Moneni Ishina mu Mukonko

ST. MORITZ. Bushe mwalilyumfwapo ili ishina? Napamo mwalilyumfwapo, pantu muli ici cifulo icabela mu mukonko witwa Engadine mu Switzerland, abantu abengi nga nshi balayako ilyo bali pa cuti. Lelo St. Moritz cifulo fye cimo pa fifulo ifingi ifyo abantu batemwa ukuyako ifyaba muli uyu mukonko wabela mu mpili shikwata imfula yabuuta pa muulu ishitwa at Alps. Ne shi mpili shabela lwa ku kapinda ka ku kulyo aka Switzerland mupepi no mupaka wa ici calo ne calo ca Italy. Muli uyu wine mukonko e mwaba na Swiss National Park umwaba ifimenwa ifingi ifisuma e lyo ne nama shalekanalekana ifileta ilumbo kuli Yehova. (Amalu. 148:7-10) Lelo ne fintu ifyabamo ifya ku kale sana mu myaka ya ba 1600 na fyo filaleta ilumbo kuli Yehova.

Pa mayanda ayengi palaba icintu icaibela ico mwingatemwa ukumona. Na ino ine nshita mukasanga balilemba ishina lya kwa Lesa pa cibumba ca nga’anda, lwa pa muulu wa cibi ca ku ntanshi.  Ku kale, abantu balitemenwe sana ukuyemfya amayanda yabo. Balelemba ifilembo pa fibumba nelyo pa mabwe. Pano pali icikope ca ng’anda mu mushi wa Bever. Amashiwi yalembwa pali iyi ng’anda kuti yapilibulwa ati: “Umwaka wa 1715. Yehova e ntendekelo kabili e mpelekesho. Lesa kuti acita ifintu fyonse kabili takuli icingacitika ukwabula ena.” Pa cishibilo ca kale palilembwa ishina lya kwa Lesa imiku ibili.

Mu mushi wa Madulain, mwaliba icipamba ca kale sana apaba amashiwi ayatila: “Amalumbo 127. Yehova nga takuulile ing’anda, ninshi abakuula baicusha fye. Lucius Rumedius. Mu Mwaka wa 1654.”

Mulandu nshi ishina lya kwa Lesa lisangilwa apali ponse muli uyu mukonko? Kale ilyo kwali ukwaluka mu fya mapepo, Baibolo yapulintilwe mu ciRomansh, ululimi lwafumine ku ciLatini ulwalelandwa mu Engadine. Na kuba, Baibolo e buuku babalilepo ukupilibula muli lulya lulimi. Abekala mushi abengi balitemenwe sana ifyali mu Baibolo. E calengele balelemba pa nse ya mayanda yabo amashina yabo e lyo na malembo yamo aya mu Baibolo apali na yalanda pe shina lya kwa Lesa.

Ukufika na lelo, ifi filembo ficili filalenga abantu baishiba ishina lya kuti Yehova no kulenga Lesa alelumbanishiwa, nangu ca kutila palipita imyaka iingi sana ukutula apo ifi filembo fyalembelwe. Abatandashi na bekashi ba muli uyu mukonko kuti cawama baishiba na fimbi pali Lesa umusuma, Yehova nga baya ku Ng’anda ya Bufumu iya Nte sha kwa Yehova mu Bever. Pali ici cikuulwa paliba ishina lya kuti Yehova.

[Abatusuminishe Ukubomfya Icikope pe bula 7]

© Stähli Rolf A/age fotostock