“Kalangafwa Ukufika Abantu pa Mutima”

MU MUSUMBA wa Porto Alegre, uwaba ku kapinda ka ku kulyo aka Brazil, ku numa uku mwalishile abantu abengi ukufuma mu fyalo 135, abalongene ku kulanshanya pali fimo ifyakumine abantu mu fyalo fyabo. Ba Nte ukufuma mu filonganino fya mu Porto Alegre balelanshanya naba batandashi nga baletuusha pa kuti babebeko ubukombe bwa Bufumu ubwaba mu Baibolo. Bushe balelanshanya shani?

Nkashi Elizabete, painiya wa nshita yonse atile: “Twalebomfya akatabo katila Good News for People of All Nations.” Ba Elizabete basosele no kuti: “Abengi pa baishile tababalile abomfwapo imbila nsuma iya Bufumu, lelo balipokelele ubukombe bwesu. Twalilanshenye na bafumine ku Bolivia, China, France, India, Israel, na ku Nigeria. Bamo abatandashi twalibapeele impapulo mu ndimi balanda, kabili balishipokelele ne nsansa.”

Mu Mexico, painiya we shina lya Raúl, na o alabomfya aka katabo kabili mulafuma ne fisuma. Inshita imo alishimikile shikulubantu umuArabu uwa myaka 80 kabili uwafwilwa umukashi. Ilyo abelengele iciputulwa mu katabo apaba ubukombe bwa Bufumu mu ciArabic, alilukwishe ifilamba ku nsansa. Mulandu nshi? Alyumfwile bwino ilyo abelengele mu lulimi alanda ubulayo bwa kwa Lesa ubwa kuti imfwa ikafumapo, ubwaba pa Ukusokolola 21:3, 4. Pa nshita imbi, Raúl akumenye umwaume umbi uulanda iciPortuguese. Ulya mwaume na o alifwililwe umwana. Raúl amwebele ukubelenga ifyebo fimo muli aka katabo ifyalembwa mu ciPortuguese. Pa numa ya kufibelenga, ulya mwaume atile alefwaya ukusambilila na fimbi ifyaba mu Baibolo kabili alisumine ukutendeka ukusambilila.

Raúl alibomfyapo aka katabo ka Good News for People of All Nations pa kushimikila ku balanda iciArmenia, iciChinese, iciNgeleshi, iciFrench, iciGerman, iciHindi, iciKorean, iciMixe, iciPersian, iciRussian, ne ciZapotec. Atile: “Nalimona ifyo cacindama ukubomfya aka katabo ilyo ndeshimikila. Kalangafwa ukufika abantu pa mitima nangu ca kutila nshilanda ululimi lwabo.”

Apo abantu abaya ku fyalo fimbi balefulilako fye, tulakwata amashuko ayengi aya kulanda na balanda ululimi lumbi. Twakulabashimikila ubukombe bwa Bufumu ukubomfya akatabo katila, Good News for People of All Nations. Bushe mulakasenda?

[Ifikope pe bula 32]

Munyinefwe Raúl na katabo akamwafwa ukufika abantu pa mutima