Ali Ni “Kangalila Musuma Kabili Cibusa Watemwikwa”
Ali Ni “Kangalila Musuma Kabili Cibusa Watemwikwa”
BA JOHN (JACK) BARR, ababombele mwi Bumba Litungulula ilya Nte sha kwa Yehova, abakwete isubilo lya kuya ku muulu bafwile pa Cibelushi ulucelo, pa 4 December, 2010. Bali ne myaka 97. Munyinefwe Barr bamulondolola ukuti ali ni “kangalila musuma kabili cibusa watemwikwa.”
Munyinefwe Barr afyalilwe ku Aberdeen, ku Scotland, kabili ali kasuli pa bana batatu abo abafyashi bakwe bakwete. Abafyashi bakwe bonse babili bali abasubwa. Munyinefwe Barr aletemwa ukulanda sana pa fyo ubumi bwakwe bwali ilyo ali umwaice, kabili alitemenwe ifyo abafyashi bakwe balemulanga ica kumwenako cisuma.
Ilyo ali umulumendo, calemukosela sana ukulanda na bantu abo taishibe. Lelo, alibombeshe pa kuti apwishe ubo bwafya, kabili bushiku bumo pa Mulungu akasuba, mu 1927, ilyo ali ne myaka 14, aebele bawishi ukuti alefwaya ukuya nabo mu kushimikila ku ng’anda ne ng’anda. Ifi e fyo atendeke ukubombela Yehova. Ukufuma ubu bushiku ukufika na lintu afwile, Munyinefwe Barr atwalilile ukuba kashimikila wa mbila nsuma uwapimpa.
Ubusanso bwacitikile banyina ubo bapuswikeko kwempe bwalengele Munyinefwe Barr ukutontonkanya sana pa co Lesa abumbile abantunse kabili mu 1929 ali-ipeele kuli Yehova kabili aishilebatishiwa mu 1934. E lyo mu 1939, atendeke ukubombela pa Bethel ya ku London, ku England kabili abombele mu mulimo wa nshita yonse pa myaka 71.
Pa 29 October mu 1960, Munyinefwe Barr aupile ba Mildred Willet, ababombele bupainiya na bumishonari pa myaka iingi. Munyinefwe Barr umwine aleti ubu bwali ni bucibusa ubwawamisha. Munyinefwe Barr no mwina mwakwe bali fya kumwenako sana, kabili balitemenwe ukupepa ukufikila lintu ba Mildred, nabo abakwete isubilo lya kuya ku muulu, bafwile mu October, 2004. Ukufuma apo baupanine, Munyinefwe Barr no mwina mwakwe balebelenga Baibolo lyonse capamo.
Abaishibe Munyinefwe Barr, bakulaibukisha ukuti ali impanda mano ya cine cine, talepampamina fye pa cintu cimo, ali uwa cikuuku kabili alishibe sana Amalembo. Alebombesha kabili ali kangalila uulangulukilako, uwatemenwe bambi kabili cibusa wa cine cine. Ifyo alelanda, amalyashi yakwe, na mapepo alepepa, fyonse fyalelangilila ukuti alitemenwe sana icine no kuti ali cibusa wa kwa Yehova.
Nangu ca kuti tukalafuluka Munyinefwe Barr, tulesekelela nankwe apo napokelela icilambu ca kuba uushifwa, isubilo ilyo akwete kabili ilyo alelandapo libili libili. Ubu e bumi ubo lyonse alefwaisha.—1 Kor. 15:53, 54. *
[Futunoti]
^ para. 8 Ilyashi lya kwa Munyinefwe John E. Barr, lyaba mu Ulupungu lwa kwa Kalinda ulwa July 1, 1987, amabula 26 ukufika ku 31.