Bushe Mwalitemwa Sana Icebo ca kwa Lesa?

LORRAINE atile: “Ilyo natendeke fye ukubelenga Baibolo, nshaleipakisha lelo naleipatikisha fye. Nalefilwa ukumfwa ifyo nalebelenga, kanshi ilingi nga ndebelenga, nshalebikako amano.”

Bambi nabo balasumina ukuti, ilyo batendeke fye ukubelenga Baibolo tabaleipakisha. Na lyo line balitwalilile ukubelenga pantu balishibe ukuti ukubelenga Amalembo ya Mushilo cintu icikankaala sana. Marc atile: “Kwaliba ifingi ifingalenga twafilwa ukulabelenga Baibolo no kulaisambilisha fwe bene. Nalipepelepo sana no kwesha na maka pa kuti ndebelenga Baibolo cila bushiku.”

Cinshi mwingacita pa kuti mutemwe sana Baibolo, Icebo ca kwa Lesa? Cinshi cingalenga muleumfwa bwino ukuibelenga? Moneni ifingamwafwa.

Ubuyo bwa Kubelengela Baibolo ne fyo Mwingacita

Mulepepa kabili tamufwile ukupumbulwa kuli fimbi. Ipusheni Yehova ukumwafwa ukutemwa ukusambilila Icebo cakwe. Mulombeni ukumwafwa ukwiluka amano yakwe. (Amalu. 119:34) Nga tamulecita ifi, kuti mulebelengela fye ico cine, kabili kuti mwasuka mwakwata no bunang’ani bwa kubelenga. Lynn atile: “Limo ndabelenga lubilo lubilo ica kuti nafilwa no kumfwikisha ifishinka fimo mu fyo ndebelenga. Ilingi line ndafilwa ukumfwa ifishinka ifikalamba ifili mu fikomo nabelenga. Lelo, ndapepa ukuti Lesa alengafwa ukuilama, kabili ici cilangafwa ukukanapumbulwa.”

Mulemona ifyo mulesambilila ukuti naficindama. Ibukisheni ukuti ukumfwikisha no kubomfya ifyo musambilila mu Baibolo kukalenga mukakwate ubumi. E ico mule-esha na maka ukusanga ifishinka ifingamwafwa kabili mulefibomfya. Chris atile: “Ndafwayamo ifishinka ifingangafwa ukwishiba imibele nakwata imo iishawama ne cilenga ndecita fimo ifishawama. Cilomfwika bwino ukwishiba ukuti muli Baibolo na mu mpapulo shesu ishingi mwaliba ifyebo ifingangafwa, nangu ca kuti bakalemba tabanjishiba na kunjishiba.”

Mulekwata ubuyo ubo mwingafikilisha. Esheni ukusambilila ifipya pa bantu balandwapo mu Baibolo. Kuti mwasanga ifishinka ifisuma sana pa bantu abengi nga ca kuti mwabelenga icitabo ca Insight on the Scriptures no kubomfya Icisontelelo ca Mpapulo sha Watch Tower. Nga mwaishiba abantu abo Baibolo yalandapo no kwishiba ififyalilwa fyabo ne fyo baleumfwa pa fintu fimo, mukomfwikisha ifyo mulebelenga.

Tontonkanyeni pa nshila shimbi isho mwingalondolwelamo Amalembo. (Imil. 17:2, 3) Ifi e fyo Sophia acita ilyo alebelenga Baibolo. Atile: “Mfwaisha ukusambilila no kusanga inshila ishipya isha kulondolwelamo Amalembo nga ndeshimikila e lyo na pa nshita shimbi fye, pa kuti ndelondolola bwino sana icine ca mu Baibolo. Ulupungu lwa kwa Kalinda lulangafwa sana ukucita ico.”—2 Tim. 2:15.

Mule-elenganya ifyo mulebelenga mu Baibolo. Ilembo lya AbaHebere 4:12 litila: “Icebo ca kwa Lesa ca mweo.” Nga mule-elenganya ifyo abalembwa mu Baibolo balemona ilyo mulebelenga Amalembo, amashiwi ya kwa Lesa yakaba aya mweo mu matontonkanyo yenu. Esheni ukumfwa ifyo baleumfwa no kwelenganya ifyo  baleumfwa ilyo fimo fyacitika. Linganyeni ifyalebacitikila ku fimucitikila. Sambilileniko ku fyo balecita ilyo ifyo fintu fyabacitikila. Ici cikalenga muleumfwikisha no kukanalaba ifyo mulebelenga mu Baibolo.

Mulepoosa inshita iikalamba pa malembo ayakosa ukumfwa na ku fyo yalondololwa pa kuti muyomfwikishe. Ilyo mulesambilila, muleipeela inshita iikalamba. Limo kuti mwasanga amepusho ya kuti pa kuyomfwikisha kano mwasokotelapo ifyebo na fimbi. Fwayeni ubulondoloshi bwa mashiwi mushishibe, moneni amafutunoti, no kumona amalembo yambi mu Baibolo ayalanda pa fyo mwabelenga. Nga mwaumfwikisha ifyo mulebelenga no kufikonka, e lyo mukatemwa sana Icebo ca kwa Lesa. Ico cikalenga mukalande nga kemba wa malumbo uwatile: “Nimpokelela ifya kutwibukishako [ifya kwa Yehova] ukuti fibe fyandi umuyayaya, pantu e filenga umutima wandi ukusansamuka.”—Amalu. 119:111.

Te kwesha ukubelenga lubilo lubilo. Muleipeela inshita iyalinga ilyo muleisambilisha pa kuti mulekwata ne nshita ya kupekanya ukulongana. Raquel atile: “Ilingi line ndasakamikwa ica kuti nafilwa no kubika amano ku fyo ndebelenga. Kanshi icingafwa sana, kukwata ifiputulwa fya nshita ifinono ifya kubelenga Baibolo. Ici cilalenga ndemwenamo sana mu kusambilila.” Chris na o atile: “Nga nabelenga fye lubilo lubilo, kampingu ilancusha pantu te fingi njibukisha. Kabili ifyo nabelenga tafimfika pa mutima.” Kanshi mwilabelenga lubilo lubilo.

Mulefwaisha ukubelenga icebo ca kwa Lesa. Umutumwa Petro atile: “Mube kwati tunya utwafyalwa nomba, ukulafuluka umukaka uwasanguluka uwaba mu mashiwi ya kwa Lesa, e kuti nga mwalanwa uyu mukaka mukule pa kuti mukapusuke.” (1 Pet. 2:2) Abana tabakabila ukubafwa ukutemwa umukaka. Bautemwa fye abene. Lelo Amalembo yatweba ukuti tulingile ukufuluka icebo ca kwa Lesa. Nga mulebelenga fye ibula limo mu Baibolo cila bushiku, tapakakokole mukalafuluka ukubelenga icebo ca kwa Lesa. Mu nshita fye iinono mukalaumfwa bwino ukulabelenga icebo ca kwa Lesa nangu ca kuti pa kubala calemukosela.

Muletontonkanyapo sana pa Malembo mulebelenga. Ukutontonkanyapo sana pa fyo mulebelenga, kukamwafwa nga nshi ukula-ampanya amalyashi ya mu Baibolo ayo mwasokota. Mukeshiba ifyashika ifya kwa Lesa ifikamulenga ukuba na mano ayaba nge cuma icacindamisha.—Amalu. 19:14; Amapi. 3:3.

 Ukubelenga Cintu Icisuma Sana

Pa kuti tutwalilile ukulabelenga ukulingana ne fyo twatantika, kano twabikako amano. Na lyo line, amapaalo yafumamo yengi icine cine. Mukeshiba sana Amalembo. (Heb. 5:12-14) Ukushilimuka na mano ayo mukakwata ukufuma mu kubelenga Amalembo fikalenga mukalesekelela no kuba no mutende. Amano yaba mu Cebo ca kwa Lesa “muti wa mweo” kuli bonse abayakwata no kuyabomfya.—Amapi. 3:13-18.

Ukubelenga sana Icebo ca kwa Lesa kuti kwalenga mwakwata umutima wa mucetekanya. (Amapi. 15:14) Ne ci cikalenga mulefunda abantu no mweo onse ifyebo ifyashimpwa pali Baibolo. Nga tulekonka ifyo tubelenga mu Malembo na mu mpapulo sha “musha wa cishinka kabili uwashilimuka,” tukasanga ukuti Icebo ca kwa Yehova cikatupeela amaka kabili tukaba abakosa mu kupepa. (Mat. 24:45) Mukakwata isubilo kabili mukaba ne nsansa e lyo Icebo ca kwa Lesa cikalamutungulula muli fyonse. E lyo kabili fyonse ifyakuma bucibusa bwenu na Lesa fikalaenda bwino.—Amalu. 1:2, 3.

Ukutemwa sana Yehova kukalenga mule-ebako bambi ifyo mwasuminamo. Ukucita ifi nako kuti kwamunonsha sana. Sophia afwaisha sana ukulaibukisha amalembo ayalekanalekana no kuyabomfya pa kuti abo aleshimikila balefwaisha ukukutika na pa kuti aleipakisha umulimo wa kushimikila. Alandile ukuti: “Ndomfwa bwino sana ukumona ifyo abantu batemwa ilyo nabomfya amashiwi ayaba mu Baibolo.”

Lelo icacindamisha icingafumamo nga twatemwa sana Icebo ca kwa Lesa, kuba cibusa wa kwa Yehova. Ukubelenga Baibolo kulalenga mwaishiba ifipimo fyakwe no kwishiba bwino ifyo atutemwa, ifyo aba na bukapekape, e lyo no mulinganya. Takwaba na cimbi ico twingacita icacindama nelyo icingalenga twaishiba ifingi pali Lesa ukucila pa kubelenga Baibolo. Ilyo mulebelenga Icebo ca kwa Lesa mulesendwa ne fyo mulebelenga. Ukucita ifyo cintu icisuma sana.—Amalu. 19:7-11.

[Akabokoshi ne Fikope pe bula 5]

UBUYO BWA KUBELENGELA ICEBO CA KWA LESA NE FYO MWINGACITA

▪ Pa kubelenga Baibolo mulepepa kabili mwilapumbulwa.

▪ Mulemona ifyo mulesambilila ukuti naficindama.

▪ Mulekwata ubuyo ubo mwingafikilisha.

▪ Tontonkanyeni pa nshila shimbi isho mwingalondolwelamo Amalembo.

▪ Mule-elenganya ifyo mulebelenga mu Baibolo.

▪ Mulepoosa inshita iikalamba pa malembo ayakosa ukumfwa na ku fyo yalondololwa pa kuti muyomfwikishe.

▪ Te kwesha ukubelenga lubilo lubilo.

▪ Mulefwaisha ukubelenga icebo ca kwa Lesa.

▪ Muletontonkanyapo sana pa Malembo mulebelenga.

[Icikope pe bula 4]

Elenganyeni ukuti ifyo mulebelenga mu Baibolo ni mwe filecitikila