wakwe. (1 Kor. 11:3)—2/1, ibula 26.

• Bushe abafwa kuti ba-afwa aba mweo?

Baibolo yalilondolola bwino sana ukutila abafwa te kuti bafwilishe aba mwebo pantu abafwa “tabaishiba akantu nangu kamo.” Apo tabaishiba nangu kamo, te kuti bafwe umuntu. (Luk. Mil. 9:5, 6, 10)—1/1, ibula 19.

• Finshi Baibolo ifunda abafwilwa abena mwabo pa kuba beka?

Nangu ca kutila caliba fye bwino ku muntu uuleloosha ukufwaya ukuba eka pa nshita imo, Amapinda 18:1 yatusoka ukuti: “Uuitalusha ku banankwe afwaya fye ukucita ifyo umwine atemenwe.” E ico abafwilwa abena mwabo kuti cawama baleba pamo na balupwa ne fibusa abengaloosesha pamo nabo. Aba mu cilonganino ca Bwina Kristu balafwa sana abaleloosha. (Esa. 32:1, 2)—3/1, ibula 19.