Bushe Muleibukisha?

Bushe mwali-ipakishe ukubelenga bamagazini ba Ulupungu lwa kwa Kalinda abafumine nomba line? Moneni nga kuti mwayasuka amepusho yakonkapo:

• Nani wapangile icilonganino ca mapepo icisambilisha ukuti Lesa alilingila libela ifintu?

Imipepele ya bena Calvin ilalanda sana pa cisambilisho ca kuti Lesa alilingila libela ifintu. Ifyo Jean Cauvin (John Calvin) alesambilisha fyalisalanganine mu mipepele ya ba Reformed, ba Presbyterian, ba Congregational, na ba Puritan.—9/1, amabula 18-21.

• Bushe Kaini afumishe kwi umukashi?

Umukashi wa kwa Kaini afwile ali mwana wa kwa Efa, pantu Efa afyele “abana baume na bana banakashi.” (Ukute. 5:4)—9/1, ibula 25.

• Ni malaika nshi Lesa atumine ukutangilila abena Israele ilyo alebafumya mu Egupti? (Ukufu. 23:20, 21)

Te kuti tutwishike ukutila ulya malaika, ‘uwaishile mwi shina lya kwa Yehova’ ali libeli lya kwa Lesa, uwaishileba Yesu.—9/15, ibula 21.

• Mulandu nshi ibuuku lya 1 Abena Korinti lilandila pa nama isho baletuula ku tulubi?

Ukutuula amalambo ya nama kwali ukwacindama sana mu kusefya ukwalecitika mu matempele ya baGriki na bena Roma, lelo inama yaleshalapo mu kusefya limo baleishitisha pa maliketi. Nangu ca kutila Abena Kristu tabalepepako imipepele ya basenshi, tabalingile ukumona inama iyaleshalako ku malambo yaletuulwa ku tulubi iyo baleshitisha pa maliketi ukuti yalikowela. Umutumwa Paulo alembele ukuti: “Conse ico bashitisha pa maliketi ya nama mulelya, mwilaipusha iyo pa mulandu wa kampingu wenu; pantu ‘pano isonde pa kwa Yehova na fyonse ifyabapo.’” (1 Kor. 10:25, 26)—10/1, ibula 12.

• Milandu nshi iyo Lesa amona ukuti tayalinga iyo abantu bapeela pa kuti becitako ifikabilwa mu kupepa kwa cine?

Batila, ‘Kwalyafya sana. Nshilefwaya. Ifya kucita fyalimfulila. Te kuti mombe bwino. Bamo balinkalifya.’ Iyi te milandu ine ine iyo umuntu engafililwapo ukucita ifyo Lesa alanda.—10/15, amabula 12-15.

• Finshi fimo fimo twingacita ifingalenga ukulongana kuletukoselesha no kukoselesha bambi?

Mulepekanishisha libela. Mulelongana lyonse. Mwilacelwa. Muleisa na fyonse ifya kubomfya. Mwilacita ifingamupumfyanya. Muleasukapo. Mwila-asuka ifitali. Nga bamupeela ilyashi mulelanda. Muletasha bamunyinenwe. Mulelanshanya ilyo ukulongana takulatampa na pa numa ya kulongana.—10/15, ibula 22.

• Ni mu lyashi nshi ilya mu Baibolo ilyalanda pa mukashana, umo balumbula ubulwele bwa fibashi ubo pali lelo busanshamo ubulwele bwa Hansen?

Ibuuku lya 2 Ishamfumu icipandwa 5 lilanda pa mukashana umwina Israele, umubomfi wa mu ng’anda ya mukalamba wa bashilika ba bena Siria uwe shina lya Naamani. Apo uyu shikulu wakwe alilwele ifibashi, umukashana alandile ukuya nga aya kuli kasesema Elisha ukuti bakamundapa.—11/1, ibula 22.

• Finshi twingasambilila kuli filya Aarone akonkelele ifyo bambi bamwebele?

Ilyo Mose ali ku lupili, abena Israele baebele Aarone ukubapangila Lesa. Alikonkelele ifyo balelanda no kubapangila lesa. Ici cilelanga ukuti te misepela fye yeka iingakonkelela bambi. Na bakalamba bene abafwaya ukucita icalungama kuti bakonkelela bambi. Tufwile ukulakaana ukukonkelela bambi mu kucita ifyabipa.—11/15, ibula 8.

• Pali ifi fyakonkapo, ni cili kwi icishinka, ne ca bufi?

Satana e ko aba: cishinka. (2 Kor. 11:14) Abantu bonse nga bafwa baya ku calo ca mipashi: bufi. (Luk. Mil. 9:5) Bamalaika ba cishinka balatusakamana: cishinka. (Amalu. 34:7) Yesu alilingana na Lesa: bufi. (1 Kor. 11:3)—12/1, amabula 8-9.