Nalitwalilila Ukubombesha mu Kuteyanya kwa kwa Yehova

Abashimika ili lyashi ni ba Vernon Zubko

NAKULILE pa farmu mupepi no mushi wa Stenen, uwaba mu citungu ca Saskatchewan, mu Canada. Abafyashi bandi ba Fred na ba Adella, bale-esha na maka ukutusambilisha pali Yehova e lyo no kutupeela ifikabilwa mu bumi. Fwe bana twali Ine, umukalamba wandi umwanakashi Aurellia, na baice bandi, Alvin, Allegra, na Daryl. Ukufika na lelo tulatasha abafyashi besu pa kutusambilisha icine.

Batata, abali Abena Kristu basubwa, baleshimikila ukwabula umwenso. Balebombesha ukufwaya umwa kutulishisha, lelo balefwaisha no kuti abantu bonse baishiba ukuti bali ni baNte. Bale-ebako bambi icine ca mu Baibolo lyonse. Ncili ndebukisha ukubombesha kwabo no kushipa. Balitemenwe ukunjeba ati, “Nga ulebombesha mu kuteyanya kwa kwa Yehova tawakulakwata amafya ayengi.”

Ilingi twaleshimikila nabo mu misebo na mu bwina mupalamano. Limo calenkosela ukushimikila. Mu tauni limo na limo mwaleba abatemenwe ukucusha fwe baice no kutupumya. Bushiku bumo ninshi ndi ne myaka 8, naiminine pa kona ninshi ninjikata Ulupungu na Loleni! ilyo ibumba lya bacaice lyaishilenshinguluka. Basompwele icisote candi icipya ico nafwele no kucibika pa cipampa cali mupepi. Ku ce shuko, munyinefwe umo umukalamba uo twali nankwe, alimwene ifyacitike. Aishile apo nali no kunjipusha ati, “Vernon, cinshi cilecitika? Balya bakalume balencusha bwangu bwangu balifulumwike. Nangu ca kuti ifyacitike fyalinkalifye, nasambilileko ukuti nga tuleshimikila mu musebo, nshifwile ukwiminina fye nge cipampa, mfwile ukulaenda. Ifi fyonse ifyo nasambilile ilyo nali umwaice, fyalengele ndeshimikila ku ng’anda ne ng’anda ukwabula umwenso.

Ine na Alvin twabatishiwe mu 1951, mu May ilyo nali ne myaka 13. Ncili ndebukisha ukuti munyinefwe Jack Nathan, uwalandile ilyashi lya lubatisho, alitukoseleshe ukukanaleka umweshi wapwa ukwabula ukushimikila pali Yehova. * Mu lupwa lwesu twaishibe ukuti bupainiya e mulimo wacindama. E ico mu 1958, pa numa ya kupwisha isukulu, nakuukile ku Winnipeg, ku Manitoba mu kubomba bupainiya. Nangu ca kutila batata baleumfwa bwino ukubomba na ine mu bukwebo bwabo ubwa kupala imbao, bena na bamayo balinkoseleshe sana ukutendeka umulimo wa nshita yonse kabili balinsuminishe ukukuuka.

Nakuukila Kumbi, Nakwata no wa Kubomba Nankwe Umbi

Mu 1959, Iofeshi lya musambo lyalitile abengatemwa ukukuuka, ukuyabombela ku Quebec uko bakasabankanya balefwaikwa  sana. Naile mu kubombela mu musumba wa Montreal. Pali ubupusano ubukalamba! Ifintu fyalyalwike sana pantu natendeke ukusambilila iciFrench e lyo ne ntambi shimbi. Kangalila wesu uwa muputule anjebele ati: “Te kwesha ukulalanda ati, ‘ifi te fyo tucita ku mwesu.’” Ifyo anjebele fyalingafwile.—1 Kor. 9:22, 23.

Nshakwete wa kubomba na o ilyo nakuukile ku Quebec. Lelo Shirley Turcotte, nkashi wacaice uo nakumenye ku Winnipeg, e o naupile mu February mu 1961, no kutendeka ukubomba nankwe. Na o wine abafyashi bakwe balitemenwe sana Yehova. Pa myaka naikala nankwe, alankoselesha sana no kunkosha ukucila ne fyo nalemona ilyo twaupene fye.

Ifyo Twashimikile mu Gaspé

Ilyo twaupene, papitile fye imyaka ibili batwebele ukuba bapainiya baibela mu Rimouski, mu musumba wa Quebec. Pa kati ka April na May umwaka wakonkelepo, aba kwi ofeshi lya musambo batwebele ukutendeka ukushimikila mu cifulo ca Gaspe Penisula conse, icabela mu lulamba lwa ku kapinda ka ku kuso mu Canada. Umulimo wesu wali wa kutanda imbuto sha cine ishingi. (Luk. Mil. 11:6) Twalongele bamagazini ukucila 1,000 ne fitabo mupepi na 400 mu motoka yesu, e lyo ne fya kulya ne fya kufwala, no kwima ukuya kuli ici cifulo uko twaileshimikila pa mweshi uutuntulu. Twalibombele mu mishi yonse iinono iya mu Gaspé. Abantu kulya balibasokele pa mulabasa ukutila ba Nte baleisa no kubeba ukuti te kwesha ukupokako impapulo shabo. Lelo abekala mishi abengi baumfwile kwati balebeba ukuti bakapokeko impapulo shesu, e ico balepoka.

Muli ilya myaka, mu fifulo fimo ifya mu Quebec, tamwali sana ubuntungwa bwa kushimikila, kabili ilingi bakapokola baletulesha. Ici calicitike mu musumba umo, umo twaleshiila abantu magazini pa mayanda mupepi na yonse. Kapokola atwebele ukuya nankwe ku kapokola, na ifwe tatwakeene. Nailesanga ukuti loya wa muli ulya musumba alifumishe icipope ca kutulesha ukushimikila. Apo umukalamba wa bakapokola talipo ubo bushiku, napeele uyu loya kalata yafumine ku musambo mu Toronto iyalondolwele bwino bwino insambu shesu isha kushimikila. Ilyo loya abelengele kalata, apo pene fye atile: “Nshilefwaya amafya na yambi, ukulanda icishinka, ni shimapepo anjebele ukumulesha ukushimikila.” Apo twalefwaya abantu beshibe ukuti umulimo wesu tawabindwa, ilyo line fye twabwelele palya pene bakapokola batusangile no kutendeka ukushimikila.

Ubushiku bwakonkelepo twailemona umukalamba wa bakapokola. Uyu muntu alifulilwe ukumfwa ukuti balituleseshe ukushimikila. Aleumfwika ukuti nafulwa sana na lintu alelanda na loya pa foni! Uyu kapokola atwebele ukuti nga twakwata amafya na kabili, e o tukatumine kabili akatwafwa. Nangu ca kutila twali abeni ne ciFrench tatwaishibe sana, abantu ba kulya bali aba cikuuku kuli ifwe, kabili balitupokele bwino. Nomba twaleyipusha ukuti, “Bushe aba bantu bakasambilila icine?’ Lelo ilyo twabwele ku Gaspé ku kukuula Ing’anda ya Bufumu pa numa ya myaka iingi, ici cipusho calyaswikwe. Twailesanga ukuti abengi abo twashimikile kale, nomba ni bamunyinefwe. Nga fintu twamona, Yehova e umesha ifintu.—1 Kor. 3:6, 7.

Twakwata Umwana

Lisa, umwana wesu umukashana afyelwe mu 1970. Ukukwata uyu mwana nako kwalituletela insansa. Ine, Shirley na Lisa twalibombele pamo mu makuule ya Mayanda ya Bufumu ayengi. Ilyo Lisa apwishishe isukulu, atile: “Batata na bamayo, apo nine nalengele muleke umulimo wa nshita yonse, ndefwaya ukuba bupainiya.” Papita imyaka 20 ukutula apo atendekela bupainiya, lelo pali ino nshita abombela pamo no mwina mwakwe, Sylvain. Ena no mwina mwakwe balibombako umulimo  wa makuule mu fyalo fimbi. Ine no lupwa lwandi twalipingulapo ukwangusha imikalile pa kuti tulebombela Yehova. Nshalaba ifyo Lisa anjebele ilyo atendeke ukubomba bupainiya. Na kuba e walengele ntendeke umulimo wa nshita yonse na kabili mu 2001. Ukutula ilyo nshaleka bupainiya. Umulimo wa bupainiya walilenga natwalilila ukucetekela Yehova muli fyonse ifyo ncita no kwangusha imikalile. Na lyo line nalikwata insansa.

Ukutemwa, na Bucishinka Filafwaikwa pa Kubombako Umulimo wa Makuule

Yehova alinsambilisha ukuti nga twaitemenwa ukubomba umulimo uuli onse uo atupeela, tulakwata amapaalo ayengi. Ukuba muli Komiti ya Makuule no kubombako umulimo wa makuule capamo na bamunyinefwe ne nkashi mu Quebec monse e lyo na mu fifulo fimbi, lishuko icine cine.

Nangu ca kutila ababomfi bamo te bakalanda balamuka pa cisebele, balabomba bwino sana umulimo wa kukuula Amayanda ya Bufumu. Aba bamunyinefwe balabikako sana amano ku mulimo babomba, kabili cilamoneka ukuti balilamuka. Balabomba bwino ica kuti ifikuulwa fya kupepelamo Yehova ifyo bakuula filamoneka bwino sana.

Abantu balanjipusha ukuti, “Mibele nshi iyo abakuula Amayanda ya Bufumu balingile ukukwata?” Ukulingana ne fyo namona, intanshi umuntu afwile ukutemwa Yehova no Mwana wakwe e lyo na ba bwananyina. (1 Kor. 16:14) Ica bubili icifwaikwa, ni bucishinka. Nga ca kutila ifintu tafibombele ukulingana ne fyo twacilafwaya, nga fintu ciba limo, uwa cinshinka alatwalilila ukukonka ifyo ukuteyanya kwa kwa Lesa kuletweba. Bucishinka bulalenga umuntu aitemenwa ukwisabombako na mu makuule ya ku ntanshi.

Ndatasha Yehova

Nangu ca kuti batata bafwile mu 1985, ncili ndebukisha filya bankoseleshe ukuti ndebombesha mu kuteyanya kwa Yehova. Ukwabula no kutwishika balikonkanyapo ukubombesha ku muulu nga filya fine na bambi abapokelela umulimo wabo mu kuteyanya kwa kwa Yehova ukwa ku muulu babomba. (Ukus. 14:13) Bamayo bali ne myaka 97. Ubulwele bwa stroko bwalilenga belalanda bwino; na lyo line balishiba bwino Baibolo. Nga balemba kalata balabikamo amalembo kabili balatukoselesha ukutwalilila ukubombela Yehova ne cishinka. Fwe bana babo bonse tulatasha sana pa kukwata abafyashi abatutemwa!

Ndatasha na Yehova pali Shirley, umukashi wandi uwa cishinka uo tubombela nankwe pamo. Talaba filya banyina bamwebele ati, “Vernon akakwata ifya kucita ifingi mu kuteyanya, kanshi iwe ulingile ukulamupeela inshita ya kwafwa bambi.” Ilyo twaupene imyaka 49 iyapita, twasuminishenye ukuti tufwile ukutwalilila ukubombela Yehova capamo mpaka na mu bukote bwesu, kabili nga ca kutila bonse babili twapusuka impela ya buno bwikashi, tukaba abaice na kabili no kutwalilila ukumubombela ku ciyayaya. Ca cine twaliba “abacincila mu mulimo wa kwa Shikulu.” (1 Kor. 15:58) Yehova na o alatusakamana ica kuti tatubulisha icili conse icisuma.

[Futunoti]

[Icikope pe bula 31]

“Ine no lupwa lwandi twalipingulapo ukwangusha imikalile pa kuti tulebombela Yehova”