Muletontonkanya Sana pa fyo Yehova Amucitila

INSHITA inono pa numa ya kubuushiwa kwa kwa Yesu, abasambi bakwe babili bali pa lwendo ukufuma ku Yerusalemu ukuya ku Emao. Ibuuku lya mbila nsuma ya kwa Luka lyatila: “Ilyo balelanshanya no kulanda pa fyacitike, Yesu umwine alipaleme, alaendela pamo na bo; lelo tabamwishibe.” Lyena Yesu abebele ukuti: “‘Nga finshi mulelanshanya ili mule-enda?’ Na bo baiminine shilili, no bulanda pa menso.” Mulandu nshi babelele no bulanda? Abasambi bakwe balemona kwati Yesu ali no kulubula Israele ukufuma ku mitekele ya Bena fyalo pali ilya ine nshita, lelo alifwile ilyo talabalubula. Kanshi e calengele babe no bulanda.—Luka 24:15-21; Imil. 1:6.

Yesu atendeke ukupelulushanya na basambi. “Alabelwila ifyalembelwe pali ena mu Malembo yonse, ukutendekela pali Mose na Bakasesema bonse.” Ca cine, ilyo Yesu alebomba umulimo wa kushimikila kwali ifingi ifyacindama kabili ifyalekosha icitetekelo ifyacitike! Ilyo abasambi balekutika ku fyo Yesu alebalondolwela, ubulanda bwalipwile, balisansamwike. Mu nshita ya cungulo bushiku, batile: “Bushe imitima yesu tayacilabilima ilyo acilalanda na ifwe mu nshila, ilyo acilatulondolwela Amalembo?” (Luka 24:27, 32) Cinshi twingasambilila ku fyacitike ku basambi ba kwa Yesu?

Bushe Tucita Shani nga ca Kuti Ifyo Twale-enekela Taficitike?

Abasambi babili abaleya ku Emao bali no bulanda pantu ifyo bale-enekela tafyacitike. Icacitike kuli bena capalana na filya Amapinda 13:12 yalanda ati: “Icile-enekelwa nga cakokola ukwisa cilalwalika umutima.” Na fwe babombela Yehova pa myaka iingi nalimo twalitontonkanyapo ukuti “ubucushi ubukalamba” bwali no kwisa kale sana. (Mat. 24:21; Ukus. 7:14) Tacitupapusha pali ino nshita abantu nga baba no bulanda ilyo ifyo bale-enekela fyakana ukucitika.

Lelo, mwilaba ukuti balya basambi babili baishileba ne nsansa ilyo Yesu abafwile ukubika amano ku kusesema ukwafikilishiwe ilyo bali pe sonde. Na ifwe nga twacita ifyo kuti twatwalilila ukuba ne nsansa sha cine no kushipikisha ilyo ifyo tulefwaya taficitike. Ba Michael, baeluda abakokole batile:  “Mwilabika amano ku fyo Yehova ashilacita. Lelo mulebika amano ku fyo acita kale.” Ifyo ba Michael balandile fya mano icine cine!

Ifyo Yehova Atucitila

Tontonkanyeni pa fintu ifyacindama sana ifyo Yehova acita kale. Yesu atile: “Uuntetekela, na o akacita imilimo iyo ine ncita; kabili akacita imilimo iyacila pali iyi.” (Yoh. 14:12) Muno nshiku ababomfi ba kwa Lesa balabomba imilimo iyacindama sana iyapeelwa ku Bena Kristu. Abantu ukucila pali 7,000,000 balasubila ukwisapusuka ubucushi bukalamba. Takwabala akuba inshita ilyo ababomfi ba kwa Yehova aba cishinka abafula fi bacincila nge fi ukubomba umulimo mu fyalo ifingi pano isonde! Yehova alilenga amashiwi ya kwa Yesu ukufikilishiwa ayatila, ababomfi bakwe bakabomba “imilimo iyacila pali iyi”.

Finshi fimbi ifyo Yehova atucitila? Alyafwa abantu abafumacumi ukufuma mu calo cabipa no kuba muli paradaise ya mampalanya iyo abikako. (2 Kor. 12:1-4) Tontonkanyeni pa fintu ifyo Lesa apekanishisha abantu bakwe ifyo na ifwe tuipakisha muli paradaise ya mampalanya. Ku ca kumwenako, moneni impapulo ubwingi isho mwakwata mu mwenu nelyo mu Ng’anda ya Bufumu. Twalikwata Icisontelelo ca Mpapulo sha Watch Tower na Watchtower Library iya pa kompyuta. Kwaliba ne filangililo fya mu Baibolo ifyo twingakutikako. Tontonkanyeni pa fyo mwaumfwile no kumona pa kulongana kwa citungu ukwafumineko. Tontonkanyeni na pa fyo tuipakisha ukuba na Bena Kristu banensu. Yehova ni kapekape nga nshi pantu alatupeela ifya kulya fya ku mupashi ifingi kabili alitupeela na babwananyina abatutemwa. Cine cine, twaba muli paradaise wa mampalanya!

Davidi, kemba wa malumbo atile: “Ifyo mwacita fingi, mwe Yehova Lesa wandi, imilimo yenu iyapesha amano na matontonkanyo yenu kuli ifwe.” (Amalu. 40:5) Kanshi nga tuletontonkanya pa fisuma ifyo Yehova atucitila kale, no kutontonkanya pa fyo atutemwa, tukakwata amaka ya kushipikisha no kutwalilila ukubombela Shifwe wa mu muulu Yehova, no mutima onse.—Mat. 24:13.

[Icikope pe bula 31]

Yesu alyafwile abasambi bakwe ukubika amano ku fyo Yehova abacitile

[Ifikope pe bula 32]

Tontonkanyeni pa fyo mwaumfwile no kumona pa kulongana kwa citungu ukwafumineko