Afweni Abaice Ukwishiba Bwino Ukuteyanya kwa kwa Yehova

ABANA balafwaya ukusambilila. Elenganyeni ifipusho nalimo abana ba bena Israele mu Egupti bakwete pa bushiku bwa Ca Kucilila ica kubalilapo. Bafwile baleipusha ati: ‘Mulandu nshi baipaile umwana wa mpaanga?’ ‘Mulandu nshi batata baleshingila umulopa pa mwalo wa mwinshi?’ ‘Tuleya kwi?’ Icilanga ukuti ifi fipusho fyali fye bwino, ni fintu Yehova aebele abafyashi abaume abena Israele. Yehova alandile pa lwa Ca Kucilila bali no kulasefya ku ntanshi ati: “Ilyo abana benu bakamwipusha abati, ‘Nge fi mulecita e finshi?’ e lyo mukatile, ‘Lilambo lya ca kucilila kuli Yehova, uwacilile amayanda ya bana ba kwa Israele mu Egupti ilyo aipeye abena Egupti, lelo apokolwele aba mu mayanda yesu.’” (Ukufu. 12:24-27) Pa numa, Yehova aebele abafyashi abena Israele ubusuma bwa kwasuka ifipusho ifyo abana babo bali no kulaipusha ilyo balefwaya ukwishiba “fipope no bupingushi” ifyo Yehova abapeele.—Amala. 6:20-25.

Kanshi kuti twatila, Yehova alefwaya abana  beshibe fyonse ifyo balefwaya ukwishiba pa kupepa kwa cine pantu ifi fyali no kubafwa ukutemwa Umupusushi wabo, Yehova Lesa. E fyo Yehova afwaya na baice ba muno nshiku ukwishiba. Cimo ico abafyashi bengacita pa kuti basambilishe abana babo ukutemwa Lesa na bantu bakwe, kubafwa ukwishiba bwino ukuteyanya kwa kwa Yehova no kwishiba ifyo kutucitila. Kanshi natulande pa nshila shimo isho abafyashi bengafwilamo abana ukwishiba ukuteyanya kwa kwa Lesa.

Icilonganino

Abana benu bafwile ukwishiba icilonganino ico mulonganamo. Pa kuti beshibe icilonganino, mwe bafyashi mufwile ukulasenda abana ku kulongana kwa Bwina Kristu. Nga mulecita ifyo, ninshi mulekonka ifyo Yehova aebele abena Israele ukulacita ilyo atile: “Longanyeni abantu, abaume na banakashi na banono . . . , pa kutila bakutike kabili basambilile, pantu bafwile ukulatiina Yehova Lesa wenu no kubika amano ku kukonka fyonse ifyalembwa muli ili funde. Kabili abana babo abashaishiba bafwile ukukutika, kabili bafwile ukusambilila ukutiina Yehova Lesa wenu.”—Amala. 31:12, 13.

Abana kuti basambilila Icebo ca kwa Yehova ukutula fye ku bunya. Umutumwa Paulo aebele Timote ukuti: “Ukufuma ku bunya waishiba amalembo ya mushilo.” (2 Tim. 3:15) Pa kulongana tukwata mu Ng’anda ya Bufumu, na bana abanono sana balakutika ku fyebo ifilelandwa kabili baleshiba ne nyimbo sha Bufumu. Nga balesangwa ku kulongana, baleshiba ukuti Baibolo ne mpapulo shesu fyalicindama kabili baleshiba ne fya kubomfya ishi impapulo. Na kabili, pa kulongana e po bamona ukutemwa uko twishibikilwako  ukuti tuli basambi ba kwa Kristu aba cine. Yesu atile: “Ndemupeela ifunde ilipya, ilya kuti muletemwana; ifyo namutemenwe, e fyo na imwe muletemwana. Nga muletemwana, e lyo bonse bakeshiba ukuti muli basambi bandi.” (Yoh. 13:34, 35) Abana bakomfwa bwino sana nga bamona ukutemwana no mutende ifyo abantu balanga pa Ng’anda ya Bufumu kabili ici cikalenga balesangwa ku kulongana kwa Bwina Kristu lyonse.

Nga ca kuti lyonse mulefika bwangu pa Ng’anda ya Bufumu kabili pa numa ya kulongana muleshalako panono, abana benu bakalakwata inshita ya kupanga ifibusa. Ukucila ukubaleka baleangala fye na baice banabo, kuti cawama mwaleka baishibana bamunyinefwe na bankashi aba mishinku yapusanapusana. Abana benu nga baishibana na bakalamba, bakamona ukuti abakalamba balishiba ifingi ifyo bengasambililako kabili balikwata sana amano. Nga filya fine Sekaria wa ku kale asambilishe Usia imfumu yacaice iya Yuda “ukutiina Lesa wa cine,” na babombela Yehova mu cishinka pa myaka iingi muno nshiku balakoselesha sana abacaice. (2 Imila. 26:1, 4, 5) Ilyo muli mu Ng’anda ya Bufumu, kuti mwalondolwela abana benu ico kwabelako laibrali, icipampa ca fyebo, na fimbi.

Icilonganino ca mwi Sonde Lyonse

Abana balingile ukwishiba ukuti icilonganino cenu caba pa filonganino ukucila 100,000 ifyaba pano calo ponse. Balondolweleni ifyo ukuteyanya kubomba, ne milimo yaba mu kuteyanya iyo nabo bengabombako. Mubebe ico mufwaila sana ukusangwa ku kulongana kwa muputule, ukwa citungu, na ku kutandala kwa kwa kangalila wa muputule.—Moneni akabokoshi akaleti  “Ifya Kulanshanyapo pa Mapepo ya Lupwa,” pe bula 28.

Nga mwakwata inshita, muleitako bakangalila benda, bamishonari, ababombela pa Bethel, na bambi ababa mu mulimo wa nshita yonse ku ca kulya ku ng’anda ku mwenu. Mwilamona kwati tabapoosa amano ku bacaice. Aba ababomba umulimo wa nshita yonse balafwaya ukupashanya Yesu, uwatemenwe ukuba na bana abanono no kulanda nabo. (Marko 10:13-16) Nga balekutika ku fyo aba babomfi ba kwa Yehova bapitamo no kumona ifyo umulimo wa kwa Lesa ubaletela insansa, abana benu nabo nalimo kuti bakwata ubuyo bwa kubombako umulimo wa nshita yonse.

Finshi fimbi ifyo mwingacita pa kwafwa abana benu ukwishiba bwino ukuteyanya kwa kwa Yehova? Fimo ifyo mwingacita ni fi: Tantikeni ukulabelengela pamo no lupwa icitabo ca Jehovah’s Witnesses—Proclaimers of God’s Kingdom. Mulekomaila sana pa kuipeelesha, ukuicefya, na pali bucishinka bwa babomfi ba kwa Yehova. Langeni abana benu ifyo Yehova abomfeshe aba babomfi ku kubila imbila nsuma mwi sonde lyonse. Mulebomfya amavidio ayo ukuteyanya kwa kwa Yehova kwapekanya pa kuti musambilishe abana ifyacindama ku fyalecitika kale na muno nshiku. Nga mwingakwanisha, tandalileni amaofeshi ya Nte sha kwa Yehova mu calo cenu ne lyo mu fyalo fimbi. Ukutandalila ifi fifulo kukalenga abana benu bakeshibe ifyo ukuteyanya kwa kwa Yehova ukwa pano isonde ukutungululwa no musha wa cishinka kutupeela ica kulya ca ku mupashi ne fyo kutungulula bamunyinefwe mwi sonde lyonse, nga filya fine cali na mu nshita ya batumwa.—Mat. 24:45-47; Imil. 15:22-31.

Sambilisheni Cila Mwana Ifyebo Engomfwa

Pa kusambilisha abana benu, mulepashanya ifyo Yesu alesambilisha abatumwa bakwe. Inshita imo abebele ukuti: “Ncili ne fingi ifya kumweba, lelo te kuti mufyumfwe pali nomba.” (Yoh. 16:12) Yesu tale-eba  abasambi bakwe ifyebo ifingi. Lelo, alebasambilisha panono panono icine icacindeme pa kuti bacumfwikishe. Na imwe bene tamufwile ukulasambilisha abana ifingi sana pa nshita imo. Nga muli no mute wa kubasambilisha pa kuteyanya kwa kwa Yehova, kabili mulebasambilisha ifinono finono, bakulaumfwa bwino ukusambilila pa cilonganino ca Bwina Kristu. Ilyo abana benu bakalafwaya ukusambilila na fimbi, kuti mwapituluka mu fyo basambilila kale no kulundapo pa fyo baishiba.

Icilonganino ca Bwina Kristu cilatwafwa sana ukukosha bucibusa bwesu na Lesa, kabili abacaice abacincila mu kubomba imilimo ya cilonganino baleshiba ifya kucimfya amatunko ya kwa Satana. (Rom. 12:2) Natucetekela ukuti ukwafwa abana benu ukwishiba ukuteyanya kwa kwa Yehova, kukaletela mwe bafyashi insansa. Shi Yehova uwakwata ukutemwa napaale abacaice pa kuti batwalilile ukuba ne cishinka ku kuteyanya kwakwe na kuli ena, uo babombela.

[Akabokoshi ne Cikope pe bula 28]

 Ifya Kulanshanyapo pa Mapepo ya Lupwa

Aya e malyashi yamo ayalanda pa kuteyanya kwa kwa Lesa ayo mwingalanshanyapo pa Mapepo ya Lupwa.

▪ Landeni pa fyo icilonganino mulonganako cali kale. Ni lilali capangilwe kabili capangilwe shani? Mayanda nshi aya Bufumu ayo icilonganino cabomfyapo? Ilyo mulelanshanya pali ifi, kuti cawama mwaitako munyinefwe umukokole mu cilonganino pa kuti aisa-asuka amepusho abana bengepusha.

▪ Lanshanyeni ico kwabela ukulongana kwalekanalekana ukwa cilonganino no kulongana kukalamba e lyo ne fyo abana bengalanonkelamo muli uku kulongana.

▪ Bebeni ico amasukulu yalekanalekana mu kuteyanya kwa kwa Yehova yabelako. Landeni pa fisuma fimo ifyo abapita muli aya masukulu bacita.

▪ Ebeni abana benu ubucindami bwaba mu kulashimikila lyonse imbila nsuma. Balangeni fyo nabo bengalacita pa kuti imilimo yabo ilebapo pali lipoti ya calo conse iiba muli Yearbook ya Nte sha kwa Yehova.

▪ Lanshanyeni imilimo yalekanalekana iyo abacaice bengabomba mu kuteyanya kwa kwa Yehova mu mulimo wa nshita yonse. Mu cipandwa 10 mu citabo ca Abaiteyanya Ukucita Ukufwaya kwa kwa Yehova iyi milimo yalilondololwa bwino.

▪ Londolweleni abacaice ico ifintu fimo ficitilwa. Balondolweleni umulandu balingile ukulakonkela ifyo ukuteyanya kwa kwa Yehova kwalanda ilyo balefwaya ukucita fimo, nangu fintu ifilemoneka ifinono. Balangeni ifyo nabo bengalenga ifintu ukwenda bwino mu cilonganino nga ca kuti baleumfwila baeluda.

[Icikope]

Abana benu bakanonkelamo nga bapanga icibusa na babombela Lesa pa myaka iingi

[Ifikope pe bula 26]

Nga filya fine cali mu Israele, na bafyashi pali lelo bafwile ukweba abana babo ifishinka ilyo balefwaya ukwishiba fimo pa kuteyanya kwa kwa Yehova