Bushe Mulatasha Sana pa Mapaalo Mwakwata?

ILYO Lesa apuswishe abena Israele mu cipesha amano ukufuma mu busha mu Egupti, balitemenwe sana pantu nomba bali no buntungwa bwa kupepa Yehova. (Ukufu. 14:29–15:1, 20, 21) Lelo tapakokwele, batendeke ukuilishanya pa mikalile yabo. Mulandu nshi? Balekele ukubika amano ku fyo Yehova abacitiile, no kutendeka ukutontonkanya fye pa mafya bakwete mu matololo. Baebele Mose ukuti: “Cinshi ico mwatufumishe mu Egupti ukuti tukesefwila mu matololo? Pantu tatukwete ifya kulya na menshi, kabili tatulefwaya nangu panono ica kulya ici icinangwa [mana].”—Impe. 21:5.

Pa numa ya myaka iingi, Imfumu Davidi iya Israele yaimbile ukuti: “Lelo ine, mu cikuuku cenu e mo natetekela; lekeni umutima wandi usekelele mu kupususha kwenu. Ndeimbila Yehova, pantu nanambula.” (Amalu. 13:5, 6) Davidi tatalile alaba ku fisuma ifyo Yehova amucitiile, lyonse alefitontonkanyapo. (Amalu. 103:2) Na ifwe Yehova alitucitila ifintu ifisuma, kanshi tufwile ukulatasha, tatufwile ukulabako. Lekeni nomba tulande pa fyo Lesa atupaala muno nshiku.

“Bucibusa na Yehova”

Kemba wa malumbo aimbile ukuti: “Yehova ni cibusa wa bantu abamutiina.” (Amalu. 25:14) Ala mwandini lipaalo kuli ifwe fwe bantunse abashapwililika ukuba ifibusa fya kwa Yehova! Lelo kuti camoneka shani nga ca kuti twafusha sana ifya kucita ica kuti calenga tulekwata fye inshita iinono iya kupepa? Tontonkanyeni pa fingacitika kuli bucibusa bwesu na Yehova. Apo ni Cibusa wesu, Yehova enekela ifwe ukumutetekela no kulapepa kuli ena, ukulamweba fyonse ifili ku mutima, pamo nga ifiletuletela umwenso, ifyo tulefwaya  ukucita, e lyo ne filetusakamika. (Amapi. 3:5, 6; Fil. 4:6, 7) Kanshi kuti cawama ukutontonkanya pa fingalenga tulepepa amapepo ayasuma.

Ilyo Paul, Nte wacaice atontonkenye pa mapepo yakwe, ailwike ukuti alekabila ukuwamyako imipepele yakwe. * Alandile ukuti, “Nalitemenwe sana ukulabwekeshapo ifyebo fimo fine nga ndepepa kuli Yehova.” Ilyo Paul afwailishe ifyebo pe pepo muli Watch Tower Publications Index, asangile ukuti mu Baibolo mwalilembwa amapepo 180. Muli aya mapepo, ababomfi ba kwa Yehova aba ku kale balelanda ifya ku mutima. Paul atile: “Ukutontonkanya pa Malembo ya musango yu, kwalengele ukuti njishibe ukuti mfwile ukulanda mu kulungatika ilyo ndepepa. Ici calenga inde-eba Yehova fyonse ifili ku mutima. Ndomfwa bwino nomba pantu ipepo lilampalamika sana kuli Yehova.”

‘Ifya Kulya pa Nshita Yalinga’

Ipaalo na limbi ilyafuma kuli Yehova, cine ico tusambilila mu Malembo. Kanshi e calenga ukuti ilyo tuleipakisha ifi fya kulya fya ku mupashi ‘tuleaula utupundu pa mulandu wa kusekelela mu mitima.’ (Esa. 65:13, 14) Na lyo line, tulingile ukuba abacenjela pa kuti ifintu ifyabipa tafilengele twaleka ukutemwa icine. Ku ca kumwenako, ukukutika ku fya bufi ifyo abasangu bakubanya kuti kwalenga twaleka ukulatontonkanya bwino no kuleka ukumona ubucindami bwa ‘fya kulya fya pa nshita yalinga’ ifyo Yehova apekanya ukupitila mu “musha wa cishinka kabili uwashilimuka.”—Mat. 24:45-47.

Ba André ababombele Yehova pa myaka iingi, balipitile mu bwafya bwa kukonkelela abasangu. Balemona kwati tamwali no kufuma ububi mu kubelengako fye panono pa fyebo fya basangu ifyaba pa Intaneti. Balandile ukuti: “Pa kubalilapo, nalefwaya ukubelengako fye ifyebo ifyo abasangu baletila fya cine. Lelo nga natontonkanyapo sana pa fyebo fya basangu, e lyo nalemona sana ukuti cali fye bwino ukufuma mu kuteyanya kwa kwa Yehova. Pa numa, ilyo nafwailishe mu fyo abasangu basuusha pa Nte sha kwa Yehova, e lyo naishilemona ubucenjeshi bwa aba bakasambilisha ba bufi. Ifyo balemona ukuti e ‘fishinka’ bengasuushishapo ifyo twasuminamo, fyali fye fyebo ifyo banyongenye. Ici calengele ukuti ntampe na kabili ukubelenga impapulo shesu no kusangwa mu kulongana. Tapakokwele, nalimwene ukuti fingi sana ifyo napushilweko.” Caliwama pantu ba André balibwelela mu cilonganino.

“Aba Bwananyina Bonse”

Ukwikatana no kutemwana ifyo tuipakisha nga babwananyina lipaalo ukufuma kuli Yehova. (Amalu. 133:1) E mulandu wine umutumwa Petro alembele ukuti: “Muletemwa aba bwananyina bonse.” (1 Pet. 2:17) Apo twaba muli ulu lupwa lwa babwananyina, tulatungililwa sana na bashifwe, banyinefwe, bamunyina, na  bankashi shesu aba mu cilonganino.—Marko 10:29, 30.

Lelo, limo kulaba ificitika ifilenga twafilwa ukumfwana na bamunyinefwe. Ku ca kumwenako, calyanguka ukufulwa no kupata munyinefwe ilyo acita icilubo. Ica musango yu nga cacitika, tufwile ukulaibukisha ukuti Yehova alitemwa ababomfi bakwe te mulandu ne filubo bapanga. Na kuba, “nga twasosa atuti: ‘Tatuli na lubembu,’ ninshi tuleibepa fye, kabili ninshi muli ifwe tamwaba ne cine.” (1 Yoh. 1:8) Kanshi tufwile ukwesha na maka ‘ukulashipikishanya no kubelelana uluse.’—Kol. 3:13.

Kwali ifyabipa ifyacitikile Ann uwacaice ifyalengele eshibe ukuti calicindama ukuba mu cilonganino ca Bwina Kristu. Acitile kwati mwana walubile uwa mu cilangililo ca kwa Yesu. Ann alifumine mu cilonganino ca Bwina Kristu. Pa numa, alilwike no kubwelela mu cilonganino. (Luka 15:11-24) Cinshi Ann asambilile ku camucitikile? Atile: “Apo nomba nalibwelela ku kuteyanya kwa kwa Yehova, nalicindika bamunyina na bankashi bonse te mulandu ne filubo bacita. Kale nalefulwa bwangu nga bacita fimo. Nomba pali ino nshita nshifwaya nangu panono ukuleka icili conse calenga napanya amapaalo ya kuba na Bena Kristu banandi. Nga twafuma muli paradaise wa mampalanya takwaba icili conse ico tukaipakisha muli ici calo.”

Lyonse Muletasha pa Mapaalo Mwakwata

Isubilo twakwata ilya kuti Ubufumu bwa kwa Lesa bukapwisha amafya ya bantunse lyalicindama sana. Ilyo twaumfwile ili subilo pa muku wa kubalilapo, ala twalitemenwe icine cine! Twaumfwile kwati ni ulya uwa makwebo uwashimikwa mu mulumbe wa kwa Yesu ‘uwaileshitisha bwangu fyonse ifyo akwete’ pa kuti ashitemo “margariti umo uwaumo mutengo.” (Mat. 13:45, 46) Yesu talandile ukuti uwa makwebo tatemenwe margariti. Na ifwe bene, tufwile ukutwalilila ukutasha pe subilo lyesu ilyacindama nga nshi.—1 Tes. 5:8; Heb. 6:19.

Moneni ificita ba Jean, ababombela Yehova pa myaka ukucila 60. Batila: “Icangafwa ukutwalilila ukulatontonkanya lyonse pa Bufumu bwa kwa Lesa kulashimikilako bambi pali ubu bwine bufumu. Nga namona ifyo basansamuka ilyo baishiba ifyo Ubufumu bwaba, na ine ndatemwa icine cine. Ilyo namona ifyo icine ca Bufumu cayalula uulesambilila Baibolo, cilenga ndetontonkanya ukuti, ‘Kanshi icine nsambilishako bambi calicindama nga nshi!’”

E ico tulingile ukulatasha pa mapaalo ayengi ayo twakwata. Twalishiba ukuti amesho tukwata pamo nga ukucushiwa pa mulandu wa fyo twasuminamo, ukulwala, ubukote, amasakamika, ubulanda, e lyo no bupina, tayakatwalilile. Mu kuteka kwa Bufumu bwa kwa Lesa, tukakwata amapaalo na yambi ukusansha pa yo tuipakisha pali ino nshita. Ukucula konse uko tulepitamo kukapwa mu calo cipya.—Ukus. 21:4.

Pali ino nshita, natuletasha pa fyo Lesa atupaala nga kemba wa malumbo uwaimbile ukuti: “Ifyo mwacita fingi, mwe Yehova Lesa wandi, imilimo yenu iyapesha amano na matontonkanyo yenu kuli ifwe na fyo fingi; Takuli uwingalingana na imwe. Nga nali no kulanda no kusosa pali ifi fintu, fyalifulisha ica kutila te kuti mfipende.”—Amalu. 40:5.

[Futunoti]

[Icikope pe bula 18]

Yehova alitupeela ifya kutwafwa ilyo tuli na mafya