Mulefwaisha Amapaalo ya Kwa Yehova
Mulefwaisha Amapaalo ya Kwa Yehova
“[Lesa] alalambula abamufwaisha.”—HEB. 11:6.
1, 2. (a) Bushe abantu bacita finshi nga balefwaya Lesa abapaale? (b) Mulandu nshi tufwaila sana ukuti Yehova aletupaala?
“LESA amupaale!” Mu fyalo fimo, abantu balitemwa ukweba umuntu aya mashiwi nga atesula nangu ca kuti tabamwishiba. Bashimapepo ba mipepele yalekanalekana balapaala abantu, inama, ne fintu fimbi ifishipema. Abantu bamo balabeba ukuyatandalila fifulo fimo ifya mapepo pa kuti bakapaalwe. Ababa mu fikansa fya calo balalomba Lesa ukupaala icalo cabo. Bushe muletontonkanya ukuti ukulomba kwa musango yu kwaliba fye bwino? Bushe Lesa alabomfwa? Bushe ni bani abapaalwa na Lesa, kabili mulandu nshi?
2 Yehova alisobele ukuti mu nshiku sha kulekelesha, akakwata abantu basanguluka kabili aba mutende abakafuma mu fyalo fyonse, abakabila imbila nsuma ya Bufumu ukufika ku mpela sha pano isonde nangu ca kuti bakabapata no kulabacusha. (Esa. 2:2-4; Mat. 24:14; Ukus. 7:9, 14) Ifwe bonse fwe basalapo ukuba pali aba bantu, tulafwaya amapaalo ya kwa Lesa pantu nga taletupaala te kuti tumubombele bwino. (Amalu. 127:1) Nomba finshi tulingile ukucita pa kuti Lesa aletupaala?
Aba Cumfwila Balapaalwa Sana
3. Abena Israele ababa abacumfwila, nga cinshi cacitike?
3Belengeni Amapinda 10:6, 7. Ilyo uluko lwa bena Israele lwali mupepi no kwingila mu Calo ca Bulayo, Yehova alibebele ukuti bali no kuba abakankaala sana kabili bali no kucingililwa nga baumfwila ishiwi lyakwe. (Amala. 28:1, 2) Amapaalo ya kwa Yehova tayali no kwisa fye pali bena lelo yali no ‘kubasanga’. Bonse aba cumfwila bakapaalwa icine cine.
4. Bushe icumfwila ca cine cine cisanshamo finshi?
4 Lesa alefwaya abena Israele ukuba ne cumfwila ca musango shani? Ifunde lyakwe lyatile ali no kufulwa nga ca kuti abantu bakwe bafilwa ukuba ‘abasekelela no kwanga ku mutima’ ilyo balemubombela. (Belengeni Amalango 28:45-47.) Yehova tafwaya abapatikishiwa fye ukumumfwila nga filya inama nangu ifiwa fipatikishiwa ukumfwila. (Marko 1:27; Yako. 3:3) Ukumfwila Lesa ukufuma pa nshi ya mutima cilangililo ca kuti twalimutemwa. Icumfwila ca musango yu cilalenga umuntu ukuba ne nsansa pantu alacetekela ukuti amafunde ya kwa Yehova taya-afya no kuti “alalambula abamufwaisha.”—Heb. 11:6; 1 Yoh. 5:3.
5. Ukucetekela ubulayo bwa kwa Yehova kwali no kwafwa shani umuntu ukumfwila ifunde lyaba pa Amalango 15:7, 8?
5 Moneni ifyo icumfwila ca musango yu nalimo camoneke ilyo balekonka ifunde lyaba pa Amalango 15:7, 8. (Belengeni.) Ukupatikishiwa ukukonka lilya ifunde nga kwalyafwile abapiina, lelo bushe nga kwalikoseshe ukutemwana kwali pa bantu ba kwa Lesa? Ne cacindeme sana, bushe nga calangile ukuti balitetekele ukuti Yehova kuti apayanishisha ababomfi bakwe ifyo balefwaya? Kabili bushe nga calengele ukuti bamutasha no kufwaya ukupashanya bukapekape bwakwe? Awe iyo! Lesa aleishiba umuntu uwalepeela ukufuma pa nshi ya mutima kabili alilaile ukuti akamupaala mu micitile yakwe yonse na mu mulimo wakwe onse. (Amala. 15:10) Ukucetekela ubu bulayo kwalelenga umuntu ukucita ifisuma ifyalelenga apaalwa sana.—Amapi. 28:20.
6. Ilembo lya AbaHebere 11:6 liletwafwa ukucetekela finshi?
6 Ukulunda pa kutetekela ukuti Yehova alalambula ababomfi bakwe, ilembo lya AbaHebere 11:6 lilatweba na cimbi icikabilwa pa kuti Lesa aletupaala. Litila, Yehova alalambula bonse “abamufwaisha.” Ici cilenga twashininkisha ukuti amapaalo yakabako! Uukatupaala ni Lesa wa cine eka, “uushingabepa.” (Tito 1:2) Pa myaka iminshipendwa alitulanga ukuti ifyo alaya filacitika. Tapelela fye pa kulanda; ifyo alanda lyonse filacitika. (Esa. 55:11) Kanshi tatufwile ukutwishika nangu panono ukuti nga twamutetekela sana, akatulambula.
7. Finshi tulingile ukulacita pa kuti Lesa aletupaala ukupitila mu “mwana” wa kwa Abrahamu?
7 Yesu Kristu ali e mukalamba pa betwa “umwana” wa kwa Abrahamu. Abena Kristu basubwa libumba na limbi ilyaba pa betwa “umwana.” Balipeelwa umulimo wa ‘kubila konse konse ubucindami bwa wabetile ukuti bafume mu mfifi bengile mu lubuuto lwakwe ulwapesha amano.’ (Gal. 3:7-9, 14, 16, 26-29; 1 Pet. 2:9) Te kuti tube ifibusa fya kwa Yehova nga twasuula abo Yesu asonta ukulasakamana ifyuma fyakwe. Nga ca kuti “umusha wa cishinka kabili uwashilimuka” tatwafwa, nga tatwiluka ifyo tubelenga mu Cebo ca kwa Lesa nelyo ukwishiba ifya kufibomfya. (Mat. 24:45-47) Nga tulebomfya ifyo tusambilila mu Malembo, Lesa akalatupaala.
Bikeni Amano ku Kucita Ukufwaya kwa kwa Lesa
8, 9. Finshi icikolwe Yakobo abombeshe sana ukucita ifyalingene no bulayo bwa kwa Lesa?
8 Nga twalanda pa kubombesha pa kuti Lesa akatupaale, nalimo kuti twatontonkanya pa cikolwe Yakobo. Taishibe ifyo ubulayo Lesa apeele Abrahamu bwali no kufikilishiwa, lelo alicetekele ukuti Yehova ali no kufusha sana abana ba kwa shikulu wakwe, abali no kuba uluko ulukalamba sana. E ico, mu 1781 B.C.E, Yakobo aile ku Harani ku kufwaya umwanakashi wa kuupa. Talefwaya fye ukuupa umwanakashi uulemoneka bwino uo engatemwa; lelo alefwaya ukuupa umwanakashi uwabikile amano ku kupepa Yehova kabili uwali no kuba nyina musuma uwa bana bakwe.
9 Twalishiba ukuti Yakobo asangile lupwa lwakwe Rakele. Alitemenwe Rakele kabili alisumine no kubombela Rabani wishi imyaka 7 pa kuti fye akamuupe. Ili te lyashi fye ililanda pa cintemwa ilyaishibikwa sana. Ukwabula no kutwishika, Yakobo alishibe ubulayo ubo Lesa Wa Maka Yonse alaile shikulu wakwe Abrahamu ubo aishilelaya na wishi, Isaki. (Ukute. 18:18; 22:17, 18; 26:3-5, 24, 25) E lyo Isaki na o aebele umwana wakwe Yakobo ukuti: “Lesa Uwa Maka Yonse akakupaala no kukulenga ukufula no kusanda, na iwe ukaba ibumba lya bantu na bantu. Kabili akapeela ipaalo lya kwa Abrahamu kuli iwe na ku bana bobe, ukuti icalo ico uleikalamo cikabe cobe, icalo ico Lesa apeela Abrahamu.” (Ukute. 28:3, 4) Kanshi icalengele ukuti Yakobo abombeshe sana pa kusanga umukashi umusuma no kufyalamo abana ni co alitetekele ifyo Yehova alandile.
10. Mulandu nshi Yehova aitemenwe ukupaala Yakobo?
10 Yakobo tabikile amano ku kufwaya icuma ca kusungilamo ulupwa lwakwe. Abikile amano ku bulayo bwa kwa Yehova ubwakumine abana bakwe. Alefwaisha sana ukwishiba ifyo ubufwayo bwa kwa Yehova bwali no kufikilishiwa. Yakobo apampamine pa kucita icili conse ico ali no kucita te mulandu na mafya pa kuti fye Lesa amupaale. Ifi fine e fyo ali ukufika na mu bukote, kabili Yehova alimupaalilepo.—Belengeni Ukutendeka 32:24-29.
11. Cinshi tulingile ukucita icalingana no bufwayo bwa kwa Lesa ubwasokololwa?
11 Nga filya fine cali kuli Yakobo, na ifwe bene tatwaishiba fyonse pa fyo Yehova akafikilisha ubufwayo bwakwe. Lelo, ukusambilila Icebo ca kwa Lesa kulalenga twailuka ifikacitika pa “bushiku bwa kwa Yehova.” (2 Pet. 3:10, 17) Ku ca kumwenako, tatwaishiba ilyo ubu bushiku bukesa, lelo twalishiba ukuti nabupalama. Twalisumina filya Icebo ca kwa Lesa citweba ukuti nga twabila sana imbila nsuma muli iyi nshita iinono iisheleko, tukaipususha fwe bene na baletumfwa.—1 Tim. 4:16.
12. Finshi tulingile ukucetekela ukuti fikacitika?
12 Twalishiba ukuti impela kuti yafika inshita iyili yonse; Yehova takalolele ukuti mpaka umuntu onse pa calo ashimikilwe e lyo akalete impela. (Mat. 10:23) Na kuba, tulapokelela ifyebo ifisuma ifya kutwafwa ukushimikila bwino imbila nsuma. Pa mulandu wa citetekelo, tulabombako uyu mulimo wa kushimikila apapela amaka yesu, ukubomfya ifili fyonse ifyo twakwata. Bushe lyonse tukalashimikila mu cifulo umo abantu bankulako bwino? Te kuti twishibe ifya ku ntanshi. (Belengeni Lukala Milandu 11:5, 6.) Ico tufwile fye ukucita, kushimikila no kucetekela ukuti Yehova akatupaala. (1 Kor. 3:6, 7) Twalicetekela ukuti Lesa alamona ifyo tubombesha, kabili ukupitila mu mupashi wa mushilo, akulatweba fyonse ifyo alefwaya tucite.—Amalu. 32:8.
Mulelomba Umupashi wa Mushilo
13, 14. Fya kumwenako nshi ifilanga ukuti umupashi wa mushilo ulaafwa ababomfi ba kwa Lesa?
13 Ni shani nga tulemona kwati te kuti tubombe bwino umulimo batupeele nelyo umulimo wa kushimikila? Kuti twalomba Yehova ukutupeela umupashi wakwe uwa mushilo pa kuti watwafwa ukubomba bwino umulimo wakwe. (Belengeni Luka 11:13.) Umupashi wa kwa Lesa kuti walenga abantu bafikapo ukubomba umulimo nangu ca kutila kale kwali ifyalelenga cileafya. Ku ca kumwenako, ilyo fye abena Israele bafumine mu Egupti, umupashi wa kwa Lesa walyafwile bakacema na basha ukucimfya abalwani babo mu bulwi nangu ca kutila tabaishibishe ukulwa. (Ukufu. 17:8-13) Ilyo papitile inshita inono, umupashi umo wine wayafwile Besalele na Oholiabu ukuba na mano ya kupanga pulani ya cikuulwa ca mushilo icalemoneka bwino sana.—Ukufu. 31:2-6; 35:30-35.
14 Uyu mupashi uwa maka e wayafwile ababomfi ba kwa Lesa aba muno nshiku ukubomba imilimo iyalekabilwa mu kuteyanya kwa kwa Lesa ilyo camoneke ukuti balingile ukulaipulintila impapulo. Muli kalata munyinefwe Robert. J. Martin uwaleangalila umulimo wa kupulinta pali ilya nshita alembele, alondolwele ifyo umulimo wabombelwe ukufika mu mwaka wa 1927. Atile: “Pa nshita yalinga ilyo Shikulu aiswile umwinshi, twaishilekwata cimashini icikalamba ica kupulintilako nangu ca kuti tatwaishibe ifya kubika ifiputulwa pamo ne fya kucibomfya. Lelo Shikulu alishiba ifya kwafwa abamubombela no mutima onse pa kuti basambilila bwangu ifintu. . . . Mu milungu fye iinono, mashini yalitendeke ukubomba bwino; kabili icili ilabomba, ilabomba ne milimo iyo na baipangile bashaishibe ukutila kuti yabomba.” Na muno nshiku mwine Yehova alitwalilila ukupaala ababombesha.
15. Bushe ilembo lya Abena Roma 8:11 kuti lya-afwa shani abalepita mu matunko?
15 Umupashi wa kwa Yehova ulatwafwa mu nshila shalekanalekana. Ababomfi ba kwa Lesa bonse balapeelwa uyu mupashi, kabili ulabafwa ukucimfya amafya ayakalamba. Inga nga ca kuti itunko lyatukulila? Amashiwi ya kwa Paulo ayasangwa pa Abena Roma 7:21, 25 na 8:11 kuti yatukosha. Ca cine, “umupashi wa kwa Lesa uwabuushishe Yesu ku bafwa” kuti watwafwa, no kutupeela amaka ya kucimfya ifyabipa ifyo umutima wesu wingafwaya ukucita. Aya mashiwi yalungatikwe ku Bena Kristu basubwa, lelo yalafwa ababomfi ba kwa Lesa bonse. Ifwe bonse tukapeelwa umweo nga tuletetekela Kristu, nga tule-esha na maka ukucimfya ulunkumbwa lwabipa, e lyo no kulatungululwa no mupashi.
16. Finshi tufwile ukucita pa kuti tupeelwe umupashi wa kwa Lesa uwa mushilo?
16 Bushe kuti twaenekela Lesa ukutupeela umupashi wakwe nga tapali nangu cimo ico tulecitapo? Iyo. Tulingile ukulalomba uyu mupashi e lyo no kubika sana amano ku kubelenga Icebo ca kwa Lesa. (Amapi. 2:1-6) E lyo kabili, icilonganino ca Bwina Kristu citungululwa no mupashi wa kwa Lesa. Ukusangwa lyonse mu kulongana cilangililo ca kuti tulafwaya ‘ukumfwa ico umupashi ulesosa ku filonganino.’ (Ukus. 3:6) Na kabili, tufwile ukuba abaicefya pa kuti tulebomfya ifyo tulesambilila. Baibolo pa Amapinda 1:23, itufunda ukuti: “Umfwileni ukufunda kwandi no kuleka ukucita ifyabipa. E lyo nkamufumfumwina umupashi wandi.” Ca cine, Lesa apeela umupashi wakwe uwa mushilo “ku bamunakila.”—Imil. 5:32.
17. Ni kuli finshi twingalinganya ukubombesha kwesu pa kuti Lesa atupaale?
17 Nangu ca kutila ukubombesha kulafwaikwa pa kuti Lesa atupaale, muleibukisha ukuti te kubombesha kweka fye kwalenga Yehova acitile abantu bakwe ifintu ifisuma ifingi. Ukubombesha kwesu pa kukwata aya mapaalo kuti twakulinganya ku busuma bwaba mu kulya ifya kulya ifisuma. Lesa apangile imibili yesu mu musango wa kuti tuleipakisha ifya kulya no kuba abakosa. Alatupeela ne fya kulya. Tatwaishiba uko ifya kulya fifumya umulyo, kabili fwe bengi te kuti tulondolole ifyo imibili yesu ifumya amaka ku fya kulya tulya. Twaishiba fye ukuti ifi fine e fyo ciba kabili tufwile ukulya ifya kulya pa kuti imibili ileba bwino. Nga twasalapo ukulya ifya kulya ifisuma, imibili yesu ilawama sana. Na Yehova alitweba ifyo tufwile ukucita pa kuti tukabe no mweo wa muyayaya, kabili alatwafwa pa kuti tulecita ifi fintu. Ukwabula no kutwishika, alatwafwa sana kabili alinga ukumulumbanya. Na lyo line, tulingile ukulamumfwila, ukulacita ifintu ukulingana no kufwaya kwa kwa Lesa, pa kuti tukapaalwe.—Hag. 2:18, 19.
18. Cinshi mupangile ukulacita, kabili mulandu nshi?
18 Kanshi mulebombesha no kubika amano ku mulimo onse uo mwapeelwa. Lyonse muleshintilila pali Yehova pa kuti mukakwate amapaalo. (Marko 11:23, 24) Ilyo mulecita ifi, mwilatwishika ukuti “onse uufwaya alasanga.” (Mat. 7:8) Abasubwa no mupashi bakapeelwa “icilambu ca mweo” ku muulu. (Yako. 1:12) “Impaanga shimbi” isha kwa Kristu ababombesha ukuti bakapokelele amapaalo ukupitila mu mwana wa kwa Abrahamu, bakaba ne nsansa sana ilyo Yesu akabeba ati: “Iseni, mwe bapaalwa na Tata, ingileni mu bufumu ubo bamuteyanishishe ukufuma pa kutendeka kwa calo.” (Yoh. 10:16; Mat. 25:34) Kanshi “abo [Lesa] akapaala bakekala mu calo, . . . kabili bakekalamo umuyayaya.”—Amalu. 37:22, 29.
Bushe Kuti Mwalondolola?
• Bushe icumfwila ca cine cine cisanshamo finshi?
• Cinshi cifwaikwa pa kukwata amapaalo ya kwa Lesa?
• Finshi tufwile ukulacita pa kupokelela umupashi wa kwa Lesa uwa mushilo, kabili kuti watwafwa shani?
[Ifipusho]
[Ifikope pe bula 9]
Yakobo alwishenye na malaika pa kuti apaalwe na Yehova
Bushe na imwe mule-esha na maka ukucita ifingalenga mwapaalwa?
[Icikope pe bula 10]
Umupashi wa mushilo uwa kwa Lesa walyafwile Besalele na Oholiabu ukuba na mano