Mwe Bacaice—Finshi Mufwaya Ukucita mu Bumi Bwenu?

“Ifyo mpoosa inkonya te filya uuleuma umwela acita.”—1 KOR. 9:26.

1, 2. Ilyo muleyamulekula, finshi mulingile ukucita pa kuti ifintu fikamuwamine?

NGA ca kuti muleya uko mushaishiba inshita ya bushiku, kuti nalimo mwafwaya ukusenda tochi no muntu uwa kumutungulula. Tochi kuti ilelenga mulemona umo mulepita no ko muleya. Uwa kumutungulula na o kuti amwafwa pa kuti tamulubile. Lelo, tochi no muntu wa kumutungulula te kuti fimwafwe nga tamwishibe icifulo mulefwaya ukuyako. Pa kuti mwilalulumba fye, mufwile ukwishiba bwino icifulo mulefwaya ukuyako.

² Ifi fine e fyo cifwile ukuba na kuli mwe bacaice ilyo mulekula. Namukwata ico twingalinganya kuli tochi na ku muntu uwa kumutungulula. Baibolo kuti twaipashanya ku muntu uulemutungulula pa kuti mwishibe ukwa kulola. (Amapi. 3:5, 6) Kampingu yenu na yo nga yakanshiwa bwino kuti yamwafwa ukukanafuma mu nshila iisuma. (Rom. 2:15) Lelo nga mulefwaya ukuba ne nsansa, mulingile ukwishiba icacindama ico mufwile ukucita mu bumi. Saleni bwino bwino ifyo mufwaya ukucita mu bumi.

3. Fisuma nshi ififuma mu kusalila kabela ifyo mulefwaya ukucita mu bumi, ifyo Paulo alandapo pa 1 Abena Korinti 9:26?

³ Umutumwa Paulo alilandile pa busuma bwaba mu kusalila kabela ifya kucita mu bumi no kwesha na maka ukulaficita ilyo alembele ukuti: “Ifyo mpoosa inkonya te filya uuleuma umwela acita.” (1 Kor. 9:26) Nga mwalisala ifyo mufwaya ukucita, kuti mwaicetekela ilyo mule-esha ukucita ifyo fintu. Nomba line, muli no kusala ifya kucita pa fintu ifyacindama pamo nga ukupepa, incito, icupo, no lupwa. Limo ifyo mwingafwaya ukucita kuti fyamoneka ifingi sana ica kuti mwafilwa ne fya kusalapo. Lelo nga ca kuti mwapangila limo ifyo mukacita mu bumi, mwakonka ne fishinte fyaba mu Cebo ca kwa Lesa ilyo mulesala ifya kucita, te kuti mupumbulwe.—2 Tim. 4:4, 5.

4, 5. (a) Cinshi cingacitika nga ca kuti mwe bene tamuisalile ifya kucita mu bumi? (b) Mulandu nshi mufwile ukulafwaila ukuteemuna Lesa mu fyo mulefwaya ukucita mu bumi?

⁴ Nga ca kuti tamwasala ifya kucita mu bumi, abanenu na bakafundisha nalimo kuti balafwaya mulecita ifyo balemona ukuti e fyo mulingile ukucita. Kwena, nangu fye mwalisala bwino bwino ifyo mufwaya ukucita, bamo kuti bamweba ukucita ifyo baletontonkanya. Ilyo mulekutika ku fyo balemweba, yipusheni amuti, ‘Bushe ifyo balenjeba ukucita fikangafwa ukwibukisha Kabumba wandi ilyo ncili umwaice nangu fikalenga nkafilwe?’—Belengeni Lukala Milandu 12:1.

⁵ Mulandu nshi mulingile ukutontonkanishisha pa kuteemuna Lesa ilyo mulesala ifya kucita mu bumi? Umulandu umo wa kuti Yehova e watupeela ifintu fyonse ifisuma. (Yako. 1:17) Kanshi umuntu uli onse afwile ukutasha Yehova. (Ukus. 4:11) E ico, icisuma sana ico mwingacita pa kulanga Yehova ukuti mulamutasha, kutontonkanya pa fingamuteemuna ilyo mulesala ifya kucita mu bumi. Lekeni tulande  pa fintu ifyo twingasala ukucita mu bumi e lyo na pa fyo twingafifikilisha.

Finshi Mwingasala Ukucita?

6. Buyo nshi ubwacindama ubo mulingile ukukwata, kabili mulandu nshi?

⁶ Nga fintu icipande cafumineko calandile, ubuyo bwacindama ubo mwe bacaice mufwile ukukwata, bwa kushininkisha mwe bene ukuti ifyo Baibolo yalandapo fya cine. (Rom. 12:2; 2 Kor. 13:5) Abacaice banenu nalimo basumina ukuti ifintu fyasangwike fye nelyo bacetekela ifisambilisho fya bufi pantu e fyo babeba ukusuminamo uko bapepa. Lelo imwe tamufwile ukucetekela icili conse pa mulandu fye wa kuti bambi nabamweba ukuti e fyo musuminemo. Muleibukisha ukuti Yehova afwaya mulemubombela no kutontonkanya kwenu konse. (Belengeni Mateo 22:36, 37.) Shifwe wa ku muulu tafwaya mwacetekela fye ukwabula ukushininkisha ukuti ifyo mwasuminamo fya cine.—Heb. 11:1.

7, 8. (a) Finshi mwingafwaya ukutendeka ukucita ino ine inshita ifingakosha icitetekelo cenu? (b) Finshi fikafumamo nga mwatendeka ukucita ifi fintu?

⁷ Pa kuti icitetekelo cenu cilekoselako, kuti cawama mwasala ifyo mwingatendeka ukucita ino ine inshita. Cimo ico mwingatendeka ukucita, kulapepa cila bushiku. Pa kuti mwilalanda pa fintu fimo fine mu mapepo yenu, mufwile ukulemba nelyo ukutontonkanya pa fyacicitika muli ubo bushiku ifyo mwingatemwa ukulandapo ilyo mulepepa. Ilyo mulepepa mwilalanda fye pa mafya mwacikwata, lelo mulelanda na pa fisuma ifyacicitika. (Fil. 4:6) Cimbi ico mwingafwaya ukulacita, kulabelenga Baibolo cila bushiku. Bushe mwalishiba ukuti nga mulebelenga amabula 4 cila bushiku, kuti mwapwisha ukubelenga Baibolo yonse mu mwaka fye umo? * Pa Amalumbo 1:1, 2, patila: ‘Alipaalwa umuntu uusekela mu mafunde ya kwa Yehova, kabili abelenga amafunde  yakwe no kulayatontonkanyapo akasuba no bushiku.’

⁸ Ica butatu ico mwingatendeka ukucita ino ine inshita, kulapekanya pa kuti muleasukapo pa kulongana konse. Nalimo pa kubala kuti mulebelenga fye icasuko nelyo ilembo. Mu kuya kwa nshita, kuti mwafwaya ukula-asuka mu mashiwi yenu. Lyonse ilyo mwayasukapo ninshi mwatuula umutuulo kuli Yehova. (Heb. 13:15) Ilyo mwatendeka ukucita ifi twalandapo, umwenso ukapwa, kabili mukalatasha sana Yehova, e lyo kabili mukafwaya no kusala ifyo mwingatemwa ukucita ku ntanshi.

9. Nga tamulaba kasabankanya, buyo nshi mwingakwata?

⁹ Finshi mwingafwaya ukucita inshita ya ku ntanshi? Nga tamulatendeka ukushimikila imbila nsuma ku cintubwingi, kuti mwakwata ubuyo bwa kuba kasabankanya wa Bufumu. Nga mwafishapo ubu buyo bwacindama, kuti cawama mwalashimikila cila mweshi. Kuti cawama mwasambilila ne fya kubomfya Baibolo ilyo muleshimikila. Nga mwacita ifi mukalaipakisha sana ukushimikila. Lyena kuti mwatendeka ukushimikila ku ng’anda ne ng’anda pa nshita iikalamba nelyo fye ukufwaisha ukulatungulula isambililo lya Baibolo. Nga mwaba kasabankanya ushabatishiwa, ubuyo mwingakwata, kufikapo ukubatishiwa no kuba Inte ya kwa Yehova Lesa iyaipeela.

10, 11. Finshi abacaice ababatishiwa bengasala ukucita ku ntanshi?

¹⁰ Nga muli babomfi ba kwa Yehova ababatishiwa, moneni fimo ifyo mwingafwaya ukucita ku ntanshi. Limo kuti muleya mu kwafwako ifilonganino fimbi ukushimikila mu fifulo umo tabashimikila sana. Na kabili, kuti mwabomfya amaka yenu ilyo muli no bumi ubutuntulu ku kubomba bupainiya bwa kwafwilisha nelyo ubwa nshita yonse. Bapainiya abengi ababa ne nsansa bakamweba ukuti, ukubomba umulimo wa nshita yonse cintu icisuma icilanga ukuti muleibukisha Kalenga wenu mu bwaice bwenu. Ifi e fyo mwingacita ilyo muleikala pa bafyashi. Icilonganino mulonganamo cikamwenamo nga mwatendeka ukubombako iyi milimo.

¹¹ Fimo ifyo mwingasala ukucita ku ntanshi kuti fya-afwa ne filonganino fimbi. Ku ca kumwenako, kuti mwasala ukubombela ku cifulo cimbi nelyo mu calo cimbi umo bakashimikila ba mbila nsuma bacepa. Kuti mwabombako no mulimo wa kukuula Amayanda ya Bufumu na maofeshi ya Nte sha kwa Yehova mu fyalo fimbi. Kuti mwabombako no mulimo wa pa Bethel nelyo bumishonari. Lelo icacindama sana ico mufwile ukucita pa kuti ku ntanshi mukabombeko imilimo iingi iyo twalandapo, kubatishiwa. Nga tamulabatishiwa, tontonkanyeni pa fyo mufwile ukucita pa kuti mukacite ici cintu cacindama mu bumi bwenu.

Ico Mufwile Ukubatishiwilwa

12. Finshi filenga bamo ukubatishiwa, kabili cinshi cishawamina ukubatishiwa pali iyo milandu?

¹² Bushe kuti mwatila cinshi ulubatisho lwabelako? Bamo batila ukubatishiwa kuti nalimo kwabacingilila ku kucita ulubembu. Bambi bafwaya ukubatishiwa pa mulandu wa kuti ifibusa fyabo fyalibatishiwa. Abacaice bambi ico babatishiwilwa kufwaya fye abafyashi ukumfwa bwino. Lelo, ulubatisho te cipangano icingamulesha ukucita ifintu ifyo mwingatemwa ukucita mu bumfisolo; kabili tamufwile ukubatishiwa pa mulandu fye wa kuti bamo balemupatikisha. Mufwile ukubatishiwa fye ilyo mwaishiba ifyabimbwamo mu kuba Inte ya kwa Yehova na lintu mwaipekanya ukuba Nte kabili mufwile ukuitemenwa fye mwe bene.—Luk. Mil. 5: 4, 5.

13. Mulandu nshi mulingile ukubatishiwilwa?

¹³ Umulandu umo tubatishiwilwa wa kuti Yesu aebele abasambi bakwe ‘ukulenga abasambi, no kubabatisha.’ Kabili alitupeele ica kumwenako ilyo abatishiwe. (Belengeni Mateo 28:19, 20; Marko 1:9.) E lyo kabili ulubatisho lulafwaikwa sana ku bafwaya ukwisapusuka. Pa numa ya kulanda pali filya Noa akuulile icibwato umo ena no ulupwa lwakwe bapusukile ilyo kwali Ilyeshi, umutumwa Petro atile: “Icalingana  ne ci e cilemupususha nomba, e kutila, ulubatisho, ukupitila mu kubuuka kwa kwa Yesu Kristu.” (1 Pet. 3: 20, 21) Lelo ico tacilolele mu kuti ulubatisho lwabelako fye ukumucingilila ku bonaushi. Ico mufwile ukubatishiwilwa, kutemwa Yehova no kufwaya ukumubombela no mutima wenu onse, no mweo wenu onse, no kutontonkanya kwenu konse, na maka yenu yonse.—Marko 12:29, 30.

14. Mulandu nshi bamo batiinina ukubatishiwa, lelo finshi fingamukoselesha?

¹⁴ Bamo tabafwaya ukubatishiwa pantu balatiina abati napamo kuti baisatamfiwa mu cilonganino. Bushe na imwe mulatiina ico? Uyo mwenso tawabipa. Cilangililo ca kutila mwalishiba ukuti ukubatishiwa no kuba Inte ya kwa Yehova cintu icacindama sana. Bushe kwaliba na cimbi icilenga muletiina? Nalimo tamulacetekela sana ukuti ukukonka ifyo Lesa atweba cintu icisuma sana. Nga ni fyo tontonkanyeni pa ficitika kuli balya abashumfwila ifyo Baibolo ilanda. E lyo napamo kuti mwalitemwa amafunde ya kwa Lesa lelo mumona kwati kuti mwafilwa ukuyakonka. Ico na co tacalubana, pantu cilanga fye ukuti mwali-icefya. Na kuba Baibolo ilanda ukuti abantunse bonse abashapwilika bakwata imitima ya bucenjeshi. (Yer. 17:9) Na lyo line kuti mulekonka amafunde nga ca kuti ‘muleisunga ukulingana ne cebo ca kwa Lesa.’ (Belengeni Amalumbo 119:9.) Nga kwaliba icili conse icilenga muletiina ukubatishiwa, mulingile ukubombelapo. *

15, 16. Kuti mwaishiba shani nga namulinga ukubatishiwa?

¹⁵ Kuti mwaishiba shani nga namulinga ukubatishiwa? Cimo icingamwafwa kuyipusha amepusho pamo nga aya: ‘Bushe kuti nalondolola ifyo Baibolo isambilisha, filya ifyo umuntu alingile ukubalilapo ukwishiba? Bushe ndaya mu kushimikila abafyashi bandi nelyo tabele? Bushe ndaya mu kulongana kwa Bwina Kristu lyonse? Bushe kuti naibukishapo inshita iili yonse ilyo nakeene ukukonkelela abanandi? Bushe kuti natwalilila ukubombela Yehova nangu abafyashi bandi na banandi baleka ukumubombela? Bushe nalipepelapo pali bucibusa bwandi na Lesa? E lyo bushe nalimweba Yehova mwi pepo ukufuma pa nshi ya mutima ukuti ndefwaya ukuipeela kuli ena?’

¹⁶ Ulubatisho lulaalula imikalile ya muntu, kanshi umuntu afwile ukutontonkanyapo sana ilyo ashilabatishiwa. Bushe namukosa mu fya kwa Lesa ica kuti nomba kuti mwabatishiwa? Icikalanga ukuti namukosa mu fya kwa Lesa, te kulanda fye amalyashi ayasuma pa cisebele nelyo ukwasuka bwino pa kulongana. Mufwile ukulacita ifintu ukulingana ne fishinte fyaba mu Baibolo. (Belengeni AbaHebere 5:14.) Nga namufikapo ukubatishiwa, ninshi muli no kukwata ishuko ilikalamba sana ilya kubombela Yehova no mutima wenu onse e  lyo no kulaikala ukulingana ne fifwaikwa ku baipeela kuli ena ukufuma pa nshi ya mutima.

17. Cinshi cikalamwafwa ukucimfya amesho ayengalaisa nga mwabatishiwa?

¹⁷ Ilyo mwabatishiwa fye, kulaba ukumfwa bwino sana ukubombela Lesa. Lelo nga mwabatishiwa fye kukalaba ifikalaesha icitetekelo cenu na bucishinka bwenu. (2 Tim. 3:12) Mukalakwata ubwafwilisho ilyo mulepita mu fya kwesha. Ebeni abafyashi benu ukumupandako amano. Lombeni ubwafwilisho ku bakosa mu cilonganino. Muleumfwana na balya abengamutungilila. Te kwesha ukulaba ukuti Yehova alamusakamana, kabili akalamupeela amaka ya kucimfya ifya kwesha.—1 Pet. 5:6, 7.

Mukafishapo Shani Ifyo Mwapanga Ukucita mu Bumi?

18, 19. Kuti mwanonkelamo shani mu kubebeta ifyo mwabikako sana amano mu bumi?

¹⁸ Bushe mumona kwati tamukwata inshita ya kucita ifyo mufwaya mu bumi nangu mwaesha shani? Nga e fyo mumona, mulingile ukubebeta ifyo mwabikako sana amano mu bumi. Natulangilile: Buuleni imbeketi no kubikamo amabwe ayakalamba. Lyena bikenimo umucanga. Mu mbeketi mwalaisula amabwe no mucanga. Nomba fumyenimo amabwe no mucanga, e lyo mufibwekeshemo, lelo mubalilepo ukubikamo umucanga e lyo mukonkeshepo amabwe. Te mabwe yonse yalaingila. Ne calenga ni co mwacibalilapo ukubikamo umucanga.

¹⁹ E ficitika na lintu mule-esha ukubomfya inshita. Nga mwatangisha ukwangala, tamwakulakwata inshita ya kucita ifya kwa Lesa, ifintu ifyacindama sana mu bumi bwenu. Lelo nga mwakonka filya Baibolo itufunda ukuti “mwishibe bwino bwino ifyacilapo ukucindama,” mukalakwata inshita ya kucita ifya Bufumu e lyo ne ya kwangala.—Fil. 1:10.

20. Nga kuli ifilemusakamika ilyo mule-esha ukulacita ifyo mwapanga ukucita mu bumi, cinshi mufwile ukucita?

²⁰ Ilyo mule-esha na maka ukucita ifyo mwapanga ukucita mu bumi, pamo fye no kubatishiwa, kwakulaba ifya kulamusakamika e lyo ne fyo mwakulatwishika. Nga caba ifyo, ‘mulepoosa icisendo cenu pali Yehova, na o akalamukosha.’ (Amalu. 55:22) Pali ino nshita namukwata ishuko lya kubombako umulimo wacindama sana uwa kushimikila no kusambilisha abantu uulebombwa mu fyalo fyonse. (Imil. 1:8) Nga mulefwaya kuti mwalatambako fye uko abantu baleshimikila nelyo kuti mwabombako na imwe bene. Mwishingashinga ukubomfya amaka yenu ku kutungilila ifya Bufumu. Mukaimwena ifyo cawama ukubombela “Kabumba wenu mu nshiku sha bwaice bwenu.”—Luk. Mil. 12:1, New International Version.

[Amafutunoti]

Kuti Mwayasuka Shani?

• Mulandu nshi mufwile ukusalila ifya kucita mu bumi?

• Finshi fimo mwingasala ukucita mu bumi?

• Cinshi mwingacita pa kufikapo ukubatishiwa?

• Bushe ukubebeta ifyo mwabikako sana amano kuti kwamwafwa shani ukufikilisha ifyo mufwaya ukucita mu bumi?

[Ifipusho]

[Icikope pe bula 13]

Bushe mwalikwata ubuyo bwa kubelenga Baibolo cila bushiku?

[Icikope pe bula 15]

Cinshi cingamwafwa ukufikapo ukubatishiwa?

[Icikope pe bula 16]

Cinshi mwasambilila kuli ici cilangililo?