Amepusho Ukufuma ku Babelenga

Yesu aebele abantu inshita imo ati: “Mufwile ukuba abapwililika, ifyo na Shinwe wa mu muulu aba uwapwililika.” Bushe abantunse kuti baba shani “abapwililika”?—Mat. 5:48.

Pa kuti tusange icasuko kuli ici cipusho tulingile ukwishiba ifyo amashiwi ya kuti “icapwililika” na “ukupwililika” yabomfiwa mu Baibolo. Kwena te fyonse ifyo Amalembo yalanda ukuti “fyalipwililika” ifyaba ifyapwililika mu cine cine. Yehova ena alipwililika icine cine. Abantu kuti baba abapwililika mu mampalanya fye. E cimo ne fintu fimo. Ishiwi lya ciHebere ne lya ciGriki ilyo mu Baibolo bapilibula ukuti “icapwililika” ilingi line lipilibula “ukupwishishisha,” “ukufikapo,” nelyo “icabulamo akalema” ukulingana ne fipimo balekonka.

Adamu na Efa babumbilwe abapwililika muli fyonse. Kabumba wabo alebamona ukuti bali abapwililika ukulingana ne fipimo fyakwe. Pa mulandu wa kukanaumfwila Lesa, tabatwalilile ukuba abapwililika kabili na bana babo bene baishilepyana ukukanapwililika. Kanshi ulubembu lwa kwa Adamu e lwalenga abantu ukuba ababembu, ukukanapwililika e lyo no kulafwa.—Rom. 5:12.

Lelo nga filya Yesu alandile mu Lyashi lya pa Lupili, na bantu abashapwililika kuti baba abapwililika mu nshila imo. Muli lilya lyashi, alandile pa fyo ukutemwa ukwapwililika kwaba. Uku kutemwa e ko Lesa alanga ku bantunse. Yesu atile: “Muletemwa abalwani benu kabili mulepepelako abamucusha; pa kuti mulange ukuti muli bana ba kwa Shinwe uwaba mu muulu, pantu alenga akasuba ukubalikila ababifi na basuma kabili alenga imfula ukulokela pa balungama na pa bashalungama.” (Mat. 5:44, 45) Abasambi ba kwa Yesu nga balelanga ukutemwa kwa musango yu, ninshi balepashanya Lesa uwapwililika.

Pali lelo, Inte sha kwa Yehova balesha na maka ukutwalilila ukulanga ukutemwa kwa musango yu kuli bambi. Bafwaisha ukwafwa abantu aba nkulilo shalekanalekana, imitundu, ne mipepele ukwishiba icine ca mu Baibolo. Ba Nte balatungulula amasambililo ya Baibolo ku bantu ukucila pali 7,000,000 mu fyalo 236.

Yesu aipwishe ukuti, “nga mwatemwa fye abamutemwa, cilambu nshi mwingakwata? Bushe bakasonkesha ba misonko na bo tabacita cimo cine? Kabili nga muposha bamunyinenwe beka fye, cinshi icaibela ico mwacita? Bushe abena fyalo na bo tabacita cimo cine?” (Mat. 5:46, 47) Abena Kristu ba cine tababa na kapaatulula ku bantu pa mulandu wa masambililo yabo, nelyo umutundu; kabili tabatemwa fye balya ababatemwa. Lelo, balafwa abalanda na balwala, abaice na bakalamba. Ilyo Abena Kristu balecita ifi, ninshi balepashanya ukutemwa kwa kwa Yehova kabili kuti twatila ukutemwa kwabo kuli ukwapwililika.

Bushe kwena tukabala atuba abapwililika nga filya Adamu ali pa kubala? Ee, ukutetekela ilambo lya cilubula ilya kwa Yesu, kukalenga abantunse aba cumfwila bakapwililike mu kuteka kwa kwa Kristu ukwa myaka 1,000, ilyo uyu ‘Mwana wa kwa Lesa akonaule imilimo ya kwa Satana Kaseebanya.’—1 Yoh. 3:8.