Mwe Bacaice—Mwilakonkelela Abanenu
Mwe Bacaice—Mwilakonkelela Abanenu
“Imilandile yenu yonse ibe . . . iyalungwamo umucele, pa kuti mwishibe ifya kwasuka bwino umuntu onse.”—KOL. 4:6.
1, 2. Bushe ukukanakonkelela abanabo kulenga abacaice abengi ukumfwa shani, kabili mulandu nshi?
UKWABULA no kutwishika tamwaumfwa fye ukuti abantu bamo balafwaya abanabo balekonkelesha ifyo bacita. Na kuba na imwe kufwile kulaba abamwebapo ukucita ifyo mwaishiba ukuti fyalilubana. Bushe ico nga cacitika mumfwa shani? Christopher, uwa myaka 14 atile: “Limo ndafwaya ukwingila pa nshi e lyo limo ndafwaya fye no kucitako ifyo abana be sukulu banandi balecita pa kuti fye naba nga bena.”
2 Bushe abanenu balalenga mwalafwaya ukucita ifyabipa? Mulandu nshi cibela ifyo? Bushe napamo mufwaya bamutemwe? Kwena tacabipa ukufwaya ukutemwikwa ku banenu. Na kuba, na bakalamba bene balafwaya ukutemwikwa ku banabo. Takwaba nangu umo, nampo nga mukalamba nelyo mwaice uufwaya abantu ukumutaluka. Lelo, ukulanda fye icishinka, te bonse bakamutemwa nga mulekaana ukucita ifyabipa. Ifyo fyalicitike na kuli Yesu. Na lyo line, Yesu lyonse alecita icalungama. Bamo balemukonka no kuba abasambi bakwe, lelo bambi balimusuulile kabili ‘balemumona uushacindama.’—Esa. 53:3.
Ukufwaisha Ukukonkelesha Bambi Kuti Kwalenga Mwacita Cinshi?
3. Mulandu nshi cabipila ukukonkelesha abanenu?
3 Inshita shimo kuti mwalafwaisha ukucita ifyo abanenu bacita pa kuti bamutemwe. Ico kuti calubana. Abena Kristu tabafwile ukuba ‘nga bana abanono, abasendwa nga ku mabimbi.’ (Efes. 4:14) Abana abanono balitemwa ukukonkelesha ifyo bambi balecita. Lelo na imwe mwe bacaice mukasuka mukakule. E ico nga mwasumina ukuti ifyo Yehova amweba ukuti mulecita e fingamwafwa, ninshi mufwile ukulakonka ifyo fine. (Amala. 10:12, 13) Nga tamulecita ifyo ninshi mwaleka ukuitungulula. Abo bene mulekonkelesha e bakatendeka ukumutungulula.—Belengeni 2 Petro 2:19.
4, 5. (a) Bushe cali shani pa kuti Aarone acite ifyo abena Israele bamwebele, kabili cinshi twingasambililako kuli ici? (b) Finshi napamo abanenu bengacita pa kumupatikisha ukucita ifyo balefwaya?
4 Inshita imo, Aarone munyina Mose alicitile icabipa ico abantu bamwebele ukucita. Ilyo abena Israele bamwebele ukubapangila icilubi ca kupepa, alipangile. Aarone tali camwenso pantu inshita imo alile na Mose ku kumonana na Farao umwaume wakwate sana amaka mu Egupti. Ilyo baile, Aarone alandile icebo ca kwa Lesa ukwabula umwenso kuli Farao. Lelo ilyo abena Israele banankwe bamupatikishe ukupanga icilubi, alifililwe ukukaana. Ala tacanguka ukucita icalungama ilyo abanensu batutunka! Aarone alishipile no kulanda na Farao lelo ilyo abena Israele banankwe bamupatikishe ukucite icabipa, alifililwe ukukaana.—Ukufu. 7:1, 2; 32:1-4.
5 Nga fintu twamona ku fyacitile Aarone, abakonkelesha abanabo, te baice fye na balya abatemwa ukucita ifyabipa lelo na balya abafwaya no mutima onse ukucita icalungama ukubikako fye na imwe, kuti bafilwa ukuti bakaane ukukonkelesha abanabo. Abanenu kuti bamutiinya atemwa ukumutunganyapo fimo nelyo ukumusaalula pa kuti fye mucite icabipa. Te mulandu ne fyo bacita pa kumupatikisha, cilafya ukukanabakonkelela. Ica ntanshi icingamwafwa ukukanabakonkelela, kucetekela sana ifyo mwasuminamo.
“Muleilinga mwe Bene”
6, 7. (a) Mulandu nshi cacindamina ukushininkisha ukuti ifyo mwasuminamo fya cine, kabili cinshi cingamwafwa ukushininkisha ifyo? (b) Mepusho nshi mwingayipusha pa kuti mushininkishe ukuti ifyo mwasuminamo fya cine?
6 Pa kuti mulekaana ukukonkelesha abanenu, intanshi mufwile ukucetekela sana ukuti ifyo mwasuminamo ne fyo mukonka e fyalungama. (Belengeni 2 Abena Korinti 13:5.) Ukucetekela sana ifyo mwasuminamo kukalenga mukashipe nangu ca kutila mwalikwata umwenso. (2 Tim. 1:7, 8) Lelo nangu ca kutila umuntu alishipa, kuti cayafya ukupampamina pa kucita icalungama nga tacetekela sana ukuti calilungama. E ico shininkisheni ukuti ifyo bamusambilisha ukufuma mu Baibolo e cine. Tampileni pali filya tubalilapo ukusambilila. Ku ca kumwenako, mwalisumina muli Lesa kabili mwalyumfwa ne calenga bambi ukusumina ukuti e ko aba. Kanshi kuti cawama mwayipusha ukuti, ‘Cinshi calenga nsumine ukuti Lesa e ko aba?’ Ico mufwile ukuyipushisha ici cipusho, te mulandu wa kutwishika ukuti Lesa e ko aba, lelo kufwaya ukukosha icitetekelo cenu. Kuti cawama mwayipusha no kuti, ‘Naishiba shani ukuti Amalembo yafuma kuli Lesa?’ (2 Tim. 3:16) ‘Cinshi calenga nshininkishe ukuti shino ni “nshiku sha kulekelesha”?’ (2 Tim. 3:1-5) ‘Cinshi calenga nshininkishe ukuti mu fyo Yehova atweba ukucita mwaliba ubusuma?’—Esa. 48:17, 18.
7 Napamo kuti mwatiina ukuyipusha ifi fipusho pa mulandu wa kuti mulemona kwati tamwingasanga ifyasuko. Lelo ukucita ifyo kuti kwaba kwati kutiina ukulolesha pali kalya akalanga apo amafuta yapela mu motoka, pantu muletiina ukuti kalalanga ati amafuta yapwa! Nga tamuli amafuta mwi tanki lya motoka mufwile ukwishiba pa kuti mubikemo. Na imwe nga mwamona ukuti tamucetekele sana fimo ifyo mwasuminamo, mufwile ukucitapo cimo.—Imil. 17:11.
8. Londololeni ifyo mwingacita pa kuti mushininwe sana ukuti cisuma ukukonka ifunde lya kwa Lesa ilitweba ukutaluka ku bulalelale.
8 Moneni ica kumwenako. Baibolo imukoselesha ‘ukufulumuka ubulalelale.’ Yipusheni amuti, ‘Cinshi cawamina ukukonka ili ifunde?’ Tontonkanyeni pali fyonse ifilenga abanenu ukucita ubulalelale. Tontonkanyeni na pa fyalenga Baibolo ukusosa ukuti uucita ubulalelale “abembukila umubili wakwe.” (1 Kor. 6:18) Nomba tontonkanyeni pa fyalenga, no kuyipusha ukuti: ‘Cinshi cingawama ukucita? Bushe mu kucita ubulalelale mulafuma ifisuma?’ Tontonkanyenipo na kabili pali uyu mulandu no kuyipusha ukutila, ‘Kuti naumfwa shani nga nacita ubulalelale?’ Abanenu kuti baumfwa bwino, lelo nga muli na bafyashi benu nelyo na Bena Kristu banenu ku Ng’anda ya Bufumu, kuti mwaumfwa shani? Kuti mwaumfwa shani ilyo mulepepa kuli Yehova? Bushe kuti mwafwaya ukonaula bucibusa bwenu na Lesa pa mulandu fye wa kufwaya abana be sukulu banenu bamutemwe?
9, 10. Bushe ukucetekela sana ukuti ifyo mwasuminamo fya cine kukamwafwa shani ukupampamina pa kucita icalungama ilyo muli na banenu?
9 Nga uli mupungwe, ninshi naufika pa nshita ilyo “amaka yobe aya kupelulula” yalefulilako. (Belengeni Abena Roma 12:1, 2.) Iyi nshita ufikilepo e nshita ufwile ukutontonkanyapo sana pa fyo cacindamina ukuba Inte ya kwa Yehova. Ukucita ifyo kukakwafwa ukushininkisha ukuti ifyo wasumina fya cine. Lyena nga kwaba abakupatikisha ukucita ifyabipa, ukabakanina ilyo line fye ukwabula no kuwayawaya. Ukaba nga nkashi umo uwacaice uwatile: “Nga napampamina pa kucita icalungama, ninshi ndelanga abanandi ifyo naba. Te kutila nkonka fye ‘ifyo batweba uko mpepa.’ Ifyo ncita filanga ifyo ntontonkanya, ifyo mfwaya ukucita, imibele yandi e lyo ne fyo nacindamika mu bumi.”
10 Nga fintu mwamona mulingile ukushipa pa kuti mucite icalungama. (Luka 13:24) Lelo nga mulatwishika nga ca kuti mu kucita ifyo mulafuma ifisuma, muleibukisha ukuti: Nga mulemoneka kwati mwaumfwa ububi nelyo insoni pa kukanacita ifyo balemutunka ukucita, cikeshibikwa ku banenu, kabili bakacilamo no kumupatikisha. Nomba nga mwashipa no kulanda ukufuma pa nshi mutima, mukapapa ifyo abanenu bakaleka bwangu ukumutunka.—Linganyeniko Luka 4:12, 13.
‘Muletontonkanya pa Kwasuka’
11. Busuma nshi bwaba mu kutontonkanishisha kabela ifya kucita ilyo bakutunka ukucita fimo?
11 Na cimbi icacindama ico mufwile ukucita pa kuti mwilakonkelesha abanenu, kuipekanya. (Belengeni Amapinda 15:28.) Ukuipekanya, kutontonkanishisha kabela pa fingacitika. Limo ukutontonkanya pa fingacitika ne fyo wingacita kulafwa ukukanaba mu bwafya ubukalamba. Ku ca kumwenako, tutile wamona abanobe ba ku sukulu akatalamukila balepepa fwaka. Bushe nga mwakumana kuti bakweba ukupepako? Cinshi wingacita nga waishiba ukuti e fyo calaba? Pa Amapinda 22:3 patila: “Uwasalapuka nga amona ububi alabelama.” Nga wapita inshila imbi, ninshi waicingilila. Nga wacita ifyo ninshi tauli camwenso, lelo ninshi wacita ica mano.
12. Kuti wayasuka shani abanobe nga bakutunka ukucita icabipa?
12 Ni shani nga ca kuti cayafishisha fye ukutaluka abengakutunka? Tutile umunobe akwipusha ati, “Iye, na nomba ucili nacisungu?” Kuti cawama wakonka ifilanda ilembo lya Abena Kolose 4:6, ilitila: “Imilandile yenu yonse ibe iisuma, iyalungwamo umucele, pa kuti mwishibe ifya kwasuka bwino umuntu onse.” Nga fintu ili ilembo lyalanda, kuti wayasuka icipusho ca musango yu ukulingana ne fyo ifintu fili. Napamo te kuti utendeke ukulondolwela uwa kwipusha ifyo Baibolo ilanda apo pene fye. Limbi kuti wayasuka fye amashiwi yanono epela. Ku ca kumwenako, pa kwasuka ici cipusho kuti watila fye, “Ee ncili nacisungu,” nelyo ati “Ifyo fya kwishiba ne mwine.”
13. Mulandu nshi ukwishiba ifyo umunenu aleipushisha kwingamwafwila ukwasuka bwino nga amusaalula?
13 Yesu ilingi line aleasuka mu mashiwi ayanono fye nga amona ati abalemwipusha tabalefwaya ukumfwa. Na kuba ilyo Herode amwipwishe, Yesu tayaswike. (Luka 23:8, 9) Ilingi cilawama ukukana-asuka nga bamwipusha icipusho ca kumusaalula. (Amapi. 26:4; Luk. Mil. 3:1, 7) Lelo limo kuti camoneka ukutila ico umunenu aipushisha ni co alefwaya ukwishiba ifyo mwasuminamo, napamo ifyo mwaishiba pa bulalelale, nangu ca kutila uyo muntu limbi alimusaalulapo. (1 Pet. 4:4) Nga cabe fyo kuti cawama mwamulondolwela bwino bwino ifyo mwasambilila mu Baibolo. Nga alefwaya ukwishiba, te kwesha ukumfwa umwenso wa kumulondolwela. Lyonse ‘muleipekanya ukwasuka.’—1 Pet. 3:15.
14. Kuti wa-afwa shani umunobe ukutontonkanya pa co alekutunka ukucita?
14 Limo kuti walanda ifingalenga umunobe atontonkanyapo pa fyo alecita. Lelo taufwile ukulanda ifya kumukalifya. Ku ca kumwenako, nga ca kutila umwana we sukulu munobe akutambika fwaka, kuti watila, “Awe nshilefwaya,” e lyo walundapo ukuti, “Nalemona kwati ifi iwe wacenjela teti upeepe fwaka!” Bushe wamona ifyo wingamwafwa ukutontokanya pa co acita? Ukucila ukutendeka ukumulondolwela ico ushipeepela fwaka, kuti wa-afwa umunobe ukutontonkanya pa co apeepela. *
15. Ni lilali cingawama ukufumapo fye pa banenu ilyo balemutunka ukucita ifyabipa, kabili mulandu nshi?
15 Nomba tutile abanenu batwalilila fye ukumutunka na pa numa ya kwesha na maka ukukaana. Nga caba ifyo, mulingile ukufumapo fye. Nga mwaba nabo inshita iitali, kuti mwasuka mwacita ifyo balemutunka. E ico fumenipo. Nga mwacita ifyo te kutila abanenu nabamucimfya pantu ninshi tamubasuminishe ukumutungulula. Na kuba ninshi mwalenga umutima wa kwa Yehova ukusekelela.—Amapi. 27:11.
Beni na ‘Mapange Ayengalenga Mwabomba bwino’
16. Bushe ukutunkwa ukucita icabipa kuti kwafuma shani na ku Bena Kristu banenu?
16 Limo abengafwaya mwacita ifibi, bacaice ababombela na Yehova. Ku ca kumwenako, kuti mwacita shani nga mwaya ku parte iyo umuntu wa musango yu apekenye e lyo mwasanga ati takuli na bakalamba aba kulolekesha pa filecitika? Tutile uwacaice utila Mwina Kristu aleta ubwalwa ku parte lelo iwe na banobe bambi tamulakumanya imyaka iyo basuminisha pa kuti umuntu atendeke ukunwa ubwalwa? Mu fingi ifingacitika iwe ukafwaikwa ukubomfya kampingu yobe iyasambilishiwa Baibolo. Umwina Kristu umo uwacaice atile: “Ine no mwaice wandi inshita imo twalifumineko uko twaile mu kutamba filimu ilyo twamwene ukuti muli ukutukana sana. Bambi abo twali nabo balishele. Abafyashi besu balitemenwe sana pa fyo twacitile. Lelo bambi mwi bumba balifulilwe abati ifyo twacitile fyalengele bamoneka kwati bena tabapata ifyabipa.”
17. Nga mwaya kumo na banenu, cinshi mwingacita icingamwafwa ukukonka amafunde ya kwa Lesa?
17 Nga fintu twamona mu fyo twalandapo, ukukonka ifyo kampingu wenu uwasambilishiwa Baibolo alemweba kuti kwalenga bambi ukumona kwati tamwaba bwino. Lelo mulingile ukupampamina pa kucita ico mwishibe ukuti e calungama. Muleipekanya. Nga mwaya kumo na banenu, pangileni libela ifyo mwalafumako nga ca kuti ifintu fyabipa. Abacaice bamo balomfwanina limo na bafyashi babo ukuti, nga bafwaya ukufumako bwangu kuti babatumina fye foni. (Amalu. 26:4, 5) Amapange ya musango yu yalalenga umuntu abomba bwino.—Amapi. 21:5.
‘Sekelela Ilyo Ucili Umulumendo’
18, 19. (a) Cinshi cimulanga ukuti Yehova afwaya imwe ukuba ne nsansa? (b) Bushe Lesa omfwa shani nga mwakaana ukukonkelesha abanenu ilyo bamutunka?
18 Yehova amupangile mu musango wa kuti muleipakisha ubumi, kabili afwaya imwe ukuba ne nsansa. (Belengeni Lukala Milandu 11:9.) Ibukisheni ukuti ifyo abanenu baipakisha, “busuma bwa pa kashita fye ubwa lubembu.” (Heb. 11:25) Lesa wa cine afwaya imwe ukuipakisha ifintu ifisuma sana pa nshita ntali. Afwaya mukabe ne nsansa ku ciyayaya. E ico nga mwatunkwa ukucita ifyo mwaishiba ukuti fibi kuli Lesa, ibukisheni ukuti ifyo Yehova amweba ukucita e fingamuletela insansa.
19 Apo muli bacaice, mufwile ukwishiba ukuti abanenu nangu bengamutemwa shani, abengi tabakaleibukisha ne shina lyenu nga papita imyaka. Lelo nga mulekaana ukubakonkelela, Yehova akulamona, kabili ena akulamwibukisha kabili takalabe bucishinka bwenu. ‘Akamwiswila ifipunda fya mu muulu no kumupongolwela amapaalo mpaka kukabule incende apa kubika amapaalo yambi.’ (Mal. 3:10) E lyo kabili akulamupeela umupashi wakwe uwa mushilo pa kuti ulemukosha. Cine cine Yehova kuti alemwafwa ukukanakonkelela abanenu!
[Futunoti]
^ para. 14 Moneni ifyebo ifitila “Ifyo Nkacita Abanandi nga Balefwaya Mbakonkelele” ifyaba pa mabula 132 na 133, mu citabo citila Ifipusho Abacaice Bepusha ne Fyasuko Fingabafwa, Ibuuku 2.
Bushe Muleibukisha?
• Bushe cilanguka ukukaana abanensu nga baletutunka?
• Bushe ukucetekela sana ifyo mwasuminamo kuti kwamwafwa shani ukukanakonkelela abanenu?
• Kuti mwaipekanya shani pa kuti mwishibe ifya kucita abanenu nga bamutunka?
• Mwaishiba shani ukuti Yehova alatemwa nga mwaba aba cishinka?
[Ifipusho]
[Icikope pe bula 8]
Cinshi calengele Aarone asumine ukupanga umwana wa ng’ombe?
[Icikope pe bula 10]
Muleipekanya—Tontonkanishisheni kabela ifya kulanda