“Natupeele Kuli Yehova Umutuulo”

UMUNTU nga amucitila icisuma, mulanga shani ukutila mwatasha? Moneni ifyo abena Israele abailelwa ubulwi balangile ukuti batasha pa numa ya kulwa na bena Midiani. Ubu bulwi bwaliko pa numa ya lubembu Israele abembwike ukukuma kuli Baali wa ku Peore. Lesa alengele abantu bakwe bacimfya ubulwi, kabili abashilika 12,000 na bena Israele bonse balyakene ifyo basendele mu bulwi. Ukulingana ne fyo Yehova abebele, abashilika balipeeleko bashimapepo fimo pa fyo bapokolwele, na bena Israele bambi, balipeeleko fimo ku bena Lebi.—Impe. 31:1-5, 25-30.

Lelo abailelwa ubulwi balefwaya ukupeela na fimbi ifingi. Baebele Mose ati: “Ababomfi benu nabapenda abaume ba bulwi abali mu minwe yesu kabili tapabulile umuntu nangu umo pali ifwe.” E ico bapingwilepo ukupeela Yehova ifipe fya golde ne fintu fimbi ifingi. Ifipe fya golde fyonse fyafinine amakilogramu 190.—Impe. 31:49-54.

 Na pali lelo abantu abengi balafwaya sana ukutasha pa fyo Yehova abacitila. Na kuba, te balya fye abaipeela ukubombela Lesa abatasha. Ku ca kumwenako, moneni ifyacitile namutekenya wa basi umo uwale-ensha abaleya ku kulongana ku cibansa ukwabelele ukulongana kwa fyalo ifingi, ukwaliko mu Bologna, ku Italy mu 2009. Pa mulandu wa kuti alibesenshe bwino kabili aali uwafuuka, abo aletwala ku cibansa balimulembele kardi wa kumutashishapo no kumupeelako kandalama akanono pamo ne citabo ca Bushe Cinshi Baibolo Isambilisha? Namutekenya atile: “Kardi ne citabo fyena nalapoka, lelo indalama nabwesha pantu ndefwaya ukupeela ubupe pa kuti mukatwalilile ukubomba umulimo uusuma uo mulebomba. Nangu ca kutila nshili Nte ya kwa Yehova, ndefwaya ukusangwilako pantu nalimona ukuti mucita ifintu pa mulandu wa kutemwa.”

Nga ca kutila mulefwaya ukutasha pa fyo Yehova amucitila, kuti mwalanga uko ukutasha pa kupeela ubupe bwa kubomfya mu mulimo wa mwi sonde lyonse uo Inte sha kwa Yehova shibomba. (Mat. 24:14) Inshila bamo basala ukupeelelamo ubupe nashilandwapo muli aka kabokoshi.

[Akabokoshi pe bula 20, 21]

IFYO BAMO BASANGULA

IMISANGULO YA MULIMO WA MWI SONDE LYONSE

Abengi balapaatwilako libela, nelyo ukupekanishisha libela indalama sha kubika mu tubokoshi twa misangulo utwalembwapo ati “Umulimo wa mwi Sonde Lyonse.”

Cila mweshi, ifilonganino filatuma ishi ndalama ku maofeshi ya Nte sha kwa Yehova aya mu calo cabo. Imisangulo ya kuitemenwa iya ndalama na yo kuti yatumwa mu kulungatika ku Watch Tower Society, Attention Treasury, P. O. Box 33459, Lusaka 10101. (Imisangulo ilandilwepo pe samba kuti yatumwa na ku maofeshi ya Nte sha kwa Yehova ayabela mu calo mwikala.) Umuntu nga atuma cheke ukubomfya iyi adresi, alingile ukulemba ukuti abakapoka indalama ni ba “Watch Tower Society.” Abalefwaya kuti basangula ne fibeekobeeko nelyo ifipe fimbi ifya mutengo. Uulepeela ifya musango uyu, afwile ukufituma pamo na kalata iyalinga fye iilelondolola ukuti ifyo atumine ku maofeshi ya Nte sha kwa Yehova, bupe.

UKUPEKANYA UKUPEELA MU KUITEMENWA

Ukulunda pa kupeela indalama fye ishine, kwaliba inshila na shimbi isha kupeelelamo ku kwafwilisha umulimo wa Bufumu mwi sonde lyonse. Inshila shimo shimo ni shi:

Inshuwalansi: Umuntu kuti alembesha ba Watch Tower Bible and Tract Society of Pennsylvania ukuti e bakapoka indalama sha cipangano ca inshuwalansi nelyo isha penshoni.

Indalama sha ku Banki: Umuntu kuti alemba icipangano ca kuti indalama sha ku banki, ifipepala ifilanga ukuti umuntu alibikishako indalama ku banki nelyo indalama sha penshoni, fyaseekeshiwa kuli ba Watch Tower Bible and Tract Society of Pennsylvania. Nangu kuti alembesha ukuti ba Watch Tower Bible and Tract Society of Pennsylvania e bakapoka indalama ilyo umwine akafwa. Kuti acite fyo ukulingana na mafunde ye banki abikishako indalama.

Nsonsela: Bamo abakwata indalama ishingi mu twampani kuti batila nsonsela wabo aleya ku Watch Tower Bible and Tract Society of Pennsylvania nge ndalama sha bupe. E lyo bambi na bo, kuti baumana akapi no kubika pamo indalama shabo no kushitwala ku banki, e lyo batila nsonsela wabo aleya ku Watch Tower Bible and Tract Society of Pennsylvania.

Impanga ne Fikuulwa: Impanga ne fikuulwa ifyo bengashitisha kuti fyasangulwa ngo bupe, nangu fye ni ng’anda. Kuti balemba fye icipangano ca kuti ba Watch Tower Bible and Tract Society of Pennsylvania e bakaba abene ba ng’anda ilyo umwine akafwa. Ipusheni ku maofeshi ya Nte sha kwa Yehova aya mu calo cenu ilyo mushilalembesha ifipepala fya buteko ifya kupeelelapo ba Watch Tower Bible and Tract Society of Pennsylvania impanga nelyo ifikuulwa.

Ubupe bwa Kulapeelwako Akanono: Umuntu kuti akuushisha indalama mu kabungwe akabomfiwa ne Nte sha kwa Yehova. Ena nangu umuntu umbi uo alefwaya kuti alepokelelako akandalama kalinga cila mwaka mpaka akafwe.

Ifya Cishale no Kuseekesha: Umuntu kuti alemba no kusuminishanya na ba Watch Tower Bible and Tract Society of Pennsylvania ukuti nga afwa ifipe fyakwe nelyo indalama fikabe fyabo, nelyo kuti aseekesha ifipe atemwa indalama kuli ba Watch Tower Bible and Tract Society of Pennsylvania. Limo tabalipilisha imisonko nga ca kuti ifipe nelyo indalama fyaseekeshiwa ku filonganino fya mapepo.

Nge fyo amashiwi ya kuti “ukupekanya ukupeela mu kuitemenwa” yatulanga, uulesangula ukubomfya ishi nshila twalandapo afwile ukupekanishisha kabela. Nga mulefwaya ukupeela mu kuitemenwa, mulingile ukulembela ku maofeshi ya Nte sha kwa Yehova no kwipusha nelyo ukubatumina lamya.